លោកនាយករដ្ឋមន្ត្រី ហ៊ុន ម៉ាណែត ជួបពិភាក្សាជាមួយលោក Justin Trudeau នាយករដ្ឋមន្ត្រីកាណាដា នៅទីក្រុងវៀងចន្ទន៍ ប្រទេសឡាវ កាលពីថ្ងៃទី១០ ខែតុលា។ STPM
កាណាដាគ្រោងបើកស្ថានទូតរបស់ខ្លួននៅទីក្រុងភ្នំពេញនាពេលឆាប់ៗខាងមុខនេះ ដែលជាដំណឹងមួយអ្នកវិភាគយល់ថា បង្ហាញពីការរីកចម្រើននៃទំនាក់ទំនងរវាងប្រទេសទាំងពីរ និងកិច្ចប្រឹងប្រែងពិពិធកម្មការទូតរបស់កម្ពុជា។
ផែនការបើកការទូតនៅកម្ពុជានេះ ត្រូវបានបញ្ជាក់ដោយលោក Justin Trudeau នាយករដ្ឋមន្ត្រីកាណាដា ក្នុងពេលជួបពិភាក្សាការងារជាមួយលោកនាយករដ្ឋមន្ត្រី ហ៊ុន ម៉ាណែត នៅទីក្រុងវៀងចន្ទន៍ នៅក្រៅកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធកាលពីថ្ងៃទី១០ ខែតុលា។
ទំព័រហ្វេសប៊ុករបស់លោក ហ៊ុន ម៉ាណែត បានសរសេរដូច្នេះថា៖ «ឯកឧត្តម Justin Trudeau បានជម្រាបជូនសម្ដេចបវរធិបតីថា ក្នុងការពង្រឹងទំនាក់ទំនងលើវិស័យការទូត ដោយកាណាដាគ្រោងបើកស្ថានឯកអគ្គរាជរដ្ឋទូត នៅរាជធានីភ្នំពេញនាពេលឆាប់ៗខាងមុខ»។
លោក Trudeau ក៏បានបញ្ជាក់ពីការបន្តពង្រឹងទំនាក់ទំនង និងកិច្ចសហប្រតិបត្តិការនៃប្រទេសទាំងពីរឱ្យកាន់តែរឹងមាំថែមទៀត ដែលក្នុងនោះ ផ្នែកពាណិជ្ជកម្ម កាណាដានឹងបញ្ជូនគណ:ប្រតិភូពាណិជ្ជកម្ម មកបំពេញទស្សនកិច្ចនៅកម្ពុជាដើម្បីពិភាក្សាអំពីការជំរុញ និងលើកកម្ពស់ពាណិជ្ជកម្មទ្វេភាគី។
លោកក៏បានបង្ហាញពីសុទិដ្ឋិនិយមចំពោះទំនាក់ទំនងពាណិជ្ជកម្មរវាងកាណាដា និងអាស៊ានតាមរយៈកិច្ចព្រមព្រៀងពាណិជ្ជកម្មសេរី អាស៊ាន-កាណាដា ដែលនឹងត្រូវអនុម័តនាពេលខាងមុខនេះ។
លោក ហ៊ុន ម៉ាណែត ក៏បានប្រាប់លោក Trudeau ដែរថា កម្ពុជាក៏គ្រោងបើកស្ថានទូតរបស់ខ្លួននៅកាណាដាផងដែរ។ លោកថ្លែងអំណរគុណដល់កាណាដាដែលចូលរួមក្នុងកិច្ចខិតខំប្រឹងប្រែងស្វែងរកសុខសន្ដិភាពនៅកម្ពុជា តាមរយៈការបញ្ជូនកងរក្សាសន្ដិភាពនៅទសវត្សរ៍ឆ្នាំ១៩៩០ ការរួមចំណែកបោសសម្អាតមីន និងការផ្ដល់ជំនួយអភិវឌ្ឍន៍ផ្សេងៗមកកម្ពុជា។
