លោក លី ធុជ និងលោកស្រីអគ្គរដ្ឋទូតម៉ុងហ្គោលី។ រូបថត CMAA
ភ្នំពេញៈ មន្ត្រីជាន់ខ្ពស់នៃអាជ្ញាធរមីននៃកម្ពុជា បានដឹកនាំគណៈប្រតិភូចូលរួមប្រជុំដើម្បីត្រៀមរៀបចំកិច្ចប្រជុំកំពូលសៀមរាបអង្គរស្តីពីពិភពលោកមួយដែលគ្មានមីននៃអនុសញ្ញាអូតាវ៉ា និងការរៀបចំសេចក្តីថ្លែងការណ៍ និងផែនការសកម្មភាពសៀមរាបអង្គរផងដែរ។
ជាមួយគ្នានោះ គណៈប្រតិភូនៃអាជ្ញាធរមីនដែលដឹកនាំដោយលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន ក៏បានជួបជាមួយនឹងមន្ត្រីជាន់ខ្ពស់នៃបណ្តាប្រទេសពាក់ព័ន្ធមួយចំនួនផងដែរកៀរគរការគាំទ្រ និងចូលរួមជាមួយកម្ពុជាដើម្បីឱ្យកម្ពុជាទទួលបានជោគជ័យក្នុងភាពជាប្រធាន និងម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា។
លោក លី ធុជ ក្នុងនាមកម្ពុជាជាប្រធាននៃកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា បានដឹកនាំកិច្ចប្រជុំគណៈកម្មការនានានៃអនុសញ្ញាអូតាវ៉ា នៅទីក្រុងហ្សឺណែវ ប្រទេសស្វ៊ីស ចាប់ពីថ្ងៃទី ២២-២៧ ខែមករា ឆ្នាំ ២០២៤។
លោក លី ធុជ បានដឹកនាំកិច្ចប្រជុំជាមួយភាគីពាក់ព័ន្ធតំណាងប្រទេសដែលជាសមាជិកគណៈកម្មការទាំង ៥ នៃអនុសញ្ញាអូតាវ៉ា ដៃគូសំខាន់ៗ តំណាងអង្គការអន្តរជាតិ និងស្ថាប័នពាក់ព័ន្ធជាច្រើនផងដែរ ក្នុងនោះមាន៖ តួកគី អង់គ្លេស អ៊ីតាលី ហូឡង់ ម៉ិកស៊ិក អូទ្រីស នូវែលសេឡង់ បារាំង កាណាដា ស្វ៊ីស ជប៉ុន អាល្លឺម៉ង់ ថៃ ស៊ុយអែត អូស្ត្រាលី សហភាពអឺរ៉ុប រួមនឹងបណ្តាអង្គការមួយចំនួន ដែលគាំទ្រការអនុវត្តអនុសញ្ញាអូតាវ៉ា (ISU)។
ក្នុងដំណើរបំពេញការងារនោះដែរ លោក លី ធុជ ក៏បានជួបប្រជុំទ្វេភាគីជាមួយ លោក JullienThoni ឯកអគ្គរដ្ឋទូត និងតំណាងអចិន្រៃ្តយ៍ប្រទេសស្វ៊ីសប្រចាំនៅអង្គការសហ ប្រជាជាតិ នៅទីក្រុងហ្សឺណែវផងដែរ។
យោងតាមអាជ្ញាធរមីន លោក JullienThoni បានអបអរសាទរ និងកោតសរសើរចំពោះភាពជាប្រធាន ការប្តេជ្ញាចិត្ត និងការខិតខំប្រឹងប្រែងរបស់កម្ពុជាក្នុងនាមជាប្រធានអនុសញ្ញាអូតាវ៉ាឆ្នាំ ២០២៤ ព្រមទាំងបានសន្យាផ្តល់កិច្ចសហការ គាំទ្រ និងចូលរួមជាមួយកម្ពុជាឱ្យទទួលបានជោគជ័យទៅតាមគោលដៅដែលរំពឹងទុក។
