នាវាទេសចរណ៍ Westerdam ដែលមកកាន់កម្ពុជា ជាថ្មីម្តងទៀតនៅថ្ងៃទី២៥ ខែមករានេះ ដោយនាំអ្នកទេសចរមក ចំនួន១ ៨៧៣ នាក់ មាន ៤៣ សញ្ជាតិ។ STPM
ភ្នំពេញៈ លោកនាយករដ្ឋមន្រ្តី ហ៊ុន ម៉ាណែត ស្វាគមន៍ នាវាទេសចរណ៍ Westerdam ដែលមកកាន់កម្ពុជា ជាថ្មីម្តងទៀតនៅថ្ងៃទី២៥ ខែមករានេះ ដោយនាំអ្នកទេសចរមក ចំនួន១ ៨៧៣ នាក់ មាន ៤៣ សញ្ជាតិ។
លោកនាយករដ្ឋមន្រ្តីបានសរសេរថា៖«អរគុណដល់នាវាទេសចរណ៍ Westerdam ដែលតែងចងចាំ និងនឹករឭកកម្ពុជា ព្រមទាំងពាំនាំអ្នកទេសចរ មកកម្សាន្ត និងស្វែងយល់អំពីគោលដៅទេសចរណ៍នៅកម្ពុជា ដែលកំពុងសុខសាន្តក្នុងសុខសន្តិភាព។ កម្ពុជាតូច តែបេះដូងធំ»។
នាវាទេសចរណ៍Westerdamបាននាំភ្ញៀវទេសចរបរទេសចម្រុះជាតិសាសន៍ ចូលចតនៅកំពង់ផែស្វយ័តក្រុងព្រះសីហនុកាលពីខែធ្នូ ឆ្នាំ២០២៣កន្លងមក ដែលកាលនោះមានភ្ញៀវទេសចរចម្រុះជាតិសាសន៍ជិត ២ ០០០ នាក់។
យោងតាមក្រសួងព័ត៌មានបានឱ្យដឹងថា នាវាទេសចរណ៍ Westerdamនេះបាននាំភ្ញៀវទេសចរបរទេសចម្រុះជាតិសាសន៍ធ្វើដំណើរចាកចេញពីប្រទេសថៃ ចូលសំចតនៅកំពង់ផែស្វយ័តក្រុងព្រះសីហនុ កាលពីវេលាម៉ោង ៧ព្រឹក ថ្ងៃទី២៥ ខែមករា ឆ្នាំ២០២៤។ នាវានេះមានគម្រោងចាកចេញពីកំពង់ផែស្វយ័តក្រុងព្រះសីហនុ នៅវេលាម៉ោង ២១ យប់ថ្ងៃទី២៥ ខែមករា ឆ្នាំ២០២៤នេះ ឆ្ពោះទៅកាន់ប្រទេសវៀតណាម។
ភ្ញៀវទេសចរបរទេសដែលធ្វើដំណើរតាមនាវា Westerdam មានចំនួន ១ ៨៧៣នាក់ ស្រីចំនួន ៩៨៦ នាក់ មាន ៤៣ សញ្ជាតិ និងមាននាវិកសរុបចំនួន ៧៧៦ នាក់ ស្រី ១២៨ នាក់ មាន ៣៧ សញ្ជាតិ។
ភ្ញៀវទេសចរដែលធ្វើដំណើរតាមនាវាទេសចរណ៍ Westerdam ភាគច្រើនជាមនុស្សដែលមានវ័យចំណាស់។ ក្នុងចំណោមភ្ញៀវទេសចរ ដែលមានសញ្ជាតិច្រើនជាងគេ មានដូចជា អាមេរិកចំនួន ៨៧០ នាក់, កាណាដាចំនួន ២៨៨ នាក់, អង់គ្លេស ១៩១ នាក់ ក្រៅពីនោះមានភ្ញៀវទេសចរចម្រុះជាតិសាសន៍ផ្សេងទៀត។ ក្នុងចំណោមភ្ញៀវទេសចរបរទេស ដែលធ្វើដំណើរតាមនាវា Westerdam មានភ្ញៀវទេសចរចូលក្នុងប្រទេសកម្ពុជា ចេញទៅខេត្តសៀមរាប មានចំនួន ៥៩ នាក់ ស្រី ២៨ នាក់ ស្មើនឹង ៤សញ្ជាតិ៕
