ប្រជានេសាទនៅភូមិបាចុង សង្កាត់ព្រះបាទ ក្រុងស្ទឹងត្រែងបានលែងត្រីត្រសក់១ក្បាល ដែលជាប្រភេទធនធានជលផលកំពុងរងគ្រោះថ្នាក់ ចូលទៅក្នុងដែនទឹកធម្មជាតិវិញនាពេលថ្មីៗនេះ។ រូបថតៈ ខណ្ឌរដ្ឋបាលជលផលខេត្តស្ទឹងត្រែង
ភ្នំពេញៈ នៅមុនពេលប្រមូលផលត្រីប្រហុកនាពេលខាងមុខនេះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទបានអំពាវនាវឱ្យមានការដោះលែង ឬជូនដំណឹងដល់មន្រ្តីជំនាញ ប្រសិនពលរដ្ឋនេសាទបានប្រភេទត្រី ដែលកំពុងតែរងគ្រោះថ្នាក់ជិតផុតពូជ។
ប្រភេទត្រីដែលកំពុងតែរងគ្រោះថ្នាក់ទាំងនោះរួមមានត្រីគល់រាំង ត្រីរាជ ត្រីត្រសក់ បបែល ត្រីប៉ាសាណាក ត្រីកន្រ្តប់ខ្លា ឬប្រភេទត្រីកម្រផ្សេងទៀតជាដើម។ នេះបើយោងតាមរដ្ឋបាលជលផល។
រដ្ឋបាលជលផលបានអំពាវនាវ ដល់អាជីវករ ដែលធ្វើអាជីវកម្ម នេសាទដោយប្រើឧបករណ៍នេសាទដាយត្រីនៅរាជធានីភ្នំពេញ និងខេត្តកណ្តាល និងប្រជានេសាទនៅតាមដងទន្លេ បឹងបួរ ស្ទឹង ព្រែកនានា ថា៖«នៅពេលនេសាទបាននូវប្រភេទធនធានជលផលកំពុងរងគ្រោះថ្នាក់ សូមផ្តល់ព័ត៌មានដល់មន្ត្រីជំនាញ ផលផល ឬសមត្ថកិច្ចពាក់ព័ន្ធ ដើម្បីរួមគ្នាលែងចូលទៅក្នុងដែនទឹកធម្មជាតិវិញសម្រាប់បង្កើនផលស្តុកត្រីឱ្យកាន់តែសម្បូរ និង និរន្តរភាពធនធានជលផល»។
លោកអ៊ុក វិបុល ប្រធាននាយកដ្ឋានអភិរក្សជលផលបានឱ្យដឹងថាប្រភេទដែលកំពុងតែរងគ្រោះថ្នាក់ មាន៥៨ប្រភេទ ដូចដែលមានចែងនៅក្នុងអនុក្រឹត្យលេខ១២៣ របស់រាជរដ្ឋាភិបាលកាលពីឆ្នាំ២០០៩។ ក្នុងនោះត្រី២៩ប្រភេទជាត្រីទឹកសាប និង២៩ប្រភេទផ្សេងទៀត ជាប្រភេទត្រីទឹកប្រៃ។
លោកបានឱ្យដឹងថា ចាប់តាំងពីឆ្នាំ២០០៩មក រដ្ឋបាលជលផលបានធ្វើការបោះពុម្ពផ្ទាំងរូបភាពពីប្រភេទត្រីទាំងនេះ ហើយបានចុះផ្សព្វផ្សាយដល់ពលរដ្ឋនៅគ្រប់ខេត្តទាំងអស់ ដើម្បីលើកម្ពស់ការយល់ដឹង និងចូលរួមអភិរក្ស។
