លោក ឈាង រ៉ា ថ្លែងពីហានិភ័យនៃគ្រឿងស្រវឹងក្នុងក្នុងពិធីបើកសិក្ខាសាលា ផ្សព្វផ្សាយការអប់រំសុខភាព ដើម្បីចៀសវាងកត្តហានិភ័យ នៃជំងឺមិនឆ្លង កាលពីថ្ងៃទី ២៧ ម្សិលមិញ។ រូបថត សហការី
ភ្នំពេញ៖ លោករដ្ឋមន្ដ្រីក្រសួងសុខាភិបាលបានថ្លែងកាលពីថ្ងៃទី២៧ ម្សិលមិញថា ការប្រើប្រាស់ផលិតផលគ្រឿងស្រវឹង បង្កបញ្ហាសុខភាពនិងជំងឺច្រើនជាង ២០០ប្រភេទ ជាអាទិ៍ ជំងឺក្រិនថ្លើម ជំងឺមហារីក ជំងឺបេះដូងសរសៃឈាម ជំងឺទឹកនោមផ្អែម ជំងឺលើសសម្ពាធឈាមជាដើម។
នៅក្នុងពិធីបើកសិក្ខាសាលា ផ្សព្វផ្សាយការអប់រំសុខភាព ដើម្បីចៀសវាងកត្តាហានិភ័យ នៃជំងឺមិនឆ្លង លោក ឈាង រ៉ា បានឱ្យដឹងថា ការប្រើប្រាស់ផលិតផលគ្រឿងស្រវឹង មិនមានកម្រិតសុវត្ថិភាពនោះទេ ប្រើប្រាស់ផលិតផលគ្រឿងស្រវឹងកាន់តែច្រើន បង្កហានិភ័យដល់សុខភាពកាន់តែច្រើន។
លោកបានថ្លែងថា៖ «ការប្រើប្រាស់គ្រឿងស្រវឹងប៉ះពាល់ដល់ការលូតលាស់ខួរក្បាលរបស់យុវវ័យ បណ្ដាលឱ្យញៀន និងបង្កបញ្ហាសុខភាពផ្លូវចិត្ត ដូចជា ជំងឺថប់បារម្ភ ជំងឺធ្លាក់ទឹកចិត្តជាដើម។ លើសពីនេះ ការប្រើប្រាស់គ្រឿងស្រវឹងបានប៉ះពាល់ដល់សេដ្ឋកិច្ច និងសង្គម ជំរុញឱ្យកើតមានគ្រោះថ្នាក់ចរាចរណ៍ និងអំពើហិង្សាបុគ្គល គ្រួសារផងដែរ»។
លោករដ្ឋមន្ដ្រីបានបញ្ជាក់ថា ការកើតជំងឺមិនឆ្លងបណ្តាលមកពីកត្តាហានិភ័យចម្បងបួន រួមមាន របបអាហារមិនមានសុខភាព កង្វះសកម្មភាពរាងកាយ ការប្រើប្រាស់ផលិតផលថ្នាំជក់ និងការប្រើប្រាស់ផលិតផលគ្រឿងស្រវឹងប្រកបដោយគ្រោះថ្នាក់។
ថ្លែងក្នុងកិច្ចពិភាក្សាតុមូលមួយក្រោមចំណងជើងថា «ការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធការផ្សព្វផ្សាយ ផលិតផលគ្រឿងស្រវឹង នៅព្រះរាជាណាចក្រកម្ពុជា» លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានថ្លែងចំៗចំពោះគុណវិបត្ដិរបស់គ្រឿងស្រវឹង ដែលជះឥទ្ធិពលអវិជ្ជមានទាំងលើបញ្ហាគ្រួសារ និងសង្គម។
លោកស្រីបានអះអាងថា៖ «គ្រឿងស្រវឹងប៉ះពាល់សុខភាពរបស់យើងតាំងពីកែវដំបូង ហើយមិនមានកម្រិតគ្រឿងស្រវឹងណា ដែលបញ្ជាក់ថា វាមានសុវត្ថិភាពសម្រាប់សុខភាពយើងនោះទេ ពីព្រោះនៅក្នុងគ្រឿងស្រវឹង វាមានសារធាតុអេតាណុល»។
អ្នកជំនាញសុខភាព បានបន្ដថា សារធាតុអេតាណុលនេះ វាជាឈ្នាន់មួយដែលធ្វើឱ្យមនុស្សញៀន ខូចសរសៃប្រសាទ ឬ (ទឹកប្ដូរនិស្ស័យ) អំពើហិង្សា និងកំណើនជំងឺមិនឆ្លង។
