លោក ឈាង រ៉ា រដ្ឋមន្ត្រីក្រសួងសុខាភិបាល ចាក់ថ្នាំបង្ការកញ្ជ្រឹលលើទារកម្នាក់ក្នុងថ្ងៃបើកយុទ្ធនាការចាក់ថ្នាំបង្ការ កាលពីថ្ងៃទី៣១ ខែតុលា ឆ្នាំ២០២៤។ Unicef
ក្រសួងសុខាភិបាល និងដៃគូអភិវឌ្ឍន៍បើកយុទ្ធនាការផ្តល់បន្ថែមថ្នាំបង្ការជំងឺកញ្ជ្រឹល និង ស្ទូចនៅទូទាំងប្រទេសដើម្បីការពារកុមារជាង១.៥ លាននាក់ អាយុ ពី៩ខែ ដល់ ៥៩ខែ នៅទូទាំងប្រទេសកម្ពុជា។ យុទ្ធនាការនេះជាការដោះស្រាយជាបន្ទាន់មួយដើម្បីការពារពីការចម្លងជំងឺកញ្ជ្រឹល។
យុទ្ធនាការដែលចាប់ផ្ដើមនៅថ្ងៃទី៣១ ខែតុលានេះ ដឹកនាំផ្ទាល់ដោយក្រសួងសុខាភិបាល និងបានទទួលការគាំទ្រផ្នែកហិរញ្ញវត្ថុពីអង្គការសម្ព័ន្ធសកលសម្រាប់វ៉ាក់សាំង និងការផ្តល់ថ្នាំបង្ការ (Gavi) និងមានការគាំទ្រផ្នែកបច្ចេកទេសពីអង្គការសុខភាពពិភពលោក (WHO), អង្គការយូនីសេហ្វ និង និងអង្គការគ្លីនតុនហែល អែកសេស អឺនីតស៊ីអេជីវ (CHAI)។
ចំនួនករណីជំងឺកញ្ជ្រឹលមានការកើនឡើងទ្វេដងពី ១៧ម៉ឺនករណីនៅក្នុងឆ្នាំ២០២២ ដល់ ៣២ម៉ឺនករណី ក្នុងឆ្នាំ២០២៣ ដែលមូលហេតុចម្បងនៃការកើនឡើងនេះគឺដោយសារតែការរំខានដល់ការផ្តល់ថ្នាំបង្ការជាប្រចាំក្នុងអំឡុងពេលរីករាលដាលវីរុសកូវីដ១៩។
កម្ពុជា និងប្រទេសជិតខាងកំពុងប្រឈមនឹងភាពងាយរងគ្រោះនៃការឆ្លងរីករាលដាលជំងឺកញ្ជ្រឹល ស្ទូច ជាពិសេសចំពោះប្រជាជនដែលងាយរងគ្រោះ ដូចជា កុមារ ជនអន្តោប្រវេសន៍ ប្រជាជនចល័ត និងសហគមន៍នៅតាមតំបន់ព្រំដែន។ នេះបើតាមសេចក្ដីប្រកាសព័ត៌មានរួម។
លោក ឈាង រ៉ា រដ្ឋមន្ត្រីក្រសួងសុខាភិបាល បានថ្លែងនៅក្នុងពិធីបើកយុទ្ធនាការនេះថា៖ «ខ្ញុំជឿជាក់ថា ក្នុងយុទ្ធនាការលើកនេះផងដែរ បុគ្គលិកសុខាភិបាលនឹងបន្តការខិតខំប្រឹងប្រែងអស់ពីសមត្ថភាព ធ្វើយ៉ាងណាអាចផ្តល់ថ្នាំបង្ការដល់កុមារទាំងអស់ ជាពិសេសកុមារដែលរស់នៅតំបន់ដែលមានហានិភ័យខ្ពស់ និងកន្លែងដែលពិបាកដល់ដូចជាកុមាររស់នៅក្នុងគ្រួសារក្រីក្រនៅតាមទីក្រុង អ្នករស់នៅក្នុងសហគមន៍ដាច់ស្រយាលនៅតាមជនបទ កុមារតូចជនជាតិភាគតិច និងកុមារអន្តោប្រវេសន៍»។