លោកបញ្ជាក់ថា៖«ដាយត្រីហ្នឹងភាគច្រើន គឺចាប់ត្រីប្រហុកដែលធ្លាក់ពីទន្លេសាបមក។ ទទ្ទឹមនឹងនោះ ក៏មានប្រភេទមួយចំនួន ដែលត្រូវហាមឃាត់ធ្លាក់មកដែរ ដូចជាត្រីរាជ ត្រីគល់រាំង ត្រីត្រសក់ ត្រីកន្រ្តប់ខ្លា និងត្រីផ្សេងៗទៀត ដែលកំពុងតែរងគ្រោះថ្នាក់ហ្នឹង គឺសំខាន់គឺកុំឱ្យគាត់លាក់ ឬក៏ជួញដូរ ទិញលក់អី។ បើចាប់បានលើកដាយមក បានឃើញត្រីហ្នឹង ឱ្យគាត់លែងត្រឡប់ទៅវិញទៅ។ យើងលើកទឹកចិត្ត សរសើរដល់ពួកគាត់ ដែលធ្វើការងារហ្នឹង»។
លោកថ្លែងបន្តដូច្នេះថា៖«ពាក់ព័ន្ធអំពាវនាវជាលាយលក្ខណ៍អក្សរបន្ថែមទៀតនេះ សំខាន់ទៅដល់បងប្អូនយើងដែលធ្វើដាយត្រីប្រហុកនេះ ព្រោះជារដូវត្រីប្រហុកខែ១១ ខែ១២ហ្នឹង ហើយបងប្អូនដាក់មង ដាក់អីចាប់ត្រីច្រើនណាស់នៅតាមទន្លេ ត្រីប្រហុកធ្លាក់មក។ អញ្ចឹងបានយើងអំពាវនាវ ឱ្យគាត់ប្រុងប្រយ័ត្ន បើចាប់បានសូមឱ្យគាត់ទាក់ទងមកយើង ឬលែងត្រឡប់ទៅវិញ ព្រោះជិតផុតពូជហើយប្រភេទទាំងអស់ហ្នឹង»។
លោកវិបុល ជឿជាក់ថា រហូតមកដល់នឹងពេលបច្ចុប្បន្ននេះ ការចុះអប់រំផ្សព្វផ្សាយគឺវាគ្រប់គ្រាន់ហើយ។ លោកពន្យល់ថា បើតាមច្បាប់ការជួញដូរប្រភេទត្រីទាំងនោះគឺត្រូវមានទោស ដោយត្រូវដកហូតត្រី និងទទួលការផាកពិន័យរហូតទៅដល់ចំនួន៣ដង នៃតម្លៃទីផ្សារផងដែរ។
យ៉ាងហោចណាស់ត្រីត្រសក់ចំនួន២ក្បាល និងត្រីកន្ត្រប់ខ្លា២ក្បាលត្រូវបានប្រជាសហគន៍ និងមន្រ្តីខណ្ឌរដ្ឋបាលជលផលខេត្តស្ទឹងត្រែងធ្វើការដោះលែងទៅក្នុងដែនទឹកធម្មជាតិវិញ បន្ទាប់ពីពួកគេចាប់បាននាពេលថ្មីៗនេះ។ នេះបើយោងតាមខណ្ឌរដ្ឋបាលជលផលខេត្តស្ទឹងត្រែង។
ខណ្ឌរដ្ឋបាលជលផលខេត្តបានលើកឡើងថា៖«ការដោះលែងត្រីនេះ គឺជាសកម្មភាពគំរូដ៏ល្អ និងមានតម្លៃមិនអាចកាត់ថ្លៃបាន ក្នុងការរួមចំណែកថែរក្សា ការពារ និងអភិរក្សប្រភេទធនធានជលផល ដែលកំពុងរងគ្រោះថ្នាក់ និងប្រភេទត្រីមេពូជសំខាន់ៗ ឱ្យមានវត្តមានកាន់តែច្រើនក្នុងដែនទឹកធម្មជាតិសម្រាប់កូនចៅជំនាន់ក្រោយៗទៀត»។
រដ្ឋបាលជលផលបានជំរុញលើកទឹកចិត្ត ឱ្យប្រជាពលរដ្ឋ ចូលរួមថែរក្សា ការពារ និងអភិរក្សធនធានជលផលដែលជាសម្បត្តិធម្មជាតិ ដ៏មានតម្លៃនេះ។
ពលរដ្ឋអាចផ្តល់ព័ត៌មានដល់មន្ត្រីជលផល តាមរយៈទូរស័ព្ទលេខ៖ ០១៦ ៦៤០ ៣៣៣/ ០១២ ៩០៨ ១២១/ ០១២ ៨៧១ ០៧១/០១២ ៩១១ ៤១១/ ០៩៩ ៧៩១ ១៩១៩៕
