មជ្ឈមណ្ឌលប្រចាំបញ្ជាសង្គ្រោះអគ្គិភ័យលើកដំបូងត្រូវបានសម្ពោធដាក់ឱ្យដំណើរការហើយនាថ្ងៃពុធ ទី២៣ ខែតុលានេះ។ រូបថត ប៉ូលីស
ភ្នំពេញៈ មជ្ឈមណ្ឌលប្រចាំបញ្ជាសង្គ្រោះអគ្គិភ័យលើកដំបូងដែលស្ថិតក្នុងបរិវេណអគ្គស្នងការដ្ឋាននគរបាលជាតិ ត្រូវបានសម្ពោធដាក់ឱ្យដំណើរការហើយនាថ្ងៃពុធ ទី២៣ ខែតុលានេះ ដើម្បីចូលរួមផ្តល់សេវាទប់ស្កាត់គ្រោះអគ្គិសភ័យនៅកម្ពុជា។
លោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យនិងសង្គ្រោះនៃអគ្គស្នងការដ្ឋានបានឱ្យដឹងថា អត្ថប្រយោជន៍របស់មជ្ឈមណ្ឌលនេះគឺប្រាប់ឱ្យដឹងមុន ពីសញ្ញានៃការកើតមានអគ្គិសភ័យ បង្ការមិនឱ្យមាន អគ្គិភ័យកើតឡើង និងកាត់បន្ថយហានិភ័យឱ្យបាននៅកម្រិតអប្បបរិមា។
លោកមានប្រសាសន៍ប្រាប់ភ្នំពេញប៉ុស្តិ៍នៅថ្ងៃព្រហស្បតិ៍នេះថា៖«នេះជាលើកទីមួយហើយ ដែលមានមជ្ឈមណ្ឌលរង់ចាំទទួលបញ្ជាសង្គ្រោះអគ្គិភ័យ សម្រាប់យើងក្នុងការគ្រប់គ្រងស្ថានភាពអគ្គិភ័យឱ្យដឹងទុកជាមុន»។
លោកនាយឧត្តមសេនីយ៍ ស ថេត បានថ្លែងក្នុងពិធីសម្ពោធថា ការកសាងមជ្ឈមណ្ឌលប្រចាំបញ្ជាសង្គ្រោះអគ្គិភ័យនេះឡើងគឺក្នុងគោលបំណងផ្តល់សេវាកម្ម ជូនដល់រោងចក្រ សហគ្រាស សិប្បកម្ម គោលដៅអាជីវកម្មនិងលំនៅឋានជាដើម។
មជ្ឈមណ្ឌលនេះមានដំឡើងឧបករណ៍បច្ចេកទេសនិងតភ្ជាប់បណ្តាញទំនាក់ទំនងផ្តល់ព័ត៌មានសម្រាប់បង្ការពន្លត់អគ្គិភ័យ ដោយមានក្រុមហ៊ុនថប ហ្វាយអឺ សេហ្វធី (ខេមបូឌា) (TOP FIRE Safety-Cambodia co.,LTD) ជាដៃគូសហការផ្គត់ផ្គង់ឧបករណ៍សម្ភារៈបច្ចេកទេស។
លោកនាយឧត្តមសេនីយ៍មានប្រសាសន៍ថា៖ «ហេតុការណ៍គ្រោះថ្នាក់អគ្គិភ័យ បើហ៊ានតែធ្វេសប្រហែស ខ្វះការប្រុងប្រយ័ត្នគឺមិនត្រឹមតែបំផ្លិចបំផ្លាញទ្រព្យសម្បត្តិ ផ្ទះសម្បែងប៉ុណ្ណោះទេ ពេលខ្លះវាថែមទាំងអាចឆក់យកអាយុជីវិត និងបង្កឱ្យរងរបួស ហើយពេលខ្លះធ្លាក់ខ្លួនពិការថែមទៀតដែលធ្វើឱ្យប៉ះពាល់ជីវភាពរស់នៅ»។
