ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោកស សុខា។
ភ្នំពេញៈ ក្រសួងមហាផ្ទៃបានណែនាំឱ្យអភិបាលខេត្តជាប់ព្រំដែនជាមួយប្រទេសជិតខាងទាំងអស់ បិទច្រករបៀងខុសច្បាប់ទាំងអស់ និងពង្រឹងការថែរក្សាការពារសន្តិសុខ សណ្តាប់ធ្នាប់សាធារណៈ បូរណភាព ទឹកដីនិងអធិបតេយ្យជាតិនៅតាមតំបន់ព្រំដែន។
វិធានការនេះត្រូវបានធ្វើឡើង បន្ទាប់ពីក្រសួងមហាផ្ទៃ បានសង្កេតឃើញ មានបញ្ហាមិនប្រក្រតីមួយចំនួនបន្តកើតមានឡើងនៅតាមបណ្តោយខ្សែបន្ទាត់ព្រំដែន។ ក្នុងនោះរួមមាន ការធ្វើសកម្មភាពឆ្លងដែនខុសច្បាប់ ការបង្កើតប៉ុស្តិ៍ត្រួតពិនិត្យអនាធិបតេយ្យ ការលួចលាក់ បើកច្រករបៀងខុសច្បាប់ លំហូរនៃជនបរទេសអន្តោប្រវេសន៍ខុសច្បាប់ ឧក្រិដ្ឋកម្មឆ្លងដែន អំពើភេរវកម្មគ្រឿងញៀនជាដើម។
សកម្មភាពទាំងនេះបានកំពុងតែជះឥទ្ធិពលមិនល្អដល់វិស័យសន្តិសុខជាតិ សុវត្ថិភាព សណ្តាប់ធ្នាប់សាធារណៈ ប្រភពចំណូលថវិកាជាតិ និងរបៀបរៀបរយនៅតាមបណ្តោយខ្សែបន្ទាត់ព្រំដែន ដែលតម្រូវឱ្យមានវិធានការ កែលម្អដើម្បីថែរក្សាការពារឧត្តមប្រយោជន៍ជាតិនិងប្រជាពលរដ្ឋ។
ដើម្បីពង្រឹងរបៀបរបបការងារនិងលើកកម្ពស់ការអនុវត្តច្បាប់និងលិខិតបទដ្ឋានគតិយុត្តឱ្យបានត្រឹមត្រូវ ពិសេសដើម្បីពង្រឹងថែរក្សាការពារសន្តិសុខ សណ្តាប់ធ្នាប់សាធារណៈ បូរណភាព ទឹកដីនិងអធិបតេយ្យជាតិនៅតំបន់ព្រំដែន សម្តៅបង្ការ ទប់ស្កាត់បាតុភាពនានា កុំឱ្យរីករាលដាលកាន់តែស្មុគស្មាញ ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោកស សុខា តាមរយៈលិខិតចុះថ្ងៃទី៣ ខែវិច្ឆិកា ដែលត្រូវផ្សព្វផ្សាយនាថ្ងៃទី១៣ ខែវិច្ឆិកានេះ បានណែនាំដល់អភិបាលខេត្តជាប់ព្រំដែនជាមួយប្រទេសជិតខាងទាំងអស់៖ «ត្រូវអនុវត្តវិធានការបិទច្រករបៀងខុសច្បាប់ទាំងអស់ក្នុងដែនសមត្ថកិច្ចរបស់ខ្លួន ដោយមិនអនុញ្ញាតឱ្យទំនិញ មនុស្ស និងមធ្យោបាយចេញ-ចូលឆ្លងកាត់តាមច្រករបៀងខុសច្បាប់ឡើយ»។
