លោក នី ណាក់ ដែលត្រូវបានតុលាការចេញដីកាឃុំខ្លួន។ រូបថត Ny Nak
សាលាដំបូងរាជធានីភ្នំពេញ បានចេញដីកាឃុំខ្លួន លោក នី ណាក់ ម្ចាស់គណនីហ្វេសប៊ុកផេក «Iman KH» ដាក់ពន្ធនាគារជាបណ្តោះអាសន្ន នៅមណ្ឌលអប់រំកែប្រែទី១ (ម១) ក្រោមការចោទប្រកាន់ពីបទ «បរិហារកេរ្តិ៍ជាសាធារណៈ និងញុះញង់ឱ្យមានការរើសអើង»។
ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល កាលពីថ្ងៃទី៥ ខែមករា ឆ្នាំ ២០២៤ បានចេញដីកាបង្គាប់ឱ្យឃុំខ្លួន លោក នី ណាក់ ភេទប្រុស កើតឆ្នាំ១៩៧៩ ជនជាតិខ្មែរ សញ្ជាតិខ្មែរ មុខរបរអាជីវករ មានទីកន្លែងកំណើតភូមិរកា ឃុំរការ ស្រុកសង្កែ ខេត្តបាត់ដំបង និងទីលំនៅមុនពេលឃាត់ខ្លួនស្នាក់នៅផ្ទះលេខ៤៧ ផ្លូវបេតុង ភូមិ គោកឃ្លាង ខណ្ឌសែនសុខ រាជធានីភ្នំពេញ។
នៅក្នុងដីកាបង្គាប់ឱ្យឃុំខ្លួនបញ្ជាក់ថា៖«ជននេះត្រូវបានដាក់ឱ្យស្ថិតនៅក្រោមការពិនិត្យពីបទ ការមិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម បរិហារកេរ្តិ៍ជាសាធារណៈ និងញុះញង់ឱ្យមានការរើសអើង ប្រព្រឹត្តនៅរាជធានីភ្នំពេញ កាលពីថ្ងៃទី១២ ថ្ងៃទី១៧ ខែធ្នូ ឆ្នាំ២០២៣ បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញាត្តិមាត្រា ៨៨ មាត្រា ៣០៧ មាត្រា ៤៩៥ និងមាត្រា ៤៩៦ នៃក្រមព្រហ្មទណ្ឌ»។
លោក នី ណាក់ ត្រូវបានសមត្ថកិច្ចឃាត់ខ្លួន និងបញ្ជូនទៅតុលាការភ្លាមៗ កាលពីព្រឹកថ្ងៃ ទី៥ ខែមករា ឆ្នាំ២០២៤ បន្ទាប់ពីលោកបាននិយាយបរិហារ និងរិះគន់ជាហូរហែទៅលើសកម្មភាពមន្ត្រីរាជរដ្ឋាភិបាល។
លោក ទូច សុខៈ អ្នកនាំពាក្យក្រសួងមហាផ្ទៃ បានប្រាប់ឱ្យដឹងនៅថ្ងៃទី៦ ខែមករា នេះថា យោងទៅលើគោលការណ៍ជំនាញ និងនៅក្នុងតួនាទីភារកិច្ចជាជំនួយការរបស់តុលាការ នាយកដ្ឋានផ្ទៃក្នុងអគ្គស្នងការនគរបាលជាតិ បានអនុវត្តឃាត់ខ្លួន លោក នី ណាក់ តាមនីតិវិធី ហើយបញ្ជូនទៅអយ្យការអមសាលាដំបូងរាជធានីភ្នំពេញ។
លោកបញ្ជាក់ថា៖«អយ្យការអមសាលាដំបូងរាជធានីភ្នំពេញក៏បានបន្តនីតិវិធី ទៅកាន់ចៅក្រមស៊ើបសួរ រហូតដល់ចៅក្រៅមស៊ើបសួរ នៅថ្ងៃទី ៥ ខែមករា ឆ្នាំ ២០២៤ និងបានចេញដីកាបង្គាប់ឱ្យឃុំខ្លួន លោក នី ណាក់ ដូចបទល្មើសដែលមាននៅក្នុងដីកាបង្គាប់ឱ្យឃុំខ្លួន។ ដូច្នេះ ករណីនេះ ផុតពីដៃនគរបាលយុត្តិធម៌»។
សូមរំឭកថា លោក នី ណាក់ ធ្លាប់ជាប់ពន្ធនាគារម្តងរួចមកហើយ កាលពីឆ្នាំ២០២០ ក្រោមបទ ញុះញង់ឱ្យប្រព្រឹត្តបទឧក្រិដ្ឋ ទាក់ទិននឹងការប្រកាសពីផែនការទិញម៉ាស់មកពាក់ឱ្យសត្វមាន់ក្នុងអំឡុងពេលនៃការឆ្លងរាតត្បាតជំងឺកូវីដ១៩ ដោយតុលាការបានផ្តន្ទាទោស រយៈពេល ១៨ ខែ។ ប៉ុន្តែលោកបានចេញពីពន្ធនាគារវិញ កាលពីថ្ងៃទី១០ ខែមិថុនា ឆ្នាំ២០២១៕
