ពុទ្ធបរិស័ទកំពុងធ្វើសមាធិនៅបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅឧទ្យានជាតិព្រះកុសុមៈគីរីរម្យ ។ រូបថត BCCC
កំពង់ស្ពឺៈ ក្រសួងបរិស្ថាន បានរៀបចំសាងសង់ទីកន្លែងសមាធិនៅបរិវេណមជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅឧទ្យានជាតិព្រះកុសុមៈគីរីរម្យ ដើម្បីស្រូបទាញពុទ្ធបរិស័ទឱ្យមកធ្វើសមាធិ និងមានការសិក្សាធម៌វិន័យរបស់ព្រះពុទ្ធសាសនា។
តាមរយៈក្រសួងបរិស្ថាន កាលពីថ្ងៃទី៦ ខែមករា បានឱ្យដឹងថា លោក អ៊ាង សុផល្លែត រដ្ឋមន្រ្តីក្រសួងបរិស្ថានបានចុះពិនិត្យបរិវេណនៅក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅក្នុងឧទ្យានជាតិព្រះកុសុមៈគីរីរម្យ និងបានលើកឡើងពីការរៀបចំសាងសង់ទីកន្លែងសម្រាប់សមាធិនេះ។
គោលបំណងនៃគម្រោងសាងសង់ទីកន្លែងសម្រាប់ធ្វើសមាធិ និងវិបស្សនា របស់មជ្ឈមណ្ឌលវប្បធម៌ព្រះពុទ្ធសាសនាកម្ពុជានេះ គឺដើម្បីធ្វើឱ្យចិត្តបរិសុទ្ធជ្រះថ្លា ហើយនិងមានភាពស្អាតទាំងផ្លូវចិត្ត និងកាយបានដឹកនាំមនុស្សឆ្ពោះទៅរកសេចក្តីសុខប្រកបដោយភាពថ្លៃថ្នូរ និងមានកិត្តិយសនៅក្នុងសង្គមជាតិ។
លោក អ៊ាង សុផល្លែត បានលើកឡើងនាដំណើរទស្សនកិច្ចនេះថា ការរៀបចំសាងសង់ទីកន្លែងសមាធិនេះឡើង គឺដើម្បីផ្សព្វផ្សាយពីមាគ៌ាព្រះពុទ្ធសាសនា វប្បធម៌ និងបង្ហាញអំពីធនធានធម្មជាតិផ្សារភ្ជាប់នឹងជីវិតប្រចាំថ្ងៃ ដែលប្រកបដោយធម៌សន្តោស កសាងសន្តិភាពផ្លូវចិត្តឱ្យរឹងមាំ តាមរយៈការសិក្សាធម៌វិន័យរបស់ព្រះពុទ្ធ ដែលផ្តោតសំខាន់លើភាពល្អបរិសុទ្ធ ភាពស្អាតនៃចិត្ត ស្របតាមយុទ្ធសាស្រ្តចក្រាវិស័យបរិស្ថាន ២០២៣-២០២៨។
លោកបានថ្លែងថា៖ «ការសាងសង់ទីកន្លែងធ្វើសមាធិជូនពុទ្ធបរិស័ទនេះ នឹងមានការរៀបចំតង់ជាលក្ខណៈខ្មែរបែបទំនើប មានភាពល្អឯកប្លែកពីតំបន់ដទៃ ដែលបន្សល់ជាស្នាដៃទុកជាកេរមរតកដល់កូនខ្មែរជំនាន់ក្រោយ ហើយជាគម្រោងយើងនឹងរៀបចំពី ៥តង់ ទៅ១០តង់ សម្រាប់ការសាកល្បងជាមុនសិន»។
