កម្មវិធីពិព័រណ៍សិក្សានៅអឺរ៉ុប ដែលប្រព្រឹត្តទៅនៅ Factory Phnom Penh ពីថ្ងៃទី២៤-២៥ ខែតុលា។ EU in Cambodia
សហភាពអឺរ៉ុប (EU) ប្រចាំកម្ពុជា រៀបចំកម្មវិធី «ពិព័រណ៍សិក្សានៅអឺរ៉ុប» នៅ Factory Phnom Penh ដែលផ្ដល់ឱកាសដល់សិស្សនិងនិស្សិតកម្ពុជាទទួលបានព័ត៌មានអំពីការសិក្សានៅក្នុងប្រទេសនានានៅក្នុងសហភាពអឺរ៉ុប។
ពិព័រណ៍សិក្សានៅអឺរ៉ុបនេះ ប្រព្រឹត្តឡើងរយៈពេលពីរថ្ងៃ គឺថ្ងៃទី២៤ និង ២៥ ខែតុលា ដែលរំពឹងថា នឹងមានអ្នកចូលរួមប្រមាណ ១៥០០នាក់ តាមរយៈការចុះឈ្មោះមុននៅលើលីងដែលអាចរកឃើញនៅលើទំព័រហ្វេសប៊ុកសហភាពអឺរ៉ុបប្រចាំកម្ពុជា។
តាមរយៈកម្មវិធីនេះ សិស្សានុសិស្សអាចស្វែងយល់ពីកម្មវិធីថ្នាក់បរិញ្ញាបត្រ និង ក្រោយឧត្តមសិក្សា ឱកាសផ្លាស់ប្តូរការសិក្សា និងអាហារូបករណ៍ដែលផ្តល់ដោយគ្រឹះស្ថានឧត្តមសិក្សាមកពីទូទាំងទ្វីបអឺរ៉ុប រួមមាន ប្រទេសបែលហ្ស៊ិក សាធារណរដ្ឋឆែក ហ្វាំងឡង់ បារាំង អាល្លឺម៉ង់ ហុងគ្រី អៀរឡង់ អ៊ីតាលី ឡាតវី ប៉ូឡូញ រូម៉ានី ស្លូវ៉ាគី និងកម្មវិធី Erasmus+ របស់គណៈកម្មការអឺរ៉ុប។ នេះបើតាមសេចក្ដីប្រកាសព័ត៌មានរួមរបស់សហភាពអឺរ៉ុប និងក្រសួងអប់រំ យុវជន និងកីឡា។
អ្នកចូលរួមទស្សនាកម្មវិធីពិព័រណ៍នេះ ក៏អាចសួរសំណួរដោយផ្ទាល់ទៅកាន់អតីតនិស្សិតដែលធ្លាប់បានសិក្សានៅអឺរ៉ុប និងស្វែងយល់ពីរបៀបដែលការសិក្សានៅអឺរ៉ុបបានផ្លាស់ប្តូរជីវិតរបស់ពួកគេ។ ក្រុមហ៊ុនសម្ភារៈកីឡាបារាំង Decathlon ក៏ចូលរួមតាំងបង្ហាញនិងរៀបចំ សកម្មភាពកីឡាក្នុងកម្មវិធីនេះផងដែរ។
លោក អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជាបានថ្លែង៖ «អឺរ៉ុបគឺជាគោលដៅសិក្សាដ៏ពេញនិយមបំផុតនៅលើសកលលោក។ សាកលវិទ្យាល័យរបស់យើងផ្តល់ជូននូវការអប់រំខ្ពស់លំដាប់ពិភពលោក ដែលសាកសមនឹងតម្លៃ។ ទីកន្លែងសិក្សាទាំងនោះរួមមានចាប់ពីតំបន់សម្បូរព្រៃក្នុងប្រទេសហ្វាំងឡង់ ទៅកាន់ប្រទេសអាឡឺម៉ង់ និងបារាំង ដែលជាទីក្រុងសម្បូរទៅដោយទិសដៅប្រវត្តិសាស្ត្រឬក៏ទៅកាន់ភូមិដ៏ស្រស់ស្អាតក្នុងប្រទេសអ៊ីតាលី និងអេស្ប៉ាញជាដើម»។
លោក ហងជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា (ឆ្វេង) និងលោក អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុបប្រចាំកម្ពុជា ក្នុងកម្មវិធីពិព័រណ៍សិក្សានៅអឺរ៉ុប នៅថ្ងៃទី២៤ ខែតុលា។ EU in Cambodia
លោកបន្តថា សិស្សដែលសិក្សានៅអឺរ៉ុបក៏មានឱកាសស្វែងយល់ពីភាពចម្រុះនៃទ្វីប និងរបៀបរស់នៅបែបអឺរ៉ុបផងដែរ។ ការមកទស្សនាពិព័រណ៍នេះ គឺជាឱកាសដ៏ល្អសម្រាប់និស្សិតកម្ពុជា និងអាណាព្យាបាលដើម្បីស្វែងយល់ពីឱកាសផ្សេងៗដែលសាកលវិទ្យាល័យអឺរ៉ុបនឹងផ្តល់ជូន។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានលើកទឹកចិត្តឱ្យសិស្សនិស្សិតទៅសិក្សានៅអឺរ៉ុប ដើម្បីបង្កើនជំនាញរបស់ពួកគេ និងរួមចំណែកដល់ការអភិវឌ្ឍន៍សង្គម។
លោកថ្លែងថា៖ «សញ្ញាបត្រសិក្សាមកពីអឺរ៉ុបត្រូវបានទទួលស្គាល់ជាលក្ខណៈអន្តរជាតិ។ ការសិក្សានៅអឺរ៉ុបពិតជាជួយលើកកម្ពស់អនាគតការងាររបស់យុវជនកម្ពុជា។ មិនត្រឹមតែប៉ុណ្ណោះ ទីក្រុងនៃបណ្ដាប្រទេសនៅអឺរ៉ុបក៏ជាកន្លែងដែលអាចរស់នៅបានយ៉ាងសមរម្យ ដែលរួមមានផ្លូវជិះកង់ និងខ្យល់អាកាសបរិសុទ្ធផងដែរ»។
បើតាមសេចក្ដីប្រកាសព័ត៌មាន សហភាពអឺរ៉ុប គឺជាស្ថាប័នផ្ដល់ជំនួយហិរញ្ញប្បទានឥតសំណងធំបំផុតគាំទ្រដល់វិស័យអប់រំនៅក្នុងប្រទេសកម្ពុជា៕
