ភ្នំពេញៈ អាជ្ញាធរទន្លេសាបបានបញ្ចប់ការបោះបង្គោលព្រំតំបន់៣ ដែលមានចំនួន១ ២២៤បង្គោលនៅក្នុងខេត្តទាំង៦ ជុំវិញបឹងទន្លេសាប ដែលសម្រេចបានតាមផែនគ្រោងទុក ហើយនិងត្រៀមបន្តបោះបង្គោលជំហាន២ នៅ តំបន់កាត់ឆ្វៀលនាឆ្នាំ២០២៥ខាងមុខ។
បង្គោលសរុបចំនួន១ ២២៤ ដែលត្រូវបានបោះក្នុងខេត្តទាំង៦ជុំវិញបឹងទន្លេសាបនោះរួមមាន ខេត្តកំពង់ឆ្នាំងចំនួន ២១៥ បង្គោល ពោធិ៍សាត់ចំនួន១៤៦បង្គោល បាត់ដំបងចំនួន ១៧១បង្គោល បន្ទាយមានជ័យចំនួន៤៧បង្គោល សៀមរាបចំនួន២៩៩បង្គោល និងខេត្តកំពង់ធំមានចំនួន៣៤៦បង្គោល។ នេះបើយោងតាមអាជ្ញាធរទន្លេសាបនៅថ្ងៃចន្ទ ទី២១ ខែតុលានេះ។
អាជ្ញាធរទន្លេសាបបញ្ជាក់ថា៖«ជារួមការងារបោះបង្គោលព្រំតំបន់៣ ចំនួន១ ២២៤ បង្គោល នៅក្នុងខេត្តទាំង៦ ជុំវិញបឹងទន្លេសាប បានបញ្ចប់តាមផែនការការងារដែលបានគ្រោងទុកសម្រាប់ឆ្នាំ ២០២៤នេះ ១០០ភាគរយ...ក្រុមការងារបានយកចិត្តទុកដាក់អនុវត្តការងារតាមជំហ៊ានទាំងថ្ងៃ ទាំងយប់ពេលខ្លះ ទោះមានឧបសគ្គច្រើនយ៉ាងណា ក៏ ខិតខំបំពេញ និងដោះស្រាយ សម្របសម្រួលរហូតឈានដល់សម្រេចបានជោគជ័យ១០០ភាគរយ»។
ក្រុមការងារក៏ត្រៀមអនុវត្តការងារបន្ត សម្រាប់ការងារបោះបង្គោលជំហ៊ាន២ តំបន់កាត់ឆ្វៀល តំបន់១ និងតំបន់២ ដែលស្ថិតនៅក្នុងតំបន់៣ (បង្គោលឃ្លុំ) ក្នុងឆ្នាំ ២០២៥ខាងមុខនេះផងដែរ។
អគ្គលេខាធិការអាជ្ញាធរទន្លេសាប លោកសរ គឹមសាន្ត និងប្រតិភូតំណាងក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំ និងក្រុមការងារបច្ចេកទេសអាជ្ញាធរទន្លេសាបក៏បានចុះពិនិត្យ និងវាយតម្លៃ បញ្ចប់ការងារបោះបង្គោលព្រំតំបន់៣ ការពារដែនព្រៃលិចទឹក និងព្រៃលិចទឹក នៅខេត្តទាំង៦ ជុំវិញបឹងទន្លេសាបចាប់ពីថ្ងៃទី១៦ ដល់ថ្ងែទី២០ ខែតុលានេះផងដែរ។
អនុប្រធានក្តាប់រួម នៃអាជ្ញាធរទន្លេសាប លោកហ៊ែល តូនីជាប់ប្រជុំមិនអាចមានប្រសាសន៍បានទេនាថ្ងៃចន្ទនេះ។
ការបោះបង្គោលព្រំនេះធ្វើឡើងទៅតាមអនុសាសន៍ណែនាំរបស់ប្រមុខរដ្ឋាភិបាល លើការរៀបចំធ្វើបច្ចុប្បន្នភាពផែនទី និង បោះបង្គោលតំបន់១ តំបន់២ និងតំបន់៣ នៃតំបន់ទន្លេសាប ឱ្យបានត្រឹមត្រូវ និងសុក្រឹតភាពឡើងវិញ ក្នុងការគិតគូរយកចិត្តទុកដាក់ដល់ការថែរក្សា ការពារ និងគ្រប់គ្រងតំបន់ទន្លេសាបប្រកបដោយចីរភាព និងនិរន្តរភាពសម្រាប់បន្តដល់កូនចៅជំនាន់ក្រោយ។
លោកនាយករដ្ឋមន្រ្តី ហ៊ុន ម៉ាណែត បានបង្ហាញការប្តេជ្ញាចិត្តក្នុងការការពារបឹងទន្លេសាប ដើម្បីទុកចិញ្ចឹមប្រជាជនទូទាំងប្រទេស ហើយរាជរដ្ឋាភិបាលនឹងខិតខំរកលទ្ធភាព ដើម្បីស្តារបឹងទន្លេសាបបន្ថែមទៀត។
កាលពីខែមករា កន្លងមក លោកក៏បានបញ្ជាឱ្យអាជ្ញាធរខេត្តជាប់បឹងទន្លេសាប ត្រូវតែទប់ស្កាត់ការទន្រ្ទានដីតំបន់៣ឱ្យបានផងដែរ។
តំបន់បឹងទន្លេសាប ត្រូវបានបែងចែកជា ៣ តំបន់។ ក្នុងនោះរួមមានតំបន់១ ជាតំបន់លំនៅដ្ឋាន ឬភូមិករ និងជាតំបន់បង្កបង្កើនផលរបស់ប្រជាពលរដ្ឋ ដែលទទួលបានសិទ្ធិកាន់កាប់ស្របច្បាប់ (ប័ណ្ណកម្មសិទ្ធិ)។
តំបន់២ ជាតំបន់ប្រើប្រាស់អាស្រ័យផល ស្រូវឡើងទឹកនិងប្រដេញទឹក និងក៏ជាតំបន់ទ្រនាប់ការពារ និងតំបន់៣ តំបន់ព្រៃលិចទឹក ហាមប៉ះពាល់ដាច់ខាត និងត្រូវការពារឱ្យខានតែបាន៕