មន្ត្រី គជប នៅក្នុងកិច្ចប្រជុំនៅថ្ងៃទី៩ខែមករាឆ្នាំ២០២៤។ រូបថត គជប
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានណែនាំដល់លេខាធិការដ្ឋានសន្តិសុខបោះឆ្នោត, គណៈកម្មការរាជធានីខេត្ត រៀបចំការបោះឆ្នោត (គធ.ខប) យកចិត្តទុកដាក់សហការអនុវត្តតាមគោលការណ៍ និងវិធានការមួយចំនួន ដើម្បីធ្វើឱ្យដំណើរការការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ឆ្នាំ២០២៤ ប្រព្រឹត្តទៅដោយរលូន ជោគជ័យ សុវត្ថិភាព និងមានសណ្តាប់ធ្នាប់ល្អ គ្មានការបំភិតបំភ័យ គ្មានការគំរាមកំហែង និងគ្មានអំពើហិង្សា។
តាមរយៈសេចក្តីណែនាំ ស្តីពីកិច្ចសហការការងារសន្តិសុខ សុវត្ថិភាព និងសណ្តាប់ធ្នាប់សាធារណៈ ដែលបានចេញផ្សាយនៅថ្ងៃទី៩ ខែមករា ឆ្នាំ ២០២៤ លោកប្រាជ្ញ ចន្ទ ប្រធាន គ.ជ.ប បានលើកឡើងថា លេខាធិការដ្ឋានសន្តិសុខបោះឆ្នោតនៃ គ.ជ.ប និងគធ.ខប ត្រូវសហការ និងពិគ្រោះយោបល់ជាមួយស្ថាប័នពាក់ព័ន្ធគ្រប់រាជធានី ខេត្ត ក្នុងការរៀបចំកម្លាំងនគរបាល ឬកងរាជអាវុធហត្ថ ឬកងយោធពលខេមរភូមិន្ទ ដែលមានមូលដ្ឋានឈរជើងនៅតាមរាជធានី ខេត្ត ឱ្យបំពេញភារកិច្ចជាភ្នាក់ងារសន្តិសុខបោះឆ្នោត តាមដំណាក់កាលនីមួយៗ។
លោកថា ៖ «ដើម្បីការពារមុខសញ្ញា និងគោលដៅសំខាន់ៗ ផ្អែកតាមចំនួនកម្លាំងដែលបានកំណត់ក្នុងផែនការអន្តរស្ថាប័ន និងចាត់វិធានការនានា ដើម្បីការពារសន្តិសុខ សុវត្ថិភាព និងសណ្តាប់ធ្នាប់សម្រាប់ដំណើរការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដោយអនុលោមតាមច្បាប់ស្តីពីការបោះឆ្នោតជាធរមាន បទបញ្ជា និងនីតិវិធីរបស់ គ.ជ.ប ព្រមទាំង ផែនការ ឬក៏សេចក្តីណែនាំផ្សេងៗទៀតដែលពាក់ព័ន្ធនឹងការងារសន្តិសុខ»។
លោក ប្រាជ្ញ ចន្ទ បានបន្តថា គធ.ខប នីមួយៗ ត្រូវពង្រឹងកិច្ចសហការឱ្យបានជាប់ជាប្រចាំជាមួយគណៈបញ្ជាការឯកភាពរដ្ឋបាលរាជធានី ខេត្ត ពិសេសកម្លាំងការពារក្នុងពេលឃោសនាបោះឆ្នោត ការពារការិយាល័យបោះឆ្នោត និងការិយាល័យរាប់សន្លឹកឆ្នោត កម្លាំងត្រៀមអន្តរាគមន៍ ភូមិសាស្ត្រខាងក្រៅ និងក្នុងក្រុងស្រុក ខណ្ឌនីមួយៗ និងកម្លាំងត្រៀមអន្តរាគមន៍នៅនឹងកន្លែងតាមបញ្ជាការដ្ឋាន យោធភូមិភាគនៃរាជធានីខេត្ត ដែលពាក់ព័ន្ធ ដោយផ្អែកតាមផែនការកំណត់។
