លោកនាយករដ្ឋមន្ត្រី ហ៊ុន ម៉ាណែត (កណ្ដាល) ចូលរយមកិច្ចប្រជុំកំពូលសៀមរាប-អង្គរស្តីពីពិភពលោកគ្មានមីន នៅថ្ងៃទី២៥ ខែវិច្ឆិកា។ AKP
កិច្ចប្រជុំកំពូលសៀមរាប-អង្គរស្តីពីពិភពលោកគ្មានមីន ចាប់ផ្ដើមនៅថ្ងៃនេះនៅខេត្តសៀមរាប ដើម្បីពិនិត្យមើលប្រតិបត្តិការ និងស្ថានភាពនៃការអនុវត្តអនុសញ្ញាអូតាវ៉ា និង ហើយបង្ហាញពីការប្តេជ្ញាចិត្តរួមគ្នារបស់ប្រទេសសមាជិក ១៦៤ ដើម្បីបញ្ចប់គ្រាប់មីនដ៏ឃោរឃៅ និងមានផលវិបាករយៈពេលយូរអង្វែង។ កិច្ចប្រជុំកំពូលនេះនឹងបញ្ចប់នៅថ្ងៃទី២៩ ខែវិច្ឆិកា។
កិច្ចប្រជុំកំពូលសៀមរាប-អង្គរស្តីពីពិភពលោកគ្មានមីន ដែលមានមានឈ្មោះម្យ៉ាងទៀតថា សន្និសីទលើកទី៥ (5RC) នៃអនុសញ្ញាស្ដីពីការហាមប្រើ ការរក្សា ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញវា។ នេះជាលើកដំបូងហើយដែលកម្ពុជាធ្វើជាម្ចាស់ផ្ទះនៃសន្និសីទពិភពលោកនេះ ដែលមានអ្នកចូលរួមប្រមាណ ៧០០ នាក់ ដែលតំណាងឱ្យប្រទេសសមាជិកនិងដៃគូរបស់អនុសញ្ញាអូតាវ៉ា ចំនួន១៥០។
ក្នុងពិធីបើកសន្និសីទនេះ លោកនាយករដ្ឋមន្រ្តី ហ៊ុន ម៉ាណែត បានលើកឡើងថា ការប្រកួតប្រជែងភូមិសាស្ត្រនយោបាយបាននាំឱ្យកម្ពុជាក្លាយជាទីវាលសមរភូមិនៅអំឡុងសង្គ្រាមត្រជាក់ ដែលបានទុកនូវគ្រាប់មីន និងសំណល់ពីសង្គ្រាម (ERW) ចំនួនយ៉ាងច្រើន។ រហូតមកដល់ពេលបច្ចុប្បន្ននេះ កម្ពុជាបានបំផ្លាញគ្រាប់មីនប្រឆាំងមនុស្សជាង ១លានគ្រាប់ និងគ្រាប់គ្រាប់មិនទាន់ផ្ទុះប្រមាណ ៣លានគ្រាប់ ហើយបានសម្អាតដីប្រមាណ ៣,០០០ គីឡូម៉ែត្រការ៉េ។ រាជធានីភ្នំពេញ និងខេត្តចំនួន ១៤ ទៀត ត្រូវបានប្រកាសថា មិនមានគ្រាប់មីនទៀតឡើយ។
លោកបានថ្លែងថា នៅក្នុងរយៈពេល ១០ ឆ្នាំចុងក្រោយ ចំនួនជនរងគ្រោះដោយគ្រាប់មីនបានថយចុះមិននៅក្រោម ១០០នាក់ ក្នុងមួយឆ្នាំ បើប្រៀបធៀបនឹងនឹងចំនួនជាង ៤,០០០ នាក់នៅឆ្នាំ ១៩៩៦។ ទោះបីជាយ៉ាងនេះក្តី កម្ពុជានៅមានផ្ទៃដីចំនួន ១,៦០០ គីឡូម៉ែត្រការ៉េទៀត ដែលត្រូវសម្អាត និងប៉ះពាល់ដល់ប្រជាជនប្រមាណ ១លាននាក់។
លោក ហ៊ុន ម៉ាណែត បន្តថា ឆ្លងកាត់បទពិសោធន៍របស់ខ្លួនក្នុងករបោសសម្អាតមីន កម្ពុជាបាន ចែករំលែកបទពិសោធន៍ និងការអនុវត្តល្អៗទៅប្រទេសជាច្រើន ដូចជា អ៊ុយក្រែន អាហ្វហ្គានីស្ថាន អាមេនី អាស៊ែបៃហ្សង់ និងប្រទេសសមាជិកអាស៊ាន។
លោកបានអំពាវនាវឲ្យសមាជិកទាំងអស់ បន្តប្តេជ្ញាចិត្តក្នុងអនុវត្តអនុសញ្ញាអូតាវ៉ា ដែលជាឯកសារសំខាន់បំផុតសម្រាប់មនុស្សជាតិ។
