ភ្ញៀវទេសចរកូរ៉េខាងត្បូងមួយក្រុមធំបានមកដល់អាកាសយានដ្ឋានអន្តរជាតិសៀមរាប កាលពីថ្ងៃទី៥ ខែតុលា ឆ្នាំ២០២៣។ រូបថត មន្ទីរព័ត៌មានខេត្តសៀមរាប
មិនខុសពីស្ថានភាពទីផ្សារទេសចរណ៍មកពីប្រទេសផ្សេងទេ ចំនួនភ្ញៀវទេសចរមកពីសាធារណរដ្ឋកូរ៉េ នៅមានកម្រិតនៅឡើយបើធៀបទៅនឹងចំនួនមុនវិបត្តិកូវីដ១៩ ដោយសារកត្តាមួយចំនួន។
ទិន្នន័យក្រសួងទេសចរណ៍ បង្ហាញថា ចន្លោះពីខែមករា ដល់ខែសីហា ឆ្នាំ ២០២៤ កម្ពុជាទទួលបានភ្ញៀវទេសចរមកពីប្រទេសកូរ៉េខាងត្បូងចំនួនសរុបជាង ១៣ម៉ឺននាក់ (១៣២ ២៨៦) កើនឡើង ១៤,៦ ភាគរយ ធៀបនឹងរយៈពេលដូចគ្នាកាលពីឆ្នាំមុន។
កាលពីឆ្នាំ២០១៩ ទេសចរណ៍ភ្ញៀវទេសចរណ៍កូរ៉េសរុបមានចំនួនសរុបជាង ២៥ម៉ឺននាក់(២៥៤ ៨៧៤) ដែលស្ថិតនៅលេខ៤ បន្ទាប់ពីចិន វៀតណាម ថៃ និងឡាវ។
ភ្នំពេញប៉ុស្តិ៍បានធ្វើបទសម្ភាសន៍ជាមួយ លោក ស៊ាម សុខខេង ប្រធានសមាគមមគ្គុទ្ទេសក៍ទេសចរណ៍ភាសាកូរ៉េនៅកម្ពុជា ដើម្បីដឹងបន្ថែមអំពីស្ថានភាពទីផ្សារទេសចរណ៍កូរ៉េ ជាពិសេសស្របពេលមានការចុះផ្សាយដោយទូរទស្សន៍កូរ៉េអំពីការលើកឡើងរឿងចាប់ជំរិត និង ការបង្ខាំងជនជាតិកូរ៉េ។
តើស្ថានភាពភ្ញៀវទេសចរកូរ៉េក្រោយកម្ពុជាបើកប្រទេសឡើងវិញក្រោយកូវីដ១៩ នៅខែវិច្ឆិកា ឆ្នាំ២០២១ មានស្ថានភាពយ៉ាងណាដែរ? បើប្រៀបធៀបនឹងឆ្នាំ២០១៩ តើកំណើនមានកម្រិតណា?
បន្ទាប់ពីកូវីដហើយ កាលនោះសម្បូរភ្ញៀវកូរ៉េមែនទែន រហូតដល់ចុងខែកុម្ភៈ ឆ្នាំ២០២២ ទើបខ្សោយភ្ញៀវបន្តិចម្ដង២។ ភ្ញៀវច្រើនកាលនោះ ដោយសារយើងមានជើងហោះហើរត្រង់ពីកូរ៉េមកខេត្តសៀមរាបតែម្ដង។
ក្រោយពេលអស់ជើងហោះហើរត្រង់ នៅមានភ្ញៀវកូរ៉េមកដែរ តែមិនច្រើនដូចមុន។ គាត់ចុះនៅភ្នំពេញទើបគាត់បន្តមកខេត្តសៀមរាប ឬបន្តមកពីប្រទេសផ្សេងៗ ប៉ុន្តែ មានចំនួនតិច។
បច្ចុប្បន្ននេះ បើខ្ញុំប៉ាន់ស្មានទៅ ចំនួនភ្ញៀវកូរ៉េដែលមកទស្សនាកម្ពុជា បានប្រហែលតែ ៣០ភាគរយនៃចំនួនភ្ញៀវដែលធ្លាប់មកមុនកូវីដ១៩ ហើយអ្វីដែលជាបញ្ហា ដូចខ្ញុំបានលើកឡើង គឺអត់មានជើងហោះហើរត្រង់។ បើសិនជាមាន ខ្ញុំគិតថា ចំនួនមិនចាញ់គ្នាប៉ុន្មានទេ។
បច្ចុប្បន្ននេះ នៅពេលភ្ញៀវទេសចរកូរ៉េមកទស្សនាប្រទេសកម្ពុជា តើពួកគេធ្លាប់បានបង្ហាញក្ដីបារម្ភអំពីបញ្ហាអ្វីមួយទេ ជាពិសេស ថ្មីៗនេះ មានការចុះផ្សាយករណីថា ជនជាតិកូរ៉េត្រូវបានចាប់បង្ខាំង និងចាប់ជំរិត?
