លោក ទេព អស្នារិទ្ធ អ្នកនាំពាក្យក្រសួងព័ត៌មាន បានថ្លែងនៅក្នុងសន្និសីទកាលពីថ្ងៃទី៣១ ខែតុលាស្តីពី «ទំនុកចិត្តលើសារព័ត៌មានកម្ពុជា៖ សារព័ត៌មានប្រកបដោយក្រមសីលធម៌សម្រាប់ប្រយោជន៍សាធារណៈ»។ AKP
ភ្នំពេញ៖ ក្រសួងព័ត៌មានបានឱ្យដឹងថា ក្រសួងបានផ្ដល់កិច្ចគាំពារផ្នែកច្បាប់ដល់អ្នកសារព័ត៌មានជិត ៤០ករណីក្នុងរយៈពេល ៩ខែនៃឆ្នាំ២០២៤។
លោក ទេព អស្នារិទ្ធ អ្នកនាំពាក្យក្រសួងព័ត៌មាន បានថ្លែងនៅក្នុងសន្និសីទកាលពីថ្ងៃទី៣១ ខែតុលាស្តីពី «ទំនុកចិត្តលើសារព័ត៌មានកម្ពុជា៖ សារព័ត៌មានប្រកបដោយក្រមសីលធម៌សម្រាប់ប្រយោជន៍សាធារណៈ» ថា ក្នុងឆមាសទី១ នៃឆ្នាំ២០២៤ ក្រសួងព័ត៌មាន បានផ្តល់ការគាំពារផ្នែកច្បាប់ដល់អ្នកសារព័ត៌មានដែលបានចុះបញ្ជីត្រឹមត្រូវ ហើយបានជួបប្រទះនឹងបញ្ហាក្នុងពេលបំពេញការងារ។
លោកបានឱ្យដឹងថា ក្រសួងបានសម្របសម្រួលស្វែងរកដំណោះស្រាយចំពោះវិវាទ និងបញ្ហានានា សរុបចំនួន ២០ករណី និងកំពុងជួយជ្រោមជ្រែងដល់ដំណើរការផ្តល់មេធាវីការពារក្តីក្នុងនីតិវិធីតុលាការលើករណីវិវាទមួយចំនួនទៀត។
លោក អស្នារិទ្ធ បានបន្តថា៖ «ក្នុងត្រីមាសទី៣ ឆ្នាំ២០២៤ ក្រសួងបានសម្របសម្រួលដោះស្រាយបណ្តឹងពាក់ព័ន្ធនឹងកំហុសវិជ្ជាជីវៈចំនួន ១៧ករណី ដោយបានផ្តល់ការអប់រំនិងតម្រង់ទិសលើការប្រតិបត្តិក្រមសីលធម៌ និងនិយាមវិជ្ជាជីវៈសារព័ត៌មានជាធរមាន»។
លោកបញ្ជាក់ថា៖ «កិច្ចគាំពារដល់អ្នកសារព័ត៌មានជាអាទិភាពចំបងមួយរបស់ក្រសួងព័ត៌មាន និងរាជរដ្ឋាភិបាលកម្ពុជា ដើម្បីផ្តល់ទំនុកចិត្តនិងការការពារដល់អ្នកសារព័ត៌មាន ដែលបានចុះបញ្ជីត្រឹមត្រូវ គោរពតាមក្រមសីលធម៌វិជ្ជាជីវៈត្រឹមត្រូវ និងអនុវត្តតួនាទីនិងភារកិច្ចក្នុងក្របខណ្ឌដែលច្បាប់កំណត់»។
នៅក្នុងសន្និសីទរៀបចំដោយសមាគមសម្ព័ន្ធអ្នកសារព័ត៌មានកម្ពុជា ដោយមានការគាំទ្រ និងចូលរួមរៀបចំពីអង្គការយូណេស្កូ ព្រមទាំងដៃគូជាអង្គទូត អ្នកពាក់ព័ន្ធប្រមាណ ១៥០នាក់ អ្នកនាំពាក្យក្រសួងព័ត៌មាន បានបញ្ជាក់ថា រាជរដ្ឋាភិបាល និងក្រសួងព័ត៌មាន បានផ្តល់ការយកចិត្តទុកដាក់ខ្ពស់ក្នុងការធានានូវបរិយាកាសល្អសម្រាប់ការប្រកបវិជ្ជាជីវៈសារព័ត៌មាននិងសោតទស្សន៍ និងបានប្រកាន់នូវគោលបន្តលើកស្ទួយសេរីភាពខាងសារព័ត៌មាន ដោយស្មើភាព គ្មានការរើសអើង និងមិនប្រកាន់និន្នាការនយោបាយ។
នៅក្នុងវិស័យព័ត៌មាន លោក អស្នារិទ្ធ បានបន្ថែមថា បច្ចុប្បន្ន មានប្រជាពលរដ្ឋច្រើនឡើងបានចាប់យកមធ្យោបាយឌីជីថលដើម្បីទទួលព័ត៌មានប្រចាំថ្ងៃ ដែលនិន្នាការនេះបានបង្ហាញថាកម្ពុជាមានសិទ្ធិ និងសេរីភាពពេញលេញ ក្នុងការទទួលបានអ៊ីនធឺណិតប្រើប្រាស់នៅទូទាំងប្រទេស។
