ភ្នំពេញៈ អគ្គនាយកដ្ឋានពន្ធនាគារបានបញ្ចប់ការស្រាវជ្រាវលើវីដេអូឃ្លីបផឹកស៊ី និងរាំរបស់ជនជាតិចិន និងខ្មែរនៅមណ្ឌលអប់រំកែប្រែម១ (ព្រៃស) នោះហើយ ដែលលទ្ធផលបានបង្ហាញថា វីដេអូនោះគឺជាវីដេអូចាស់ កាលពី ២០២៣ កន្លងមក ខណៈដែលអគ្គាធិការដ្ឋាន ក្រសួងមហាផ្ទៃកំពុងតែបន្តស្រាវជ្រាវលើករណីនេះបន្ថែមទៀត។
លទ្ធផលនៃស្រាវជ្រាវរបស់មន្រ្តីជំនាញ នៃអគ្គនាយកដ្ឋានពន្ធនាគារលើវីដអូដែលគេបង្ហោះតាមបណ្តាញសង្គមចាប់ពីថ្ងៃអាទិត្យ ទី១៣ ខែតុលាបានបង្ហាញថា វីដេអូនោះ គឺជាវីដអូចាស់ ដែលកើតឡើងតាំងពីឆ្នាំ២០២៣។ នេះបើយោងតាមអ្នកនាំពាក្យ អគ្គនាយកដ្ឋានពន្ធនាគារ លោក នុត សវនា។
លោក នុត សវនា បានប្រាប់ភ្នំពេញ ប៉ុស្តិ៍នៅថ្ងៃពុធនេះថា៖ «វីដេអូហ្នឹងពីឆ្នាំ២០២៣។ វីដេអូចាស់ ហើយជាក់ស្តែងយើងហ៊ានថាអញ្ជឹងដោយសារម្នាក់ក្នុងចំណោមគ្នាគាត់ក្នុងវីដេអូហ្នឹងត្រូវបានដោះលែងដូចជាកាលពីខែឧសភា ឆ្នាំ២០២៤។ អញ្ជឹងបានន័យថា ហេតុការហ្នឹង វាកើតឡើងមុនហ្នឹង។ វាមិនអាចថា ខែកញ្ញា ខែអីថ្មីៗនេះទេ។ យើងស៊ើបសួរដោយសំងាត់ រវាងមន្រ្តី ហើយនឹងជនជាប់ឃុំដែលពាក់ព័ន្ធហ្នឹងឃើញថា វីដេអូហ្នឹងកើតឡើងនៅពេលហ្នឹង»។
លោកបន្តថា ទោះយ៉ាងណា អគ្គាធិការដ្ឋាន ក្រសួងមហាផ្ទៃ ទើបតែបានចាត់ក្រុមការងារចុះស្រាវជ្រាវលើករណីនេះទៀតកាលពីព្រឹកថ្ងៃពុធនេះទី១៦ ខែតុលានេះ។
លោកបានលើកឡើងថា ការចុះស្រាវជ្រាវដោយអង្គភាពផ្សេងគ្នានេះ គឺដើម្បីធានាឱ្យបាននូវសុចរិតភាព សុក្រិតភាព ប្រសិទ្ធភាព និងឯករាជភាពក្នុងធ្វើការស្រាវជ្រាវ។
អ្នកនាំពាក្យរងក្រសួងមហាផ្ទៃ លោក ទូច សុឃៈ បានឱ្យដឹងថា ក្នុងចំណោមអ្នកក្នុងវីដេអូឃ្លីបនោះ គឺមានម្នាក់បានចេញពីពន្ធនាគាររួចហើយ បន្ទាប់ពីបានអនុវត្តទោសរយៈពេល ២ឆ្នាំ។ ទោះយ៉ាងណា មន្រ្តីជំនាញរបស់ក្រសួងនៅតែបន្តស្រាវជ្រាវតទៅទៀត ក្នុងការប្រមូលវីដេអូផ្សេងៗ និងឯកសារដែលពាក់ព័ន្ធ។
លោកបញ្ជាក់ថា៖ «កន្លងទៅ ថ្មីៗនេះ ក្រសួងមហាផ្ទៃក៏បានធ្វើការបោសសម្អាតភាពមិនប្រក្រតីក្នុងពន្ធនាគារមួយចំនួន ដែលអគ្គនាយកដ្ឋានពន្ធនាគារបានដុតដៃដុតជើងលើករណីហ្នឹង។ វីដេអូមួយចំនួន អាចជាវីដេអូចាស់ ដែលវា ជាប់ពាក់ព័ន្ធទៅនឹងការបោសសម្អាតហ្នឹង។ វីដេអូមួយចំនួន វាអាចថាតើ ជាប់ពាក់ព័ន្ធទៅនឹងរឿងថ្មីៗដែរ ឬក៏អត់។ អញ្ជឹងគឺថា យើងបន្តស្រាវជ្រាវ ឱ្យកាន់តែច្បាស់លាស់បន្តទៅទៀត»។