កាណាដាគឺជាដៃគូពាណិជ្ជកម្មទ្វេភាគីលំដាប់ទី៧ របស់កម្ពុជា ដែលបានរួមចំណែកដល់ការអភិវឌ្ឍសង្គមសេដ្ឋកិច្ចកម្ពុជា ដូចជាការបង្កើតការងារ និងការអភិវឌ្ឍជំនាញវិជ្ជាជីវៈសម្រាប់យុវជនកម្ពុជា។
ទិន្នន័យកត់ត្រាដោយអគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា ចាប់ពីខែមករា ដល់ខែកញ្ញា ឆ្នាំ២០២៤ ការផ្លាស់ប្តូរពាណិជ្ជកម្មទ្វេភាគីកម្ពុជា-កាណាដា មានទឹកប្រាក់សរុប ៨៩៥,៩៨ លានដុល្លារ កើនឡើង ២៨,២ ភាគរយបើធៀបរយៈពេលដូចគ្នាក្នុងឆ្នាំ ២០២៣។
ក្នុងនោះទំនិញកម្ពុជានាំទៅប្រទេសកាណាដា មានទឹកប្រាក់ ៨៤៨,៦៨ លានដុល្លារ កើនឡើង ៣០,៨ ភាគរយ និងទំនិញកាណាដានាំចូលមកកម្ពុជា មានចំនួន ៤៧,៣ លានដុល្លារ ធ្លាក់ចុះ ៥,៦ ភាគរយ។
ទំនិញដែលកម្ពុជានាំទៅកាណាដា មានភាគច្រើនជាផលិតផលសម្លៀកបំពាក់ កាបូប ស្បែកជើង គ្រឿងបង្គុំអេឡិចត្រូនិកអគ្គិសនី និងកង់ ជាដើម។ ចំណែកទំនិញកាណាដា នាំចូលមកវិញភាគច្រើនគឺជាគ្រឿងអេឡិចត្រូនិក។
ដើម្បីជំរុញកិច្ចសហប្រតិបត្តិការផ្នែកពាណិជ្ជកម្ម និងការវិនិយោគ កន្លងមកផ្នែកឯកជនកម្ពុជា ដែលតំណាងដោយសភាពាណិជ្ជកម្មកម្ពុជាបានទៅបើកការិយាល័យតំណាងរបស់ខ្លួននៅទីក្រុងតូរ៉ន់តូនៃប្រទេសកាណាដា ដើម្បីពង្រឹង និងពង្រីកការផ្សព្វផ្សាយពីផលិតផលកម្ពុជា និងផ្តល់ព័ត៌មានដើម្បីទាក់ទាញវិនិយោគិនកាណាដាឱ្យមកបណ្ដាក់ទុនផ្ទាល់នៅកម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានថ្លែងថា វាជាដំណឹងគួរឲ្យរីករាយដែលកាណាដានឹងបើកស្ថានទូតរបស់ខ្លួននៅកម្ពុជា ដែលបង្ហាញពីការរីកចម្រើននិងវិវត្តជាវិជ្ជមាននៃទំនាក់ទំនងនៃប្រទេសទាំងពីរ។
លោកថា៖ «ម្យ៉ាងទៀត ផែនការបើកស្ថានទូតនេះវាស្របជាមួយនឹងកិច្ចខិតខំប្រឹងប្រែងធ្វើពិពិធកម្មការទូតរបស់រដ្ឋាភិបាលជាមួយបណ្ដាប្រទេសទាំងអស់ ទាំងក្នុងតំបន់និងពិភពលោក។ នេះក៏ជាការរំលេចឲ្យឃើញថា កម្ពុជាមិនបានផ្កាប់មុខទៅរកតែប្រទេសណាមួយនោះទេ។ កម្ពុជាចង់មានទំនាក់ទំនងស៊ីជម្រៅជាមួយបណ្ដាប្រទេសទាំងអស់ តាមគោលការទូតផ្កាចម្រុះពណ៌»៕
