លោកហេង សួរ នៅក្នុងពិធីនៅខេត្ដកោះកុងកាលពីម្សិលមិញ។ រូបថត STPM
កោះកុងៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានថ្លែងថា ទន្ទឹមនឹងវឌ្ឍនភាពការងារដែលត្រូវអនុវត្តក្នុងឆ្នាំ ២០២៣ កន្លងទៅ ក្រសួងក៏បន្តអនុវត្តការងារអាទិភាពចំនួន ៤ ដែលក្រសួងត្រូវអនុវត្តឱ្យបានមុនដំណាច់ឆ្នាំ ២០២៥។
លោក ហេង សួរ បានលើកឡើងដូចនេះ នៅថ្ងៃទី ៨ ខែមករា ឆ្នាំ ២០២៤ ក្នុងឱកាសលោកនាយករដ្ឋមន្ត្រី ហ៊ុន ម៉ាណែត ជួបសំណេះសំណាលជាមួយកម្មករនិយោជិតជាង ១ ម៉ឺននាក់ នៅឃុំប៉ាក់ខ្លង ស្រុកមណ្ឌលសីមា នៅខេត្តកោះកុង។
លោកបានថ្លែងថា៖ «ខ្ញុំសូមជម្រាបនូវការវឌ្ឍនភាពទាំង ៤ ដែលក្រសួងការងារនិងបណ្តុះបណ្តាលវិជ្ជាជីវៈត្រូវអនុវត្តឱ្យបានមុនដំណាច់ឆ្នាំ ២០២៥ ដោយមានរយៈពេល ២ ឆ្នាំទៅខាងមុខឱ្យបានក្នុងនោះទី១- គឺការបង្កើតទារកដ្ឋាននិងមតេ្តយ្យសហគមន៍នៅតាមតំបន់ដែលមានរោងចក្រដោយក្រសួងបានរៀបចំសេចក្តីព្រាងអំពីយន្តការទ្រទ្រង់និងបានកំណត់កាលវិភាគប្រជុំជាមួយភាគីនិយោជកនៅដើមខែមីនា ឆ្នាំ ២០២៤»។
ជាមួយគ្នានេះក្រសួងការងារក៏បានកំពុងរៀបចំលិខិតស្នើសុំកិច្ចសហការជាមួយក្រុមប្រឹក្សាអភិវឌ្ឍន៍កម្ពុជា ដើម្បីជួបប្រជុំជាមួយម្ចាស់តំបន់សេដ្ឋកិច្ចនានាអំពីយន្តការលើកទឹកចិត្ត និងជំរុញការសាងសង់ទារកដ្ឋានសហគមន៍ និងមត្តេយ្យសហគមន៍ក្នុងតំបន់សេដ្ឋកិច្ចផងដែរ។
លោករដ្ឋមន្ត្រីបានបន្តថា សម្រាប់ចំណុចទី២- ជំរុញការកែលម្អកន្លែងហូបបាយឬអាហារដ្ឋាននៅតាមរោងចក្រ ដែលកំពុងដំណើរការឱ្យបានសមរម្យសម្រាប់កម្មករនិយោជិត និងតម្រូវឱ្យមានការរៀបចំកន្លែងហូបបាយឬអាហារដ្ឋានសម្រាប់រោងចក្រដែលត្រូវបង្កើតថ្មី។ លោកថា ក្រសួងការងារនឹងធ្វើការសហការជាមួយក្រសួងរៀបចំដែនដីនិងនគរូបនីយកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជាដើម្បីកំណត់ស្តង់ដារោងចក្រថ្មី។
លោក ហេង សួរ បានបន្តថា៖ «ទី៣- សហការជាមួយភាគីពាក់ព័ន្ធ សិក្សាយន្តការគាំទ្រ និងលើកទឹកចិត្តឱ្យមានការផ្លាស់ប្តូរជាបណ្តើរៗនូវមធ្យោបាយដឹកជញ្ជូនកម្មករនិយោជិតដែលស្របតាមបទដ្ឋានបច្ចេកទេសនិងផាសុកភាពជាងមុនត្រឹមឆ្នាំ ២០២៧ ដែលក្រសួងនឹងយកទៅពិភាក្សាក្នុងកិច្ចប្រជុំដើម្បីសិក្សានិងលើកជាជម្រើសដែលប្រសើរបំផុតសម្រាប់កម្មករនិយោជិត និយោជក ម្ចាស់រថយន្តនិងអ្នកបើកបរបច្ចុប្បន្នផង»។
