កម្ពុជាកែសម្រួលការរចនាសម្ព័ន្ធគ្រប់គ្រងកងទ័ពមួកខៀវដោយដកតួនាទីនេះពីក្រសួងការបរទេសនិងសហប្រតិបត្តិការអន្តរជាតិ មកនៅក្រោមក្រសួងការពារជាតិទាំងស្រុង ដោយលោកនាយករដ្ឋមន្ត្រី ហ៊ុន ម៉ាណែត លើកឡើងថា បេសកម្មការពារសន្តិភាពជាប់ពាក់ព័ន្ធផ្ទាល់នឹងវិស័យការពារជាតិ។
លោក ហ៊ុន ម៉ាណែត បានបញ្ជាក់អំពីការកែសម្រួលនេះនៅក្នុងពិធីរំឭកខួប ៣០ឆ្នាំ នៃថ្ងៃបង្កើតកងពលតូចលេខ៧០ ដែលប្រព្រឹត្តិទៅកាលពីថ្ងៃទី១៥ ខែតុលា។
លោកបានថ្លែងដូច្នេះថា៖ «ល្ងាចមិញនេះ (១៤ តុលា) ខ្ញុំបានសម្រេចក្រោយពីពិភាក្សាជាមួយឯកឧត្តម ទៀ សីហា និងឯកឧត្តម សុខ ចិន្តាសោភា ដើម្បីកែសម្រួលគណៈកម្មការជាតិកិច្ចការបញ្ជូនកងកម្លាំងចូលរួមបេសកកម្មរក្សាសន្តិភាពអង្គការសហប្រជាជាតិ ដែលពីមុនដឹកនាំដោយរដ្ឋមន្ត្រីការបរទេស។ ឥឡូវកិច្ចការនេះភាគច្រើនពាក់ព័ន្ធទៅនឹងការការពារជាតិ និងកងទ័ព។
លោកបន្តថា៖ «អីចឹងបានសម្រេចឲ្យកែសម្រួលដោយជូនទៅឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងការពារជាតិធ្វើជាប្រធានវិញ ដើម្បីឲ្យមូលតែម្ដងក្នុងការដឹកនាំសម្របសម្រួលកងកម្លាំង PKO នៅក្រោមក្រសួងការពារជាតិ»។
រចនាសម្ព័ន្ធថ្មី នឹងមានរដ្ឋលេខាធិការក្រសួងការបរទេសជាអនុប្រធាន ដើម្បីសម្របសម្រួលទំនាក់ទំនងការទូតជាមួយអង្គការសហប្រជាជាតិ និងប្រទេសនានា។
រហូតទល់ពេលនេះ កម្ពុជាបានបញ្ជូនកងទ័ពមួកខៀវទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាតិជិត ១ម៉ឺននាក់ហើយនៅក្នុងប្រទេសនិងតំបន់សរុបចំនួន១០ គិតចាប់ពីឆ្នាំ២០០៥មក។
បច្ចុប្បន្ន កងទ័ពកម្ពុជាជំនួន ៦២៧នាក់ (ស្រី១៣០) កំពុងបំពេញបេសកម្មនៅប្រទេសចំនួន ៤ប្រទេស រួមទាំងនៅលីបង់ ដែលជាទីតាំងប្រយុទ្ធគ្នារវាងកងទ័ពអ៊ីស្រាអែល និងក្រុមហេសបូឡាផងដែរ។ នៅទីនេះមានកម្ពុជាជិត ១៨០នាក់។
លោក ហ៊ុន ម៉ាណែត ក៏បានប្រាប់ឲ្យលោក ទៀ សីហា រដ្ឋមន្ត្រីការពារជាតិតាមដានសភាពការណ៍នៅប្រទេសលីបង់ ដើម្បីអាចមានវិធានការទាន់ពេលវេលា រួមមានការជម្លៀសចេញក្នុងស្ថានភាពចាំបាច់។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងថា ការផ្ទេរការគ្រប់គ្រងពីក្រសួងមួយទៅក្រសួងមួយទៀត មិនមានអ្វីទាស់ខុសនោះទេ ប៉ុន្តែអ្វីដែលសំខានគឺប្រសិទ្ធភាពនៃការធ្វើការ។
លោកថ្លែងដូច្នេះថា៖ «ទី១ ធ្វើយ៉ាងណាឲ្យមានប្រសិទ្ធភាព ទី២ត្រូវធ្វើឡើងស្របទៅតាមច្បាប់របស់កម្ពុជា និងស្របតាមគោលការណ៍របស់អង្គការសហប្រជាជាតិ។ វាជារឿងត្រឹមត្រូវដែលដាក់ការងារនេះឲ្យស្ថិតនៅក្រោមក្រសួងការពារជាតិ ពីព្រោះរឿងខ្លះអាចជាកិច្ចការពាក់ព័ន្ធនិងការលាក់ការណ៍សម្ងាត់ផងដែរ»៕