លោក ទេព អស្នារិទ្ធ អ្នកនាំពាក្យក្រសួងព័ត៌មាន ក្នុងជំនួបជាមួយថ្នាក់ដឹកនាំ និងបុគ្គលិកនៃមន្ទីរព័ត៌មានខេត្តកំពង់ធំ នៅថ្ងៃទី១១ ខែតុលា ឆ្នាំ២០២៤។ រូបថត សហការី
ភ្នំពេញ៖ មតិណែនាំនាពេលថ្មីៗនេះរបស់ក្រសួងព័ត៌មានដែលជំរុញឱ្យមន្ទីរតាមខេត្តត្រួតពិនិត្យ និងគ្រប់គ្រងការមតិសាធារណៈ ជាពិសេសតាមប្រព័ន្ធផ្សព្វផ្សាយសង្គម បានធ្វើឱ្យមានការព្រួយបារម្ភអំពីថាតើចេតនាចម្បងគឺដើម្បីរក្សាស្ថិរភាព ឬរារាំងមតិក្នុងស្រុក។
មតិណែនាំដែលមានគោលបំណងស្វែងយល់ពីកង្វល់របស់សហគមន៍ និងការបង្កើតមតិសាធារណៈ ត្រូវបានគេមើលឃើញថាដោយអ្នកខ្លះថាជាដាវមុខពីរដែលអាចបង្ក្រាបការរិះគន់ដោយអចេតនា ក្រោមរូបភាពនៃការថែរក្សាសន្តិភាព។
លោក ទេព អស្នារិទ្ធ អ្នកនាំពាក្យក្រសួងព័ត៌មាន បានបកស្រាយមតិណែនាំនេះ ក្នុងជំនួបជាមួយថ្នាក់ដឹកនាំ និងបុគ្គលិកនៃមន្ទីរព័ត៌មានខេត្តកំពង់ធំ នៅថ្ងៃទី១១ ខែតុលា ឆ្នាំ២០២៤។
លោកបានសង្កត់ធ្ងន់លើតួនាទីដែលកំពុងកើនឡើងរបស់មន្ទីរព័ត៌មានក្នុងការគ្រប់គ្រងព័ត៌មានក្នុងស្រុក និងការបញ្ចេញមតិសាធារណៈក្នុងយុគសម័យឌីជីថល ដោយផ្ដោតលើតម្រូវការសម្រាប់ការត្រួតពិនិត្យយ៉ាងសកម្មចំពោះបញ្ហាដែលកំពុងកើតមាន។
លោក អស្នារិទ្ធ បានពន្យល់ថា គោលបំណងនៃការត្រួតពិនិត្យ និងប្រមូលព័ត៌មានសាធារណៈ គឺដើម្បីស្តាប់សំឡេងប្រជាពលរដ្ឋ។
លោកបានប្រាប់ភ្នំពេញប៉ុស្តិ៍ថា៖ «គោលការណ៍ដ៏ខ្ពស់របស់សម្ដេចធិបតី រដ្ឋបាលរាជធានី-ខេត្ដ នៅតាមបណ្ដារាជធានី-ខេត្ដទាំងអស់ គឺត្រូវប្រើមន្ទីរព័ត៌មានជាសេនាធិកាព័ត៌មានសាធារណៈមតិ។ យើងស្តាប់តម្រូវការរបស់ប្រជាពលរដ្ឋក្នុងជីវភាពរស់នៅប្រចាំថ្ងៃ ហើយលើកឡើងពីបញ្ហាដើម្បីជំរុញការអភិវឌ្ឍន៍នៅថ្នាក់ឃុំ ស្រុក និងថ្នាក់ខេត្ត»។
ក្នុងចំណោមមតិណែនាំការងារទាំងបួន ភារកិច្ចមួយគឺតាមដានស្ថានការណ៍ដែលកំពុងកើតមាន ដើម្បីស្វែងយល់ពីប្រធានបទសំខាន់ៗដែលចាប់អារម្មណ៍ក្នុងចំណោមប្រជាជនទូទៅ និងសហគមន៍នៅក្នុងផ្នែកផ្សេងៗនៃខេត្ត។
យោងតាមសារាចរណែនាំថា៖ «មិនត្រូវបណ្តោយទុកឱ្យរឿងរ៉ាវណាមួយនៅបណ្តែតក្នុងសាធារណមតិ ជាពិសេសលើបណ្តាញទំនាក់ទំនងសង្គម រហូតអាចប៉ះពាល់ដល់សតិអារម្មណ៍របស់មហាជន និងឈានដល់ធ្វើឱ្យប៉ះពាល់ដល់ប្រយោជន៍សាធារណៈ ឬបង្កហានិភ័យនានាជាយថាហេតុ រំខានដល់ភាពសុខសាន្តក្នុងសហគមន៍ដាច់ខាត»។