ចំណែកវឌ្ឍនភាពទី៤- ដែលនឹងត្រូវអនុវត្តដែរនោះគឺជំរុញកម្មវិធីធ្វើតេស្តទទួលស្គាល់ជំនាញដែលជាឱកាសសម្រាប់កម្មករនិយោជិតនិងពលករធ្វើការនៅក្រៅប្រទេសអាចចុះឈ្មោះធ្វើតេស្ត និងទទួលបានវិញ្ញាបនបត្រទទួលស្គាល់ជំនាញមួយ ដើម្បីបង្ហាញពីសមត្ថភាពនិងកម្រិតជំនាញរបស់ខ្លួន។
នៅក្នុងឱកាសនោះ លោកនាយករដ្ឋមន្ត្រី ហ៊ុន ម៉ាណែត ក៏បានលើកឡើងដែរថា ក្រសួងការងារបន្តអនុវត្តនូវផែនការ ៤ ចំណុចបន្ថែមទៀតក្នុងរយៈពេល ២ ឆ្នាំបន្តនិងមានចំណុចផ្សេងៗដែលនឹងអនុវត្តបន្តបន្ទាប់ទៀត ហើយមិនមែនតែក្រសួងការងារនោះទេគឺគ្រប់ក្រសួងស្ថាប័នទាំងអស់ ទាំងថ្នាក់ជាតិ និងថ្នាក់ក្រោមជាតិ ដែលជាផែនការសម្រាប់អនុវត្តលើកស្ទួយនិងជំរុញការអភិវឌ្ឍជីវភាពរស់នៅរបស់ប្រជាពលរដ្ឋ។
លោកបានបញ្ជាក់ថា៖ «យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលយើងគឺដាក់ចេញនូវគោលនយោបាយដែលត្រូវធ្វើហើយគោលនយោបាយ និងផែនការសកម្មភាពទាំងអស់គឺសុទ្ធតែធ្វើដើម្បីបម្រើប្រជាពលរដ្ឋ និងរុញជីវភាពពលរដ្ឋឱ្យកាន់តែល្អប្រសើរ។ នេះគឺជាគោលដៅរបស់យើង»។
ជាមួយគ្នានោះលោក ហ៊ុន ម៉ាណែត ក៏បានណែនាំឱ្យក្រសួងនិងស្ថាប័នពាក់ព័ន្ធត្រូវខិតខំធ្វើបន្តគឺបង្កើតឱ្យបាននូវទារកដ្ឋាន និងមត្តេយ្យសហគមន៍នៅជិតកន្លែងកម្មករនិយោជិតធ្វើការដើម្បីជួយសម្រាលការលំបាក ជាពិសេសដល់កម្មការិនីចំណាកស្រុក។
លោកបញ្ជាក់ថា៖ «យើងបន្តធ្វើបានប៉ុនណាយកប៉ុណ្ណឹងមិនមែនធ្វើ ១ ឆ្នាំបានគ្រប់ទាំងអស់នោះទេព្រោះយើងមានរាប់ពាន់កន្លែងនៅទូទាំងប្រទេស ដោយយើងធ្វើបានប៉ុនណាគឺយកប៉ុណ្ណឹងហើយបន្តធ្វើបន្តទៀត»។
ទាក់ទងនឹងមធ្យោបាយដឹកជញ្ជូនកម្មករនិយោជិត លោក ហ៊ុន ម៉ាណែត ក៏បានណែនាំឱ្យក្រសួងការងារ បេឡាជាតិរបបសន្តិសុខសង្គមនិងអ្នកពាក់ព័ន្ធ កែសម្រួលដើម្បីធានាសុវត្ថិភាពរបស់ពួកគាត់។
លោកបានសង្កត់ធ្ងន់ថា៖ «ក្នុងរយៈពេល ៤ ខែកន្លងមកនេះ តាមក្រសួងនីមួយៗបានធ្វើបានច្រើនរៀងៗខ្លួនហើយ ហើយថា តើរដ្ឋាភិបាល ៤ ខែនេះដេកស្ពឹក រដ្ឋាភិបាលអួត ចេញគោលនយោបាយស្អាត ហើយអត់បានធ្វើអីដូចគេថាមែនទេ?»។
សូមបញ្ជាក់ដែរថា ក្នុងជំនួបជាមួយកម្មករកម្មការិនីក្នុងខេត្តកោះកុងនេះគឺជាកម្មវិធីលើកទី១១ និងជាជំនួបលើកដំបូងក្នុងឆ្នាំ ២០២៤ ដែលលោកនាយករដ្ឋមន្ត្រី ហ៊ុន ម៉ាណែត បានបន្តជួបកម្មករនិយោជិតតាមបណ្តារោងចក្រសហគ្រាសនានា៕
