ភ្នំពេញៈ សេវាកម្មធ្វើតេស្តវិភាគ រកកាកសំណល់ថ្នាំកសិកម្ម និងកាកសំណល់ថ្នាំផ្សះជាដើមត្រូវបានបង្កើតនៅកម្ពុជាហើយ ដែលនឹងជួយឱ្យម្ចាស់អាជីវកម្មផលិតផលកសិកម្ម មិនលំបាកទៅរកសេវាកម្មនេះនៅក្រៅប្រទេសទៀត ដែលចំណេញទាំងពេលវេលា ថវិកា និងជួយពង្រឹងភាពប្រកួតប្រជែង សម្រាប់ការនាំចេញរបស់កម្ពុជាផងដែរ។
វិទ្យាស្ថានប៉ាស្ទ័រកម្ពុជា (IPC) នាថ្ងៃពុធ ទី១៦ខែតុលានេះបានដាក់ឱ្យដំណើរការ ជាផ្លូវការ នូវកិច្ចសហការក្នុងការរៀបចំបង្កើតសេវាកម្ម ធ្វើតេស្តវិភាគ ដោយមានការទទួលស្គាល់ ដែល អនុលោមតាមស្តង់ដារ ISO 17025 សម្រាប់វិភាគរក កាកសំណល់ថ្នាំកសិកម្ម កាកសំណល់ថ្នាំផ្សះ និងលោហៈធ្ងន់។ ការដាក់ឱ្យដំណើរការនេះ មានការការគាំទ្រពីប្រទេសអូស្រ្តាលី តាមរយៈកម្មវិធី ភាពជាដៃគូ កម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)។ នេះបើយោងតាមសេចក្តីប្រកាសព័ត៌មានរួមរបស់ភាគីទាំង២។
កិច្ចសហការរួមគ្នានេះ គឺ ដើម្បីបង្កើនសុវត្ថិភាពចំណីអាហារ និងពង្រឹងភាពប្រកួតប្រជែងសម្រាប់ការនាំចេញរបស់ប្រទេសកម្ពុជា។
សេចក្តីប្រកាសបានលើកឡើងថា អាជីវកម្ម ប្រមាណ ៧០ភាគរយ ជួបប្រទះនឹងឧបសគ្គ រាល់ពេល ដែលពួកគេស្នើ សុំវិញ្ញាបនបត្របញ្ជាក់ ពីគុណភាព សម្រាប់ផលិតផលកសិកម្ម ផ្នែកមួយនៃឧបសគ្គទាំងនោះ គឺដោយសារកង្វះខាត សេវាកម្ម មន្ទីរពិ សោធន៍ធ្វើ តេស្តវិ ភាគ ដែលមានការទទួលស្គាល់ជាអន្តរជាតិ នៅក្នុងប្រទេសកម្ពុជា។ កន្លងមក អាជីវកម្មទាំងនោះ បានពឹងផ្អែកលើសេវាកម្មមន្ទីរពិសោធន៍នៅបរទេស ដែលកត្តានេះបណ្តាលឱ្យមានការកើនឡើងហានិភ័យនៃការចម្លងរោគ ការពន្យារពេលវេលាទទួលបានលទ្ធផលវិភាគ ការចំណាយខ្ពស់ និងការកាត់បន្ថយភាពប្រកួតប្រជែង។
សេចក្តីប្រកាសសរសរថា៖ «សេវាកម្មវិភាគថ្មីនេះ ដែលនឹងត្រូវបានផ្តល់តាមរយៈមន្ទីរពិសោធន៍បរិស្ថាន និងសុវត្ថិភាពចំណីអាហាររបស់ វិទ្យាស្ថានប៉ាស្ទ័រកម្ពុជា នឹងធ្វើឱ្យប្រសើរឡើងនូវគុណភាពផលិតផលចំណីអាហារ និងភាពប្រកួតប្រជែងនៅទីផ្សារក្នុងស្រុក និងអន្តរជាតិ ជួយបង្កើតការងារ លើកកម្ពស់សុវត្ថិភាពចំណីអាហារ និងការពារអ្នកប្រើប្រាស់ ព្រមទាំងបង្កើនលទ្ធភាពទទួលបានទីផ្សារសម្រាប់ផលិតផលកសិកម្មកម្ពុជា»។
ឯកអគ្គរដ្ឋទូតអូស្ត្រាលីប្រចាំនៅកម្ពុជា លោកដេរិក យីប (Derek Yip) មានប្រសាសន៍ថា តាមរយៈការឧបត្ថម្ភក្នុងការរៀបចំបង្កើតនូវមន្ទីរពិសោធន៍ទាំងនេះ អូស្ត្រាលីកំពុងតែជួយគាំទ្រអាជីវកម្មកម្ពុជាផលិតផលិតផលកសិ-ចំណីអាហារប្រកបដោយសុវត្ថិភាព និងគុណភាពខ្ពស់សម្រាប់ទីផ្សារក្នុងស្រុក និងអន្តរជាតិនិងប្រកបដោយប្រសិទ្ធភាពលើការចំណាយ។
