គ្រោះថ្នាក់ចរាចរណ៍តាមបណ្ដោយមហាវិថីសម្ដេច ហ៊ុន សែន នាពេលកន្លងទៅ។ ហេង ជីវ័ន
ភ្នំពេញៈ លោក ទូច សុឃៈ អ្នកនាំពាក្យរងក្រសួងមហាផ្ទៃបានឱ្យដឹងថា ត្រឹមតែ ១ សប្ដាហ៍ នាដើមឆ្នាំ ២០២៤ នេះ ករណីគ្រោះថ្នាក់ចរាចរណ៍បានកើតមានឡើងរហូតជិត ៦០ ករណីនៅទូទាំងប្រទេស ដែលបណ្តាលឱ្យមានអ្នកស្លាប់ជាង ២០ នាក់ និងអ្នករងរបូសជិត ៨០ នាក់។
លោក ទូច សុឃៈ បានប្រាប់ឱ្យដឹងនៅថ្ងៃទី ៩ មករាថា របាយការណ៍ក្រសួងមហាផ្ទៃ គិតពីថ្ងៃទី ១ ដល់ថ្ងៃទី ៧ ខែមករា ឆ្នាំ ២០២៤ គ្រោះថ្នាក់ចរាចរណ៍នៅទូទាំងប្រទេសបានកើតឡើងសរុបចំនួន ៥៧ ករណី ដែលបណ្ដាលឱ្យមានអ្នកស្លាប់ចំនួន ២២ នាក់ និងរងរបួស ៧៧ នាក់។
មិនខុសពីឆ្នាំ ២០២៣ នោះទេ ករណីគ្រោះថ្នាក់ចរាចរណ៍នៅតែជាប្រធានបទដ៏ក្តៅគគុកជាពិសេសកើតលើអ្នកប្រើប្រាស់ម៉ូតូតែម្ដង គឺជួបគ្រោះថ្នាក់ច្រើនជាងគេដដែលស្របពេលដែលហេដ្ឋារចនាសម្ព័ន្ធរូបវន្តនៅកម្ពុជា កាន់តែរីកចម្រើនជាលំដាប់។
លោក ទូច សុឃៈ បញ្ជាក់ថា៖ «ជាទិសដៅអាទិភាព ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដាក់បញ្ហាចរាចរណ៍ជាទិសដៅអាទិភាពក្នុងចំណោមទិសដៅអាទិភាពទាំង ៦ របស់ក្រសួងមហាផ្ទៃ ក្នុងអាណត្តិទី៧ នេះ។ ជាបន្តបន្ទាប់ ឯកឧត្ដមឧបនាយករដ្ឋមន្ត្រី តែងដាក់គោលការណ៍អនុវត្តដល់អង្គភាពជំនាញជាប្រចាំ»។
លោកបន្តថា ចំនួនអ្នកស្លាប់ និងរងរបួសនៅតែបន្តកើតឡើងពីមួយថ្ងៃទៅមួយថ្ងៃ ដែលក្នុងនោះបណ្ដាលមក ពីការបើកបរធ្វេសប្រហែស បើកបរក្នុងស្ថានភាពស្រវឹង បើកបរលើសល្បឿនកំណត់មើលស្រាលស្ថានការណ៍ ការចង់ចាញ់ចង់ឈ្នះ មិនយោគយល់គ្នាលើដងផ្លូវ...។ ជារួម កង្វះការឈ្វេងយល់ និងគោរពច្បាប់ចរាចរណ៍ជាដើម ដែលទាមទារឱ្យមានការចូលរួមព្រមគ្នាដើម្បីដោះស្រាយ។
លោក គឹម បញ្ញា នាយកប្រចាំប្រទេសនៃអង្គការមូលនិធិបង្ការរបួសអាស៊ី ឱ្យដឹងដែរថា តួលេខទាំងអ្នកស្លាប់ និងរងរបួសគឺហាក់បីដូចជាខ្ពស់ ហើយសម្រាប់ឆ្នាំ២០២៤ ប្រសិនបើមិនមានវិធានការឱ្យបានខ្លាំងនិងឱ្យមានប្រសិទ្ធភាពជាងមុនទេនោះ គ្រោះថ្នាក់ចរាចរណ៍អាចនឹងហក់ឡើងខ្ពស់។