លោកក៏បានឱ្យដឹងផងដែរថា កាលពីថ្ងៃអង្គារ ទី១៥ ខែតុលានេះ លោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃបានដឹកនាំកិច្ចប្រជុំបន្ទាន់ពិសេសមួយ ជាមួយមន្រ្តីជំនាញរបស់អគ្គនាយកដ្ឋានពន្ធនាគារ។ ក្នុងឱកាសនោះ លោកឧបនាយករដ្ឋមន្រ្តី បានអនុវត្តតាមការដឹកនាំរបស់ ប្រមុខរដ្ឋាភិបាល ដោយបានណែនាំឱ្យមានការអង្កេតស្រាវជ្រាវ ផ្ទៀងផ្ទាត់ ឬ ធ្វើអធិការកិច្ចឱ្យច្បាស់លាស់ជាបន្តទៀត ដើម្បីរកភាពពិតឱ្យឃើញ។
លោកថ្លែងដូច្នេះថា៖«ក្នុងក្រមខណ្ឌដែលរកឃើញ មន្រ្តីណាដែលពាក់ព័ន្ធ ឬក៏ធ្វើឱ្យមានបាតុភាពបែបហ្នឹងកើតឡើង ដែលយើងគិតថា បើសិនជារកឃើញថា វីដេអូហ្នឹង ជាវីដេអូថ្មី ហើយមន្រ្តីទាំងឡាយណាដែលបង្កឱកាសឱ្យមានការធ្វើសកម្មភាពបែបហ្នឹង គឺថាត្រូវតែកែសម្រួលហើយ»។
លើសពីនោះ លោក ស សុខាក៏បានដាក់បទបញ្ជាបន្ថែមទៀតគឺត្រូវរកឱ្យឃើញថាតើ ពិតជាមានបន្ទប់ ដែលបំពាក់នូវឧបករណ៍សម្ភារទំនើបៗ ទូរទស្សន៍ ឬក៏កន្លែងផ្សេងៗ ដែលអាចច្រៀង និងរាំ ខុសពីស្តង់ដារពន្ធនាគារដែររឺអត់។ ប្រសិនបើ រកឃើញថាមានមែន គឺត្រូវតែធ្វើការបោសម្អាតឱ្យស្អាត។
ចំពោះក្រុមឧក្រិដ្ឋជន ជាក្រុមៗ ដែលជាបក្សពួករបស់ពួកគេ ឬមានចរិតគ្រោះថ្នាក់ ត្រូវតែបំបែកពួកគេ ដែលមិនអាចឱ្យពួកគេនៅជុំគ្នាបានទេនៅក្នុងពន្ធនាគារ ឬមន្ទីរឃុំឃាំងតែមួយបានទេ។ លោករដ្ឋមន្រ្តីបានណែនាំឱ្យមានការ បញ្ជូនពួកគេទៅពន្ធនាគារតាមបណ្តាខេត្តមួយចំនួន ដែលអាចធ្វើឡើងវិលជុំក្នុងរយៈពេលកំណត់ណាមួយ។
ប្រមុខរដ្ឋាភិបាលក៏បានលើកឡើងពីបញ្ហានេះផងដែរកាលពីថ្ងៃអង្គារ។ លោកនាយករដ្ឋមន្រ្តីហ៊ុន ម៉ាណែតបានពិភាក្សា និងប្រគល់ភារៈកិច្ច ដល់លោកឧបនាយករដ្ឋមន្រ្តីស សុខា ឱ្ពិពិនិត្យករណីនេះឡើងវិញ។
លោកនាយករដ្ឋមន្រ្តីមានប្រសាសន៍ថា៖«ឆែកមើល ស្រាវជ្រាវមើលរឿងហ្នឹង។ វាយ៉ាងម៉េច ព្រោះឥលូវអាតាមហ្វេសប៊ុកនេះ វាមិនដឹងថា ស្អីជាស្អីទេ។ ជួនកាល អា១០ឆ្នាំមុន ក៏ចេញមកឥលូវដែរ។ ប៉ុន្តែឱ្យធ្វើយ៉ាងណា ជាពិសេសធ្វើការកែទម្រង់ ពង្រឹង ពន្ធនាគាររបស់យើង នៅទូទាំងប្រទេស។ ម្សិលមិញឯកឧត្តមស សុខាបានរាយការណ៍មក ខ្ញុំឯកភាព។ ទី១ ពង្រឹងម១នេះតាមរយៈការផ្លាស់ប្តូរក្បាលម៉ាស៊ីនដឹកនាំ តែម្តង ដើម្បីពង្រឹងស្ថាប័ននេះ»។
លោកនុត សវនាក៏បានឱ្យដឹងផងដែរថា លោកយិន គន្ធបានចូលនិវត្តន៍ពីការងារជាប្រធានមណ្ឌលអប់រំកែប្រែម១ កាលពីថ្ងៃទី៩ ខែកញ្ញា ឆ្នាំ២០២៤ ហើយលោកឧត្តមអគ្គានុរក្សថ្នាក់លេខ២ ម៉ុង ម៉េងអ៊ាន់ត្រូវបានតែងតាំងជាប្រធានស្តីទីមណ្ឌលនេះចាប់ពីថ្ងៃទី១០ ខែកញ្ញាមក។
លោកបន្ថែមថា មណ្ឌលនេះមានអ្នកកំពុងតែជាប់ឃុំជិត៨ពាន់នាក់នាពេលប្ចុប្បន្ននេះ៕