បើតាម គ.ជ.ប ចាប់ពីពេលនេះ រហូតចប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ គធ.ខប នីមួយៗ ត្រូវស្នើសុំកិច្ចសហការពីគណៈអភិបាលរាជធានី ខេត្ត ដែលជាគណៈបញ្ជាការឯកភាពរដ្ឋបាលរាជធានី ខេត្ត ដើម្បីរៀបចំកិច្ចប្រជុំចម្រុះដោយផ្ទាល់ ឬតាមប្រព័ន្ធអនឡាញ (Online) ម្ដងក្នុងមួយសប្តាហ៍ និងអាចកោះប្រជុំតាមការចាំបាច់ក្នុងគោលបំណងពិភាក្សាលើការងារសន្តិសុខ និងការចាត់វិធានការចាំបាច់ផ្សេងៗ សំដៅកាត់បន្ថយឱ្យបានរាល់បញ្ហាទំនាស់ ឬការប្រឈមនានាដែលកើតមានឡើង និងត្រូវស្វែងរកដំណោះស្រាយឱ្យបានសមស្រប។
លោក ឈឹម ច័ន្ទធន ប្រធានគណ:កម្មការរៀបចំការបោះឆ្នោតខេត្តកំពង់ឆ្នាំង បានប្រាប់ឱ្យដឹងថា លោកទទួលបាននូវសេចក្តីណែនាំរបស់ គ.ជ.ប រួចហើយ ដោយនឹងត្រៀមរៀបចំបើកកិច្ចប្រជុំនៅថ្ងៃទី១២ ខែមករា។
លោកនឹងដឹកនាំគណៈប្រតិភូទៅចូលជួយពិភាក្សា ជាមួយអភិបាលខេត្ត ដើម្បីស្នើសុំកិច្ចសហការបន្ត ដើម្បីធ្វើយ៉ាងណាឱ្យការបោះឆ្នោត ជ្រើសតាំងសមាជិកព្រឹទ្ធសភានៅពេលខាងមុខនេះ ឱ្យប្រព្រឹត្តទៅដោយរលូន តាមការណែនាំរបស់ គ.ជ.ប។
ចំណែកលោក លី សុវណ្ណារិទ្ធ អភិបាលរង និងជាអ្នកនាំពាក្យរដ្ឋបាលខេត្តបន្ទាយមានជ័យ បានឱ្យដឹងដែរថា នៅរាល់គ្រប់ដំណាក់កាលនៃការបោះឆ្នោតទាំងអស់ គណៈបញ្ជាការសន្តិសុខខេត្តបន្ទាយមានជ័យតែងតែចូលរួម និងផ្តល់កិច្ចហហការជាមួយលេខាធិការដ្ឋានគណៈកម្មការរៀបចំការបោះឆ្នោតខេត្ត ដើម្បីធ្វើយ៉ាងណារក្សាឱ្យបាននូវសន្តិសុខ សុវត្ថិភាព និងសណ្តាប់ធ្នាប់សាធារណៈ ជាពិសេសឱ្យការបោះឆ្នោតនោះ ប្រព្រឹត្តទៅដោយសេរី ត្រឹមត្រូវ និងយុត្តិធម៌ព្រមទាំងគ្មានអំពើហឹង្សា។
លោក លី សុវណ្ណារិទ្ធិ ថ្លែងថា៖«និយាយជារួម យើងតែងតែមានកិច្ចសហការគ្នាបានល្អណាស់ជាមួយនឹងគណៈកម្មការរៀបចំការបោះឆ្នោតខេត្តរបស់យើង ព្រោះរាល់ការងារផ្សេងៗពាក់ព័ន្ធនឹងសេចក្តីណែនាំរបស់ថ្នាក់ជាតិ ខេត្តតែងតែទៅចូលរួមជាអធិបតី ដើម្បីផ្សព្វផ្សាយទៅដល់ អ្នកពាក់ព័ន្ធទាំងអស់ មានទាំងអាជ្ញាធរ កម្លាំងសមត្ថកិច្ច អង្គការសង្គមស៊ីវិល និងគណបក្សនយោបាយ ឱ្យមានការចូលរួមនៅក្នុងកិច្ចដំណើការបោះឆ្នោតនីមួយៗ»៕
