ទេសរដ្ឋមន្រ្តីលោក លី ធុជ អនុប្រធានទី១ អាជ្ញាធរមីន បានដឹកនាំកិច្ចប្រជុំនេះធ្វើឡើងនៅទីក្រុងហ្សឺណែវ ប្រទេសស៊្វីស នៅថ្ងៃទី២៥ ខែមករា ឆ្នាំ២០២៤។ អាជ្ញាធរមីន
ទេសរដ្ឋមន្រ្តីលោក លី ធុជ អនុប្រធានទី១ អាជ្ញាធរមីន បានដឹកនាំកិច្ចប្រជុំគណៈកម្មការសម្របសម្រួលនៃអនុសញ្ញាអូតាវ៉ា ដើម្បីពិនិត្យមើលផែនការសកម្មភាពគាំទ្រអនុសញ្ញា ដើម្បីត្រៀមខ្លួនឆ្ពោះទៅកាន់កិច្ចប្រជុំត្រួតពិនិត្យឡើងវិញលើកទី៥ និងសម្រេចឱ្យបាននូវគោលដៅអាទិភាពរបស់កម្ពុជាក្នុងនាមជាប្រធាន និងម្ចាស់ផ្ទះនៃកិច្ចប្រជុំក្នុងខែវិច្ឆិកា ឆ្នាំ២០២៤។
កិច្ចប្រជុំនេះធ្វើឡើងនៅទីក្រុងហ្សឺណែវ ប្រទេសស៊្វីស នៅថ្ងៃទី២៥ ខែមករា ឆ្នាំ២០២៤ ដោយអង្គប្រជុំ ក៏បានលើកឡើងអំពីការអនុវត្តមាត្រា៤ ស្តីពីការបំផ្លាញគ្រាប់មីនដែលរក្សាទុក និងបានអបអរសាទរដល់ប្រទេសក្រិកដែលមានដំណើរការវិជ្ជមានក្នុងការសម្រេចគោលដៅនេះ។
ជាមួយគ្នានេះ អង្គប្រជុំបានផ្តោតជាពិសេសទៅលើប្រទេសអ៊ុយក្រែន ដែលរងការចោទប្រកាន់ថាបានរក្សាទុកគ្រាប់មីនប្រឆាំងមនុស្ស និងបានស្នើឱ្យបន្តតាមដានដោយយកចិត្តទុកដាក់បន្ថែមទៅលើបញ្ហារបស់អ៊ុយក្រែន។ នេះបើតាមអាជ្ញាធរមីន បានបង្ហោះនៅលើហ្វេសប៊ុក។
ពាក់ព័ន្ធនឹងសកលភាវូបនីយកម្មនៃអនុសញ្ញា អង្គប្រជុំបានស្នើឱ្យមានការជំរុញដល់រដ្ឋមិនមែនភាគីអនុសញ្ញាចូលរួមក្នុងអនុសញ្ញា ឬអនុវត្តតាមបទដ្ឋានរបស់អនុសញ្ញាទោះបីខ្លួនមិនមែនជារដ្ឋភាគីក៏ដោយ។ បន្ថែមលើនេះ អង្គប្រជុំបានកំណត់ពីសកម្មភាពសំខាន់ៗ ដែលនឹងត្រូវប្រព្រឹត្តទៅក្នុងឆមាសទី១ ឆ្នាំ២០២៤ និងបានពិនិត្យទៅលើស្ថានភាពថវិកាសម្រាប់ការរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា ឆ្នាំ២០២៤ ខាងមុខ។
លោក លី ធុជ បានបញ្ជាក់ថា ៖«ខណៈកម្ពុជាជាប្រធានអនុសញ្ញាអូតាវ៉ាឆ្នាំ២០២៤ កម្ពុជាបានដាក់ចេញនូវវិធានមួយចំនួន ក្នុងការជំរុញឱ្យមានសកលភាវូបនីយកម្មនៃអនុសញ្ញាអូតាវ៉ា តាមរយៈការទូត កិច្ចប្រជុំ និងវេទិកានានាក្នុងតំបន់អាស៊ី និងប៉ាស៊ីហ្វិក»។
កិច្ចប្រជុំនេះ មានការចូលរួមពីតំណាងប្រទេសកម្ពុជា បែលហ្ស៊ីក ចក្រភពអង់គ្លេស កាណាដា ស៊្វីស ជប៉ុន ស៊ុយអែត ន័រវេស ថៃ ហូឡង់ អាល្លឺម៉ង់ និងតំណាង ISU, ICBL, ICRC ។ ក្នុងកិច្ចពិភាក្សានោះ អង្គប្រជុំ បានដាក់ចេញ និងកំណត់គោលដៅប្រទេសមួយចំនួនដែលត្រូវធ្វើសកម្មភាពសកលភាវូបនីយកម្មរួមមាន បារ៉ែន ឡាវ កោះម៉ាស្យល មីក្រូណេស៊ី នេប៉ាល់ តុងហ្គា វៀតណាម អាមេនី អាស៊ែបៃហ្សង់ ហ្សកហ្ស៊ី លីបង់ ម៉ុងហ្គោលី និងសិង្ហបុរី។
លោក លី ធុជ បានលើកឡើងថា ក្នុងខណៈប្រទេសកម្ពុជា ជាប្រធាននៃអនុសញ្ញាឆ្នាំ២០២៤ កម្ពុជា បានដាក់ចេញនូវវិធានការមួយចំនួន ក្នុងការជំរុញឱ្យមានសកលភាវូបនីយកម្មនៃអនុសញ្ញា រួមមានការបញ្ចុះបញ្ចូលប្រទេសមិនទាន់ក្លាយជារដ្ឋភាគីតាមរយៈការទូតកម្ពុជា ការប្រើប្រាស់វេទិកា UN-ESCAP ក្នុងតំបន់អាស៊ី និងប៉ាស៊ីហ្វិក និងការស្វែងរកកិច្ចសហប្រតិបត្តិការនិងការគាំទ្រពីប្រទេសជាមិត្តទាក់ទងនឹងប្រទេសដែនកោះនានាក្នុងតំបន់ប៉ាស៊ីហ្វិក ជាដើម។
កម្ពុជា បានកំណត់គោលដៅប្រទេសមួយចំនួនរួចហើយ សម្រាប់ធ្វើការសម្របសម្រួលដែលប្រទេសទាំងនោះអាចនឹងផ្តល់សច្ចាប័ន/យល់ព្រមលើការចូលរួមអនុសញ្ញា ក្នុងខណៈពេលដែលកម្ពុជាធ្វើជាប្រធាន និងម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ នៅខេត្តសៀមរាប ក្នុងខែវិច្ឆិកា ឆ្នាំ២០២៤ ខាងមុខនេះ៕