លោកបានលើកឡើងថា ការត្រៀមលក្ខណៈសម្បត្តិម្ចាស់ការ ក្នុងការបង្ការទប់ស្កាត់ គឺជាភាពចាំបាច់មួយមិនអាចខ្វះបាន។ ដូច្នេះការបំពាក់ឧបករណ៍បច្ចេកទេស និងការតភ្ជាប់ទំនាក់ទំនង ព័ត៌មានស្របតាមលក្ខខណ្ឌបច្ចេកទេស គឺជាការជ្រើសរើសដ៏ត្រឹមត្រូវ នូវភ្នាក់ងារផ្តល់ព័ត៌មាននិងផ្តល់កិច្ចអន្តរាគមន៍ទាន់ហេតុការណ៍ក្នុងករណីមានអគ្គិភ័យកើតឡើង ក្នុងទីតាំងរបស់ខ្លូន។ តាមរយៈទូរស័ព្ទផ្ទាល់ខ្លួនការផ្តល់ព័ត៌មានពីក្រុមប្រចាំបញ្ជានៃមជ្ឈមណ្ឌលប្រចាំបញ្ជាសង្គ្រោះអគ្គិភ័យ រួមទាំងការបញ្ជាឱ្យរថយន្តពន្លត់អគ្គិសភ័យ ដែលនៅកៀកបំផុតចេញអន្តរាគមន៍បានលឿនទាន់ពេលវេលានិងចំគោលដៅ។
លោក នេត វន្ថា បានពន្យល់ថា ដើម្បីទទួលបានសេវានេះយកទៅប្រើប្រាស់ ម្ចាស់ទីតាំងដែលមានដូចជា រោងចក្រ សហគ្រាស សិប្បកម្ម គោលដៅអាជីវកម្មផ្សេងៗនិងលំនៅឋានត្រូវទៅចុះបញ្ជីនៅមជ្ឈមណ្ឌលដើម្បីទទួលបានការបំពាក់ឧបករណ៍បច្ចេកទេសនៅតាមទីតាំង។ បន្ទាប់មក នឹងមានការបង្កើតអែបជូនអ្នកចុះឈ្មោះ ដើម្បីបានប្រើប្រាស់សេវាតាមរយៈទូរស័ព្ទស្មាតហ្វូន។
លោកមានប្រសាសន៍ថា៖ «ចុះបញ្ជីហើយ មានស្មាតហ្វូនប្រចាំជាប់នៅនឹងដៃ ពេលមានបញ្ហា វាប្រាប់ឱ្យយើងដឹងតែម្តង។ ទី១ [ឧបករណ៍] ផ្តល់ព័ត៌មានព្រមានពីអគ្គិភ័យមកមជ្ឈមណ្ឌលមុន។ ទី២ ពេលទទួលបានការគំរាមកំហែងពីអគ្គិភ័យហើយ បើម្ចាស់ផ្ទះអវត្តមានពីផ្ទះ មជ្ឈមណ្ឌលជូនដំណឹងទៅម្ចាស់ផ្ទះវិញថា ឥឡូវផ្ទះ អ្នកនៅកន្លែងនេះ មានការគំរាមកំហែងឬក៏ការផ្តល់សញ្ញាពាក់ព័ន្ធនិងអគ្គិភ័យហើយ»។
លោកបន្តដូច្នេះថា៖ «អញ្ជឹង អ្នកឯងត្រូវស្រូត រៀបចំវិធីសាស្រ្តពន្លត់អគ្គិភ័យបឋម។ បើមានអគ្គិភ័យហើយ គាត់មិនអាចគ្រប់គ្រងបាន គាត់ក៏រាយការណ៍មកមជ្ឈមណ្ឌលវិញថា ឥឡូវភ្លើងឆេះធំហើយ ដើម្បីអង្គភាព កន្លែងប្រចាំបញ្ជា បញ្ជាទៅអង្គភាពពន្លត់អគ្គិភ័យដែលនៅជិតបំផុតដើម្បីចេញបានជួយទាន់ពេលវេលា»។
លោកបញ្ជាក់ថា មជ្ឈមណ្ឌលនេះមានតួនាទី រង់ចំាទទួលផ្តល់ព័ត៌មាននិងវិភាគទិន្នន័យពីឧបករណ៍ដែលម្ចាស់សំណង់ ម្ចាស់គោលដៅនិងរោងចក្រសហគ្រាសបានតភ្ជាប់ជាមួយប្រព័ន្ធជាមួយមជ្ឈមណ្ឌលតាមរយៈស្មាតហ្វូនពីការព្រមានទុកជាមុន។
លោកបានឱ្យដឹងថា រហូតមកដល់ពេលនេះ មានអ្នកទៅចុះបញ្ជីទទួលសេវាជាច្រើនហើយ ដែលអ្នកខ្លះនៅតាមបណ្តាខេត្តមួយចំនួន ដូចជាខេត្តសៀមរាប និងព្រះសីហនុជាដើម។ ទោះយ៉ាងណា លោកមិនទាន់បានដឹងពីព័ត៌មានលម្អិតពីសេវានៃការចុះបញ្ជីនោះទេ។
