សាប៊ូរបស់អង្គការ Eco-Soap Bank (ESB) ត្រូវបានចែកចាយដល់សាលារៀនមួយចំនួនក្នុងសហគមនៃខេត្ដសៀមរាប។ រូបថត សហការី
ភ្នំពេញ៖ កម្ពុជាបានកំណត់គោលដៅក្នុងការសម្រេចបាននូវការគ្របដណ្តប់អនាម័យ ១០០ភាគរយ នៅទូទាំងតំបន់ជនបទនៅឆ្នាំ ២០៣០។ នេះបើយោងតាមសារលិខិតរបស់លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី ១២ ខែវិច្ឆិកា។
ក្នុងឱកាសទិវាជាតិលើកកម្ពស់អនាម័យជនបទលើកទី ១៥ លោកនាយករដ្ឋមន្ត្រីបានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលក្នុងការលើកកម្ពស់សុខភាពសាធារណៈ និងកម្រិតជីវភាពរស់នៅរបស់សហគមន៍ជនបទ។
យោងតាមសារលិខិតរបស់លោកបានឱ្យដឹងថា៖ «កម្មវិធីនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា សម្រាប់ការកសាង និងការការពារមាតុភូមិ ឆ្នាំ២០២៣-២០២៨ បានដាក់ចេញនូវគោលដៅ ក្នុងការបន្តជំរុញការអនុវត្តផែនការសកម្មភាពផ្គត់ផ្គង់ទឹកស្អាត និងអនាម័យជនបទ ឱ្យសម្រេចបានអត្រាគ្របដណ្តប់ ១០០% នៅឆ្នាំ ២០៣០»។
លោកបានបន្ដថា រាជរដ្ឋាភិបាលបានកំណត់យកថ្ងៃទី ១៣ ខែវិច្ឆិកា ជាថ្ងៃប្រារព្ធទិវាជាតិលើកកម្ពស់អនាម័យជនបទ ដើម្បី ផ្សព្វផ្សាយ ក្រើនរំឭកអំពីសារៈសំខាន់នៃការលើកកម្ពស់អនាម័យជនបទ និងរួមគ្នាធ្វើឱ្យកាន់តែប្រសើរឡើង នូវស្ថានភាពអនាម័យជនបទនៅកម្ពុជា។
លោកនាយករដ្ឋមន្ដ្រីបានលើកឡើងថា រាជរដ្ឋាភិបាលកម្ពុជា បាននិងកំពុងបន្តយកចិត្តទុកដាក់យ៉ាងខ្លាំង ក្នុងការលើកកម្ពស់អនាម័យជនបទ តាមរយៈការបន្តកែលម្អលក្ខខណ្ឌនៃការរស់នៅរបស់សហគមន៍ជនបទ ដោយផ្តោតលើការពង្រីកវិសាលភាពនៃការផ្តល់សេវាផ្គត់ផ្គង់ទឹកស្អាត និងអនាម័យជនបទ។
លោកទទួលស្គាល់ថា អត្រាកំណើននៃការទទួលបានសេវាអនាម័យជនបទនៅក្នុងប្រទេសកម្ពុជា មានការកើនឡើងគួរឱ្យកត់សម្គាល់ និងប្រកបដោយមោទនភាព។
លោកបានថ្លែងថា៖ «នាពេលបច្ចុប្បន្ន អត្រាគ្របដណ្តប់អនាម័យរបស់សហគមន៍ ជនបទ នៅព្រះរាជាណាចក្រកម្ពុជា បានកើនឡើងដល់ប្រមាណជាង ៩០%»។
សិស្សានុសិស្សនាំគ្នាលាងដៃជាមួយសាប៊ូ ជាគោលនយោបាយអនាម័យស្អាតរបស់រាជរដ្ឋាភិបាលកម្ពុជាមួយ។ រូបថត សហការី
នៅក្នុងនោះមានភូមិចំនួន ៩៦៧៥ ឃុំចំនួន ៧៩៥ ស្រុកចំនួន៧៩ ក្រុងចំនួន ១៥ ខណ្ឌចំនួន ១៤ និងខេត្តចំនួន ១០ រួមមាន ខេត្តស្វាយរៀង ខេត្តព្រៃវែង ខេត្តកណ្តាល ខេត្តកំពង់ស្ពឺ ខេត្តកំពង់ឆ្នាំង ខេត្តកែប ខេត្តព្រះសីហនុ ខេត្តកំពង់ចាម ខេត្តរតនគិរី និង ខេត្តសៀមរាប ដែលបានបញ្ចប់ការបន្ទោបង់ពាសវាលពាសកាល។