កិច្ចការទី ២ គឺបង្កើតយន្តការ និងយុទ្ធសាស្ត្រសម្របសម្រួលការងារព័ត៌មាន តាមរយៈវិធីសាស្ត្រសកម្ម។
លោក ទេព អស្នារិទ្ធ អ្នកនាំពាក្យក្រសួងព័ត៌មាន ក្នុងជំនួបជាមួយថ្នាក់ដឹកនាំ និងបុគ្គលិកនៃមន្ទីរព័ត៌មានខេត្តកំពង់ធំ នៅថ្ងៃទី១១ ខែតុលា ឆ្នាំ២០២៤។ រូបថត សហការី
លោក អស្នារិទ្ធ បានឱ្យដឹងថា៖ «ការងារបុរេសកម្មនេះគួរតែក្លាយជាការអនុវត្តជាប្រចាំក្នុងការងារមតិសាធារណៈ ដោយចងក្រង និងគ្រប់គ្រងមាតិកាឌីជីថលសម្រាប់ការផ្សព្វផ្សាយលើបណ្តាញទំនាក់ទំនងសង្គមដែលប្រជាជននិយម ដូចជា Facebook, TikTok និង YouTube ហើយផ្តោតលើវិស័យអាទិភាពដែលកំណត់ដោយរដ្ឋបាលខេត្ត ដើម្បីជំរុញការអភិវឌ្ឍន៍ និងលើកកម្ពស់ជីវភាពរស់នៅប្រចាំថ្ងៃរបស់ប្រជាពលរដ្ឋ»។
មតិណែនាំលើកិច្ចការទី៣ ដោយបន្តពង្រឹងទំនាក់ទំនងល្អ និងការសហការជាបណ្តាញ ជាមួយគ្រប់តួអង្គទាំងអស់ក្នុងមូលដ្ឋាននៅគ្រប់កម្រិត ព្រមទាំងប្រព័ន្ធផ្សព្វផ្សាយទាំងអស់ដើម្បីសម្រេចឱ្យបានការកសាងនូវប្រព័ន្ធការងារព័ត៌មាននិងផ្សព្វផ្សាយក្នុងទម្រង់តួអង្គតែមួយ សំដៅជំរុញការងារសាធារណមតិឱ្យកាន់តែមានប្រសិទ្ធភាព ទាន់ពេលវេលាគាំទ្រដល់ការបន្តធានាស្ថិរភាពក្នុងសហគមន៍ និងនិរន្តរភាពនៃការផ្តល់នូវអត្ថប្រយោជន៍ជូនប្រជាពលរដ្ឋ។
កិច្ចការទី៤ គឺត្រូវរៀបចំ «ផ្ទះ» ពោលគឺប្រព័ន្ធ និងនីតិវិធីការងារ ដោយផ្តោតលើការបន្តពង្រឹងផែនការច្បាស់លាស់ភ្ជាប់ជាមួយនឹងរបៀបក្នុងការវាស់វែងលទ្ធផលនិងប្រសិទ្ធភាពការងារ បន្តស្រាវជ្រាវនិងស្រូបយកចំណេះដឹង ជំនាញ និងវិធីសាស្ត្រអនុវត្តថ្មីបន្ថែមទៀត ដើម្បីពង្រឹងសមត្ថភាពឱ្យស្របនឹងតម្រូវការក្នុងសង្គមឌីជីថល និងការវិវត្តនៃបច្ចេកវិទ្យា នាពេលបច្ចុប្បន្ន និងទៅអនាគត។
លោកបានបញ្ជាក់ថា ថ្វីដ្បិតតែមន្ទីរព័ត៌មានមិនមានជំនាញទៅលើវិស័យផ្សេងៗយ៉ាងណាក៏ដោយ ក៏មន្ទីរដើរតួជាសេនាធិការជូនថ្នាក់ដឹកនាំរាជធានី-ខេត្ដ ដើម្បីប្រាប់ដល់ថ្នាក់ដឹកនាំ ក៏ដូចជាមន្ទីរជំនាញផ្សេងៗនូវសេចក្ដីត្រូវការជាក់ស្ដែងចំពោះក្ដីកង្វល់របស់ប្រជាពលរដ្ឋស្វែងរកដំណោះស្រាយជូនពួកគេក្នុងការថែរក្សាភាពសុខសាន្ដ ក៏ដូចជាការពារប្រយោជន៍សាធារណៈ។
