លោកនាយករដ្ឋមន្រ្តីហ៊ុន ម៉ាណែតថ្លែងក្នុងពិធីសម្ភោធដាក់ឱ្យប្រើប្រាស់ជាផ្លូវការ នូវគម្រោងអភិវឌ្ឍន៍ ទំនប់អូរតេធិបតី ទំនប់សែនសុខដុម និង ទំនប់សែនមនោរម្យ ស្ថិតក្នុងខេត្តមណ្ឌលគិរីនាថ្ងៃព្រហស្បតិ៍ ទី២៤ ខែតុលានេះ។ រូបថត STPM
មណ្ឌលគិរីៈ ប្រមុខរដ្ឋាភិបាលបានអំពាវនាវកុំឱ្យពលរដ្ឋចាញ់បោកមេខ្យល់ ដែលកំពុងតែដើរបំផុសបំផុលឱ្យចុះឈ្មោះ ដើម្បីយកដីសម្បទានសង្គមកិច្ចក្នុងខេត្តមណ្ឌលគិរី ហើយបានបញ្ហាឱ្យអាជ្ញាធរចាត់វិធានការច្បាប់ទៅលើសកម្មភាពបោកប្រាស់នោះ។
ការអំពាវនាវនេះត្រូវបានធ្វើឡើងក្នុងពិធីសម្ភោធដាក់ឱ្យប្រើប្រាស់ជាផ្លូវការ នូវគម្រោងអភិវឌ្ឍន៍ ទំនប់អូរតេធិបតី ទំនប់សែនសុខដុម និង ទំនប់សែនមនោរម្យ ស្ថិតក្នុងខេត្តមណ្ឌលគិរីនាថ្ងៃព្រហស្បតិ៍ ទី២៤ ខែតុលានេះ។
លោកនាយករដ្ឋមន្រ្តីហ៊ុន ម៉ាណែតថ្លែងថា មានមេខ្យល់កំពុងតែដើរបំផុស ឱ្យពលរដ្ឋធ្វើការចុះឈ្មោះ ដើម្បីទទួលបានដីសម្បទានសង្គមកិច្ចនៅក្នុងស្រុកពេជ្រាដា ដោយមានការបង់ប្រាក់ផងដែរ។
លោកមានប្រសាសន៍ថា៖«សូមឱ្យបងប្អូន កុំជឿលើមេខ្យល់ ដែលកំពុងតែបំផុស ដើរយកលុយ ថាចុះឈ្មោះដើម្បីយកដីសម្បទាននេះ។ អត់បានទេ ខ្ញុំសូមប្រកាស។ ប្រជាពលរដ្ឋ សូមកុំចាញ់បោក»។ លោកនាយករដ្ឋមន្រ្តីបានបន្តថា ការចុះឈ្មោះស្នើសុំដីសម្បទានសង្គកិច្ច គឺធ្វើឡើងតាមយន្តការរដ្ឋ និងតាមរយៈអាជ្ញាធរមូលដ្ឋាន។
ប្រមុខរដ្ឋាភិបាលមានប្រសាសន៍ថា៖« បើចុះឈ្មោះត្រូវតាមយន្តការរដ្ឋ។ កន្លងទៅយើងមានយន្តការដីសម្បទានចុះតាម អាជ្ញាធរឃុំ ក្រៅពីហ្នឹង ពេលដែលគណៈកម្មាធិការបង្កើត គឺយើងមានការផ្សព្វផ្សាយច្បាស់លាស់ ហើយសុំឱ្យអាជ្ញាធរ សមត្ថកិច្ច មើលមេខ្យល់ហ្នឹង ដើម្បីអនុវត្តច្បាប់ ព្រោះតែអញ្ជឹងដើរបោកប្រជាពលរដ្ឋ...ណែ នៅ[ស្រុក]ពេជ្រាដាមាន អាជ្ញាធរខេត្តឆែកមើលឱ្យច្បាស់»។
