លោក ប្រាក់ សុខុន (ស្ដាំ) ជួបជាមួយឯកអគ្គរដ្ឋទូតចិន វ៉ាង វិនពីន នៅថ្ងៃទី២៦ ខែវិច្ឆិកា។ ហ្វេសប៊ុកលោក វ៉ាង វិនពីន
ចិនគាំទ្រគម្រោងព្រែកជីកហ្វូណនតេជោ «ឥតងាករេ» ខណៈដែលប្រទេសទាំងពីរកំណត់យកឆ្នាំ ២០២៥ ខាងមុខនេះជាឆ្នាំ «ទេសចរណ៍កម្ពុជា-ចិន» និងកែលម្អហេដ្ឋារចនាសម្ព័ន្ធទេសចរណ៍ដើម្បីជំរុញឲ្យទេសចរចិនមកទស្សនាកម្ពុជាឲ្យបានស្មើចំនួនមុនកូវីដ១៩។
ការប្ដេជ្ញាទាំងនេះធ្វើឡើងជំនួបរវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស ជាមួយលោក វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា កាលពីថ្ងៃទី២៦ ខែវិច្ឆិកា គឺពីរថ្ងៃមុនពេលលោក ប្រាក់ សុខុន បំពេញទស្សនកិច្ចទៅប្រទេសចិននៅថ្ងៃនេះ។
ក្រសួងការបរទេសនិងសហប្រតិបត្តិការអន្តរជាតិ បានថ្លែងនៅក្នុងសេចក្ដីប្រកាសព័ត៌មានអំពីជំនួបនេះថា ភាគីទាំងពីរ បានប្ដេជ្ញាចិត្តក្នុងការ អនុវត្តឱ្យបានជោគជ័យនូវកុងសង់ស៊ីស និងការប្ដេជ្ញាចិត្តរបស់ថ្នាក់ដឹកនាំប្រទេសទាំងពីរដើម្បីជំរុញគម្រោងសំខាន់ៗដូចជា ច្រករបៀងត្រី និងស្រូវ ច្រករបៀងអភិវឌ្ឍន៍ឧស្សាហកម្ម គម្រោង អភិវឌ្ឍន៍កសិកម្មទំនើប និងគម្រោងថាមពលចម្រុះ។
ភាគីទាំងពីរក៏ដូចជាការលើកកម្ពស់ការកសាងសហគមន៍ កម្ពុជា-ចិន ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ ក្នុងការកសាងអនាគតរួមគ្នា នៅយុគសម័យថ្មី ដោយចាត់ទុកជាគំរូសម្រាប់មនុស្សជាតិ។ លោក ប្រាក់ សុខុន ក៏បានវាយតម្លៃខ្ពស់អំពីការចូលរួមរបស់ចិនក្នុងការអភិវឌ្ឍនៅកម្ពុជា។
ក្រសួងការបរទេសបានថ្លែងដូច្នេះថា៖ «ឯកឧត្តមឯកអគ្គរដ្ឋទូត [វ៉ាង វិនពីន] បានរំលឹកឡើងវិញនូវ ការគាំទ្រឥតងាករេ របស់ចិនសម្រាប់ការអភិវឌ្ឍរបស់កម្ពុជា រួមទាំងគម្រោងព្រែកជីក ហ្វូណន តេជោ និងការប្ដេជ្ញាចិត្តរបស់ចិនក្នុងការលើកកម្ពស់ពាណិជ្ជកម្ម និងការវិនិយោគទ្វេភាគី»។
កាលពីពេលថ្មីៗ ទីភ្នាក់ងារព័ត៌មាន Reuters បានចុះផ្សាយថា ចិនទំនងជាដកខ្លួនមិនគាំទ្រគម្រោងព្រែកជីកហ្វូណនតេជោ ប៉ុន្តែ ការចុះផ្សាយដោយស្រង់សម្ដីប្រភពមិនបញ្ចេញឈ្មោះ ត្រូវបានកម្ពុជាច្រានចោល។
លោក ប្រាក់ សុខុន ចេញដំណើរទៅបំពេញទស្សនកិច្ចនៅប្រទេសចិន ពីថ្ងៃទី២៨ វិច្ឆិកា ដល់ថ្ងៃទី១ ធ្នូ។ ក្រសួងការបរទេស
