ក្រសួងការងារ និងបណ្ដុះបណ្តាលវិជ្ជាជីវៈ នៅថ្ងៃទី១៤ ខែតុលានេះ បានប្រាប់ប្រជាពលរដ្ឋកម្ពុជាដែលកំពុងព្យាយាមចេញទៅរកការងារនៅប្រទេសថៃ ឲ្យមានការប្រុងប្រយ័ត្នខ្ពស់ ខណៈដែលជនឆបោកឬមេខ្យល់មួយចំនួនបានព្យាយាមអូសទាញពលករក្នុងស្រុកឲ្យទៅធ្វើការនៅប្រទេសថៃដោយគ្មានឯកសារស្របច្បាប់។
ក្រសួងការងារបានឲ្យដឹងថា កាលពេលថ្មីៗនេះមានការអូសទាញរបស់មេខ្យល់ និងក្រុមហ៊ុនមួយចំនួនឱ្យចូលពលរដ្ឋដែលចង់ទៅធ្វើការនៅថៃ ប្រើទិដ្ឋាការទេសចរណ៍ ហើយបានអះអាងថា ពួកគេមិនចាំបាច់មានឯកសារគ្រប់គ្រាន់ទេ។
ការអះអាងរបស់ពួកគេធ្វើឡើងតាមសេចក្តីសម្រេចរបស់គណៈរដ្ឋមន្ត្រីថៃ កាលពីថ្ងៃទី២៤ ខែកញ្ញា ឆ្នាំ២០២៤ កន្លងទៅ។
ប៉ុន្តែ ក្រសួងសូមបញ្ជាក់ថា ការចុះឈ្មោះនេះទទួលនិងការទទួលយកទិដ្ឋាការទេសចរណ៍នេះ គឺសម្រាប់តែពលករកំពុងស្នាក់នៅ និងធ្វើការនៅប្រទេសថៃស្រាប់ជាមួយនិយោជក (ថៅកែ) ហើយពួកគេមិនមានឯកសារគ្រប់គ្រាន់។ ការអនុវត្តនេះមិនសម្រាប់ពលករដែលទើបឆ្លងដែនចូលប្រទេសថៃនាពេលថ្មីៗនេះទេ។
ក្រសួងការងារបញ្ជាក់ដូច្នេះថា៖ «សូមបងប្អូនពលករប្រុងប្រយ័ត្នខ្ពស់ ចៀសវាងការចាញ់បោកមេខ្យល់ តាមរយៈការផ្សព្វផ្សាយព័ត៌មានមិនពិតក្នុងន័យអូសទាញឲ្យឆ្លងដែនទៅធ្វើការ នៅប្រទេសថៃដោយគ្មានឯកសារស្របច្បាប់ ដែលអាចបណ្តាលឱ្យខាតបង់ពេលវេលា ប្រាក់កាស និងអាចធ្លាក់ខ្លួនជាជនរងគ្រោះនៃអំពើជួញដូរមនុស្ស និងការកេងប្រវ័ញ្ចកម្លាំងពលកម្ម ព្រមទាំងប្រឈមមុខនឹងវិធានការច្បាប់របស់ប្រទេសថៃ»។
ពលរដ្ឋខ្មែរជាង ១លាននាក់កំពុងធ្វើការនៅប្រទេសថៃ ដែលក្នុងនោះមានទាំងអ្នកដែលមិនមានឯកសារគ្រប់គ្រាន់ផងដែរ។
កាលពីខែកញ្ញា អាជ្ញាធរថៃបានឃាត់ខ្លួនពលករខុសច្បាប់ពីប្រទេសនានាដែលបានចូលទៅធ្វើការនៅក្នុងប្រទេសថៃ នៅក្នុងយុទ្ធនាការ ១២០ថ្ងៃរបស់ខ្លួន។
ក្នុងយុទ្ធនាការដែលប្រព្រឹត្តទៅបាន ១០៦ ថ្ងៃ ពលករខុសច្បាប់ជាង ២៥ម៉ឺននាក់ត្រូវបានចាប់ខ្លួន ដែលក្នុងនោះភាគច្រើនមកពីប្រទេសមីយ៉ាន់ម៉ា ដែលមានរហូតដល់ទៅជិត២០ម៉ឺននាក់។ ចំណែកពលករខុសច្បាប់ពីកម្ពុជាមានចំនួន ៣៩៧៣៦នាក់។ នេះបើតាមការចុះផ្សាយរបស់កាសែត The Nation Thailand៕