លោកថ្លែងដូច្នេះថា៖ «កម្ពុជា អំពាវនាវឲ្យប្រទេសទាំងអស់ចូលរួមជាមួយយើងក្នុងបេសកកម្មនេះ ដើម្បីធ្វើឲ្យពិភពលោកកាន់តែមានសុវត្ថិភាព និងសន្តិភាព មិនមែនសម្រាប់ជំនាន់បច្ចុប្បន្នប៉ុណ្ណោះទេ ថែមទាំងសម្រាប់ជំនាន់ក្រោយៗផងដែរ។ យើងត្រូវបង្កើនការខិតខំប្រឹងប្រែងក្នុងការស្វែងរក និងសម្អាតគ្រាប់មីន ពង្រីកការអប់រំ និងលើកកម្ពស់ការយល់ដឹង និងពង្រីកការគាំទ្រជូនជនរងគ្រោះជាសកល»។
លោក លី ធុជ ប្រធានអនុសញ្ញាអូតាវ៉ា និងជាអនុប្រធានទី១ អាជ្ញាធរមីន បានស្វាគមន៍អ្នកចូលរួម និងបានថ្លែងថា កិច្ចប្រជុំកំពូលនេះបង្ហាញពីការប្តេជ្ញាចិត្តរួមគ្នា ដើម្បីបញ្ចប់មរតកដ៏ឃោរឃៅនៃគ្រាប់មីន។
លោកថ្លែងថា៖ «កិច្ចប្រជុំកំពូលនេះមិនមែនត្រឹមតែជាការជួបប្រជុំរបស់ប្រទេសសមាជិកប៉ុណ្ណោះទេ ប៉ុន្តែជាការប្តេជ្ញាចិត្តរួមគ្នា ចំពោះសន្តិភាព សេចក្ដីថ្លៃថ្នូរ និងសាមគ្គីភាព។ យើងទាំងអស់គ្នាស្ថិតនៅចំណុចប្រសព្វនៃប្រវត្តិសាស្រ្ត ដែលការចងចាំនៃការឈឺចាប់ពីសង្គ្រាមកំពុងត្រូវបានជំនួសដោយអនាគតប្រកបដោយក្ដីសង្ឃឹម ការតស៊ូ និងសន្តិភាព»។
អ្នកស្រី Armida Salsiah Alisjahbana, អនុលេខាធិការអង្គការសហប្រជាជាតិ និងប្រធានគណៈកម្មការសេដ្ឋកិច្ច និងសង្គមសម្រាប់អាស៊ី និងប៉ាស៊ីហ្វិក (ESCAP) បានថ្លែងថា ក្នុងរយៈពេល ២៥ ឆ្នាំ មានគ្រាប់មីនប្រឆាំងមនុស្សជាង ៥៥លានត្រូវបានបំផ្លាញនៅជាង ៦០ ប្រទេស។
អ្នកស្រីក៏បានអានសារពីអគ្គលេខាធិការអង្គការសហប្រជាជាតិ លោក António Guterres ដែលបានសរសើរកម្ពុជាសម្រាប់កិច្ចខិតខំប្រឹងប្រែងក្នុងការបោសសម្អាតគ្រាប់មីន និងការធ្វើជាម្ចាស់ផ្ទះនៃសន្និសីទនេះ។
លោក Guterres ថ្លែងថា៖ «ខ្ញុំអំពាវនាវឲ្យសមាជិកបំពេញតាមកាតព្វកិច្ច និងធានាឲ្យមានការអនុលោមតាមអនុសញ្ញា ដោយធ្វើឲ្យមានប្រសិទ្ធភាពលើផលប៉ះពាល់មនុស្សធម៌ និងការអភិវឌ្ឍ តាមរយៈការគាំទ្រផ្នែកហិរញ្ញវត្ថុ និងបច្ចេកទេស។ ខ្ញុំក៏លើកទឹកចិត្តឲ្យប្រទេសទាំងអស់ដែលមិនទាន់ចូលរួមអនុសញ្ញានេះ សូមចូលរួមជាមួយប្រទេសសមាជិក ១៦៤ ដែលបានធ្វើហើយ»។
លោក Guterres បានបន្ថែមថា៖ «កិច្ចប្រជុំកំពូលនេះ និងផែនការសកម្មភាពសៀមរាប គឺជាជំហានសំខាន់មួយក្នុងការសម្រេចចក្ខុវិស័យនេះ និងធានាឲ្យប្រជាជនទាំងអស់អស់រស់នៅដោយសុវត្ថិភាព កិត្យានុភាព និងក្ដីសង្ឃឹម»៕
