លោកនាយករដ្ឋមន្ត្រី ហ៊ុន ម៉ាណែត បានប្រាប់ឲ្យក្រសួងសាធារណការ និងដឹកជញ្ជូន និងក្រុមហ៊ុនរ៉ូយ៉ាល់ រេលវេ កម្ពុជា ពន្លឿនការការពិភាក្សាដើម្បីឈានទៅដល់ការចុះអនុស្សរណៈនៃការយោគយល់គ្នាឲ្យបានយ៉ាងយូរនៅចុងឆ្នាំ២០២៤នេះ ដើម្បីបន្ថែមសមត្ថភាពដឹកជញ្ជូនរបស់កម្ពុជា ជាពិសេសតាមផ្លូវដែក។
ថ្លែងក្នុងពិធីអបអរសាទរខួប ២០ឆ្នាំ នៃការចូលជាសមាជិកអង្គការពាណិជ្ជកម្មពិភពលោករបស់កម្ពុជា នៅថ្ងៃទី១៤ តុលា ២០២៤ លោក ហ៊ុន ម៉ាណែត បានលើកឡើងថា ការចរចាលើកិច្ចការនេះបានជាប់គាំងមកជាច្រើនឆ្នាំមកហើយ ហើយពេលនេះមិនអាចពន្យារបានទៅទៀតទេ។
លោកថ្លែងថា៖ «ដូច្នេះ សុំឲ្យអ្នកឧកញ៉ា គិត ម៉េង និងឯកឧត្តម ប៉េង ពោធិ៍នា ធ្វើម៉េចចរចាឲ្យចប់នូវ អនុស្សរណៈនៃការយោគយល់គ្នារឿងផ្លូវដែកហ្នឹង ធ្វើឲ្យចប់ត្រឹមដាច់ឆ្នាំនេះដើម្បីយើងធ្វើការងារពង្រឹងអាហ្នឹង។ ព្រោះតែអត់ចរចាចប់ ខ្ញុំដកហើយ»។
លោកថ្លែងបន្តថា ដំណើរការនៃការអភិវឌ្ឍផ្លូវដែកនេះ មិនចាំបាច់ល្អឥតខ្ចោះនៅដំណាក់កាលដំបូងនោះទេ អ្វីដែលសំខាន់គឺឲ្យគម្រោងនេះដើរទៅមុខ។ បន្ទាប់មក គុណភាពនឹងត្រូវពង្រឹងជាបន្តបន្ទាប់នាពេលខាងមុខ។
លោកថា៖ «ធ្វើយ៉ាងណាឲ្យមានការឯកភាគគ្នាជាគោលការណ៍ដើម្បីអាចដំណើរការបាន ដូចជាតាមរយៈការ upgrade ឬជួសជុលយ៉ាងណាដែលអាចឲ្យវាដំណើរការបាន។ ឥឡូវថវិកាយើងមានខ្លះសម្រាប់សិក្សាផ្លូវដែក។ ប៉ុន្តែ យើងត្រូវចរចាឲ្យហើយមុននឹងដាក់ថវិកានេះបញ្ចូលទៅក្នុងផែនការផ្លូវដែក បើមិនដូច្នេះទេ យើងនឹងចាយលុយអត់ប្រយោជន៍»។
លោកបានលើកឡើងពីថវិកាជាង ៣០០លានយន់ ឬ ជាង ៤២លានដុល្លារដែលរដ្ឋាភិបាលចិនបានផ្ដល់ឲ្យកម្ពុជាជាជំនួយឥតសំណង ដែលការប្ដេជ្ញានេះត្រូវបានធ្វើឡើងនៅប្រទេសឡាវកាលពីសប្ដាហ៍មុន។ លោកថា ថវិកានេះគឺមានគោលដៅប្រើប្រាស់លើការធ្វើឲ្យប្រសើរឡើងដល់ផ្លូវដែក។
ដោយលើកឡើងពីគម្រោងពង្រីកផ្លូវដែកឆ្ពោះទៅទិសខាងកើត លោក ហ៊ុន ម៉ាណែត ក៏បានបង្ហាញពីសក្ដានុពលនៃផ្លូវដែកដែលកាត់បន្ថយការចំណាយក្នុងការដឹកជញ្ជូនបានយ៉ាងច្រើន។ លោកក៏បង្ហើបអំពីផែនការស្ដារទន្លេមេគង្គនៅផ្នែកខាងលើផងដែរ ដើម្បីតភ្ជាប់ផ្លូវទឹករបស់កម្ពុជា ដែលការស្ដារទន្លេនេះរួមមានទាំងការបូមខ្សាច់ផងដែរ។
យោងតាមក្រសួងសាធារណការនិងដឹកជញ្ជូន ផ្លូវដែកកម្ពុជា ត្រូវបានសាងសង់ដំបូងក្នុងទសវត្សរ៍ឆ្នាំ១៩៣០ ដល់ឆ្នាំ១៩៤០ ដែលមានចំនួន ២ខ្សែ គឺខ្សែភាគខាងជើង និងខ្សែភាគខាងត្បូង ដែលមានប្រវែងសរុប ៦៥០គីឡូម៉ែត្រ។
ផ្លូវដែកភាគខាងជើង មានប្រវែង ៣៨៦គីឡូម៉ែត្រ ពីភ្នំពេញ ទៅដល់ប៉ោយប៉ែត កសាងឡើងចាប់ពីឆ្នាំ១៩២៩ ដល់ឆ្នាំ១៩៤២ ក្នុងសម័យអាណានិគមបារាំង ចំណែកផ្លូវដែកភាគខាងត្បូង ត្រូវបានកសាងឡើងចន្លោះឆ្នាំ១៩៦០ ដល់ឆ្នាំ១៩៦៩ ក្នុងសម័យសង្គមរាស្ត្រនិយម ប្រវែង ២៦៤គីឡូម៉ែត្រ។
បច្ចុប្បន្ននេះ ផ្លូវដែកទាំងពីរខ្សែ ត្រូវបានសាងសង់ និងជួសជុលដាក់ឱ្យប្រើប្រាស់ឡើងវិញតាមរយៈការសហការរវាងក្រសួងសាធារណការ និងដឹកជញ្ជូន និងក្រុមហ៊ុន រ៉ូយ៉ាល់ រេលវេ កម្ពុជា (RRC)ដែលផ្ដល់សេវាកម្មដឹកអ្នកដំណើរនិងទំនិញ៕