ក្នុងករណីរកឃើញថា មានសកម្មភាពចេញ-ចូលឆ្លងកាត់តាមច្រករបៀង ខុសច្បាប់ក្នុងភូមិសាស្ត្រដែលអង្គភាពណាមួយឈរជើងការពារ ប្រធានអង្គភាពនោះត្រូវទទួលខុសត្រូវចំពោះមុខច្បាប់ជាធរមាន។ ករណីចាំបាច់ ត្រូវធ្វើការសិក្សាស្រាវជ្រាវ និង វាយតម្លៃអំពីសក្តានុពលសង្គម-សេដ្ឋកិច្ចរបស់ច្រកដែលមានស្រាប់ រួចលើកសំណើមក ក្រសួងមហាផ្ទៃ ដើម្បីមានមូលដ្ឋានសិក្សា វាយតម្លៃ និងលើកយោបល់គោរពជូនប្រមុខរាជរដ្ឋាភិបាលពិនិត្យសម្រេចបង្កើតជាច្រកទ្វារព្រំដែនផ្លូវការ។
បន្ថែមពីនោះ ក៏ត្រូវចាត់វិធានការពង្រឹងការគ្រប់គ្រងនិងការត្រួតពិនិត្យអ្នកដំណើរ ទំនិញ និងមធ្យោបាយ ចេញ-ចូលឆ្លងកាត់ព្រំដែន ដើម្បីបង្ការ ទប់ស្កាត់ និងបង្ក្រាបរាល់បទល្មើសឆ្លងដែនគ្រប់ប្រភេទ។ ជាពិសេស បទល្មើសគ្រឿងញៀនឆ្លងដែន ដែលបង្កផលប៉ះពាល់យ៉ាងធ្ងន់ធ្ងរដល់ សន្តិសុខជាតិនិងសុវត្ថិភាពសង្គម។
ទន្ទឹមនេះ ត្រូវចាត់វិធានការទប់ស្កាត់ការបង្កើតប៉ុស្តិ៍ត្រួតពិនិត្យអនាធិបតេយ្យនៅក្នុងបរិវេណភូមិសាស្ត្រច្រកទ្វារព្រំដែនតាមគ្រប់រូបភាព ដែលបង្កការរាំងស្ទះដល់ការធ្វើដំណើរនិងការផ្លាស់ប្តូរទំនិញចេញ-ចូលឆ្លងកាត់ព្រំដែន។
អាជ្ញាធរមូលដ្ឋានគ្រប់លំដាប់ថ្នាក់ និងកងកម្លាំងមានសមត្ថកិច្ចទាំងអស់ដែលឈរជើង នៅតាមបណ្តោយខ្សែបន្ទាត់ព្រំដែន ក៏ត្រូវរួមគ្នាបង្ការ ទប់ស្កាត់ និងចាត់វិធានការតាម ច្បាប់ ចំពោះជនបរទេសទាំងអស់ដែលបានលួចឆ្លងដែនដោយខុសច្បាប់ ចូលមកក្នុង ភូមិសាស្ត្រស្ថិតក្រោមការទទួលខុសត្រូវរបស់ខ្លួន ដោយអនុវត្តឱ្យបានម៉ឺងម៉ាត់តាម ច្បាប់ស្តីពីអន្តោប្រវេសន៍ និងលិខិតបទដ្ឋានគតិយុត្តពាក់ព័ន្ធ។
លិខិតបានសរសេរថា៖«ពង្រឹងការគ្រប់គ្រងការចេញ-ចូល ការស្នាក់នៅ និងការធ្វើអាជីវកម្មរបស់ជនបរទេស ខុសច្បាប់នៅតាមបណ្តោយព្រំដែន ដោយអនុវត្តឱ្យបានម៉ឺងម៉ាត់តាមច្បាប់ស្តីពី អន្តោប្រវេសន៍នៃព្រះរាជាណាចក្រកម្ពុជា ច្បាប់ស្តីពីការងារ និងលិខិតបទដ្ឋានគតិយុត្ត ជាធរមាន»។
