ការដាក់ដំណើរការសាកល្បងកម្មវិធីលក់សេវាកម្មទេសចរណ៍លើទូរស័ព្ទ (STC Vendors)។ រូបថត AR Admin
ក្រសួងទេសចរណ៍ និងរដ្ឋបាលខេត្តសៀមរាប បានដាក់ដំណើរការសាកល្បងកម្មវិធីលក់សេវាកម្មទេសចរណ៍លើទូរស័ព្ទ (STC Vendors) ដើម្បីផ្ដល់ភាពងាយស្រួលដល់ភ្ញៀវទេសចរជាតិ និងអន្តរជាតិ ក្នុងការទទួលបានសេវាកម្មដែលមានស្តង់ដា លឿន និងប្រកបដោយសុវត្ថិភាពខ្ពស់។
ការដាក់ដំណើរការសាកល្បងនេះ ធ្វើឡើងក្រោមវត្តមាន លោក ហេង សុខចំរើន អនុរដ្ឋលេខាធិការ ក្រសួងទេសចរណ៍ និងលោក យុន លីនណេ អភិបាលរងខេត្តសៀមរាប និងដោយមានការចូលរួមពីសមាគមក្លិបទេសចរណ៍សៀមរាប និងដៃគូអភិវឌ្ឍន៍នានាផងដែរ។ នេះបើយោងតាមមន្ទីរព័ត៌មានខេត្តសៀមរាប បានឱ្យដឹងកាលពីថ្ងៃទី២៦ ខែមករា ឆ្នាំ២០២៤។
លោក ហេង សុខចំរើន អនុរដ្ឋលេខាធិការ ក្រសួងទេសចរណ៍ បានលើកឡើងក្នុងពិធីដាក់ដំណើរការកាលពីថ្ងៃទី២៦ ខែមករាថា កិច្ចខិតខំប្រឹងប្រែងទាំងអស់នេះ បានបង្ហាញពីគោលបំណង និងចក្ខុវិស័យស្របគ្នារវាងវិស័យឯកជន និងក្រសួងទេសចរណ៍ ក្នុងការពង្រឹងសមត្ថភាពលើការគ្រប់គ្រងទិន្នន័យ និងការប្រើប្រាស់ប្រព័ន្ធឌីជីថល សម្រាប់វិស័យទេសចរណ៍ ចូលក្នុងការអភិវឌ្ឍសេដ្ឋកិច្ចសង្គមកម្ពុជា។ នេះបើយោងតាមហ្វេសប៊ុកមន្ទីរព័ត៌មានខេត្តសៀមរាប។
លោកបានថ្លែងថា៖ «ក្រសួងបានចាត់ទុកការបង្កើតកម្មវិធីប្រើលើទូរស័ព្ទដៃនេះ គឺជាការចូលរួមរបស់វិស័យឯកជន ជាមួយរដ្ឋាភិបាលដើម្បីអភិវឌ្ឍសង្គម និងសេដ្ឋកិច្ចជាតិ។ ទន្ទឹមនឹងនេះ វាក៏ជាតម្រូវការរបស់ភ្ញៀវទេសចរជាតិ និងអន្តរជាតិ ដែលទាមទារសេវាកម្មដែលមានស្តង់ដា លឿន ជាក់លាក់ ប្រកបដោយសុវត្ថិភាពខ្ពស់»។
ជាមួយគ្នានេះ លោក យុន លីនណេ អភិបាលរងខេត្តសៀមរាប ក៏បានបង្ហាញពីការគាំទ្រលើថ្នាលឌីជីថលនេះ ស្របពេលដែលអាជ្ញាធរខេត្ត បាននិងកំពុងពង្រឹង និងពង្រីកវិសាលភាពនៃការបម្រើសេវាកម្មទេសចរណ៍ខេត្តឱ្យកាន់តែល្អប្រសើរបន្ថែមទៀត តាមរយៈការកសាងហេដ្ឋារចនាសម្ព័ន្ធផ្លូវថ្នល់ ស្ពាន ការផ្គត់ផ្គង់អគ្គិសនី ទឹកស្អាត ភ្លើងបំភ្លឺសាធារណៈ។
