ភ្នំពេញ៖ យុទ្ធនាការចាក់វ៉ាក់សាំងការពារជំងឺឆ្កែឆ្កួត នឹងចាប់ផ្ដើមភ្នំពេញ ខេត្តកណ្តាល និងខេត្តបាត់ដំបងចាប់ពីថ្ងៃទី២១ ខែតុលា ដល់ថ្ងៃទី១ ខែវិច្ឆិកា ឆ្នាំ២០២៤។
ក្រុមចាក់វ៉ាក់សាំង ៣០០ក្រុមនឹងទៅដល់តាមសហគមន៍ពីផ្ទះមួយទៅផ្ទះមួយ ដែលនេះជាផ្នែកនៃកិច្ចខិតខំប្រឹងប្រែងដើម្បីការពារជីវិតមនុស្សនិងសត្វរបស់អ្នកពីជំងឺឆ្កែឆ្កួត។
យុទ្ធនាការនេះក៏ត្រូវបានបញ្ចូលជាមួយផែនការនៃយុទ្ធសាស្ត្រថ្នាក់ជាតិសម្រាប់ការគ្រប់គ្រង និងលុបបំបាត់ជំងឺឆ្កែឆ្កួតនៅកម្ពុជា ដែលត្រូវដឹកនាំដោយអគ្គនាយកដ្ឋានសុខភាពសត្វ និងផលិតកម្មសត្វ (GDAHP) និងអង្គការបេសកកម្មជំងឺឆ្កែឆ្កួត ដែលជាគម្រោងរបស់អង្គការសប្បុរសធម៌ផ្តល់សេវាបសុពេទ្យអន្តរជាតិ និងអង្គការសង្ក្រោះសត្វនៅកម្ពុជា។
ការចម្លងដោយសុនខខាំគឺជាមូលហេតុចម្បងនៃការស្លាប់ដោយសារជំងឺឆ្កែឆ្កួតចំពោះមនុស្ស ដែលនេះត្រូវបានគេប៉ាន់ប្រមាណថាមានមនុស្សប្រហែល ៣០ម៉ឺននាក់ត្រូវបានសុនខខាំជារៀងរាល់ឆ្នាំនៅក្នុងប្រទេសកម្ពុជា។
កម្មវិធីការចាក់វ៉ាក់សាំងការពារជំងឺឆ្កែឆ្គួតដល់សត្វសុនខ ត្រូវបានគេបញ្ជាក់ថា ជាមធ្យោបាយដ៏មានប្រសិទ្ធភាពបំផុតក្នុងការគ្រប់គ្រងការរីករាលដាលនៃជំងឺឆ្កែឆ្កួត ដែលជំងឺនេះបណ្តាលឱ្យមនុស្សស្លាប់នៅពេលមានរោគសញ្ញាចាប់ផ្តើមវិវត្តន៍។
លោកបណ្ឌិត តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ (GDAHP) លើកទឹកចិត្តដល់ម្ចាស់សត្វសុនខទាំងអស់នាំយកសត្វរបស់ខ្លួនចូលរួមក្នុងការចាក់វ៉ាក់សាំងនេះ។
លោកបានថ្លែងថា៖ «ការចាក់វ៉ាក់សាំងការពារជំងឺឆ្កែឆ្កួត គឺជាវិធីសាស្ត្រដ៏មានប្រសិទ្ធភាពបំផុតដើម្បីការពារអាយុជីវិតមនុស្សនិងសត្វ ហើយយើងប្តេជ្ញាថានឹងបន្តការងាររបស់យើងឆ្ពោះទៅរកប្រទេសដែលគ្មានជំងឺឆ្កែឆ្កួតនៅកម្ពុជា។ យើងស្នើឱ្យម្ចាស់សត្វសុនខទាំងអស់ ធ្វើកិច្ចសហការជាមួយគម្រោងនេះ និងទទួលបានវ៉ាក់សាំងដោយឥតគិតថ្លៃសម្រាប់សត្វសុខនរបស់ពួកគេ»។
យុទ្ធនាការឆ្នាំ ២០២៤ នេះ បានបន្តពីគម្រោងកាលពីឆ្នាំ ២០២៣ ដែលកាលពីឆ្នាំទៅសត្វសុនខ ចំនួន ៧៤៩៨៣ ក្បាលត្រូវបានចាក់វ៉ាក់សាំងក្នុងអំឡុងពេលយុទ្ធនាការ ត្រឹមតែរយៈពេល ១០ ថ្ងៃនៅក្នុងរាជធានីភ្នំពេញ និងខេត្តកណ្តាល ដែលធ្វើឱ្យមានការប្រសើរឡើងយ៉ាងខ្លាំងនៅក្នុងការគ្រប់គ្រងជំងឺឆ្កែឆ្កួតនៅកម្ពុជា។
