លោក ហ៊ុន ម៉ាណែត ថ្លែងក្នុងពិធីបិទសន្និបាតបូកសរុបលទ្ធផលការងាររបស់ក្រសួងដែនដី នៅថ្ងៃទី២៦ ខែវិច្ឆិកា។ AKP
ខេត្តកំពង់ចាមនឹងក្លាយជាខេត្តដំបូងគេនៅកម្ពុជា ដែលបានបញ្ចប់ការវាស់វែងដីធ្លីជូនប្រជាពលរដ្ឋ។ លោកនាយករដ្ឋមន្ត្រី ហ៊ុន ម៉ាណែត នឹងចុះទៅប្រកាសខេត្តអំពីភាពជោគជ័យនៃខេត្តនេះលើការវាស់វែងដីធ្លី នៅខែធ្នូខាងមុខ។
កម្ពុជាបានឆ្លងកាត់សង្គ្រាម ជាពិសេសរបបប្រល័យពូជសាសន៍ខ្មែរក្រហម ដែលបានបំផ្លាញកម្មសិទ្ធឯកជន ជាពិសេសកម្មសិទ្ធិដីធ្លី ដោយយកដីធ្វើជារបស់សមូហភាព។ ក្រោយពេលរបបនេះបានរលត់ផុតទៅ ជម្លោះដណ្ដើមដីធ្លីបានកើតឡើង ខណៈដែលព្រំដែនរវាងដីឯកជននិងដីរដ្ឋគ្មានព្រំដែនច្បាស់លាស់។ នេះបើតាមលោក ហ៊ុន ម៉ាណែត។
ថ្លែងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំបន្ត របស់ក្រសួងដែនដី នគរូបនីយកម្ម និងសំណង់ នៅរសៀលថ្ងៃទី២៦ ខែវិច្ឆិកានេះ លោក ហ៊ុន ម៉ាណែត បានបញ្ជាក់ថា៖ «យើងនឹងប្រកាសខេត្តកំពង់ចាម ជាខេត្តមុនគេដែលបញ្ចប់ការវាស់វែងចុះបញ្ជីក្បាលដី សូមអបអរសាទរ។ ដោយសារយើងមានសង្គ្រាម កាលពីមុន ខ្ញុំដើរប្រកាសខេត្តបានដោះមីនអស់ ដែលមាន១៥ខេត្ត។ ឥឡូវយើងចាប់ផ្ដើមប្រកាសខេត្តដែលបានវាស់វែងចុះបញ្ជីក្បាលដី ចាប់ពីខេត្តកំពង់ចាមមុនគេ»។
លោក ហ៊ុន ម៉ាណែត សង្ឃឹមថា ការចុះវាស់វែងនិងចុះបញ្ជីដីធ្លីនឹងត្រូវបញ្ចប់ស្ថាពរនៅឆ្នាំ២០២៩ ដើម្បីចេញកម្មសិទ្ធិឯកជននេះ។
កាលពីខែសីហា ក្នុងគម្រប់ខួបមួយឆ្នាំនៃរដ្ឋាភិបាលអាណត្តិទី៧ លោក ហ៊ុន ម៉ាណែត បានលើកឡើងថា រយៈពេល ១២ ខែចុងក្រោយ រាជរដ្ឋាភិបាលបានវាស់វែងនិងចុះបញ្ជីដីបន្ថែមបានចំនួនជាង ២ លានក្បាលដី និងបានចេញប័ណ្ណជិត ៥៩ ម៉ឺនប័ណ្ណ។
លោកថា ការវាស់វែងក្បាលដីនៅសេសសល់ប្រមាណ ២,៥ លានក្បាលដី នឹងបញ្ចប់នៅក្នុងឆ្នាំ ២០២៥ ដោយប្រើប្រាស់កម្លាំងសរុបជាង ៥ពាន់នាក់ និងគ្រោងចំណាយថវិកា១០០លានដុល្លារ។
យ៉ាងណាក៏ដោយ នៅថ្ងៃនេះ លោកបញ្ជាក់ថា ការចុះវាស់វែងចុះបញ្ជីដីធ្លីនេះមិនមែនជាការងាយស្រួលនោះទេ៕