លោកបញ្ជាក់ក្នុងសេចក្តីប្រកាសថា៖ «ការទទួលបានសេវាមន្ទីរពិសោធន៍ធ្វើតេស្តវិភាគក្នុងប្រទេសប្រកបដោយប្រសិទ្ធភាព គឺជាគន្លឹះនៃការរីកចម្រើន និងភាពប្រកួតប្រជែងនៅក្នុងវិស័យនេះ»។
ច្បាប់ស្តីពីសុវត្ថិភាពម្ហូបអាហារឆ្នាំ ២០២២ របស់កម្ពុជា ក៏បានលើកឡើងពីការធានាសុវត្ថិភាពម្ហូបអាហារនៅក្នុងដំណើរការផលិតកម្មដែលនេះ គឺជាហេតុផលមួយទៀតបង្ហាញពីភាពចាំបាច់ដែលកម្ពុជាត្រូវមានសេវាកម្មធ្វើតេស្តមន្ទីរពិសោធន៍នៅក្នុងស្រុកដោយខ្លួនឯង ប្រកបដោយប្រសិទ្ធភាព និងគុណភាពខ្ពស់។
កិច្ចសហការនេះ គឺជាជំហានដ៏សំខាន់មួយក្នុងការលើកកម្ពស់ទិដ្ឋភាពសុវត្ថិភាពចំណីអាហាររបស់កម្ពុជា។ តាមរយៈការបង្កើតមន្ទីរពិសោធន៍ទំនើបចុងក្រោយ ដែលមានការទទួលស្គាល់នេះ អូស្ត្រាលី និងវិទ្យាស្ថានប៉ាស្ទ័រកម្ពុជាកំពុងគាំទ្រដល់សុខភាពសាធារណៈអាជីវកម្មក្នុងស្រុក រួមទាំងអាជីវកម្មដែលដឹកនាំដោយស្ត្រី ដើម្បីបំពេញតាមស្តង់ដារអន្តរជាតិ និងឈានជើងចូលទៅកាន់ទីផ្សារថ្មីៗ។
លោក André Spiegel នាយកវិទ្យាស្ថានប៉ាស្ទ័រកម្ពុជាបានលើកឡើងថា សេវាកម្មមន្ទីរពិសោធន៍ថ្មីនេះ នឹងផ្តល់លទ្ធភាពឱ្យវិទ្យាស្ថានប៉ាស្ទ័រកម្ពុជាផ្តល់សេវាធ្វើតេស្តពិសោធន៍សម្រាប់វិស័យកសិ-ចំណីអាហាររបស់កម្ពុជា។
លោកមានប្រសាសន៍ថា៖«សេវាកម្មមន្ទីរពិសោធន៍នេះមិនត្រឹមតែលើកកម្ពស់សុវត្ថិភាពចំណីអាហារប៉ុណ្ណោះទេ ប៉ុន្តែថែមទាំងរួមចំណែកដល់ការអភិវឌ្ឍប្រទេសប្រកបដោយនិរន្តរភាព តាមរយៈការកើនឡើងនូវឱកាសការធ្វើពាណិជ្ជកម្មផងដែរ» ។
លោក អួន ស៊ីឡូត ប្រធានសមាគមស្វាយចន្ទីកម្ពុជាបានឱ្យដឹងថា ការសុំវិញ្ញាបនបត្របញ្ជាក់ ពីគុណភាព សម្រាប់ផលិតផលកសិកម្មភាគច្រើនគឺធ្វើឡើងនៅប្រទេសវៀតណាមនាពេលកន្លងមក ដើម្បីបាននាំចេញផលិតផលទៅកាន់ទីផ្សារអន្តរជាតិ ទៅតាមការតម្រូវ។
លោកមានប្រសាសន៍ថា៖«ការបង្កើតសេវាពិសោធន៍នេះនៅស្រុកខ្មែរយើងហ្នឹងពិតជារឿងមួយល្អមែនទែន។ យើងគ្រាន់តែចំណាយថវិកាជាការស្រេច ដោយអត់ពិបាកទៅប្រទេសគេទេ។ បើមានក្នុស្រុកយើង ពិតជាស្រួលមែនទែន ដែលយើងអាចទទួលបានវិញ្ញាបនបត្រស្តង់ដារ អនាម័យម្ហូបអាហារផ្សេងរបស់ពិភពលោក ហើយយើងអាចនាំចេញបានទៅតាមតម្រូវការរបស់ប្រទេសមួយចំនួន»។
ទោះយ៉ាងណា លោកសង្កេតឃើញថា កម្ពុជានៅខ្វះការវិភាគលើសារធាតុចិញ្ចឹមក្នុងចំណីអាហារ ហើយបើមានការបង្កើតឱ្យមានសេវាកម្មវិភាគនេះមួយទៀតនោះ គឺជាប្រការល្អប្រសើរមែនទែន សម្រាប់កម្មវិធីចំណីអាហាររបស់កម្ពុជា៕