បើតាមរដ្ឋមន្ត្រីក្រសួងបរិស្ថាន ចំពោះការរៀបចំបែបនេះ ក៏ចង់ឱ្យមានការចូលរួមការពារ និងអភិរក្សពីប្រជាសហគមន៍ និងប្រជាពលរដ្ឋ ដែលរស់នៅក្នុងតំបន់ឧទ្យានជាតិព្រះកុសុមៈគីរីរម្យ ព្រោះថា ការសាងសង់នេះ ទុកសម្រាប់ជាប្រយោជន៍ជូនសហគមន៍ឱ្យរកប្រាក់ចំណូលបន្ថែម ដើម្បីធ្វើឱ្យជីវភាពប្រជាពលរដ្ឋបានល្អប្រសើរ។ ខណៈដែលមានការរកចំណូលទាំងនេះដែរ គឺកើតចេញពីភាពស្អាត មិនមានការកេងចំណេញ មិនកុហកភូតភរបោកប្រាស់ពុទ្ធបរិស័ទ ឬភ្ញៀវទេសចរជាតិ អន្តរជាតិដែលមកកម្សាន្តឡើយ។
លោក ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បានថ្លែងនៅថ្ងៃ៧ ខែមករាថា ការរៀបចំបរិវេណនៅក្នុងមជ្ឈមណ្ឌលវប្បធម៌ព្រះពុទ្ធសាសនាជាកន្លែងសមាធិនេះ គឺវាជារឿងល្អព្រោះមជ្ឈមណ្ឌលនេះស្ថិតនៅតំបន់ឧទ្យានជាតិគិរីរម្យដែលជាកន្លែងមានខ្យល់ឱកាសល្អបរិសុទ្ធ និងមានធនធានធម្មជាតិស្រស់ស្អាត។
ក្រៅពីការរៀបចំជាកន្លែងសមាធិហើយ ក៏ត្រូវមានការរៀបចំដាក់អ្នកជំនាញមកធ្វើការណែនាំអំពីរបៀបសមាធិដល់ពុទ្ធបរិស័ទ និងភ្ញៀវទេសចរជាតិហើយនិងភ្ញៀវទេសចរអន្តរជាតិ ដើម្បីឱ្យការធ្វើសមាធិរបស់ពួកគាត់មានភាពស្ងប់ចិត្ត ក៏ដូចជាអាចស្គាល់ចិត្តខ្លួនឯង និងគ្រប់គ្រងខ្លួនឯងបាន។
លោកបានឱ្យដឹងថា៖ «ដោយសារសង្គមកាន់តែជឿនលឿនទៅ គឺធ្វើឱ្យមនុស្សសព្វថ្ងៃនេះមានបញ្ហាផ្លូវចិត្តច្រើនណាស់ ដូច្នេះការមានកន្លែងសមាធិ វាជួយសម្អាត និងព្យាបាលផ្លូវចិត្តរបស់ពួកគាត់ផងដែរ។ ក្រៅពីនេះ វាក៏រួមចំណែកលើកកម្ពស់វិស័យទេសចរណ៍ តាមរយៈភ្ញៀវទេសចរជាតិ អន្តរជាតិដែលមកកម្សាន្ត បានទិញផលិតផលបងប្អូននៅក្បែរៗហ្នឹង»។
បើតាមលោក ឈត ប៊ុនថង កាលណាមានលំហូរសេដ្ឋកិច្ចនៅតំបន់នោះ វានឹងធ្វើឱ្យប្រជាពលរដ្ឋដែលរស់នៅក្នុងសហគមន៍មូលដ្ឋានមានការរីកចម្រើន ហើយវាក៏ធ្វើឱ្យវិស័យសមាធិ និងវិស័យព្រះពុទ្ធសាសនាកម្ពុជា ក៏មានភាពរីកចម្រើនផងដែរ តាមរយៈការមានអ្នកទៅគោរពប្រតិបត្តិជាដើម។
សូមបញ្ជាក់ថា មជ្ឈមណ្ឌលវប្បធម៌ព្រះពុទ្ធសាសនាកម្ពុជា ត្រូវបានបង្កើតឡើងតាមអនុក្រឹត្យលេខ២១៥ អនក្រ/បក ដោយមានវិសាលភាពលើផ្ទៃដីទំហំប្រមាណ១២៦ហិកតា ក្នុងឧទ្យានជាតិព្រះសុរាម្រិត-កុសុមៈគិរីរម្យ ក្នុងភូមិសាស្ត្រឃុំចំបក់ ស្រុកភ្នំស្រួច ខេត្តកំពង់ស្ពឺ។ មជ្ឈមណ្ឌលវប្បធម៌នេះ បង្កើតឡើង ដើម្បីជាប្រយោជន៍ ក្នុងការសិក្សាស្រាវជ្រាវ ស្វែងយល់ពីព្រះពុទ្ធសាសនានៅកម្ពុជា៕