ប្រភពដដែលបានបន្តថា ប្រទេសស្វ៊ីសក៏បានសន្យាបង្កើនកញ្ចប់ថវិកាបន្ថែមសម្រាប់សកម្មភាព និងបេសកកម្មរបស់កម្ពុជា ក្នុងការធ្វើជាម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញានៅកម្ពុជា និងគាំទ្រដល់កិច្ចប្រជុំនានានៅទីក្រុងហ្សឺណែវ ក្នុងខែមិថុនា ឆ្នាំ ២០២៤។
ចំណែក្នុងជំនួបជាមួយនឹងលោក Marc Pecsteen de Buytswerve ឯកអគ្គរដ្ឋទូត និងតំណាងអចិន្រៃ្តយ៍ប្រទេសបែលហ្ស៊ិកប្រចាំនៅអង្គការសហប្រជាជាតិលោក លី ធុជ ក៏បានយាងអញ្ជើញអ្នកអង្គម្ចាស់នៃប្រទេសបែលហ្ស៊ិក ដែលជាប្រេសិតពិសេស នៃអនុសញ្ញាអូតាវ៉ា ចូលរួមក្នុងកិច្ចប្រជុំកំពូលសៀមរាបអង្គរ ស្តីពីពិភពលោកមួយដែលគ្មានមីន ក្នុងខែវិច្ឆិកា ឆ្នាំ ២០២៤ ខាងមុខផងដែរ។
នាឱកាសនោះដែរ លោក Marc Pecsteen បានសន្យាផ្តល់កិច្ចសហការ និងគាំទ្រ កម្ពុជាឱ្យទទួលបានជោគជ័យទៅតាមគោលដៅដែលរំពឹងទុក ហើយលោកក៏បានសន្យានឹងជួយសិក្សាប្រមូលព័ត៌មានពីជំហរ លក្ខខណ្ឌនានា និងស្ថាប័នសម្រេចចិត្តនៃប្រទេសមិនទាន់ក្លាយជារដ្ឋភាគីនៃអនុសញ្ញា អូតាវ៉ា ឱ្យបានចូលរួមជារដ្ឋភាគីនៃអនុសញ្ញា ក្នុងខណៈពេលកម្ពុជាជាប្រធាន និងម្ចាស់ផ្ទះនៃកិច្ចប្រជុំ។
ក្នុងឱកាសបានជួបពិភាក្សាការងារជាមួយនឹងលោក Latsamy Keomany ឯកអគ្គរដ្ឋទូត និងតំណាងអចិន្រៃ្តយ៍ប្រទេសឡាវប្រចាំនៅអង្គការសហប្រជាជាតិដែរនោះ លោក លី ធុជ ក៏បានស្នើដល់ភាគីឡាវពិចារណាចូលរួមគាំទ្រ និងចូលរួមជារដ្ឋភាគីអនុសញ្ញាអូតាវ៉ា។
លោក លី ធុជ បានថ្លែងថា៖ «កម្ពុជាក្នុងនាមជាប្រធានអនុសញ្ញាអូតាវ៉ាឆ្នាំ ២០២៤ បានខិតខំស្វែងរកកិច្ចសហប្រតិបត្តិការ និងជំនួយពីដៃគូអភិវឌ្ឍន៍ និងម្ចាស់ជំនួយនានា ដើម្បីគាំទ្រដល់សកម្មភាពបោសសម្អាតមីនរបស់ប្រទេសឡាវ»។
លោកបានបន្តថា៖ «យើងសូមស្នើឱ្យភាគីឡាវពិចារណាចូលរួមជារដ្ឋភាគីអនុសញ្ញាអូតាវ៉ា ហើយកម្ពុជានឹងប្តេជ្ញាគាំទ្រដល់ភាគីឡាវឱ្យអស់ពីលទ្ធភាព ក្នុងការបោសសម្អាតមីន និងអនុវត្តតាមបទដ្ឋានរបស់អនុសញ្ញាអូតាវ៉ា»។
