យុវជនចូលរួមសកម្មភាពផ្សព្វផ្សាយបញ្ហាគ្រឿងញៀនក្នុងពិធីប្រណាំងទូកខេត្តបាត់ដំបងកាលពីម្សិលមិញ។ រូបថត អាជ្ញាធរជាតិប្រយុទ្ធប្រឆាំងគ្រឿងញៀន
ភ្នំពេញៈ ការអប់រំផ្សព្វផ្សាយចល័តពីបញ្ហាគ្រឿងបាននឹងកំពុងតែធ្វើឡើងនៅតាមពិធីប្រណាំងទូកតាមបណ្តាខេត្ត នៅទូទាំងប្រទេស ដែលមានអ្នកទទួលសារអប់រំរាប់លាននាក់ ខណៈដែលការរិះគន់ពីបញ្ហាគ្រឿងបានស្ងប់ស្ងាត់ បន្ទាប់ពីដាក់ឱ្យដំណើរការកម្មវិធី App NoDrug រួចមក។
ក្រោមកិច្ចសហការជាមួយនឹងអាជ្ញាធរជាតិប្រយុទ្ធប្រឆាំងគ្រឿងញៀន អាជ្ញាធរថ្នាក់ខេត្ត និងស្ថាប័នពាក់ព័ន្ធនីមួយៗកំពុងតែធ្វើការអប់រំផ្សព្វផ្សាយនេះទៅតាមលទ្ធភាពរបស់ខ្លួនតាមរយៈមធ្យោបាយផ្សេងៗ។ ក្នុងនោះរួមមាន ការចែកខិតប័ណ្ណពីសារអប់រំ សារព្រមាន និងចំណេះដឹងពីគ្រឿងញៀន ដែលបញ្ជ្រាបតាមរយៈពិធីករ ពិធីការិនីអត្ថាធិប្បាយពីពិធីប្រណាំងទូក ពិធីករ ពិធីការិនី និងសិល្បៈករ សិល្បៈការិនីក្នុងកម្មវិធីប្រគុំតន្ត្រី ហើយនឹងតាមរយៈការស្កែន QR code ទាញយកកម្មវិធី App NoDrug យកទៅប្រើប្រាស់ជាដើម។ នេះបើយោងតាម ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ លោកឧត្តមសេនីយ៍ឯក លឹម តុងហួត។
លោកមានប្រសាសន៍៖«យើងធ្វើគ្រប់ខេត្ត ទៅតាមលទ្ធភាពរបស់ខ្លួនក្នុងការផ្សព្វផ្សាយបញ្ហាគ្រឿងញៀនហ្នឹង ដើម្បីឱ្យពលរដ្ឋបានទទួលសារអប់រំពាក់ព័ន្ធនឹងបញ្ហាគ្រឿងញៀននេះ។ អ្នក ដែលចូលរួមឈនៅមាត់ស្ទឹង មាត់ទន្លេហ្នឹង គឺបានឮទាំងអស់គ្នាហើយ»។
លោកបន្តថា ជាទូទៅ កម្មវិធីផ្សព្វផ្សាយចល័តនេះ គឺទាញនូវចំណាប់អារម្មណ៍របស់សាធារណជន ឱ្យមានការភ្ញាក់រលឹក ក្នុងការចូលរួមការងារងារប្រយុទ្ធប្រឆាំងនឹងបញ្ហាគ្រឿងញៀននេះ។
ក្រោយពីត្រូវបានដាក់ឱ្យដំណើរការកាលពីថ្ងៃទី២៣ ខែមេសាកន្លងមក ដើម្បីចូលរួមប្រយុទ្ធប្រឆាំងនឹងគ្រឿងញៀនខុសច្បាប់ កម្មវិធីទូរស័ព្ទដៃ App NoDrug មានអ្នកទាញយកទៅប្រើប្រាស់ជាង៣ ៥ ០០០នាក់ហើយរហូតមកដល់នឹងពេលនេះ។ ពលរដ្ឋបានរាយការណ៍ពីបញ្ហាគ្រឿងញៀនបានជាង៥០០ករណី ហើយក្នុងនោះ ជាង២០០ករណីត្រូវបានដោះស្រាយ។
លោកបានសង្កេតឃើញថា កម្មវិធីទូរស័ព្ទដៃ App NoDrug នេះពិតជាបានបង្កើនប្រសិទ្ធភាពក្នុងការអប់រំ ក៏ដូចជាបង្ក្រាបបទល្មើសគ្រឿងញៀននៅតាមមូលដ្ឋាន។ នេះបានធ្វើឱ្យការរិះគន់ទៅលើអាជ្ញាធរមានការស្ងប់ស្ងាត់ជាងមុន។