លោកនិយាយថា៖ «ដូចដែលខ្ញុំបាននិយាយជារឿយៗកន្លងមកអ៊ីចឹង គឺទី១ សុំឱ្យការអនុវត្តច្បាប់ដាក់ជាអាទិភាព ផ្តោតលើកត្តាហានិភ័យ ដោយធ្វើឱ្យមានតម្លាភាពស្មើភាពបានត្រឹមត្រូវនិងទូលំទូលាយទាំងថ្ងៃទាំងយប់។ ទី២ គឺបង្កើនការអប់រំ ផ្សព្វផ្សាយដោយជំរុញការផ្សព្វផ្សាយពីកម្រិតបឋមសិក្សាមក»។
ចំណែកចំណុចទី៣ គឺការប្រើប្រាស់វិធានការផ្សេងៗទៀតដូចជាការកែលម្អហេដ្ឋារចនាសម្ព័ន្ធ ជំរុញការត្រួតពិនិត្យសុវត្ថិភាពយានយន្ត និងការផ្តល់ជំនួយសង្គ្រោះបន្ទាន់ដល់ជនរងគ្រោះ។
លោកបញ្ញាបញ្ជាក់ថា៖ «អ្វីដែលជាខ្ញុំចង់ទាញចំណាប់អារម្មណ៍សម្រាប់ ២០២៤ នេះគឺយើងមានច្បាប់ចរាចរណ៍ផ្លូវគោកសម្រាប់អ្នកបើកបរម៉ូតូ និងអ្នករួមដំណើរត្រូវតែពាក់មួកសុវត្ថិភាពតាំងពីឆ្នាំ ២០០៧។ អ៊ីចឹងសុំឱ្យរដ្ឋាភិបាលជំរុញលើការពាក់មួកនេះឱ្យបាន ១០០% ហើយយើងចាំមើលថាតើគ្រោះថ្នាក់មានការថយចុះទេ»។
ការជំរុញការអនុវត្តច្បាប់ចរាចរណ៍ ដោយអាចប្រើពេល ៣ ខែដំបូងក្នុងការផ្សព្វផ្សាយ អប់រំ ហើយក្នុងត្រីមាសទី ២ អាចជំរុញការរឹតបន្តឹងដោយគ្មានការលើកលែងដោយធ្វើយ៉ាងណាឱ្យអ្នកបើកបរម៉ូតូ និងអ្នករួមដំណើរត្រូវពាក់មួកឱ្យបាន ១០០%។
មួយទៀតលោកក៏បានស្នើឱ្យមានការបណ្តុះបណ្តាលបច្ចេកទេសក្នុងការបើកបរម៉ូតូដែរ បើទោះបីជាមិនទាន់មានការកំណត់ឡើងវិញនៅក្នុងច្បាប់ដែលអ្នកបើកបរម៉ូតូត្រូវមានបណ្ណបើកបរក៏ដោយ ហើយអង្គការលោកនឹងចាប់ផ្តើមសាកល្បងលើការបណ្តុះបណ្តាលបច្ចេកទេសបើកបរម៉ូតូនាពេលខាងមុខអាចក្នុងខែ ២ ឬខែ ៣។
«មួយទៀត ខ្ញុំចង់ឱ្យរដ្ឋាភិបាលជំរុញទៅដល់ស្ថាប័នរដ្ឋ វិស័យឯកជន សង្គមស៊ីវិល គ្រឹះស្ថានសិក្សា រោងចក្រសហគ្រាសត្រូវមានបទបញ្ជាផ្ទៃក្នុងឬគោលនយោបាយសុវត្ថិភាពចរាចរណ៍ និងការរឹតបន្តឹងដោយសាមីអង្គភាពផ្ទាល់ហើយស្ថាប័នដែលគួរធ្វើមុនគេ គឺចាប់ពីស្ថាប័នរដ្ឋាភិបាលមុន»៕