លោក Latsamy Keomany បានមានប្រសាសន៍ដែរថា៖ «ទោះបីឡាវមិនមែនជារដ្ឋភាគីនៃអនុសញ្ញាអូតាវ៉ា ឡាវបានចូលរួមគាំទ្រការអនុវត្តន៍បទដ្ឋាន និងសកម្មភាពនានារបស់អនុសញ្ញា ហើយឡាវក៏បានត្រៀមខ្លួនជាស្រេចក្នុងការចូលរួមកិច្ចប្រជុំត្រួតពិនិត្យឡើងវិញលើកទី ៥ នៃអនុសញ្ញាអូតាវ៉ា ដែលនឹងប្រព្រឹត្តទៅនៅកម្ពុជា នៅពេលដ៏ខ្លីខាងមុខនេះដែរ»។
លោកបានបន្តទៀតថា ឡាវនឹងពិចារណាលើសំណើរបស់កម្ពុជា ពាក់ព័ន្ធនឹងការចូលរួមជារដ្ឋភាគីនៃអនុសញ្ញាអូតាវ៉ារបស់ឡាវ។ទាក់ទងនឹងការបោសសម្អាតមីននេះដែរ ថ្នាក់ដឹកនាំនៃអាជ្ញាធរមីនកម្ពុជា ក៏បានសន្យាផ្តល់ការគាំទ្របច្ចេកទេស ចំណេះដឹង និងជំនាញដល់ប្រទេសម៉ុងហ្គោលី លើការងារបោសសម្អាតមីន និងគាំទ្រដល់ម៉ុងហ្គោលីអនុវត្ត
បទដ្ឋានរបស់អនុសញ្ញាអូតាវ៉ាផងដែរ។
ក្នុងដំណើរបំពេញការងារដ៏សំខាន់មួយនេះដែរ លោក លី ធុជ បានជួបប្រជុំទ្វេភាគី ជាមួយលោកស្រី Davaasuren Gerelmaa ឯកអគ្គរដ្ឋទូត និងតំណាងអចិន្រៃ្តយ៍ប្រទេសម៉ុងហ្គោលី ប្រចាំនៅអង្គការសហប្រជាជាតិនៅទីក្រុងហ្សឺណែវ ប្រទេសស្វ៊ីស ក្នុងគោលបំណងស្នើដល់ភាគីម៉ុងហ្គោលី ចូលរួមជារដ្ឋភាគីអនុសញ្ញាអូតាវ៉ា។
ប្រទេសម៉ុងហ្គោលី ធ្លាប់បានប្តេជ្ញាចិត្តចូលរួមជារដ្ឋភាគីនៃអនុសញ្ញាអូតាវ៉ា ក៏ប៉ុន្តែដោយសារកត្តាមួយចំនួន ដែលក្នុងនោះរួមបញ្ចូលទាំងកង្វះថវិកាផងដែរ បានធ្វើឱ្យម៉ុងហ្គោលីមិនទាន់មានលទ្ធភាពចូលរួមជារដ្ឋភាគីបាន។
លោក លី ធុជ បានបង្ហាញពីឆន្ទៈរបស់កម្ពុជាក្នុងការកៀរគរជំនួយ និងផ្តល់ជាជំនួយបច្ចេកទេស ចំណេះដឹង និងជំនាញ ដើម្បីគាំទ្រដល់ម៉ុងហ្គោលីបោសសម្អាតមីនប្រឆាំងមនុស្ស និងគាំទ្រដល់ម៉ុងហ្គោលីអនុវត្តបទដ្ឋានរបស់អនុសញ្ញាអូតាវ៉ា។
លោកស្រី DavaasurenGerelmaa បានថ្លែងដោយកោតសរសើរខ្ពស់ចំពោះកិច្ចខិតខំប្រឹងប្រែងរបស់កម្ពុជាក្នុងនាមជាប្រធាន ហើយលោកស្រីក៏បានសន្យាលើកសំណើរបស់ប្រទេសកម្ពុជាបន្តទៅកាន់រដ្ឋាភិបាលម៉ុងហ្គោលីដើម្បីពិចារណា និងស្នើឱ្យមានកិច្ចពិភាក្សាបន្តរវាងកម្ពុជា និងស្ថាប័នសំខាន់ៗមួយចំនួនរបស់ប្រទេសម៉ុងហ្គោលី៕