លោកថ្លែងដូច្នេះថា៖«អញ្ជឹងបានន័យថា អែបនេះគឺជា ឧបករណ៍មួយសម្រាប់ឱ្យពលរដ្ឋរាយការណ៍ និងទទួលការដោះស្រាយយ៉ាងមានប្រសិទ្ធិភាពធ្វើឱ្យអ្នកប្រព្រឹត្តខ្លាចរអារ មិនសូវហ៊ានដូចមុន។ សមត្ថកិច្ចចូលចាប់បានជាហូរហែ ហើយរហ័សទៀត។ ចុះទៅអត់ខុស ចុះទៅចាប់បានៗ។ អញ្ជឹងពលរដ្ឋគាត់មានទំនុកចិត្ត។ ពាក្យថា សកម្មភាពគ្រឿងញៀនរីកចែកដូចស្ករគ្រាប់ គ្មានសមត្ថកិច្ចណាបង្រ្កាប ពាក្យអស់ហ្នឹងដូចស្ងាត់ហើយ»។
លោកក៏បានលើកឡើងផងដែរថា ដោយសារតែការរាយការណ៍តាមអែប(App)នេះរក្សាការសម្ងាត់ ទើបប្រជាពលរដ្ឋ ជាអ្នករាយការណ៍មិនខ្លាចការសងសឹកពីអ្នកពាក់ព័ន្ធនឹងបទល្មើសគ្រឿងញៀន។ ការរាយការណ៍នេះ វាខុសពីការរាយការណ៍តាមប្រព័ន្ធលេខhotlineកាលពីលើកមុន ដែលអត្តសញ្ញាណអ្នករាយការណ៍អាចត្រូវបានគេដឹងតាមរយៈលេខទូរស័ព្ទ។
លោកបញ្ជាក់ថា៖«កាលមុនពី គាត់កើតទុកមិនសុខចិត្ត ដោយសាររាយការណ៍ទៅមិនបានលទ្ធផល។ តាមទូរស័ព្ទhotlineអាចជាប់លេខ ហើយខ្លាចសងសឹកពីអ្នកផ្សេងៗ។ អញ្ចឹងអត់ហ៊ានរាយការណ៍ទេ។ តែអែបនេះ គឺមិនមានអត្តសញ្ញាណទេ គឺសម្ងាត់ សូម្បតី Admin ហ្នឹង ក៏មិនដឹង មិនឃើញគាត់ជាអ្នកណាដែរ គឺមកតែទិន្នន័យទេ ដូចជាករណីអីគេ នៅចំណុចណា គេដាក់locationមក អត់មានជាប់អត្តសញ្ញាណថា លោកក ឬលោកខទេ»។
លោកបន្ថែមថា ដោយសារតេអែបនេះមានប្រសិទ្ធិភាពបែបនេះ ទើបអាជ្ញាធរជាតិប្រយុទ្ធប្រឆាំងគ្រឿងញៀន កំពុងតែ ជម្រុញឱ្យប្រជាពលរដ្ឋទាញយកទៅប្រើប្រាស់ ដើម្បីជួយរាយការណ៍ពីបញ្ហាគ្រឿងឱ្យកាន់តែច្រើន។ «ដូច្នេះ គឺយើងអាចដោះស្រាយបញ្ហាគ្រឿងញៀនបានហើយ»។
កាលពីពេលថ្មីៗនេះ អាជ្ញាធរជាតិប្រយុទ្ធប្រឆាំងគ្រឿងញៀនក៏បានសហការជាមួយរដ្ឋបាលរាជធានីភ្នំពេញបិតSticker QR Code App NoDrug នៅរថយន្តក្រុងជាង៦០០គ្រឿង ដើម្បីឱ្យពលរដ្ឋទាញយកប្រើប្រាស់ផងដែរ។
អ្នកនាំពាក្យក្រសួងយុត្តិធម៌ក៏បានឱ្យដឹងផងដែរថា ក្នុងរយៈពេល ១សប្ដាហ៍ គិតចាប់ពីថ្ងៃទី៨ ដល់ថ្ងៃទី១៤ ខែតុលា នេះ សាលាដំបូង និងអយ្យការអមសាលាដំបូងរាជធានី ខេត្ត បានទទួលចាត់ការលើសំណុំរឿងពាក់ព័ន្ធនឹងគ្រឿងញៀនសរុបចំនួន៨២ករណី។ ក្នុងនោះ មានជនសង្ស័យចំនួន២៦១ នាក់ និងត្រូវបានឃាត់ខ្លួនចំនួន១៨៤នាក់៕