ទន្ទឹមនេះ ក្នុងចំណោមខេត្តខាងលើ មានខេត្តមួយចំនួនបាននិងកំពុងវាយតម្លៃ ដើម្បីឈានទៅសម្រេចបានជាខេត្តបញ្ចប់ការបន្ទោបង់ពាសវាលពាសកាល កម្រិតខ្ពស់។
លោកបានបន្ថែមថា៖ «ខ្ញុំសូមលើកទឹកចិត្តដល់គ្រប់ភាគីពាក់ព័ន្ធទាំងអស់ បន្តចូលរួមសហការ និងយកចិត្តទុកដាក់កាន់តែខ្លាំងក្លាបន្ថែមទៀត ដើម្បីជំរុញ និងពន្លឿនអត្រាគ្របដណ្តប់អនាម័យជនបទនៅកម្ពុជា បានកាន់តែប្រសើរឡើង និងឈានទៅ សម្រេចតាមគោលដៅនៃកម្មវិធីនយោបាយរបស់រាជរដ្ឋាភិបាល»។
លោកនាយករដ្ឋមន្ដ្រីបានដាក់ចេញនូវអនុសាសន៍ និងគំនិតផ្តួចផ្តើមសំខាន់ៗ ៩ ចំណុចក្នុងការឈានសម្រេចគោលដៅអនាម័យពេញលេញក្នុងឆ្នាំ២០៣០។
បុគ្គលិកអង្គការ Eco-Soap Bank (ESB) ផលិតសាប៊ូលាងដៃ ដែលប្រមូលពីការប្រើប្រាស់រួចនៅតាមសណ្ឋាគារ និងផ្ទះសំណាក់នៅសៀមរាប និងបាត់ដំបង។ រូបថត ភ្នំពេញប៉ុស្ដិ៍
រដ្ឋាភិបាលបានយកចិត្តទុកដាក់លើតម្រូវការសម្រាប់ការគាំទ្រជាបន្តបន្ទាប់ ដើម្បីជំរុញគោលដៅអនាម័យរបស់កម្ពុជា ជាពិសេសនៅក្នុងតំបន់ដែលមិនទាន់ទទួលបានសេវា។
ក្រសួងអភិវឌ្ឍន៍ជនបទ បន្តយកចិត្តទុកដាក់ និងពង្រឹងយន្តការចងក្រងប្រព័ន្ធគ្រប់គ្រងទិន្នន័យអត្រា គ្របដណ្តប់អនាម័យជនបទ ឱ្យបានកាន់តែច្បាស់លាស់ និងប្រកបដោយទំនុកចិត្ត ដើម្បីប្រើប្រាស់ជាមូលដ្ឋាន ក្នុងការតាមដាន ត្រួតពិនិត្យ និងវាយតម្លៃអំពីវឌ្ឍនភាពនៃការងារលើកកម្ពស់អនាម័យជនបទ។
លោកបានបញ្ជាក់ថា៖ «ត្រូវខិតខំស្វែងរកបច្ចេកវិទ្យាថ្មីៗ ទាក់ទងនឹងការងារលើកកម្ពស់អនាម័យជនបទ ដែលសមស្របនិង មានភាពធន់ ឆ្លើយតបទៅនឹងការប្រែប្រួលអាកាសធាតុ ក៏ដូចជាការគ្រប់គ្រងកាកសំណល់លាមក»។
ស្ត្រីម្នាក់កំពុងសប់ទឹកអណ្តូងឱ្យកុមារងូត។ រូបថត Plan Cambodia
ក្រសួងអភិវឌ្ឍន៍ជនបទ ត្រូវសហការជាមួយក្រសួង ស្ថាប័នពាក់ព័ន្ធ ដៃគូអភិវឌ្ឍ និងអង្គការមិនមែន រដ្ឋាភិបាល រៀបចំផែនការយុទ្ធសាស្ត្រជាតិ ក៏ដូចជាផែនការសកម្មភាពជាតិស្តីពីការផ្គត់ផ្គង់ទឹកស្អាត និងអនាម័យជនបទ ជំហានទី ៣ សម្រាប់ប្រើប្រាស់ជាផែនទីបង្ហាញផ្លូវ ក្នុងការជំរុញការលើកកម្ពស់អនាម័យជនបទ។
នាយករដ្ឋមន្ត្រីក៏បានលើកឡើងពីការយកចិត្តទុកដាក់លើប្រជាជនដែលងាយរងគ្រោះ ដោយជំរុញឱ្យមានសិទ្ធិទទួលបានអាទិភាពក្នុងការលើកកម្ពស់អនាម័យសម្រាប់ជនក្រីក្រ ក្រុមជនជាតិដើមភាគតិច និងជនពិការ។
លើសពីនេះ រដ្ឋាភិបាលបានប្តេជ្ញាចិត្តក្នុងការលើកកម្ពស់ការអនុវត្តអនាម័យ ដូចជាការលាងដៃជាមួយសាប៊ូនៅតាមសហគមន៍ជនបទ និងស្ថាប័នសាធារណៈជាដើម៕
