មន្ត្រីក្រសួងកសិកម្មកាលពីថ្ងៃទី ២៩ មករា ចុះពិនិត្យស្រូវស្រែប្រាំងរបស់កសិករនៅក្នុងខេត្តកំពង់ឆ្នាំង ដែលកំពុងត្រូវការទឹក។ រូបថត ក្រសួងកសិកម្ម
ភ្នំពេញៈ មន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ឱ្យដឹងថា ស្រូវស្រែប្រាំងជួបបញ្ហាខ្វះទឹក ត្រូវបានជួយសង្គ្រោះ តាមរយៈការជីកស្តារប្រឡាយ ការបើកទ្វារទំនប់ទឹក ការបូមទឹកពីប្រភពមេចូលប្រឡាយរង និងការបូមទឹកដាក់ចូលក្នុងស្រែជួយសង្គ្រោះស្រូវបានចំនួន ១០ ៧៧៧ ហិកតា ស្មើនឹង ៣២,៦២ ភាគរយ នៃផ្ទៃដីជួបបញ្ហាខ្វះទឹកនៅទូទាំងប្រទេស។
កញ្ញា អ៊ឹម រចនា អ្នកនាំពាក្យក្រសួងកសិកម្មបានប្រាប់ឱ្យដឹងនៅថ្ងៃទី ២៩ ខែមករា ឆ្នាំ ២០២៤ ថា គិតត្រឹមថ្ងៃទី ២២ ខែមករា ឆ្នាំ ២០២៤ ផ្ទៃដីដាំដុះស្រូវរដូវប្រាំងសម្រេចបានចំនួន ៧៥៣ ០២៣ ហិកតាស្មើនឹង ១៥០,៩៥ ភាគរយនៃផែនការចំនួន ៤៩៨ ៨៥៨ ហិកតា លឿនជាងឆ្នាំ ២០២៣ ចំនួន ២៣១ ៤៥៦ ហិកតា បើធៀបរយៈពេលដូចគ្នា ដែលសម្រេចបានត្រឹមតែ ៥២១ ៥៦៧ ហិកតាប៉ុណ្ណោះ។
ផ្ទៃដីដែលបានជួបបញ្ហាខ្វះទឹកសរុបមានចំនួន ៣៣ ០៣៥ ហិកតាស្មើនឹង ៤,៣៩ ភាគរយ នៃផ្ទៃដីដាំដុះនៅរាជធានី ខេត្តចំនួន ១០ រួមមាន ខេត្តពោធិ៍សាត់១៤ ៤០២ ហិកតា,បាត់ដំបង ៩ ៥៥៨ ហិកតា, ព្រៃវែង ៣ ៦៥០ ហិកតា, កំពង់ចាម ១ ៥០២ ហិកតា,កំពង់ឆ្នាំង ១២៨២ ហិកតា, ត្បូងឃ្មុំ ១ ២១៨ ហិកតា, កំពង់ធំ ៨៥០ ហិកតា, កំពត ២៧៦ ហិកតា, តាកែវ ២៤៧ ហិកតា និងភ្នំពេញ ៥០ ហិកតា។
កញ្ញា អ៊ឹម រចនា ថ្លែងថា៖ «ផ្ទៃដីជួបបញ្ហាខ្វះទឹកដែលទទួលបានការសង្គ្រោះនៅក្នុងរាជធានីខេត្តចំនួន ៩ រួមមាន ខេត្តបាត់ដំបង ៤ ០៥៥ ហិកតា, ព្រៃវែង ៣ ៦៥០ ហិកតា, កំពង់ចាម ១ ២២៩ ហិកតា,ត្បូងឃ្មុំ ៦៣៥ ហិកតា, កំពង់ឆ្នាំង ៤៤០ ហិកតា, កំពត ២៧៦ ហិកតា, តាកែវ ២៤៧ ហិកតា, កំពង់ធំ ១៩៥ ហិកតា និងរាជធានីភ្នំពេញ ៥០ ហិកតា»។
ក្នុងចំណោមផ្ទៃដីដែលបានជួយសង្គ្រោះ នៅតាមបណ្តាខេត្តទាំង ៩ នេះ ខេត្តបាត់ដំបង ក៏ជាខេត្តដែលត្រូវបានជួយសង្គ្រោះលើបញ្ហាខ្វះខាតទឹកនេះដែរ។ លោក សុខ លូ អភិបាលខេត្តបាត់ដំបងឱ្យដឹងនៅថ្ងៃទី ២៩ ខែមករាថា ផ្ទៃដីជាង ៤ ពាន់ហិកតា ក្នុងចំណោមផ្ទៃដីប៉ះពាល់ដោយការខ្វះខាតទឹកជិត ៦ ៥០០០ ហិកតា ដែលត្រូវបានអាជ្ញាធរខេត្តសហការជាមួយក្រសួងធនធានទឹក និងកសិកម្ម បានជួយសង្គ្រោះទាន់ពេលវេលា។
