ភ្នំពេញៈ ក្រសួងបរិស្ថានបានចុះកិច្ចព្រមពៀងសហប្រតិបត្តិការជាមួយនិង មជ្ឈមណ្ឌលកោងកាងអន្តរជាតិក្នុងប្រទេសចិន ដើម្បីពង្រឹងកិច្ចសហការ ក្នុងការស្តារព្រៃកោងកាងឡើងវិញ ខណៈដែលកម្ពុជាមានព្រៃកោងកាងជាង ៥ម៉ឺនហិកតាក្នុងខេត្តឆ្នេរសមុទ្រចំនួន៤។
ការចុះកិច្ចព្រមពៀងនេះត្រូវបានធ្វើឡើងនៅថ្ងៃទី១២ ខែតុលា រវាង លោកស្រី ស៊ុនលាង អគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន និងលោក Kong Fanchang អគ្គនាយករង និងជាតំណាងមជ្ឈមណ្ឌលកោងកាងអន្តរជាតិ (the International Mangrove Center-IMC) ដែលមានទីស្នាក់ការនៅទីក្រុង Shenzhen នៃប្រទេសចិន។ នេះបើយោងតាមក្រសួងបរិស្ថាននាថ្ងៃអាទិត្យ ទី១៣ ខែតុលានេះ។
ក្រសួងបញ្ជាក់ថា៖«កិច្ចព្រមពៀងសហប្រតិបត្តិការនេះ គឺផ្តោតលើការពង្រឹងកិច្ចសហការ ការផ្លាស់ប្តូរបទពិសោធន៍ និងការស្តារព្រៃកោងកាង ក៏ដូចជាការលើកកម្ពស់ការយល់ដឹងសាធារណៈអំពីសារៈសំខាន់ នៃប្រព័ន្ធអេកូឡូស៊ីព្រៃកោងកាង»។
លោកស៊ុនលាងបានថ្លែងក្នុងពិធីចុះកិច្ចព្រមពៀងនោះថា ព្រៃកោងកាងបានផ្តល់ជាសេវាកម្មប្រព័ន្ធអេកូឡូស៊ីដល់ប្រជាពលរដ្ឋនៅតាមតំបន់ឆ្នេរ និងជាគោលដៅលំហែបៃតង ដែលភ្ញៀវជាតិ និងអន្តរជាតិតែងតែចូលចិត្តទៅកំសាន្ត។
លើសពីនោះ លោកក៏បានលើកឡើងពីយុទ្ធសាស្ត្រចក្រាវិស័យបរិស្ថានរបស់កម្ពុជា ដែលផ្តោតលើ «ភាពស្អាត» «ភាពបៃតង» និង«ចីរភាព»។ ចំពោះភាពបៃតង គឺក្រសួងបរិស្ថាន បានធ្វើការចែកកូនឈើដោយឥតគិតថ្លៃដល់សាធារណជន ដែលមានបំណងចូលរួមដាំស្តារ និងបង្កើនភាពបៃតងក្នុងសហគមន៍។ ក្នុងនោះក៏មានការចែកកូនកោងកាងនៅតាមខេត្តតំបន់ឆ្នេរទាំង៤ផងដែរ ដូចជា ខេត្តកោះកុង ព្រះសីហនុ កំពត និងខេត្តកែប។
ក្រសួងបញ្ជាក់ថា៖«កិច្ចសហប្រតិបត្តិការនេះ គឺស្របទៅនិង«ភាពបៃតង» ដោយការចូលរួមស្តារព្រៃកោងកាង និងអភិរក្សព្រៃកោងកាង ហើយឯកឧត្តមសង្ឃឹមយ៉ាងមុតមាំថា តាមរយៈ ការបង្កើតមជ្ឈមណ្ឌលកោងកាងអន្តរជាតិ យើងនឹងអាចរួមកំលាំងគ្នាជាសកលក្នុងការស្តារ និងអភិរក្សព្រៃកោងកាងទាំងក្នុងប្រទេសខ្លួន នៅថ្នាក់តំបន់ និងសកលលោក»។
លោកបានក៏បានស្វាគមន៍ដល់ប្រតិភូចិន ដែលបានមកបំពេញទស្សនសិក្សាអំពីព្រៃកោងកាងនៅកម្ពុជាផងដែរ។
លោក Kong Fanchang បានថ្លែងអំណរគុណ ដល់ក្រសួងបរិស្ថានដែលបានគាំទ្រដល់ការបង្កើតមជ្ឈមណ្ឌលកោងកាងអន្តរជាតិ ដែលចាប់តាំងពីដំបូង រហូតមកដល់បច្ចុប្បន្ន មានប្រទេសជាង២០បានចូលរួមគាំទ្រជាបន្តបន្ទាប់។ នេះបង្ហាញឱ្យឃើញពីចំណងមិត្តភាពដ៏រឹងមាំរវាងកម្ពុជា និងចិន។ នេះបើយោងតាមប្រភពដដែលនេះ។
