គ្រោះថ្នាក់ចរាចរណ៍មួយនៅលើផ្លូវជាតិលេខ ៦កាលពីថ្ងៃភ្ជុំបិណ្ឌ។ រូបថត ហ្វេសប៊ុក
ភ្នំពេញៈ ចំនួនគ្រោះថ្នាក់ចរាចរណ៍ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌបានកើតមានចំនួន ៣៤លើក ដែលថយចុះជាង ៤០ភាគរយ បើធៀបនឹងរយៈពេលដូចគ្នា កាលពីឆ្នាំ ២០២៣កន្លងមក ប៉ុន្តែចំនួនអ្នកស្លាប់មានការកើនឡើងចំនួន៨នាក់។
លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យនគរបាលជាតិបានឱ្យដឹងថា រយៈពេល៣ថ្ងៃនៃបុណ្យភ្ជុំបិណ្ឌចាប់ពីថ្ងៃទី១ដល់ថ្ងៃទី៣ ខែតុលា ឆ្នាំ២០២៤នេះ គ្រោះថ្នាក់ចរាចរណ៍បានកើតមានចំនួន៣៤លើកនៅទូទាំងប្រទេស។ បើធៀបនឹងរយៈពេលដូចគ្នាកាលពីឆ្នាំ២០២៣កន្លងមក ចំនួនគ្រោះថ្នាក់នេះមានការថយចុះចំនួន២៤លើក ឬ៤១ភាគរយ។
លោកឧត្តមសេនីយ៍ឯកបញ្ជាក់ថា៖«៣ថ្ងៃឆ្នាំនេះ ហេតុការគ្រោះថ្នាក់ចរាចរណ៍កើតឡើងតែ៣៤លើកទេ តែឆ្នាំមុនកើតឡើង៥៨លើក។ ប៉ុន្តែសំខាន់ យើងឃើញថា ការស្លាប់មានកំណើន។ លើកនេះ បណ្តាលឱ្យស្លាប់ចំនួន៣០នាក់។ ឆ្នាំមុនកើតមាន៥៨លើក ស្លាប់ ២២នាក់»។
លោកបន្តថា រីឯចំនួនអ្នករងរបួសវិញ គ្រោះថ្នាក់ចរាចរណ៍ឆ្នាំនេះ មានចំនួនតែ៥០នាក់ប៉ុណ្ណោះ ខណៈពេលពីឆ្នាំទៅមានរហូតដល់ទៅ៧៩នាក់ ដែលមានការថយចុះ២៩នាក់ ឬ៣៧ភាគរយ។
គ្រោះថ្នាក់ចរាចរណ៍បានកើតឡើងភាគច្រើនគឺនៅថ្ងៃទី២ តុលា ដែលមានរហូដល់ទៅចំនួន ១៥លើក បណ្តាលឱ្យមនុស្សស្លាប់១៧នាក់ ក្នុងនោះមានស្រីចំនួន ៣នាក់ និងអ្នករបួសធ្ងន់ស្រាល១៩នាក់។ ក្នុងចំណោមជនរងគ្រោះមានអ្នកមិនពាក់មួកសុវត្ថិភាពចំនួន ២៦នាក់។ នេះបើយោងតាម អគ្គស្នងការនគរបាលជាតិ។
ប្រភពដដែលបានឱ្យដឹងថា មូលហេតុដែលបង្កឱ្យមានគ្រោះថ្នាក់រួមមាន កត្តាល្មើសល្បឿន ការមិនគោរពសិទ្ធិ មិនប្រកាន់ស្តាំ ការប្រជែង និងកត្តាយានជាដើម។
គ្រោះថ្នាក់ចរាចរណ៍ក៏បានសម្លាប់មនុស្សចំនួន៤នាក់ និងរបួស ៨ នាក់ផងដែរនៅថ្ងៃសុក្រទី៤ ខែតុលានេះ។
ទាក់ទងទៅនឹងបញ្ហាចរាចរណ៍នេះផងដែរ អភិបាលខេត្តកំពង់ស្ពឺ និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត លោកជាម ច័ន្ទសោភ័ណបានណែនាំឱ្យអង្គភាពពាក់ព័ន្ធ ធ្វើការផ្សព្វផ្សាយច្បាប់ចរាចរណ៍ផ្លូវគោកឱ្យបានទូលំទូលាយ ដល់អ្នកបើកបរទោចក្រយានយន្ត (ម៉ូតូ) ឱ្យពាក់មួកសុវត្ថិភាព ។ ទោះយ៉ាងណា ចំពោះអ្នកបើកបរត្រីចក្រយានយន្ត ដូចជា ផាស់អាប់ គឺមិនត្រូវបានតម្រូវឱ្យពាក់មួកសុវត្ថិភាពនោះទេ។
លោក ជាម ច័ន្ទសោភ័ណ បានណែនាំថា៖«នគរបាលចរាចរណ៍ផ្លូវគោកទូទាំងខេត្ត ត្រូវបង្កើនប្រសិទ្ធភាពនៃការអនុវត្តវិធានការច្បាប់ឱ្យបានម៉ឺងម៉ាត់ ប្រកបដោយតម្លាភាពគ្មានការលើកលែងនឹងយោគយល់នោះទេ និងត្រូវធ្វើការផាកពិន័យតាមច្បាប់ ចាប់ពីថ្ងៃទី១ ខែតុលា ឆ្នាំ២០២៤នេះតទៅ»៕