ចំពោះវិស័យទេសចរណ៍ ក្រសួងបញ្ជាក់ថា៖ «ឯកឧត្តមឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត បានសម្ដែងការសាទរចំពោះការកំណត់យកឆ្នាំ២០២៥ ជាឆ្នាំទេសចរណ៍កម្ពុជា-ចិន។ ភាគីទាំងពីរបានពិភាក្សាអំពីសារៈសំខាន់នៃការបង្កើនជើងហោះហើរត្រង់ និងការកែលម្អហេដ្ឋារចនាសម្ព័ន្ធទេសចរណ៍ ដើម្បីស្ដារឡើងវិញនូវចំនួនភ្ញៀវទេសចរចិនមកកម្សាន្តនៅកម្ពុជាឱ្យដូចមុនមានជំងឺរាតត្បាតកូវីដ-១៩»!។
ភាគីទាំងពីរក៏បានពិភាក្សាអំពីដំណើរបំពេញទស្សនកិច្ចរបស់លោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាទៅកាន់ប្រទេសចិននាពេលខាងមុខនេះ ដើម្បីពង្រឹងបន្ថែមភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិននិងកម្ពុជា ក្រោមក្របខណ្ឌកិច្ចសហប្រតិបត្តិការត្បូងពេជ្រ។
នៅព្រឹកថ្ងៃទី២៨ ខែវិច្ឆិកានេះ លោក ប្រាក់ សុខុន បានចេញដំណើរទៅបំពេញទស្សនកិច្ចផ្លូវការនៅប្រទេសចិន ដោយលោកគ្រោងនឹងជួបជាមួយលោក វ៉ាង យី រដ្ឋមន្ត្រីការបរទេសចិន និងលោក លីវ ជានឆាវ រដ្ឋមន្ត្រីក្រសួងទំនាក់ទំនងអន្តរជាតិមជ្ឈិមបក្សកុម្មុយនីស្តចិន រហូតដល់ថ្ងៃទី១ ខែធ្នូ។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា យល់ថា ប្រទេសទាំងពីរនេះមិនអាចងាករេនៅលើទំនាក់ទំនងរបស់ខ្លួនបានទេព្រោះត្រូវពឹងគ្នាទៅវិញទៅមក ទោះបីជាកម្ពុជា ជាប្រទេសតូចក៏ដោយ ពីព្រោះកម្ពុជាមានតម្លៃផ្នែកភូមិសាស្ត្រនយោបាយសម្រាប់ចិន។
លោកថា៖ «ងាកមករឿងព្រែកជីកហ្វូណនតេជោនេះ ក៏មានតម្លៃនៅក្នុងកិច្ចសហប្រតិបត្តិការជាយុទ្ធសាស្ត្រ ទាំងសេដ្ឋកិច្ច ទាំងភូមិសាស្ត្រនយោបាយ។ ដូច្នេះ ចិនត្រូវតែឲ្យតម្លៃលើកិច្ចសហប្រតិបត្តិការនេះ»។
លោកបន្តថា ការបំពេញទស្សនកិច្ចផ្លូវការទៅប្រទេសលោក ប្រាក់ សុខុន ទៅកាន់ប្រទេសចិនបន្ទាប់ពីកាន់តំណែងរដ្ឋមន្ត្រីការបរទេសឡើងវិញនេះ ក៏បង្ហាញអំពីសារៈសំខាន់នៃទំនាក់ទំនងរវាងប្រទេសទាំងពីរផងដែរ។
លោកយល់ថា ក្នុងដំណើរទស្សនកិច្ចនេះ ក៏នឹងអាចមានការពិភាក្សាទៅលើកិច្ចការមួយចំនួនទៀត ដូចជា ការពង្រឹងសន្តិសុខឌីជីថល ការប្រយុទ្ធប្រឆាំងល្បែងអនឡាញក្នុងក្របខណ្ឌទ្វេភាគី៕