លោកក៏បានឱ្យដឹងផងដែរថា នៅថ្ងៃទី៥ ខែវិចិ្ឆកាខាងមុននេះ នឹងមានពិធីចុះហត្ថលេខាលើកិច្ចព្រមព្រៀងបង្កើតមជ្ឈមណ្ឌលកោងកាងអន្តរជាតិជាផ្លូវការ នៅទីក្រុងShenzhen ដោយមានការចូលរួមពីថ្នាក់ដឹកនាំជាច្រើនប្រទេស។ កម្ពុជា និងសាធារណរដ្ឋ ម៉ាដាហ្គាស្កា គឺជាភ្ញៀវដ៏សំខាន់ ព្រោះថា កម្ពុជា និងប្រទេសម៉ាដាហ្គាស្កា គឺជាប្រទេសសហស្ថាបនិក ក្នុងការបង្កើតមជ្ឈមណ្ឌលនេះឡើង។
កម្ពុជាមានផ្ទៃដីព្រៃកោងកាងសរុបចំនួន ៥៨ ៨០០ហិកតា។ ក្នុងនោះ ខេត្តកោះកុង មានព្រៃកោងកាងទំហំ ៤៦ ៥២៩ហិកតា ដែលជាខេត្ត មានព្រៃកោងកាងច្រើនជាងគេ ក្នុងចំណោមខេត្តជាប់មាត់សមុទ្ររបស់កម្ពុជា។ ក្រៅពីនោះខេត្តព្រះសីហនុ ដែលមានព្រៃកោងកាងទំហំ ៩ ៣៥២ហិកតា ខេត្តកំពតមានទំហំ ១ ៩៦៦ហិកតា និងខេត្តកែបទំហំ ១ ០០៥ហិកតា។
លោកសុខ សុខុម ប្រធានអង្គការ ស្រលាញ់ធនធានធម្មជាតិកម្ពុជា (CNRO) ដែលកំពុងតែចូលរួមធ្វើសកម្មភាពអភិរក្សធនធានធម្មជាតិបានគាំទ្រចំពោះការចុះកិច្ចព្រមព្រៀងនេះ។
លោកបានលើកឡើថា ប្រសិនបើមិនមានការរួមគ្នាក្នុងការការពារ និងដាំស្តារឡើងវិញនោះទេ ព្រៃកោងកាងនឹងបាត់បង់នៅថ្ងៃណាមួយជាមិនខានឡើយ។
លោកថ្លែងដូច្នេះថា៖«បើយើងរួមគ្នាធ្វើឱ្យមានពណ៌បៃតងឡើង វាធ្វើឱ្យសុខមាលភាពពលរដ្ឋល្អប្រសើរ និងជីវភាពក៏ប្រសើរដែរ..ឱ្យតែរួមគ្នាអភិវឌ្ឍ កុំរួមគ្នាបំផ្លាញ ខ្ញុំគាំទ្រ និងចូលរួម។ បើមិនរួមគ្នាអភិរក្សទេ បាត់បង់អស់ហើយព្រៃកោងកាង។ បាត់បង់ទាំងធនធានធម្មជាតិ បាត់បង់ទាំងភ្ញៀវទេសចរ»។
លោកបន្តថា ធនធានធម្មជាតិជីវៈចម្រុះសមុទ្រជាច្រើនប្រភេទកើតមានឡើង និងរស់នៅដោយពឹងអាស្រ័យលើព្រៃកោងកាងនេះ។ លោកជឿជាក់ថា ការចុះកិច្ចព្រមពៀងសហប្រតិបត្តិការនេះនឹងជួយនាំមកនូវ គម្រោងថវិកា ដើម្បីចូលរួមការពារ និងដាំស្តារព្រៃកោងកាងនៅកម្ពុជាឡើងវិញបន្ថែមទៀត។
អង្គការសត្វ ព្រៃនិងរុក្ខជាតិកម្ពុជា (Fauna & Flora- Cambodia Programme) ក៏បានលើកឡើងផងដែរថា កោងកាងពិតជាមានសារ:សំខាន់ណាស់។ ពួកវាមិនត្រឹមតែការពារឆ្នេរទប់ទល់និងរលកយក្សនិងការហូរច្រោះប៉ុណ្ណោះទេ ប៉ុន្តែ ថែមទាំងផ្ទុកទៅដោយកាបូនដែលជួយកាត់បន្ថយការប្រែប្រួលអាកាសធាតុ និងគាំទ្រដល់ជីវៈចម្រុះរាប់ពាន់ប្រភេទនៅក្នុងសមុទ្រផងដែរ។
អង្គការបានអំពាវនាវដូច្នេះថា៖«យើងចូលរួមទាំងអស់គ្នា ដើម្បីការពារតាមរយ:ការមិនកាប់បំផ្លាញព្រៃកោងកាង ហើយចូលនិយាយថា “ទេ” ចំពោះការបូមខ្សាច់ និងសកម្មភាពផ្សេងៗទៀតដែលប៉ះពាល់ដល់ប្រព័ន្ធអេកូឡូស៊ីដល់សំខាន់ទាំងនេះ»៕