អតីតរដ្ឋមន្ត្រីក្រសួងមហាផ្ទៃ លោក ស ខេង បានប្រកាសពីការរៀបចំត្រៀមទម្លាក់ស័ក្តិមន្ត្រីនគរបាលទាំងឡាយណា ដែលដុះក្បាលពោះធំៗហួសប្រមាណពេក កាលពីឆ្នាំ ២០២១។ រូបថត FN
ភ្នំពេញៈ លោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃបានណែនាំដល់ស្នងការរាជធានីខេត្តទាំងអស់ឱ្យត្រួតពិនិត្យមើលមន្រ្តីនគរបាល ដែលដុះក្បាលពោះ ឬមានមានឌធំ ហើយហាមមិនឱ្យបំពេញការងារនៅតាមទីសាធារណៈ ជាពិសេសនៅក្នុងខេត្តទេសចរណ៍ ដូចជាខេត្តសៀមរាប និងខេត្តព្រះសីហនុជាដើម។
ការណែនាំនេះត្រូវបានធ្វើឡើងតាមរយៈសារសំលេងដោយយោងទៅលើគោលការណ៍កាយសម្បទា សុខភាព និងគោលការណ៍សាធារណមតិ ដែលមានការរិះគន់ចំពោះមន្រ្តីទាំងនោះ។
លោកឧបនាយករដ្ឋមន្រ្តីមានប្រសាសន៍ថា៖ «សូមស្នងការរាជធានីខេត្តទាំងអស់ ស្នើសុំធ្វើម៉េច ចំពោះនគរបាលដែលគាត់មានមាឌធំ ដុះក្បាលពោះ គឺមិនមែនថាមិនឱ្យគាត់ធ្វើការទេ ឱ្យធ្វើការ តែនៅក្នុងការិយាល័យ។ ហាមដាច់ខាត មិនឱ្យគាត់ចេញទៅអនុវត្តកិច្ចការងារ ជាពិសេស ទៅលើការប៉ះពាល់លើមហាជន ជាពិសេសខាងក្រៅនេះ»។
លោកបានបញ្ជាក់ថា៖«អញ្ជឹងសូមអនុវត្តកិច្ចការនេះឱ្យបានម៉ឹងមាត់ ពិនិត្យទៅតាមបណ្តាខណ្ឌ តាមបណ្តាស្រុក នីមួយៗ ហើយជាពិសេស គឺនៅខេត្តមួយចំនួន ដែលជាខេត្តទេសចរណ៍ ដូចជាខេត្តសៀមរាប ដូចជាព្រះសីហនុ និងខេត្តដទៃទៀតដែលជាខេត្តទេសចរណ៍ សូមឱ្យប្រុងប្រយ័ត្ន ហើយជាពិសេសចាប់ផ្តើមកែលម្អពីឥលូវទៅ។ សម្រាប់អ្នកមានក្បាលពោះ ឬមួយមានមាឌធំ បើគាត់ចង់ទៅឈវិញ ឱ្យគាត់ស្រកគីឡូ»។
អ្នកនាំពាក្យរដ្ឋមន្ត្រីក្រសួងមហាផ្ទៃ លោក រ៉េន រតនៈបានឱ្យដឹងថា ការណែនាំធ្វើឡើងតាម គោលការណ៍កាយសម្បទា ដែល ជាសត្យានុម័ត ជាពិសេសសម្រាប់កងកម្លាំងចេញប្រតិបត្តិការអនុវត្តច្បាប់នានា ត្រូវតែមានកាយសម្បទាមាំមួន ដូចជា មិនស្គមពេក មិនធាត់ពេក ពិសេសមិនគួរធាត់មានក្បាលពោះធំហួស ដែលនាំឱ្យមានការលំបាកពេលបំពេញការងារ ដូចជាបាត់ភាពរហ័សរហួន និងឆាប់ហត់ជាដើម។
ក្រៅពីនោះ គឺគោលការណ៍សុខភាព ដែលកងកម្លាំង ដែលធាត់ហួស ក៏ដូចជនទូទៅផងដែរ គឺជារួមមានសុខភាពមិនសូវល្អទេ ហើយប្រឈមនិងហានិភ័យគ្រប់ពេលវេលា។ កងកម្លាំង ត្រូវតែមានសុខភាពល្អ មាំមួន ដើម្បីបំពេញបេសកម្មបម្រើជាតិ និងប្រជាជនបានល្អ។ ម្យ៉ាង ពួកគាត់មានសុខភាពល្អ ក៏ជាសំណាងរបស់រដ្ឋ និងក្រុមគ្រួសារផងដែរ។
ចំពោះគោលការណ៍សាធារណមតិវិញលោកបញ្ជាក់ដូច្នេះថា៖«ករណីនេះ កន្លងមកទោះជាក្នុងចំណោមកងកម្លាំងសរុប មានតិចតួចនូវករណីកងកម្លាំងមានក្បាលពោះធំជ្រុលនេះ ប៉ុន្តែពេលកងកម្លាំងនោះចេញប្រតិបត្តិការខាងក្រៅ ដូចជាសម្រួលចរាចរណ៍ និងបង្ក្រាបជនល្មើសជាដើម មហាជនតែងមានការចាប់អារម្មណ៍ និងនិយាយបង្អាប់ផង រិះគន់ផង ដូចជា បើក្បាលពោះធំ ឬធាត់ម្លឹងៗ តើដេញចាប់ជនល្មើសយ៉ាងម៉េច ជាដើម?»។
ដោយយោងតាមហេតុផលទាំងនោះ ទើបលោកឧបនាយករដ្ឋមន្រ្តី បានណែនាំដល់អគ្គស្នងការនគរបាលជាតិ និងស្នងការដ្ឋាននគរបាលរាជធានីខេត្ត យកចិត្តទុកដាក់រៀបចំកងកម្លាំង ដែលមានក្បាលពោះធំជ្រុល ឱ្យបំពេញការងារនៅក្នុងការិយាល័យ។ លើសពីនោះ បើពួកគាត់ចង់ចេញបំពេញការងារខាងក្រៅវិញ គឺត្រូវខិតខំធ្វើលំហាត់ប្រាណ ដើម្បីធានាភាពមាំទាំ សុខភាពល្អ និងបញ្ចៀសការរិះគន់ទាំងឡាយពីមហាជនតទៅទៀត។
លោកសុខ ពីសាន្តស្នងការងនគរបាលខេត្តសៀមរាប ទទួលបន្ទុកសេនាធិការបានឱ្យដឹងថា លោកឧត្តមសេនីយ៍ទោ ហួត សុធី ស្នងការនគរបាលខេត្តនឹងធ្វើការប្រជុំ ដើម្បីផ្សព្វផ្សាយ និងអនុវត្តតាមការណែនាំរបស់ថ្នាក់ដឹកនាំ។
អតីឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកស ខេងក៏ធ្លាប់បានព្រមាន ទម្លាក់ស័ក្តិមន្ត្រីនគរបាល ដែលដុះក្បាលពោះធំជ្រុលផងដែរ កាលពីឆ្នាំ២០២១កន្លងមក៕
