ក្រសួងកសិកម្មចែកស្រូវពូជជូនដល់ប្រជាពលរដ្ឋដែលរងផលប៉ះពាល់ដោយសារគ្រោះទឹកជំនន់ក្នុងភូមិសាស្រ្តខេត្តកំពង់ធំ កាលពីថ្ងៃទី ១៨ តុលា។ រូបថត ក្រសួងកសិកម្ម
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានចែកស្រូវពូជជាង ៤៦៧តោនដល់ប្រជាកសិករជាង ៤ពាន់គ្រួសារ ដែលរងគ្រោះដោយសារតែជំនន់ទឹកភ្លៀនៅ ៨ ក្រុង-ស្រុក ក្នុងខេត្តកំពង់ធំ ដើម្បីឱ្យពួកគាត់យកទៅដាំដុះស្តារផលប៉ះពាល់ឡើងវិញ។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំបានឱ្យដឹងថា ស្រូវពូជដែលត្រូវបានចែកជូនពលរដ្ឋនោះជាប្រភេទ OM៥៤៥១ ដែលជាពូជមិនប្រកាន់រដូវនិងផ្តល់ផលក្នុងរយៈពេលខ្លី។
លោកប្រាប់ភ្នំពេញប៉ុស្តិ៍នៅថ្ងៃចន្ទ ទី២១ ខែតុលានេះថា៖«ក្រោយពីទទួលបានស្រូវពូជ កសិករអាចចាប់ផ្តើមធ្វើការដាំដុះឱ្យទាន់ពេលក្នុងរដូវទឹកសម្រកនេះ ដែលស្រូវនេះផ្តល់ផលប្រហែលក្នុងរយៈពេល ៣ខែ។ កន្លែងណាមានប្រភពទឹក គឺអាចដាំដុះស្តារឡើងវិញបានចង់ទាំងអស់។ ខេត្តយើងនេះធ្វើទាំងរដូវវស្សាផងនិងប្រាំងផង»។
លោកបានឱ្យដឹងថា ការបង្កបង្កើនផលស្រូវក្នុងខេត្តកំពង់ធំនាឆ្នាំនេះ សម្រេចបានលើសផែនការ គឺរហូតដល់ទៅជាង២២ម៉ឺនហិកតាដែលស្មើនឹង១០៣ភាគរយនៃផែនការ។
ខេត្តកំពង់ធំបានទទួលរងគ្រោះធ្ងន់ធ្ងរជាងគេពីគ្រោះមហន្តរាយជំនន់ទឹកភ្លៀងក្នុងដំណាក់កាលទី១ ដែលបំផ្លាញស្រូវជាង ៣ពាន់ហិកតា ក្នុងចំណោមជាង ៦ពាន់ហិកតា ដែលរងផលប៉ះពាល់គិតត្រឹមដើមខែសីហាកន្លងមក។
ក្នុងអំឡុងពេលចែកស្រូវពូជ នាថ្ងៃទី១៨ ខែតុលានេះ រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានផ្តល់អនុសាសន៍ដល់ប្រជាកសិករឱ្យចូលរួមសហការគិតគូរឱ្យបានវែងឆ្ងាយ ទទួលស្តាប់នូវការណែនាំរបស់ក្រសួងស្ថាប័នពាក់ព័ន្ធពីការព្យាករណ៍ធាតុអាកាសនិងបម្រែបម្រួលអាកាសធាតុដើម្បីកាត់បន្ថយនូវផលប៉ះពាល់ដោយមិនប្រថុយធ្វើស្រែទាំងមានហានិភ័យខ្ពស់នោះទេ។
លោករដ្ឋមន្រ្តីបានលើកឡើងថា គោលដៅរបស់រាជរដ្ឋាភិបាលគឺជួយប្រជាកសិករឱ្យមានសន្តិសុខស្បៀងនិងមានប្រសិទ្ធភាពសេដ្ឋកិច្ច ពោលគឺមានការហូបគ្រប់គ្រាន់និងមានបានដោយរាជរដ្ឋាភិបាលមិនទុកនរណាម្នាក់ចោលនោះទេ ហើយតែងតែយកចិត្តទុកដាក់ ផ្តល់ជំនួយព្រមទាំងជួយស្តារនូវផលប៉ះពាល់ជានិច្ចកន្លងមក។
លើសពីនោះ រាជរដ្ឋាភិបាលបានដាក់ចេញនូវកម្មវិធីគោលនយោបាយអាទិភាពក្នុងការរក្សាស្ថេរភាពថ្លៃកសិផល កាត់បន្ថយថ្លៃដើមផលិត ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ និងការរៀបចំសហគមន៍កសិកម្មទំនើប ដើម្បីជួយគាំទ្រលើផ្នែកបច្ចេកទេស ការផ្តល់ព័ត៌មាន ការប្រឹក្សាយោបល់ និងជួយដោះស្រាយបញ្ហាពាក់ព័ន្ធនឹងការងារកសិកម្មដល់កសិករ។ ទំាងនេះគឺក្នុងគោលបំណងបង្កើនផលិតភាពកសិកម្ម ជំរុញជីវភាព ធានាបាននូវសន្តិសុខ និងសុវត្តិភាពស្បៀងផងដែរ។
