ភ្នំពេញៈ ក្រសួងសុខាភិបាលបានអំពាវនាវមាតាបិតា ឬអាណាព្យាបាល ប្រញាប់រួសរាន់នាំកូនរបស់ខ្លួន ដែលសង្ស័យ ថាមានបញ្ហាភ្នែក ទៅពិនិត្យព្យាបាលជាមួយគ្រូពេទ្យជំនាញនៅតាមមណ្ឌលថែទាំភ្នែក ឬមន្ទីរពេទ្យ ដែលមានផ្តល់សេវាផ្នែកចក្ខុរោគឱ្យបានទាន់ពេលវេលា។
ការអំពាវនាវនេះត្រូវបានធ្វើឡើងក្នុងសារអបអរសាទរទិវាសុខភាពភ្នែកពិភពលោក ក្រោមប្រធានបទ៖ «ស្រឡាញ់សុខភាពភ្នែកកូនអ្នក» នៅថ្ងៃព្រហស្បតិ៍ ទី១០ ខែតុលានេះ ដើម្បីបង្កើនការយល់ដឹងពីសារៈសំខាន់នៃការថែទាំ និងការពារសុខភាពភ្នែក។
ក្រសួងបានសរសេរថា៖«ស្រឡាញ់ភ្នែកកូនលោកអ្នក គឺត្រូវនាំកូនៗរបស់អ្នក ទៅធ្វើតេស្តភ្នែករបស់ពួកគេជាមួយគ្រូពេទ្យជំនាញ ដែលបង្ហាញពីការចូលរួមជាមួយមាតាបិតា និងអាណាព្យាបាលជុំវិញពិភពលោក ដែលកំពុង ផ្តល់អាទិភាពដល់សុខភាពភ្នែកកូនរបស់ពួកគេ»។
បើយោងតាមការសិក្សាស្រាវជ្រាវរបស់អង្គការសុខភាពពិភពលោក និងទីភ្នាក់អន្តរជាតិសម្រាប់បង្ការភាពពិការភ្នែកបានឱ្យដឹងថា កុមារ ដែលបានផ្តល់វ៉ែនតាកែតម្រូវគំហើញ អាចកាត់បន្ថយភាពបរាជ័យក្នុងការសិក្សាបានរហូតដល់ ៤៤ភាគរយ។
ក្រសួងបានជំរុញឱ្យ មាតាបិតា អាណាព្យាបាល និងគ្រូបង្រៀនគ្រប់រូប ត្រូវយកចិត្តទុកដាក់ផ្តល់អាទិភាពដល់សុខភាព ភ្នែកកុមារ នៅក្នុងចំណោមបញ្ហាសុខភាពអាទិភាពសំខាន់ៗ ដទៃទៀត។ ដូច្នេះបញ្ហាគំហើញថយចុះ របស់កុមារ ត្រូវបានធ្វើរោគវិនិច្ឆ័យ និងព្យាបាលបានទាន់ពេលវេលា។
ក្រសួងក៏បានលើកឡើងផងដែរថា សារអបអរសាទរ ក្រោមប្រធានបទ៖«ស្រឡាញ់សុខភាពភ្នែកកូនអ្នក»គឺមាន គោលបំណងលើកកម្ពស់ការយល់ដឹងពីការថែទាំ និងការពារសុខភាព។ ក្នុងនោះរួមមាន យកចិត្តទុកដាក់ផ្តល់អាទិភាពដល់សុខភាពភ្នែករបស់កុមារ នៅទូទាំងប្រទេសកម្ពុជា និងលើកកម្ពស់ការយល់ដឹង ដោយបញ្ជ្រាបការថែទាំសុខភាពភ្នែក ក្នុងការថែទាំសុខភាពទូទៅរបស់កុមារ។
ក្រសួងគូសបញ្ជាក់ថា៖«ការចុះខ្សោយគំហើញចំពោះកុមារដែលមិនបានកែតម្រូវឱ្យបានទាន់ ពេលវេលា អាចនាំឱ្យមានផលប៉ះពាល់យ៉ាងធ្ងន់ធ្ងរដល់ការសិក្សារបស់ពួកគេ..យើងទាំងអស់គ្នាចូលរួមក្នុងការទប់ស្កាត់ និងកាត់បន្ថយភាពពិការភ្នែក និងគំហើញចុះខ្សោយរបស់ កុមារ នៅព្រះរាជាណាចក្រកម្ពុជា ឱ្យស្ថិតនៅកម្រិតទាបបំផុត»។
ដើម្បីចូលរួមអបអរសាទរទិវាសុខភាពភ្នែកពិភពលោក ឆ្នាំ២០២៤នេះ មន្ទីរសុខាភិបាលខេត្តកំពង់ស្ពឺបានរៀបចំការពិនិត្យ និងព្យាបាលជំងឺភ្នែក រយៈពេល ២ថ្ងៃ ចាប់ពីថ្ងៃទី៩ ដល់ ថ្ងៃទី១០ ខែតុលានេះ នៅក្នុងមន្ទីរពេទ្យបង្អែក ខេត្តកំពង់ស្ពឺ និងមន្ទីរពេទ្យបង្អែកគងពិសី។
លោក ហុក គ្រី ប្រធានមន្ទីរសុខាភិបាលខេត្តកំពង់ស្ពឺបានឱ្យដឹងថា ការពិនិត្យព្យាបាលវះកាត់ជំងឺភ្នែកជូនប្រជាពលរដ្ឋដោយឥតគិតថ្លៃ ក្នុងរយៈពេល២ថ្ងៃនេះមានចំនួន ២៤២នាក់ (ស្រី១៤៦)។ ក្នុងនោះ វះកាត់ភ្នែកឡើងបាយ ចំនួន ៦០ នាក់(ស្រី៤៦) វះកាត់ជំងឺកន្ទុយថ្លែនភ្នែកចំនួន៧នាក់ (ស្រី៤) និង ផ្តល់វ៉ែនតាចំនួន១៤ដើម។
ការវាយតម្លៃ នៃការស្ទង់មតិពីភាពពិការភ្នែកឆ្នាំ ២០០៧បានបង្ហាញថា មូលហេតុចម្បងបំផុតនៃភាពពិការភ្នែកទាំងសងខាងក្នុងប្រទេសកម្ពុជា គឺបណ្តាលមកពីជំងឺភ្នែកឡើងបាយ៕