ការប្រើប្រាស់ផលិតផលគ្រឿងស្រវឹង បង្កបញ្ហាសុខភាពនិងជំងឺច្រើនជាង ២០០ប្រភេទ ជាអាទិ៍ ជំងឺក្រិនថ្លើម ជំងឺមហារីក ជំងឺបេះដូងសរសៃឈាម ជំងឺទឹកនោមផ្អែម ជំងឺលើសសម្ពាធឈាម។ រូបថត សហការី
លទ្ធផលស្រាវជ្រាវពីវិទ្យាស្ថានសុខភាពរបស់សហរដ្ឋអាមេរិក បានបង្ហាញថា បញ្ហាប្រឈមមុនគេ គឺថ្លើមពីព្រោះថ្លើមមានមុខងារបន្សាបសារធាតុអេតាណុល ដូចជា ជំងឺក្រិនថ្លើម ដែលនឹងវិវត្ដន៍ទៅមហារីកថ្លើម ដោយមានអត្រាជំងឺថ្លើម ៤៨ភាគរយ ហើយចំណោមនេះ មានអត្រាស្លាប់ ៦៦,៨ភាគរយ។
ការសិក្សានៃការអង្កេតប្រជាសាស្ដ្រ និងសុខភាពឆ្នាំ២០២១-២០២២ បានបង្ហាញថា ការទទួលទានគ្រឿងស្រវឹងនៅកម្ពុជាមិនមានភាពខុសគ្នារវាងអ្នកនៅទីក្រុង និងអ្នកជនបទនោះទេ ដែលមានន័យថា ទំហំនៃការទទួលទានគ្រឿងស្រវឹងមាននៅទូទាំងប្រទេស។
ចំពោះការសិក្សាហានិភ័យនៃជំងឺមិនឆ្លងឆ្នាំ២០២៣ នៅកម្ពុជា បានបង្ហាញថា ៥០ភាគរយនៃប្រជាជនអាយុពី ១៨ ទៅ ៦៩ឆ្នាំ ទទួលទានគ្រឿងស្រវឹង រយៈពេល ៣០ថ្ងៃ មុនធ្វើការអង្កេត ដោយបុរសមានចំនួន៧១,២ភាគរយ ស្ដ្រី ២៦,៥ភាគរយ និង ៣០,៦ភាគរយ ជាយុវវ័យ អាយុពី ១៥ទៅ ១៨ឆ្នាំ។
លោកស្រីបានថ្លែងថា៖ «ចំនួន ៣០,៦ភាគរយ មិនដឹងប៉ះលើកូននរណាខ្លះទេ។ ដូច្នេះ យើងត្រូវរួមគ្នាគិត រួមគ្នាធ្វើ។ បើយើងមិនធ្វើទេ វាកាន់តែលំបាកហើយចំពោះជំងឺមិនឆ្លងនេះ។ ពីមុន ជំងឺប្រភេទនេះកើតឡើងតែមនុស្សចាស់ទេ តែឥឡូវវាបានកើតលើយុវវ័យហើយ»។
ការព្យាករបានបង្ហាញថា បើមិនមានវិធានការអ្វីទេ នៅចន្លោះពី ២០២៥ ទៅឆ្នាំ២០៣០ កំណើននៃគ្រឿងស្រវឹងនឹងស្ទុះឡើងខ្ពស់ខ្លាំង។
ផ្អែកលើទិន្នន័យរបស់អង្គការសុខភាពពិភពលោកក្នុងឆ្នាំ២០១៩ យុវវ័យកម្ពុជាដែលប្រើប្រាស់គ្រឿងស្រវឹងជាមធ្យម ១៦,២លិត្រម្នាក់ក្នុងមួយឆ្នាំនូវសារធាតុអាកុលសុទ្ធ ដោយបុរសប្រើប្រាស់ ២១,៨លិត្រ និងស្ដ្រី ៨,១លិត្រក្នុងមួយឆ្នាំ។
ចំពោះសេវាកម្មថែទាំសុខភាព លោកស្រី បានថ្លែងថា ចំណោមអ្នកជំងឺ ១ពាន់នាក់ដោយសារគ្រឿងស្រវឹង ដោយផ្ដោតលើជំងឺមហារីក ពួកគេត្រូវចំណាយ ២៨៣លានដុល្លារក្នុងមួយឆ្នាំ ជំងឺដាច់សរសៃឈាមខួរក្បាល ៥៦លានដុល្លារ ជំងឺគាំងបេះដូង ២២,៥លានដុល្លារ បញ្ហាសុខភាពខួរក្បាល ៤៨លានដុល្លារ។
ទន្ទឹមនឹងនេះ លោករដ្ឋមន្ដ្រី ឈាង រ៉ា បានជំរុញការផ្សព្វផ្សាយជំងឺមិនឆ្លងទៅដល់មូលដ្ឋាន និងជំរុញឱ្យប្រជាជនមានការផ្លាស់ប្តូរឥរិយាបថរស់នៅប្រកបដោយសុខុមាលភាព ឆ្ពោះទៅការការពារជៀសវាងនូវគ្រោះថ្នាក់ដែលកើតមានឡើង៕