ខ្ញុំផ្ទាល់ជាមគ្គុទ្ទេសក៍ភាសាកូរ៉េ នៅពេលដើរជាមួយគាត់ផ្ទាល់ ពួកគាត់មិនដែលបានលើកឡើងពីការបារម្ភអំពីដំណើរកម្សាន្តរបស់គាត់មកស្រុកខ្មែរទេ។ អ្វីដែលគាត់ត្អូញត្អែរ គឺអត់មានជើងហោះហើរផ្ទាល់ ដែលធ្វើឲ្យគាត់ពិបាកមក។ ចំពោះរឿងផ្សេងៗ គាត់មិនដែលបានលើកឡើងទេ ពួកគាត់មក គាត់សប្បាយរីករាយនៅសៀមរាបយើង គាត់មើលទៅឃើញថា វាមានសុវត្ថិភាព។
ចំពោះករណីដែលទូរទស្សន៍កូរ៉េចុះផ្សាយអំពីការលើកឡើងរបស់ជនជាតិកូរ៉េថា គាត់ត្រូវបានចាប់បង្ខាំង និងជំរិត ព័ត៌មាននេះទើបតែថ្មីៗដែរ។ ក្នុងពេលមានព័ត៌មាននេះ ខ្ញុំក៏បាននាំភ្ញៀវទេសចរកូរ៉េទស្សនាប្រាសាទនានាដែរ ប៉ុន្តែ ដូចជាអត់មានការលើកឡើងឬប្រតិកម្មអ្វីជាមួយនឹងបញ្ហានេះទេ។
តាមបទពិសោធន៍ខ្ញុំដែលដើរជាមួយពួកគាត់ផ្ទាល់ គាត់មិនបានលើកឡើងពីបញ្ហានេះទេ ព្រោះពេលគាត់មកដល់សៀមរាប គាត់ឃើញស្ថានភាពជាក់ស្ដែងនៅខេត្តសៀមរាប ដែលមិនដូចអ្វីដែលត្រូវបានចុះផ្សាយ។ ដូច្នេះ វាដូចជាមិនមានបញ្ហាអ្វីទេ គឺគាត់សប្បាយធម្មតា ហើយក៏មិនដែលលើកឡើងពីបញ្ហាទាំងនោះ។
ក្នុងនាមជាសមាគមមគ្គុទ្ទេសក៍ទេសចរណ៍ភាសាកូរ៉េ តើបងមានអ្វីដើម្បីប្រាប់ទៅពលរដ្ឋកូរ៉េអំពីស្ថានភាពនៅកម្ពុជា?