យោងតាមនគរបាលជាតិបានឱ្យដឹងថា ក្រុមហ៊ុនបានចំណាយដើមទុន ៣លាន ៣សែនដុល្លារសហរដ្ឋអាមេរិកក្នុងការសាងសង់មជ្ឈមណ្ឌលនេះ។ ក្នុងនោះរួមមាន ៨០ម៉ឺនដុល្លារសម្រាប់អគារ ៥០ម៉ឺនដុល្លារសម្រាប់បច្ចេកទេស និងបំពាក់ឧបករណ៍ និង២លានដុល្លារសម្រាប់បង្កើតបច្ចេកវិទ្យា និងរៀបចំប្រព័ន្ធទិន្នន័យព័ត៌មាន។
លោក ស ថេត ក៏បានណែនាំផងដែរឱ្យមានការខិតខំលើកកម្ពស់មន្រ្តីប្រចាំបញ្ជា ប្រកបដោយគុណភាពនិងមានប្រសិទ្ធភាព ជាពិសេស កម្លាំងប្រតិបតិ្តការពន្លត់អគ្គិភ័យនិងសង្រ្គោះរួមទាំង ភ្នាក់ងារកាតព្វកិច្ចពន្លត់អគ្គិភ័យ ក្រុមពន្លត់អគ្គិភ័យស្ម័គ្រចិត្តនៅមូលដ្ឋាន ដោយត្រូវផ្តល់ការគាំទ្រលើការងារបណ្តុះបណ្តាល ការបំពាក់មធ្យោបាយឧបករណ៍សម្ភារៈបច្ចេកទេស សម្ភារៈសាមញ្ញ ឬ បុរាណឱ្យអស់លទ្ធភាពដើម្បីឱ្យពួកគេមានលទ្ធភាពគ្រប់គ្រាន់ចូលរួមបង្ការ ពន្លត់ និងសង្រ្គោះបានទាន់ពេលវេលា។
លើសពីនោះ អង្គភាពនគរបាលបង្ការ ពន្លត់អគ្គិភ័យ និងសង្រ្គោះត្រូវត្រៀមលក្ខណៈសម្បត្តិគ្រប់បែបយ៉ាង និងគ្រប់កាលៈទេសៈ ក្នុងការចេញអន្តរាគមន៍សង្រ្គោះ ពេលមានហេតុការណ៍គ្រោះថ្នាក់អគ្គិភ័យកើតឡើង។
បន្ថែមពីនោះ អាជ្ញាធរមូលដ្ឋានគ្រប់ជាន់ថ្នាក់ ត្រូវរួមចំណែកដល់ការរៀបចំសណ្តាប់ធ្នាប់នៅតាម តំបន់មិនទាន់រៀបរយ ដើម្បីកាត់បន្ថយគ្រោះថ្នាក់អគ្គិភ័យផងនិងផ្តល់លទ្ធភាពគ្រប់គ្រាន់ដល់ក្រុមអន្តរាគមន៍ពន្លត់អគ្គិភ័យផង ក្នុងប្រតិបត្តិការអន្តរាគមន៍សង្រ្គោះ។
ក្នុងរយៈពេល ៦ខែ ឆ្នាំ២០២៤នេះ គ្រោះអគ្គិភ័យនៅទូទាំងប្រទេសបានកើតឡើងចំនួន ៧៣៨លើក ដែលមានការកើនឡើង ២២២លើក បើធៀបនឹងរយៈពេលដូចគ្នាក្នុងឆ្នាំ ២០២៣។
ហេតុការណ៍នេះបានបណ្ដាលឱ្យមនុស្សស្លាប់ចំនួន ៩នាក់ របួស ២៥នាក់ ឆេះផ្ទះ៤៥០ខ្នង និងចំនួនតូប ៥០២ផងដែរ។ ចំពោះមូលហេតុអគ្គិភ័យទាំងនោះ គឺបណ្តាលមកពីចរន្ដអគ្គីសនីចំនួន ៤១.៥៦ភាគរយ ប្រើប្រាស់ភ្លើង ៣៩.៣៣ភាគរយ និងមូលហេតុដែលកំណត់មិនទាន់បានចំនួន ១៩.១១ភាគរយផងដែរ។
លោក នេត វន្ថា សង្ឃឹមថា ប្រសិនបើមានការគាំទ្រពីម្ចាស់រោងចក្រស សហគ្រាស សំណង់ ឬលំនៅឋានទូទៅ ក្នុងការប្រើប្រាស់សេវានោះ គ្រោះអគ្គិភ័យនឹងអាចមានការថយចុះ៕