លោកស្រី ហេង ម៉ូរ៉ានី អគ្គនាយិការងនៃអគ្គនាយកដ្ឋានសុខភាពសត្វ និងផលិតកម្មសត្វបានថ្លែងក្នុងពិធីបើកយុទ្ធនាការថ្ងៃទី ១៤ តុលានេះថា៖ «ជាបញ្ហាមួយគួរឱ្យព្រួយបារម្ភ និងជាអាទិភាពនៅក្នុងតំបន់ ក៏ដូចជានៅក្នុងសកលលោកទាំងមូល។ ដើម្បីធានាបាននូវការថែរក្សាសុខភាពមនុស្សនិងសត្វ យុទ្ធនាការនេះ បានចុះអប់រំណែនាំ ផ្សព្វផ្សាយដល់សាធារណៈជនទាំងអស់ ដើម្បីបង្កើនការយល់ដឹង និងការផ្លាស់ប្តូរឥរិយាបទប្រកបដោយប្រសិទ្ធភាព ដើម្បីឆ្លើយតបទៅនឹងស្ថានភាពជាក់ស្ដែង និងតម្រូវការ ពិតប្រាកដក្នុងការលុបបំបាត់ជំងឺឆ្កែឆ្កួតនៅកម្ពុជា ស្របតាមគោលដៅសកលលុបបំបាត់ជំងឺនេះ នៅឆ្នាំ២០៣០»។
វេជ្ជបណ្ឌិត Amy Nicole Lewis អ្នកគ្រប់គ្រងគម្រោងអន្តរជាតិនៅអង្គការផ្តល់សេវាបសុពេទ្យអន្តជាតិ បានប្រាប់ឲ្យដឹងថា ជំងឺឆ្កែឆ្កួតបង្កការឈឺចាប់យ៉ាងខ្លាំងសម្រាប់មនុស្សនិងសត្វ។ ទោះជាយ៉ាងនេះក្តី ក៍វានៅតែអាចការពារបាន ១០០ភាគរយផងដែរ។
លោកវេជ្ជបណ្ឌិតបានបន្ដថា៖ «ដើម្បីសម្រេចបាននូវការកាត់ផ្តាច់ជំងឺនេះនៅក្នុងហ្វូងសត្វសុនខ និង បញ្ឈប់ជំងឺនេះពីដំណើរការរបស់វា យ៉ាងហោចណាស់ យើងត្រូវចាក់វ៉ាក់សាំងឲ្យសត្វសុខនឲ្យបាន ៧០ភាគរយនៃសត្វសុនខទាំងអស់»។
លោក Lewis បន្ថែមថា៖ «ដើម្បីធ្វើដូចនេះបាន ក្រុមរបស់យើងពឹងផ្អែកលើម្ចាស់សត្វដែលពួកគាត់ត្រូវនាំសត្វរបស់ពួកគាត់ដោយផ្ទាល់នៅពេលដែលចាក់វ៉ាក់សាំង។ ប្រសិនបើសុនខរបស់អ្នកមិនធ្លាប់ប្រលែងនោះទេ សូមយកឱកាសនេះ ក្នុងការនាំយកយុទ្ធនាការចាក់វ៉ាក់សាំងនេះ ដើម្បីឱ្យសុនខរបស់អ្នកកាន់តែមានភាពស្និទ្ធស្នាលជាមួយនឹងមនុស្ស។ ការចាប់កាន់និងអង្អែលពួកគេថ្នមៗ គឺជាការចាប់ផ្តើមដ៏ល្អមួយ ហើយត្រូវចាប់ពួកគេឲ្យជាប់នៅក្នុងរយៈពេលពីរបីវិនាទី ដើម្បីធ្វើការចាក់វ៉ាក់សាំងឱ្យបានសម្រេច»។
វាមានសារៈសំខាន់ណាស់ ដែលមនុស្សជាច្រើនអាចបង្ហាញពីវត្តមានរបស់សត្វសុនខរបស់ពួកគេ សម្រាប់ការទទួលការចាក់ថ្នាំបង្ការដើម្បីគាំទ្រដល់បេសកកម្មសង្គ្រោះជីវិតមួយនេះ។