លោកបន្ថែមថា៖«មេខ្យល់អញ្ចេះ[ខ្យល់ធម្មជាតិ]ធ្លាក់រហើយ តែខ្យល់នោះ ខ្យល់ក្តៅ។...បោកប្រជាជនអស់លុយហើយរឿងទៀត។ មិនស្រួលទៅកាប់ដី កាប់អីកន្លែងណា ...អញ្ជឹង ខ្ញុំសូមប្រាប់ បើខ្យល់នេះ ខ្យល់ល្ហើយ មានផាសុខភាព តែមេខ្យល់ចាប់ដីនេះ អត់ទេ គឺកុំធ្វើ ហើយបើសិនជាធ្វើ ត្រូវប្រឈមការអនុវត្តច្បាប់»។
រដ្ឋបាលខេត្តមណ្ឌលគិរីបានឱ្យដឹងថា មានមេខ្យល់ ដើរបំផុសបំផុលពីរឿងចែកដីលំនៅឋាន និងដីកសិកម្មជូនប្រជាពលរដ្ឋនៅបណ្តាខេត្តផ្សេងៗ នៅក្នុងភូមិវ៉ាល់យោង ឃុំប៊ូស្រា ស្រុកពេជ្រាដានាពេលថ្មីៗនេះ។ ពួកគេបានអះអាងថា ពលរដ្ឋមួយគ្រួសារនឹងទទួលបានដីលំនៅឋានទំហំក្បាលដី ៣០ម៉ែត្រ និងជម្រៅ ៧០ម៉ែត្រ រួមទាំងដីកសិកម្មចំនួន៣ហិកតាផងដែរ។
រដ្ឋបាលខេត្តបានបញ្ជាក់ថា៖«គ្មានគោលការណ៍ណែនាំ ឬការអនុញ្ញាតពីរាជរដ្ឋាភិបាល ក៏ដូចជាក្រសួង ស្ថាប័នពាក់ព័ន្ធណាមួយ ក្នុងការបែងចែកដីជូនប្រជាពលរដ្ឋនោះទេ។ ព័ត៌មាននេះ គឺជាការបំផុសបំផុលពីសំណាក់ក្រុមមេខ្យល់ ក្នុងគោលបំណងបោកប្រាស់ពលរដ្ឋស្លូតត្រង់»។
រដ្ឋបាលខេត្ត ក៏បានអំពាវនាវដល់ប្រជាពលរដ្ឋ កុំឱ្យចាញ់បោកតាមការសន្យារបស់ក្រុមមេខ្យល់ ដែលនាំឱ្យ ខាតបង់ទ្យព្យសម្បត្តិ។
រដ្ឋបាលខេត្តក៏បានឱ្យដឹងផងដែរថា នាពេលបច្ចុប្បន្ននេះ ខេត្តមណ្ឌលគិរី មានដីសម្បទានសង្គមកិច្ច១កន្លែង ស្ថិតនៅក្នុងស្រុកកោះញែក សម្រាប់ផ្តល់ជូនប្រជាពលរដ្ឋក្រីក្រ និងគ្មានដីពិតប្រាកដ។ ប្រជាពលរដ្ឋ អាចដាក់ពាក្យស្នើសុំតាមរយៈ អាជ្ញាធរមូលដ្ឋាន ភូមិ ឃុំ ស្រុក ដើម្បី រដ្ឋបាលខេត្តពិនិត្យលទ្ធភាព និងផ្តល់ជូនតាមការជាក់ស្តែង។
លោកនាង វណ្ណៈនាយករដ្ឋបាលខេត្តមណ្ឌលគិរីបានឱ្យដឹងថា អាជ្ញាធរខេត្តកំពុងតែរៀបចំក្រុមការងារ ដើម្បីចុះស្រាវជ្រាវរកអ្នកពាក់ព័ន្ធនឹងករណីនេះ ដើម្បីមានវិធានការទៅតាមផ្លូវច្បាប់។
លោកថ្លែងថា៖« កន្លងមក មានជនខិលខូចបោកប្រាស់ពលរដ្ឋ សន្យាអញ្ចេះ សន្យាអញ្ចុះ អស់លុយពលរដ្ឋច្រើនដែរ។ នេះគឺជាគំនិតដ៏ខ្មៅកខ្វក់របស់ជនជាមេខ្យល់នេះ។ ករណីនេះ ខេត្តនឹងមានវិធានការចំពោះបុគ្គលដែលបានប្រព្រឹត្ត»៕