លោកបានថ្លែងថា៖ «ពិតណាស់ វាបានផ្តល់នូវភាពងាយស្រួលសម្រាប់ការរស់នៅប្រចាំថ្ងៃ ស្របតាមការវិវត្តនៃបច្ចេកវិទ្យា ប៉ុន្តែវាក៏បាននាំមកនូវផលវិបាកជាច្រើនផងដែរ»។
លោកបានពន្យល់ថា ការសាយភាយយ៉ាងរហ័សនូវព័ត៌មានក្លែងក្លាយ បានក្លាយជាបញ្ហាចម្បង ដែលបង្កគ្រោះថ្នាក់ដល់សង្គម ព្រោះការចែកចាយនូវព័ត៌មាននានា រាប់ទាំងព័ត៌មានមិនពិតផង មានភាពលឿនឆាប់ដល់ដៃប្រជាពលរដ្ឋតាមបណ្តាញទំនាក់ទំនងសង្គមដូចជាហ្វេសប៊ុក តិកតុក យូធូប និងមធ្យោបាយអនឡាញផ្សេងទៀត ជាជាងតាមកាសែត ទូរទស្សន៍ វិទ្យុជាដើម ឬតាមប្រព័ន្ធផ្សព្វផ្សាយវិជ្ជាជីវៈផ្សេងទៀត»។
លើសពីនេះ ការផ្សព្វផ្សាយតាមបណ្តាញទំនាក់ទំនងសង្គមមួយចំនួនដោយខ្វះក្រមសីលធម៌ បានធ្វើឱ្យឲ្យប៉ះពាល់ដល់ការជឿទុកចិត្តលើសារព័ត៌មាន ជះឥទ្ធិពលអវិជ្ជមានលើប្រព័ន្ធផ្សព្វផ្សាយបែបប្រពៃណី និងអ្នកដែលអនុវត្តការងារតាមវិជ្ជាជីវៈសារព័ត៌មានត្រឹមត្រូវ។
ទោះយ៉ាងណាក៏ដោយ មិនមែនអ្នកសារព័ត៌មានទាំងអស់ស្ថិតក្រោមឆ័ត្រការពារដែលផ្តល់ដោយក្រសួងនោះទេ។
ជាឧទាហរណ៍ លោក ម៉ិច ដារ៉ា អ្នកសារព័ត៌មានឯករាជ្យកាលពីពេលថ្មីៗនេះ បានប្រឈមមុខនឹងបញ្ហាផ្លូវច្បាប់ ដែលក្រសួងអះអាងថា មិនពាក់ព័ន្ធនឹងការងារអ្នកសារព័ត៌មានរបស់លោកទេ។
នៅក្នុងសេចក្តីថ្លែងការណ៍មួយកាលពីពេលថ្មីៗនេះ ក្រសួងបានច្រានចោលការអះអាងដែលថា ការចាប់ខ្លួនលោក ដារ៉ា ឆ្លុះបញ្ចាំងពីការបង្ក្រាបលើសេរីភាពសារព័ត៌មាន ដោយបញ្ជាក់ថា ការចោទប្រកាន់មកលើរូបលោកផ្តើមចេញពីការបំពានច្បាប់ប្រឆាំងនឹងការផ្សព្វផ្សាយព័ត៌មានមិនពិត។
ក្រសួង បានអះអាងថា សកម្មភាពរបស់លោក ដារ៉ា មិនស្ថិតនៅក្រោមសិទ្ធិសេរីភាពដែលត្រូវបានការពារទេ ដោយសារត្រូវបានចោទថា មានពាក់ព័ន្ធនឹង «ព័ត៌មានក្លែងបន្លំ និងការបង្ហោះសារញុះញង់ដែលមានបំណងបំភ្លៃការពិត និងបង្កើតការភ័ន្តច្រឡំជាសាធារណៈ»។
សេចក្តីថ្លែងការណ៍របស់ក្រសួងបានជំរុញឱ្យមានការប្រុងប្រយ័ត្ន ដោយសង្កត់ធ្ងន់ថា សកម្មភាពបំភ្លៃការពិត និងការប្រឌិតព័ត៌មានមិនពិត មិនមែនជាសេរីភាពសារព័ត៌មាន ឬសេរីភាពនៃការបញ្ចេញមតិឡើយ។
វាត្រូវបានបញ្ជាក់បន្ថែមថា ការរំលោភបំពានច្បាប់របស់អ្នកសារព័ត៌មាន ទោះលោក ដារ៉ា អស់សុពលភាពជាអ្នកសារព័ត៌មានតាំងពីឆ្នាំ២០២២ គឺត្រូវប្រឈមនឹងរដ្ឋប្បវេណី និងព្រហ្មទណ្ឌ ដោយបញ្ជាក់បន្ថែមថា សេរីភាពសារព័ត៌មានត្រូវបានចងភ្ជាប់ដោយក្រមសីលធម៌ និងច្បាប់៕