លោកបន្តថា៖ «ខេត្តបាត់ដំបងយើង នៅខាងស្រុកមោងឫស្សី មានបញ្ហាខ្វះខាតទឹកច្រើនជាងគេ បើធៀបនឹងស្រុកដទៃទៀតដោយសារស្រុកនេះនៅឆ្ងាយពីទំនប់និងប្រព័ន្ ធធារាសាស្ត្រដល់ទៅជាង ១០០ គីឡូម៉ែត្រឯណោះ។ ប៉ុន្តែនៅពេលទំនប់ស្ទាក់ទឹកដូនទ្រីសាងសង់រួចហើយនៅឆ្នាំក្រោយ វានឹងលែងមានបញ្ហាខ្វះខាតនៅស្រុកមោងឫស្សីនេះទៀតហើយ។ មិនត្រឹមតែស្រុកមោងឫស្សីនោះទេ ស្រុករុក្ខគិរី និងស្រុកកោះក្រឡ ក៏មានទឹកប្រើប្រាស់គ្រប់គ្រាន់វិញដែរ»។
លោក សុខ លូ បន្ថែមថា ខេត្តបាត់ដំបងមានប្រព័ន្ធធារាសាស្ត្រធំៗចំនួន ៤ សម្រាប់ប្រើប្រាស់ប្រចាំថ្ងៃផង និងជួយដល់ការស្រោចស្រពដំណាំរបស់ប្រជាកសិករផងដែរ ដែលទំនប់ទាំងនោះ រួមមាន៖ ទំនប់សេកសក, ទំនប់បឹងកំពីងពួយ, ទំនប់ស្ទឹងបវេល និងទំនប់បាសាក់ ដែលសុទ្ធតែជាអាងស្តុកទឹកដ៏សំខាន់ សម្រាប់ការដាំដុះរបស់កសិករ មិនបារម្ភ ពីគ្រោះរាំងស្ងួត។
ទោះយ៉ាងណាលោកអភិបាលខេត្តបានបន្តអំពាវនាវថា៖ «សូមបងប្អូនប្រជាពលរដ្ឋអនុវត្តតាមការណែនាំរបស់ក្រសួងធនធានទឹក ដោយផ្អាកធ្វើស្រែប្រាំងលើកទី ២ និងទី ៣ សិន ព្រោះថា យើងមានការខ្វះខាតទឹក ព្រោះត្រូវទុកទឹកដែលនៅសល់សម្រាប់ប្រើប្រាស់ប្រចាំថ្ងៃ និងប្រើសម្រាប់ការចិញ្ចឹមសត្វពាហនៈជាដើម»។
លោក សុខ លូ បន្តថា៖ «ដូចយើងបានឃើញការជូនដំណឹងកន្លងទៅហើយដោយសារយើងទទួលឥទ្ធិពលពីបាតុភូតអែលនីណូទើបនាំឱ្យការរាំងស្ងួតកាន់តែអូសបន្លាយ និងធ្ងន់ទៅ។ ដូច្នេះសូមបងប្អូនប្រជាពលរដ្ឋមេត្តាយោគយល់ ខណៈដែលអាជ្ញាធរយើងកំពុងខិតខំជួយសង្គ្រោះជាបន្តបន្ទាប់ទៀតចំពោះស្រូវដែលរងផលប៉ះពាល់»។
បើតាមក្រសួងកសិកម្ម ផ្ទៃដីដែលកំពុងខ្វះទឹក និងអាចប្រឈមនឹងការខូចខាតឬថមថយទិន្នផលក្នុងករណីពុំមានភ្លៀងកក់ខែ ឬពុំមានយន្តការជួយសង្គ្រោះណាមួយសរុបមានចំនួន ២០ ២១៨ ហិកតា នៅខេត្តចំនួន ៦ រួមមាន៖ ខេត្តពោធិ៍សាត់ចំនួន ១២ ៣៦២ ហិកតា, បាត់ដំបង ចំនួន ៥ ៥០៣ ហិកតា, កំពង់ឆ្នាំងចំនួន ៨៤២ ហិកតា,កំពង់ធំចំនួន ៦៥៥ ហិកតា, ត្បូងឃ្មុំចំនួន ៥៨៣ ហិកតា និងខេត្តកំពង់ចាម ចំនួន ២៧៣ ហិកតា។
ក្នុងនោះផ្ទៃដីចំនួន ៧ ៧៣៤ ហិកតា អាចខូចខាតទាំងស្រុង ដែលមានខេត្តបាត់ដំបងចំនួន ៥ ៥០៣ ហិកតា និងខេត្តពោធិ៍សាត់ចំនួន ២ ២៣១ ហិកតា៕