ដោយយោងតាអង្គការសុខភាពពិភពលោក និងអង្គការ មូលនិធិសម្រាប់កុមារនៃអង្គការសហប្រជាជាតិ (WUENIC) ប្រទេសកម្ពុជាមានអត្រាគ្របដណ្តប់វ៉ាក់សាំងការពារជំងឺកញ្ជ្រឹល ស្ទូចដូសទីមួយ (MR1) បាន ៧៩ភាគរយ និងដូសទីពីរបាន ៦៤ភាគរយនៅឆ្នាំ២០២៣ ដែលស្ថិតនៅក្រោមតម្រូវការសម្រាប់ការបង្ការការផ្ទុះរាលដាលនិងការស្លាប់ដោយសារជំងឺកញ្ជ្រឹលនិង ស្ទូច។
លោកស្រីវេជ្ជបណ្ឌិត Marianna Trias តំណាងអង្គការសុខភាពពិភពលោកប្រចាំកម្ពុជា បានថ្លែងថា ជំងឺកញ្ជ្រោល ស្ទូច គឺពិតជាមានហានិភ័យធ្ងន់ធ្ងរ ប៉ុន្តែជាជំងឺមួយដែលអាចការពារបានដោយ វ៉ាក់សាំង ដែលកុមារកម្ពុជាមិនគួរមានបញ្ហានេះទេ។
លោកស្រី Nadia Lasri អ្នកគ្រប់គ្រងជាន់ខ្ពស់ប្រចាំប្រទេស និងជាអ្នកសម្របសម្រួលមកពី Gavi ប្រចាំកម្ពុជាថ្លែងថា ការគាំទ្ររបស់អង្គការ Gavi សម្រាប់យុទ្ធនាការនេះ គឺដើម្បីបង្កើន និងបន្តការខិតខំប្រឹងប្រែងក្នុងការពង្រឹងការផ្តល់ថ្នាំបង្ការជាប្រចាំរបស់កម្ពុជា។ លោកស្រីបន្តថា គ្មានសហគមន៍ណាមួយត្រូវបានទុកចោលនោះទេ។
វ៉ាក់សាំងការពារជំងឺកញ្ជ្រឹល ស្ទូចនេះ គឺមានសុវត្ថិភាព ប្រសិទ្ធភាព និងទទួលដោយឥតគិតថ្លៃ ដែលអាចការពារកុមារទូទាំងពិភពលោកអស់រយៈពេលជាង៥០ឆ្នាំមកហើយ។ វ៉ាក់សាំងនេះអាចរកបាននៅគ្រប់មណ្ឌលសុខភាពទាំងអស់របស់ក្រសួងសុខាភិបាល។ កុមារទាំងអស់ រួមទាំងកុមារដែលធ្លាប់កើតជំងឺកញ្ជ្រឹល ឬកុមារដែលបានទទួលវ៉ាក់សាំងពីមុនក៏ដោយ ត្រូវបានលើកទឹកចិត្តឱ្យទទួលវ៉ាក់សាំងនេះដែរ។
យុទ្ធនាការនេះបែងចែកជាពីរដំណាក់កាល ដោយដំណាក់កាល ទីមួយនឹងគ្របដណ្តប់ខេត្តចំនួន១៣ (បន្ទាយមានជ័យ បាត់ដំបង កំពង់ចាម កំពង់ស្ពឺ កំពង់ធំ កណ្តាល ក្រចេះ ឧត្តរមានជ័យ ភ្នំពេញ ពោធិ៍សាត់ សៀមរាប ប៉ៃលិន និងខេត្តត្បូងឃ្មុំ) ចាប់ថ្ងៃទី១ ដល់ថ្ងៃទី១៣ ខែ វិច្ឆិកា ឆ្នាំ ២០២៤។ ដំណាក់កាលទីពីរ គ្របដណ្តប់ខេត្តចំនួន១២ (ខេត្តកំពង់ឆ្នាំង កំពត កោះកុង មណ្ឌលគិរី ព្រះវិហារ ព្រៃវែង រតនគិរី ព្រះសីហនុ ស្ទឹងត្រែង ស្វាយរៀង តាកែវ និងខេត្តកែប) ចាប់ពីថ្ងៃទី២៥ ខែ វិច្ឆិកា ដល់ថ្ងៃទី៦ ខែធ្នូ ឆ្នាំ២០២៤៕
