អង្គការតំណាងជនមានពិការភាពថតរូបអនុស្សាវរីយ៍។ រូបថត CDPO
ភ្នំពេញៈ អង្គការជនពិការកម្ពុជា (CDPO) បានផ្ដល់ចំណេះដឹងទៅដល់អង្គការតំណាងជនមានពិការភាពទាំង ២៤ ខេត្ត-ក្រុង ឱ្យយល់ពីការប្រើប្រាស់បណ្ណសមធម៌តាមប្រព័ន្ធឌីជីថល តាមរយៈការគ្រប់គ្រង និងការចុះឈ្មោះជនមានពិការភាពក្រីក្រនៅតាមមូលដ្ឋាន ក្នុងការទទួលបានកិច្ចគាំពារសង្គម។
លោកស្រី ម៉ាក់ ម៉ូនីកា នាយិកាប្រតិបត្តិអង្គការជនពិការកម្ពុជា បានប្រាប់ឱ្យដឹងនៅថ្ងៃទី៩ ខែមករាថា កន្លងមករាល់ពេលមានបញ្ហាអ្វីមួយកើតឡើង អង្គការតំណាងជនមានពិការភាព តែងតែធ្វើការដោយបញ្ជូនក្រដាស និងចុះទៅផ្ទាល់ជាមួយអាជ្ញាធរភូមិ ឃុំនៅក្នុងខេត្តរបស់ពួកគាត់គ្រប់គ្រង។
លោកស្រីបន្តថា ក្រសួងផែនការ បានបង្កើតអ៊ែប (App) មួយ ដែលប្រព័ន្ធអ៊ែបនេះ នឹងធ្វើការគ្រប់គ្រង ចុះឈ្មោះ និងការអនុវត្តសាកល្បងលើមតិជំទាស់ និងសំណូមពរនៃកម្មវិធីអត្តសញ្ញាណកម្មគ្រួសារក្រីក្រ និងគ្រួសារងាយរងហានិភ័យ។
លោកស្រីបន្តទៀតថា អង្គការលោកស្រី បានរៀបចំសិក្ខាសាលាចែករំលែកចំណេះដឹងពាក់ព័ន្ធទៅនឹងការប្រើប្រាស់បណ្ណសមធម៌តាមប្រព័ន្ធឌីជីថល (Public ID Poor) ទៅដល់អង្គការតំណាងជនពិការទាំង ២៤ខេត្ត-ក្រុង ឱ្យយល់ដឹងពីរបៀបរបបនៃប្រើប្រាស់ប្រព័ន្ធឌីជីថល ការគ្រប់គ្រង និងការចុះឈ្មោះរបស់ជនមានពិការភាពក្រីក្រនៅតាមមូលដ្ឋានរបស់ពួកគាត់ ក្នុងការទទួលបានកិច្ចគាំពារសង្គម។
លោកស្រីម៉ាក់ ម៉ូនីកា បានបញ្ជាក់ថា៖ «ដោយសារអង្គការតំណាងជនពិការជាអ្នកធ្វើការជាមួយជនមានពិការភាពថ្នាក់ក្រោមជាតិ ដូច្នេះកាលពីមុនគាត់បញ្ជូនទៅផ្ទាល់ វាប្រើពេលយូរ និងខាតពេលរបស់គាត់ ប៉ុន្តែឥឡូវនេះគាត់ប្រមូលដាក់នៅក្នុងប្រព័ន្ធអ៊ែបហ្នឹង គឺវាជួយឱ្យគាត់មានភាពងាយស្រួល លឿន និងបានទៅដល់ដៃអាជ្ញាធរផ្សេងៗ»។
លោកស្រី ម៉ាក់ ម៉ូនីកា បានឱ្យដឹងទៀតថា ក្រៅពីនេះ នៅពេលអង្គការតំណាងជនមានពិការភាព បានយល់ពីការប្រើប្រាស់បណ្ណសមធម៌តាមប្រព័ន្ធឌីជីថលហើយ ពួកគាត់ក៏មានសិទ្ធិផ្ដល់ជាមតិជំទាស់ និងការសំណូមពរនៅក្នុងក្របខ័ណ្ឌកិច្ចគាំពារសង្គម ទៅដល់អ្នកអនុវត្ត និងអ្នកគ្រប់គ្រងកម្មវិធីកំណត់អត្តសញ្ញាណកម្មគ្រួសារក្រីក្រ និងគ្រួសារងាយរងហានិភ័យ។
លោកស្រីបានបន្ថែមថា ជារួមការផ្ដល់ចំណេះដឹងទាំងនេះ ទៅដល់អង្គការតំណាងជនមានពិការភាព ដើម្បីអាចឱ្យពួកគាត់ធ្វើការចែករំលែកបន្ដ ទៅដល់សហគមន៍រួមមាន៖ អាជ្ញាធរថ្នាក់ក្រោមជាតិ ក្រុមជួយខ្លួនឯង និងជនមានពិការភាព ដែលជាក្រុមគោលរបស់ខ្លួន។
យោងតាមរបាយការណ៍របស់នាយកដ្ឋានសុខុមាលភាពជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានបង្ហាញថា គិតចាប់ពីឆ្នាំ២០២០ រហូតដល់ឆ្នាំ២០២៣ ក្រសួងសង្គមកិច្ច បានកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន តាមប្រព័ន្ធបច្ចេកវិទ្យាព័ត៌មាន សម្រាប់ការគ្រប់គ្រងពិការភាព បានចំនួនសរុប ៣១៨ ៤៧៣ នាក់ (ស្រីចំនួន ១៥៥ ៤១០ នាក់)។ ក្នុងនោះក្រសួង បានអនុម័តក្នុងការបោះពុម្ពបណ្ណជូនជនមានពិការភាព បានចំនួន ២៥៤ ៤១៩ នាក់។
របាយការណ៍បន្តថា ដោយឡែកការអនុវត្តរបបគោលនយោបាយ ចំពោះជនមានពិការភាពក្រីក្រនៅតាមសហគមន៍ក្នុងឆ្នាំ២០២៣ នៅទូទាំង២៥រាជធានី-ខេត្ត មានជនមានពិការភាព ចំនួន ១៨ ៤០៩ នាក់ (ស្រីចំនួន ៩ ៥០១ នាក់)។
សូមបញ្ជាក់ថា កាលពីថ្ងៃទី៥ ខែមករា ឆ្នាំ២០២៤ អង្គការជនពិការកម្ពុជា បានសហការជាមួយអង្គការអុកស្វាម និងក្រសួងផែនការ រៀបចំសិក្ខាសាលាស្ដីពីការចែករំលែកចំណេះដឹងក្នុងការប្រើប្រាស់បណ្ណសមធម៌តាមប្រព័ន្ធឌីជីថល (Public ID Poor) ដល់អង្គការតំណាងជនពិការ ក្នុងការទទួលបានកិច្ចគាំពារសង្គម៕