លោកបានថ្លែងថា៖ «យើងសង្ឃឹមថា យន្តការមួយនេះ នឹងផ្ដល់ភាពងាយស្រួលដល់ភ្ញៀវទេសចរជាតិ និងអន្តរជាតិ ក្នុងការទាញយកព័ត៌មានពីទិសដៅទេសចរណ៍ ដើម្បីរៀបចំផែនការមកទស្សនាខេត្តសៀមរាបប្រកបដោយភាពសប្បាយរីករាយ»។
ទាក់ទងនឹងកម្មវិធីនេះដែរ លោក ម៉ម រិទ្ធី ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជា បានប្រាប់ឱ្យដឹងនៅថ្ងៃទី២៩ ខែមករាថា កម្មវិធីសាកល្បងនេះ វាជាវិធីសាស្ត្រមួយល្អ ដើម្បីទាក់ទាញភ្ញៀវទេសចរជាតិ និងអន្តរជាតិ នៅពេលមកទស្សនាខេត្តសៀមរាបងាយស្រួលក្នុងការដឹងពីសេវាកម្ម និងផលិតផលទេសចរណ៍ក្នុងខេត្ត។
លោកបានបន្តថា ទន្ទឹមនឹងមានកម្មវិធីសាកល្បងនេះដែរ លោកក៏ចង់ឃើញក្រសួង ក៏ដូចជាសមាគមទេសចរណ៍ ត្រូវមានការរៀបចំផ្ទៃក្នុងទាំងរមណីយដ្ឋានទេសចរណ៍ ផលិតផលទេសចរណ៍ ហេដ្ឋារចនាសម្ព័ន្ធ ក៏ដូចជាសេវាកម្មទេសចរណ៍ផងដែរ ដើម្បីឱ្យមានស្ដង់ដាដូចប្រទេសជិតខាង ជាពិសេសភ្ញៀវទេសចរដែលមកលេង ពួកគាត់អាចទទួលយកសេវាកម្មទាំងអស់នេះបាន។
លោកបានប្រាប់ថា៖ «បើយើងមិនទាន់រៀបចំផ្ទៃក្នុងឱ្យល្អទេ នោះអ្វីដែលភ្ញៀវបានឃើញហ្នឹង គាត់យកទៅរិះគន់ ផ្សព្វផ្សាយទៅកាន់អ្នកផ្សេងទៀត។ ដូច្នេះយើងត្រូវតែមានការរៀបចំខាងក្នុងឱ្យមានភាពទាក់ទាញ ឬមានអ្វីដែលថ្មីសម្រាប់ផ្សព្វផ្សាយឱ្យគេមើលឃើញថា ចង់មកខេត្តសៀមរាបយើងហ្នឹង»។
សូមបញ្ជាក់ថា កម្មវិធីលក់សេវាកម្មទេសចរណ៍លើទូរស័ព្ទ ដែលមានឈ្មោះថា «STC Vendors» គឺជាគំនិតផ្តួចផ្ដើមដោយសមាគមក្លិបទេសចរណ៍សៀមរាប ខណៈដែលកម្មវិធីនេះមិនត្រឹមតែជាកន្លែងលក់ សេវាកម្ម និងផលិតផលទេសចរណ៍ប៉ុណ្ណោះទេ ប៉ុន្តែវាក៏ជាថ្នាលឌីជីថល សម្រាប់អង្គភាព ស្ថាប័នរដ្ឋ និងឯកជន ផ្សព្វផ្សាយព័ត៌មានទេសចរណ៍ទៅកាន់អ្នកប្រើប្រាស់ផងដែរ៕