ក្រៅពីនោះ ក៏ត្រូវខិតខំប្រឹងប្រែងទប់ស្កាត់នូវរាល់សកម្មភាពឯកតោភាគីរបស់ប្រទេសជិតខាង នៅក្នុង តំបន់ដែលពុំទាន់មានការឯកភាពខណ្ឌសីមា និងបោះបង្គោលព្រំដែនគោក។ ក្នុងនោះមានជាអាទិ៍ ការដាក់ប៉ុស្តិ៍យាម ការដោតទង់ជាតិ ការសាងសង់សំណង់រឹងមាំ ការធ្វើផ្លូវ ការដាំដើមឈើរយៈពេលវែង ការជីកស្រះជាដើម ដែលជាហេតុនាំឱ្យមានការប្រែប្រួលស្ថានភាព ដើមក្នុងតំបន់ពុំទាន់ឯកភាព ដោយអនុវត្តឱ្យបានពេញលេញនូវស្មារតីនៃសារាចរណែនាំ លេខ១១ សរណន ចុះថ្ងៃទី២៧ ខែតុលា ឆ្នាំ២០០០ របស់រាជរដ្ឋាភិបាលកម្ពុជា ស្តីពី ករណីហាមឃាត់មិនឱ្យធ្វើអ្វី ដែលអាចធ្វើឱ្យមានការប្រែប្រួលបរិស្ថានតំបន់ព្រំដែន កម្ពុជា-វៀតណាម កម្ពុជា-ឡាវ និងកម្ពុជា-ថៃ។
ក្រសួងបានណែនាំថា នៅក្នុងករណីដែលមានការរំលោភបំពានលើខ្សែបន្ទាត់ព្រំដែនដែលបានខណ្ឌសីមានិង បោះបង្គោលព្រំដែនជាស្ថាពររួចហើយ ឬការធ្វើសកម្មភាពឯកតោភាគីណាមួយរបស់ប្រទេសជិតខាងដែលនាំឱ្យប៉ះពាល់ដល់ស្ថានភាពដើមនៃព្រំដែនពុំទាន់ឯកភាព អាជ្ញាធរក្រុង ស្រុក និងកងកម្លាំងមានសមត្ថកិច្ចដែលឈរជើងការពារតំបន់នោះ ត្រូវ ធ្វើការទាក់ទងជាមួយអាជ្ញាធរមានសមត្ថកិច្ចនៃភាគីប្រទេសជិតខាងនោះ ដើម្បីហាមឃាត់នៅនឹងកន្លែង ដោយមិនអនុញ្ញាតឱ្យធ្វើសកម្មភាពរំលោភបំពានឡើយ។
លោកឧបនាយករដ្ឋមន្រ្តីបញ្ជាក់ថា៖«រដ្ឋបាលខេត្តជាប់ព្រំដែនត្រូវធ្វើលិខិតជាបន្ទាន់មកក្រសួងមហាផ្ទៃ ក្រសួងការបរទេស និងសហប្រតិបត្តិការអន្តរជាតិ និងរដ្ឋលេខាធិការដ្ឋានកិច្ចការព្រំដែន ដើម្បីជូនជ្រាប និងស្នើសុំយោបល់ដឹកនាំ និងមានវិធានការតវ៉ាតាមផ្លូវការទូត។ ទន្ទឹមនេះ ត្រូវបន្ត តាមដានឱ្យបានជាប់ជាប្រចាំនូវការវិវត្តនៃស្ថានការណ៍ព្រំដែន និងសកម្មភាពរបស់ ភាគីប្រទេសជិតខាង ដើម្បីធ្វើសេចក្តីរាយការណ៍ជូនក្រសួង-ស្ថាប័នខាងលើ»។
លើសពីនោះ បណ្តាកងកម្លាំងដែលឈរជើងការពារព្រំដែនជាមួយប្រទេសជិតខាងត្រូវធ្វើការល្បាត ឱ្យបានជាប់ជាប្រចាំនៅតាមភូមិសាស្ត្រទទួលខុសត្រូវរបស់ខ្លួន ទាំងក្នុងតំបន់ដែល បានឯកភាព ក៏ដូចជាតំបន់ដែលពុំទាន់ឯកភាពខណ្ឌសីមានិងបោះបង្គោលព្រំដែន៕