ខ្ញុំលើកទឹកចិត្តឲ្យប្រជាជនកូរ៉េ បន្តដំណើរកម្សាន្តមកកម្ពុជា ជាពិសេសខេត្តសៀមរាប ដូចធម្មតា ពីព្រោះនៅខេត្តសៀមរាប និង ស្ថានភាពជាក់ស្ដែងនៅទូទាំងប្រទេសកម្ពុជា វាអត់ដូចអ្វីដែលត្រូវបានចុះផ្សាយនៅព័ត៌មានមួយចំនួននោះទេ។
ខ្ញុំលើកទឹកចិត្តឲ្យពួកគាត់មកលេងស្រុកខ្មែរ ហើយនៅសៀមរាប គឺមានសុវត្ថិភាព និងមានអ្វីប្លែកៗដែលគាត់អាចមកមើល មកស្វែងយល់ ឬរៀនសូត្របាន។ ចំពោះរឿងឆបោកអីនោះ គឺជាទីផ្សារងងឹតរបស់ឧក្រិដ្ឋជន ប៉ុន្តែ មិនមានជាប់ពាក់ព័ន្ធនឹងដំណើរកម្សាន្តនោះទេ។ សម្រាប់ដំណើរកម្សាន្ត យើងធានាមួយរយភាគរយថា នៅសៀមរាបយើងមិនមានបញ្ហាចាប់ជំរិត ឬអ្វីអីចឹងៗទេ។
តើសមាគមរបស់លោក បានធ្វើកិច្ចការអ្វីខ្លះដើម្បីជួយលើកស្ទួយវិស័យទេសចរណ៍ទៅកាន់ទីផ្សារទេសចរណ៍កូរ៉េ?
ការងារដំបូង គឺយើងពង្រឹងចំណេះដឹងសមាជិករបស់យើង ដើម្បីឲ្យពួកគាត់មានសមត្ថភាពខ្ពស់ក្នុងការផ្ដល់ព័ត៌មានទៅកាន់ភ្ញៀវទេសចរ និងជូនពួកគាត់ទៅកម្សាន្តទីកន្លែងនានាដោយភាពរលូន។ ពេលគាត់មក គាត់ចង់បានអ្វី គាត់ខ្វះខាតអ្វី គាត់មានសំណូមពរអ្វី យើងបំពេញតាមតម្រូវការរបស់ពួកគាត់។
នេះជាចំណុចស្នូលដែលយើងបានធ្វើ។ លើសពីនេះទៀតយើងបានធ្វើការផ្សព្វផ្សាយនៅលើបណ្ដាញព័ត៌មាននៅកូរ៉េ តាមរយៈអ្នកសរសេរប្លក់ យូធ្យូប័រ និងបណ្ដាញសង្គមផ្សេងៗទៀត។
តើលោកមានសំណូមពរអ្វីដើម្បីជំរុញឲ្យមានកំណើនភ្ញៀវទេសចរកូរ៉េឡើងវិញនៅកម្ពុជា?
ខ្ញុំស្នើដល់ក្រសួងពាក់ព័ន្ធ ជាពិសេសក្រសួងទេសចរណ៍កម្ពុជាយើង និងក្រសួងទេសចរណ៍កូរ៉េ ធ្វើការជាមួយគ្នាក្នុងការផ្សព្វផ្សាយអំពីទេសចរណ៍នៅកម្ពុជាឲ្យបានទូលំទូលាយ។ ចំពោះក្រុមហ៊ុនអាកាសចរណ៍ ខ្ញុំលើកទឹកចិត្តឲ្យក្រសួងពាក់ព័ន្ធធ្វើការជាមួយក្រុមហ៊ុនទាំងនោះដើម្បីឲ្យមានជើងហោះហើរត្រង់ពីកូរ៉េមកសៀមរាប។
បើយើងបានធ្វើការផ្សព្វផ្សាយ ហើយមានជើងហោះហើរត្រង់ ខ្ញុំគិតថា ភ្ញៀវទេសចរកូរ៉េនឹងមកទស្សនាខេត្តសៀមរាបដោយខ្លួនឯង មិនពិបាកទេ។ យើងជាមគ្គុទ្ទេសក៍ទេសចរណ៍ភាសាកូរ៉េ មានលទ្ធភាពពេញលេញក្នុងការបំពេញតម្រូវការរបស់ភ្ញៀវទេសចរ ក្នុងការដើរកម្សាន្ត៕
