លោកនាយករដ្ឋមន្ត្រី ហ៊ុន ម៉ាណែត។ រូបថត STPM
លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងពាក់ព័ន្ធ គិតគូររៀបចំបង្កើតប្រព័ន្ធទីផ្សារចរន្តមួយ ដើម្បីបង្កើនការផ្គត់ផ្គង់ផ្ទៃក្នុង ជាពិសេសប្រភេទសាច់ និងបំណែកគ្រឿងក្នុងបង្កក ដើម្បីបង្កើនចីរភាពនៃការផ្គត់ផ្គង់ក្នុងស្រុក ក្នុងរយៈពេលវែង។
ការណែនាំយ៉ាងដូច្នេះ បានធ្វើឡើងក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅបន្តឆ្នាំ២០២៤ របស់ក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី៣០ ខែមករា ឆ្នាំ២០២៤។
លោក ហ៊ុន ម៉ាណែត បានថ្លែងថា៖«កន្លងទៅយើងក៏បានដាក់គោលការណ៍មួយចំនួន ក្នុងការផ្អាកការនាំចូលគ្រឿងក្នុងនៃបំណែកសាច់បង្កកមួយចំនួន សម្រាប់សាច់ជ្រូក សាច់មាន់ និងសាច់មួយចំនួននៅក្នុងរយៈពេល ៦ ខែ ដោយចាប់ពីខែមីនាទៅ ប៉ុន្តែការអន្តរាគមន៍នេះ មិនមែនជាវិធានការមួយដែលចីរភាព អាចធ្វើគ្រប់ពេលនោះទេ យើងចង់ធ្វើយ៉ាងណាដើម្បីឱ្យមានចីរភាព តាមរយៈវិធីសាស្ត្រណា ដើម្បីធានាឱ្យការចិញ្ចឹមសត្វមានភាពប្រកួតប្រជែង»។
លោកបានបន្តថា ៖ «ក្នុងពេលដែលកម្ពុជាយើងផ្អាកការនាំចូលបណ្ដោះអាសន្ននូវគ្រឿងបំណែកកក ធ្វើយ៉ាងណាឱ្យអ្នកទិញបំណែកកកនេះភ្ជាប់ការទិញដូរផ្ទាល់ជាមួយកសិកររបស់យើង ហើយប្រើប្រាស់តាមបច្ចេកទេសបង្កករបស់ពួកគេចុះ។ បើទោះបីជាមិនមានការដាក់ហាមឃាត់ការនាំចូលបំណែកគ្រឿងក្នុងបង្កកនេះ វាក៏អាចបង្កើតនូវទីផ្សារប្រព័ន្ធចរន្តមួយទៅហើយ នៃការផ្គត់ផ្គង់ផ្ទៃក្នុងផងដែរ»។
លោកថា កិច្ចការផ្គត់ផ្គង់ផ្ទៃក្នុងនេះ គឺជាកិច្ចការសំខាន់ណាស់ មានន័យថា ទីផ្សារផលិតនៅនឹងកន្លែង នាំចេញនៅនឹងកន្លែង អ៊ីចឹងត្រូវធ្វើយ៉ាងណា ដើម្បីខិតខំភ្ជាប់ចំណុចនេះ។
ជាមួយគ្នានោះដែរ រាជរដ្ឋាភិបាលមានការធានា២ចំណុច ក្នុងនោះការធានាទី១គឺជួយឱ្យកសិផលរបស់កសិករមានតម្លៃថ្លៃ ទទួលបានផលចំណេញខ្ពស់ និងការធានាទី២កុំឱ្យមានអតិផរណាថ្លៃ ការដោះស្រាយជូនកសិករ គឺកាត់បន្ថយថ្លៃផលិត។
លោក ហ៊ុន ម៉ាណែត បានបញ្ជាក់ថា៖«ក្រសួងពាណិជ្ជកម្ម បានផ្ញើតារាងតម្លៃជូនលោករាល់ថ្ងៃ ខណៈដែលទំនិញណាឡើងថ្លៃលើស២០ភាគរយ ត្រូវដាក់ជាហានិភ័យហើយ តែសំណាងវាឡើងថ្ងៃនេះ ស្អែកវានឹងចុះវិញហើយ។យើងសង្ឃឹមថា វាមិនឡើងជាប់គ្នា ១ខែ ឬ២ខែ ឬ៣ខែជាប់គ្នានោះទេ»។
លោក ស្រ៊ុន ពៅ ប្រធានសមាគអ្នកចិញ្ចឹមសត្វកម្ពុជា រំពឹងថា អនុសាសន៍និងការណែនាំរបស់ប្រមុខរាជរដ្ឋាភិបាល នឹងត្រូវបានអនុវត្តឱ្យបានល្អ ជាពិសេសការអនុវត្តវិធានការហាមឃាត់ការនាំចូលជាបណ្តោះអាសន្ន នូវគ្រឿងក្នុង និងបំណែកសាច់បង្កក ក្នុងរយៈពេល៦ខែ ដោយគិតចាប់ពីថ្ងៃទី១២ ខែមីនា ឆ្នាំ២០២៤តទៅ។
លោកបានបញ្ជាក់ថា៖«កសិករ ឬអ្នកចិញ្ចឹមសត្វយើង មិនចង់បានអ្វីច្រើនជាង ការរក្សាលំនឹងថ្លៃសាច់ឱ្យមានភាពសមរម្យ ដោយអ្នកផលិតក៏អាចទទួលយកបាន ហើយអ្នកបរិភោគក៏អាចទទួលយកបានដូចគ្នា។ សាច់បង្កកដែលឈ្មួញលួចនាំចូលមកដោយខុសច្បាប់នេះ វាប៉ះពាល់ខ្លាំងណាស់មិនត្រឹមតែអ្នកផលិតទេ តែប៉ះពាល់ដល់សុខភាពអ្នកហូបយើងដែរ។ដូច្នេះស្នើឱ្យមានការអនុវត្តឱ្យបានម៉ឺងម៉ាត់»។
តាមរយៈសេចក្តីជូនដំណឹង របស់ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៩ ខែមករា ឆ្នាំ២០២៤ បានបញ្ជាក់ថា រាជរដ្ឋាភិបាលកម្ពុជាបានសម្រេចផ្អាកជាបណ្ដោះអាសន្នសម្រាប់រយៈពេល៦ខែ នូវការនាំចូលគ្រឿងក្នុង និងបំណែកសាច់បង្កក៕