ក្រសួងកសិកម្មតែងតែត្រៀមបម្រុងពូជសុទ្ធចំនួន ២ពាន់តោន និងជាសាច់ប្រាក់ដែលត្រៀមបម្រុង ៣ពាន់តោនទៀតជារៀងរាល់ ដើម្បីចែកជូនពលរដ្ឋដែលរងគ្រោះ។ ស្រូវពូជជាង ៦០០តោនក៏ត្រូវបានចែកជូនកសិករក្នុងខេត្តក្រចេះ ដែលរងគ្រោះដោយសារតជំនន់ទឹកភ្លៀងផងដែរ។
ជំនន់ទឹកភ្លៀងដែលធ្លាក់ពីតំបន់ជួរភ្នំ មកអូរព្រំដែនកម្ពុជា-ថៃ កាលពីថ្ងៃទី ១៩ តុលា។ រូបថត រដ្ឋបាលខេត្តប៉ៃលិន
ជំនន់ទឹកភ្លៀងក៏បានបង្កផលប៉ះពាល់ដល់ពលរដ្ឋជាង ១៨០គ្រួសារនៅក្នុងខេត្តប៉ៃលិនផងដែរ កាលពីចុងសប្តាហ៍មុន ក្រោយពីទឹកហូរធ្លាក់ពីតំបន់ជួរភ្នំ ទៅអូរព្រំដែនកម្ពុជា-ថៃ។ គ្រោះធម្មជាតិនេះបានបណ្តាលខូចខាតផ្ទះសម្បែង សម្ភារៈប្រើប្រាស់ និងហេដ្ឋារចនាសម្ព័ន្ធមួយចំនួន ប៉ុន្តែមិនមានប៉ះពាល់ដល់អាយុជីវិតរបស់ពលរដ្ឋនោះទេ។ នេះបើយោងតាមរដ្ឋបាលខេត្តប៉ៃលិន។
ទាក់ទងទៅនឹងបញ្ហាទឹកជំនន់នេះដែរ រដ្ឋលេខាធិការក្រសួងធនធានទឹក និងឧតុនិយម លោក ចាន់ ស៊ីណាត នាថ្ងៃអាទិត្យ ទី២០ ខែតុលានេះ បានដឹកនាំមន្ត្រីបច្ចេកទេសក្រសួង ចុះពិនិត្យស្ថានភាពជាក់ស្តែងនៅតំបន់ភ្នំក្រវាញ ភ្នំឱរ៉ាល់ និងតំបន់ជ្រោះពេជ្រនិល ដើម្បីធ្វើការរៀបចំយុទ្ធសាស្ត្រក្នុងការស្តុកទឹកជាប្រព័ន្ធដំណាក់បន្តឱ្យបានច្រើន ដើម្បីកាត់បន្ថយធារទឹកស្ទឹងព្រែកត្នោត។ នេះបើយោងតាមក្រសួងធនធានទឹក។
ជំនន់ទឹកភ្លៀងដែលធ្លាក់ពីតំបន់ជួរភ្នំ មកអូរព្រំដែនកម្ពុជា-ថៃ កាលពីថ្ងៃទី ១៩ តុលា។ រូបថត រដ្ឋបាលខេត្តប៉ៃលិន
លោករដ្ឋលេខាធិការឱ្យដឹងថា ការចុះពិនិត្យជាក់ស្តែងនាពេលនេះ គឺដើម្បីវាយតម្លៃធ្វើការរៀបចំយុទ្ធសាស្រ្តដ៏មានប្រសិទ្ធភាពក្នុងការគ្រប់គ្រង បញ្ជា និងប្រើប្រាស់ទឹកប្រកបដោយស័ក្តិសិទ្ធិភាពក្នុងរដូវវស្សា។ ទន្ទឹមនឹងនេះ ក្រសួងនឹងធ្វើការស្តុកទឹកទុកឱ្យបានច្រើនជាអតិបរមានូវបរិមាណទឹកភ្លៀងជាប្រព័ន្ធដំណាក់បន្ត (Cascade Systems) នៅក្នុងតំបន់ជ្រលងភ្នំក្រវាញ ភ្នំឱរ៉ាល់ និងតំបន់ជ្រោះពេជ្រនិល ដើម្បីជួយកាត់បន្ថយធារទឹករបស់ស្ទឹងព្រែកត្នោត។
លោកបញ្ជាក់ថា៖ «ទឹកដែលបានស្ដុកទុកនឹងបញ្ចេញមកវិញនៅរដូវប្រាំង ដើម្បីជួយដោះស្រាយនូវបញ្ហាគ្រោះរាំងស្ងួត ព្រមទាំងជាប្រភពទឹកដ៏ល្អសម្រាប់បម្រើវិស័យគមនាគមន៍ផ្លូវទឹក អេកូទេសចរណ៍ កសិកម្ម និងសម្រាប់បម្រើឱ្យការចញ្ចឹមសត្វគ្រប់ប្រភេទ ហើយផ្គត់ផ្គង់ទឹកស្អាតសម្រាប់ការប្រើប្រាស់ក្នុងជីវភាពរស់នៅប្រចាំថ្ងៃនិងឧស្សាហកម្ម»៕