ស្របពេលនៃការអភិវឌ្ឍសង្គម និងបច្ចេកវិទ្យា ដែលប្រជាពលរដ្ឋអាចប្រើប្រាស់អ៊ីនធឺណិត និងបណ្ដាញសង្គម ជាវេទិកាដែលប្រជាពលរដ្ឋលើកឡើងពីបញ្ហានានា ជាពិសេសការរស់នៅប្រចាំថ្ងៃរបស់សហគមន៍។
លោក អស្នារិទ្ធ បានប្រាប់ភ្នំពេញប៉ុស្ដិ៍ថា៖ «វិស័យជាក្ដីកង្វល់របស់ប្រជាពលរដ្ឋ រួមមាន វិស័យកសិកម្ម វិស័យពាក់ព័ន្ធការដោះដូរ ពាណិជ្ជកម្ម ការរកទទួលទានដើម្បីអភិវឌ្ឍជីវភាពគ្រួសាររបស់ពួកគាត់ សង្គម និងសហគមន៍មូលដ្ឋានរបស់ពួកគាត់រៀងៗខ្លួន»។
លោកបានអះអាងថា៖ «ខ្ញុំបានស្ដាប់របាយការណ៍ពីមន្ទីរព័ត៌មានខេត្ដ [កំពង់ធំ] និងអាជ្ញាធរក្នុងខេត្ដ ទទួលការសាទររបស់ប្រជាពលរដ្ឋក្នុងខេត្ដកំពង់ធំអំពីភាពដឹកនាំដែលបានកំពុងជំរុញសហគមន៍ក្នុងខេត្ដមានកំណើន និងទទួលបានការអភិវឌ្ឍជាបន្ដបន្ទាប់ ដោយបញ្ហាមួយចំនួនដែលបានជួបប្រទះត្រូវបានដោះស្រាយ តាមរយៈការផ្ដល់ព័ត៌មានដោយផ្ទាល់ក្ដី និងការផ្ដល់ព័ត៌មានពីមន្ទីរព័ត៌មាន»។
លោកបានបន្ដថា ក្នុងក្របខណ្ឌការងារនេះក៏ត្រូវផ្ដោតការយកចិត្ដទុកដាក់ចំពោះយុវជនថា តើពួកគេមានសេចក្ដីត្រូវការអ្វីខ្លះ លើវិស័យអ្វីខ្លះ ដូចជា ការអប់រំ វិស័យការងារ ដែលទាមទារឱ្យមានយន្ដការសម្របសម្រួលឆ្លើយតបទៅនឹងតម្រូវការទាំងនេះ ហើយពង្រឹងការចងក្រងបណ្ដាញការងារ ដើម្បីស្តាប់ការលើកឡើង ឬមតិយោបល់របស់ប្រជាពលរដ្ឋ ដើម្បីធានាថាការបារម្ភ និងបញ្ហានានាត្រូវបានឮ យកចិត្តទុកដាក់ពីសំណាក់ថ្នាក់ដឹកនាំក្នុងមូលដ្ឋានផ្ទាល់ ដើម្បីឆ្លើយតបទៅតាមតម្រូវការនោះឱ្យទាន់ពេលវេលា។
លោកបានបន្ដថា មធ្យោបាយការងាររបស់មន្ទីរព័ត៌មានផ្ដោតលើការផ្សព្វផ្សាយលើវេបសាយ ផេក បណ្ដាញទំនាក់ទំនងសង្គម ប្រព័ន្ធផ្សព្វផ្សាយបែបប្រពៃណី ដូចជា វិទ្យុ និងទូរទស្សន៍ រួមទាំងសារព័ត៌មានផ្សេងៗ។
លោក អស្នារិទ្ធ បានឱ្យដឹងទៀតថា រាជរដ្ឋាភិបាលបាននិងកំពុងសហការជាមួយគ្រប់វិស័យ រួមទាំងវិស័យឯកជនសំដៅដាក់ចេញសកម្មភាពការងារបន្ថែមទៀត ដើម្បីរួមចំណែកជំរុញកំណើនសេដ្ឋកិច្ច ជាពិសេសដើម្បីប្រែក្លាយកម្ពុជា ជាប្រទេសអភិវឌ្ឍន៍ មានប្រាក់ចំណូលកម្រិតខ្ពស់៕