អ្នកស្ម័គ្រចិត្តកម្ពុជានិងអន្តរជាតិនឹងត្រូវបានបង្កើតឡើងដែលជាផ្នែកមួយនៃក្រុមចាក់វ៉ាក់សាំងដោយផ្ទាល់តែម្តងដោយក្នុងនោះមាននិស្សិតពេទ្យសត្វចូលរួមពីសាកលវិទ្យាល័យភូមិន្ទកសិកម្ម និងវិទ្យាស្ថានជាតិកសិកម្ម។ ដៃគូសំខាន់ៗផ្សេងជាច្រើនទៀត រួមមាន វិទ្យាស្ថានជាតិសុខភាពសាធារណៈ (NIPH) និងនាយកដ្ឋានប្រយុទ្ធនឹងជំងឺឆ្លង ក្រសួងសុខាភិបាលដែលបានផ្តល់ថ្នាំបង្ការមុនពេលប៉ះពាល់សត្វសុនខដល់អ្នកស្ម័គ្រចិត្តទាំងអស់ និងសមាគមសុខុមាលភាពសត្វភ្នំពេញ (PPAWS) ជាមួយអង្គការសង្គ្រោះសត្វកម្ពុជា (ARC) សម្រាប់ការផ្តល់ការព្យាបាលសត្វ។
ការគ្រប់គ្រងនៃមហាវិទ្យាល័យវេជ្ជសាស្ត្រសត្វនៃវិទ្យាស្ថានជាតិកសិកម្មបានឲ្យតម្លៃនៃយុទ្ធនាការនេះ ដោយផ្តល់សិស្សរបស់ពួកគាត់ចូលរួមក្នុងសហគមន៍យ៉ាងទូលំទូលាយមួយនេះ។
វេជ្ជបណ្ឌិតបានលើកឡើងថា៖ «ក្នុងនាមយើងខ្ញុំជាដៃគូជាមួយអង្គការបសុពេទ្យអន្តរជាតិ (WVS) លើយុទ្ធនាការចាក់វ៉ាក់សាំងជំងឺឆ្កែឆ្គួតដល់សត្វសុនខ និស្សិតនៃមហាវិទ្យាល័យបសុពេទ្យនៃវិទ្យាស្ថានជាតិកសិកម្ម (NIA) បានទទួលចំណេះដឹង និងជំនាញពីការរៀបចំយុទ្ធនាការចាក់ថ្នាំបង្ការ និងគ្រប់គ្រងការចាក់វ៉ាក់សាំងសម្រាប់សត្វសុនខនៅក្នុងទីក្រុង និងសហគមន៍។ លើសពីនេះទៅទៀត យុទ្ធនាការចាក់វ៉ាក់សាំងការពារសុនខលក្ខណទ្រង់ទ្រាយធំមួយនេះ នឹងចូលរួមចំណែកយ៉ាងសំខាន់ក្នុងការកាត់បន្ថយហានិភ័យពីជំងឺឆ្កែឆ្កួតនៅក្នុងរាជធានីភ្នំពេញ និងខេត្តគោលដៅផ្សេងទៀត។ យើងសង្ឃឹមថាយុទ្ធនាការនេះនៅតែបន្តសកម្មភាពរបស់ខ្លួនបន្តទៀតនៅក្នុងប្រទេសកម្ពុជា»។
សម្រាប់សាធារណៈត្រូវបានជំរុញលើកទឹកចិត្តឱ្យរាយការណ៍អំពីសត្វដែលសង្ស័យថាមានជំងឺឆ្កែឆ្គួត ដែលពួកគេអាចទំនាក់ទំនងទៅកាន់លេខ ១១៥ ដែលអ្នកជំនាញនឹងផ្ដល់ដំបូន្មាន និងផ្ដល់ប្រឹក្សាពីសុខភាពមនុស្សអំពីជំងឺឆ្កែឆ្កួត។
សញ្ញានៃជំងឺឆ្កែឆ្កួតនៅក្នុងសត្វសុនខ ឬថនិកសត្វផ្សេងទៀត មានដូចជាខឹងម៉ួម៉ៅ ការផ្លាស់ប្តូរការព្រុស ការខាំ ចលនាសកម្មភាពប្លែកៗ ការហៀរទឹកមាត់ និងការស្លាប់ដោយមិនបានរំពឹងទុក។
កាលវិភាគចាក់វ៉ាក់សាំងក្នុងយុទ្ធនាការនិងព័ត៌មានបន្ថែមលោកអ្នកអាចមើលបាននៅតាម៖
cambodia.missionrabies.com.
ដើម្បីទទួលបានព័ត៌មានថ្មីៗអំពីយុទ្ធនាការនេះលោកអ្នកអាចចូលតេលេក្រាម Channel របស់ Mission Rabies Cambodia នៅទីនេះបាន៖ https://t.me/missionrabiescambodia៕