វិថីតេជោសន្តិភាពឆ្នេរអង្កោលជាង ១២គីឡូម៉ែត្រ នៅខេត្តកែប ដែលសម្ពោធដាក់ឲ្យប្រើប្រាស់ជាផ្លូវការនៅថ្ងៃទី១១ ខែវិច្ឆិកា ឆ្នាំ២០២៤។ Peng Ponea
លោកនាយករដ្ឋមន្ត្រី ហ៊ុន ម៉ាណែត បានប្រាប់អាជ្ញាធរខេត្តឲ្យយកចិត្តទុកដាក់លើបញ្ហាសន្តិសុខ សណ្ដាប់ធ្នាប់នៅខេត្តកែប ដូចជាទប់ស្កាត់ការឆបោកតាមអនឡាញ (online scam) ជាដើម ហើយលោកចង់ឃើញខេត្តនេះក្លាយជាដុំពេជ្រទេសចរណ៍។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការវិថីតេជោសន្តិភាពឆ្នេរអង្កោលជាង ១២គីឡូម៉ែត្រ នៅខេត្តកែប នៅថ្ងៃទី១១ ខែវិច្ឆិកានេះ លោក ហ៊ុន ម៉ាណែត បានបញ្ជាក់ជាថ្មីថា មិនអនុញ្ញាតឲ្យខេត្តនេះមានកាស៊ីណូនោះទេ។
លោកក៏ប្រាប់ឲ្យអាជ្ញាធរយកចិត្តទុកដាក់ខ្ពស់លើបញ្ហាសុវត្ថិភាព ដែលបង្កឡើងដោយជនល្មើសទាំងក្នុងស្រុកនិងដោយជនបរទេស ដូចជាករណីឆបោកតាមអនឡាញជាដើម។
លោកថ្លែងថា៖ «ជាពិសេសគឺវត្តមាននៃសង្គមងងឹត។ ក្រុមជនបរទេសដែលមកជួលផ្ទះជួលអីដើម្បីលួចបើកអាឆបោកអនឡាញហ្នឹង ត្រូវធ្វើ [ទប់ស្កាត់] ឲ្យបាន គ្រប់គ្រងឲ្យជាប់។ វាមានករណីចន្លោះប្រហោង យើងបានចាត់វិធានការហើយ។ យើងត្រូវធ្វើម៉េចចាត់វិធានការកុំឲ្យមាននៅក្នុងខេត្តកែប ខេត្តកំពត និងខេត្តផ្សេងៗទៀត ត្រូវធ្វើកិច្ចការនេះឲ្យជាប់។ [ពួកគេ] មកបន្លំជួលផ្ទះ មកបន្លំជួលអូតែល បើក scam online អី ចាប់ អនុវត្តច្បាប់»។
លោកបន្តថា នៅមានជនបរទេសចង់មកលួចបើកអំពើខុសច្បាប់នេះ ហើយកាលពីពេលថ្មីៗនេះ សមត្ថកិច្ចក៏បានបង្ក្រាប និងទប់ស្កាត់ សកម្មភាពខុសច្បាប់ឆបោកតាមអនឡាញជាបន្តបន្ទាប់។
ចំពោះរឿងបើកកាស៊ីណូនៅខេត្តនេះ លោកបញ្ជាក់ដូច្នេះថា៖ «សុំអាជ្ញាប័ណ្ណធ្វើតំបន់សេដ្ឋកិច្ចពិសេស សុំអាជ្ញាប័ណ្ណធ្វើអេកូទេសចរណ៍ ឬធ្វើអ្វីផ្សេងទៀតខ្ញុំឲ្យ តែបើសុំអាជ្ញាប័ណ្ណធ្វើកាស៊ីណូនៅកែប ខ្ញុំអត់ឲ្យតែ សុំបញ្ជាក់ឲ្យច្បាស់ ព្រោះយើងអត់ត្រូវការអាហ្នឹងទេ»។
សម្រាប់ការអភិវឌ្ឍខេត្តនេះលើចក្ខុវិស័យវែងឆ្ងាយទៅអនាគត លោកប្រាប់ឲ្យថ្នាក់ដឹកនាំខេត្តកែប កែច្នៃខេត្តនេះឲ្យទៅជាដុំពេជ្រទេសចរណ៍ ដែលអាចធ្វើទៅបានតាមរយៈការកែច្នៃសក្ដានុពលដែលខេត្តនេះមានដូចជា ធនធានធម្មជាតិព្រៃឈើ សមុទ្រ និងសក្ដានុពលជីវៈចម្រុះនៅក្នុងសមុទ្រ និងការរៀបចំសោភណភាពទីក្រុងឲ្យបានត្រឹមត្រូវតាមរយៈផែនការវែង។
ការរៀបចំខេត្តនេះអាចធ្វើបានតាមរយៈការកំណត់ទីតាំងច្បាស់លាស់ (zoning) សម្រាប់ថែរក្សាធនធានធម្មជាតិ និងទីតាំងស្រាប់ការសាងសង់អគារនានា។ យ៉ាងណាក៏ដោយ លោកនាយករដ្ឋមន្ត្រីមិនចង់ឲ្យខេត្តកែបមានសភាពដូចជាក្រុងព្រះសីហនុ ឬ ខេត្តព្រះសីហនុនោះទេ ដែលពេលនេះមានអគារធំៗខ្ពស់ៗ។
បន្ថែមពីលើនេះ លោក ហ៊ុន ម៉ាណែត ក៏បានបញ្ជាក់ដែរថា រដ្ឋាភិបាលកំពុងសិក្សាពីការតភ្ជាប់ផ្លូវសម្រាប់ដំណើរកម្សាន្តដូចជា ផ្លូវជិះកង់ នៅក្នុងខេត្តនៅមាត់សមុទ្រទាំងបួន គឺ កោះកុង ព្រះសីហនុ និង កែប និងកំពត៕
