ចំនួនទឹកភ្លៀងនៅតែបន្តលិចកំណាត់ផ្លូវជាតិលេខ ៥ រហូតដល់ថ្ងៃទី៥ ខែវិឆ្ឆិកា។ រូបថត ក្រសួងធនធានទឹក
កំពង់ស្ពឺៈ ការផ្អាកចរាចរណ៍រថយន្តដឹកទំនិញធុនធ្ងន់គ្រប់ប្រភេទលើកំណាត់ផ្លូវជាតិលេខ៣ ក្នុងខេត្តកំពង់ស្ពឺនៅបន្តបិទជាណ្តោះអាសន្ន រហូតមកដល់ថ្ងៃអង្គារ ទី៥ ខែវិច្ឆិកានេះ ខណៈមន្រ្តីជំនាញពាក់ព័ន្ធកំពុងកាយប្រឡាយបើកមុខទឹក ដើម្បីរំដោះការជន់លិចនេះ។
អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានឱ្យដឹងថា ចរាចរណ៍លើកំណាត់ផ្លូវជាតិលេខ៣ នេះនៅមិនទាន់អាចបើកដំណើរការឡើងវិញនោះទេ ដោយសារតែទឹកបន្តស្ថិតក្នុងស្ថានភាពកម្រិតដដែល។
លោកបញ្ជាក់ថា៖ «យើងនៅបន្តបិទរហូតដល់យើងចេញសេចក្តីប្រកាសព័ត៌មានមួយទៀត។ ស្ថានភាពទឹកនៅបន្តកម្រិតដដែលទេ តែគ្រាន់ចំណុច គីឡូ ៥៤ និង ៥៥ រាងស្រកបន្តិច ប៉ុន្តែគីឡូ ៥៣ និង ៥៤ វាចាប់ផ្តើមឡើងបន្តិចវិញ។ ក្រសួងធនធានទឹក និងឧតុនិយម ក៏កំពុងតែប្រឹងប្រែង ដើម្បីរកមុខទឹក ដើម្បីរំដោះទឹកចេញពីតំបន់ជនលិចនោះ»។
មន្ទីរសាធារណការ និងដឹកជញ្ជូនខេត្តកំពង់ស្ពឺបានសម្រេចផ្អាកចរាចរណ៍រថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវជាតិលេខ៣ ក្នុងភូមិសាស្ត្រខេត្តកំពង់ស្ពឺជាបណ្តោះអាសន្នកាលពីថ្ងៃច័ន្ទ ទី ៤ ខែវិច្ឆិកា។
មន្ទីរបញ្ជាក់ថា ស្ថានភាពទឹកភ្លៀង ចុងឆ្នាំក្នុងរដូវវស្សាឆ្នាំ ២០២៤ នេះចាប់ផ្តើមធ្លាក់ក្នុងកម្រិតមធ្យមទៅច្រើន បង្កឱ្យមានជាជំនន់ទឹកភ្លៀង ដែលត្រូវមានការប្រុងប្រយ័ត្នខ្ពស់ និងអាចបង្កឱ្យមានផលប៉ះពាល់ ដល់អាយុជីវិតមនុស្សសត្វ និងហេដ្ឋា រចនាសម្ព័ន្ធ ផ្លូវថ្នល់ និងស្ពាន។
ជំនន់ទឹកភ្លៀងដែលបាន និងកំពុងជន់ឡើង បណ្តាល ឱ្យលិចលង់នៅតាមកំណាត់ ផ្លូវជាតិលេខ៣ ចន្លោះគ.ម ៤១ ដល់ គ.ម ៤៣ (ផ្សារត្រាំខ្នារ) ស្ថិតក្នុង ស្រុកគងពិសី និងចន្លោះ គ.ម ៥៣ ដល់ គ.ម ៥៥ (ផ្សារប៉ាង្គសី) ស្ថិតក្នុង ស្រុកបសេដ្ឋ ខេត្តកំពង់ស្ពឺ។ ស្ថានភាពនេះធ្វើឱ្យផ្លូវថ្នល់-ស្ពាន មិនអាចទ្រនឹងទម្ងន់របស់រថយន្តដឹកទំនិញធុនធ្ងន់បាន។
សេចក្តីជូនដំណឹងសរសេរថា៖«ដើម្បីបង្ការ គ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធផ្លូវថ្នល់-ស្ពាន មន្ទីរសាធារណការ និងដឹក ជញ្ជូនខេត្តកំពង់ស្ពឺ សូមធ្វើការផ្អាក ចរាចរណ៍រថយន្តដឹកទំនិញធុនធ្ងន់គ្រប់ប្រភេទ ជាបណ្តោះអាសន្នលើ កំណាត់ ផ្លូវជាតិលេខ៣ ចន្លោះគ.ម ៤១ ដល់ គ.ម ៤៣ និង ចន្លោះ គ.ម ៥៣ ដល់ គ.ម ៥៥ ចាប់ពីថ្ងៃជូនដំណឹងនេះ រហូតដល់មានសេចក្តីជូនដំណឹងសារជាថ្មី»។
ប្រជាពលរដ្ឋ ជាម្ចាស់រថយន្តដឹកទំនិញធុនធ្ងន់ទាំងអស់ ដែលធ្វើចរាចរណ៍ពីរាជធានី ភ្នំពេញ ឆ្ពោះទៅខេត្តកំពត និងសម្រាប់ទិសដៅពីខេត្តកំពត ឆ្ពោះទៅរាជធានីភ្នំពេញ សូមធ្វើដំណើរវាងតាម ផ្លូវជាតិលេខ ២ ឬវាងទៅតាមផ្លូវជាតិលេខ ៤១ ជាបណ្តោះអាសន្នសិន។
ដើម្បីដោះស្រាយបន្ទាន់ចំពោះការធ្លាក់ភ្លៀងខ្លាំងក្នុងរយៈពេលពីរបីថ្ងៃនេះ ក្រុមការងារអាជ្ញាធរមូលដ្ឋានស្រុកគងពិសី ខេត្តកំពង់ស្ពឺ សហការជាមួយអាជ្ញាធរស្រុក ក្នុងខេត្តតាកែវបានសម្រេចកាយប្រឡាយបើកមុខទឹក ដើម្បីរំដោះការជន់លិចលើកំណាត់ផ្លូវជាតិលេខ ៣ និងពីតំបន់ជុំវិញអគាររោងចក្រ ទំលាក់ទៅតាមស្ទឹងស្លាគូ។ នេះបើយោងតាមក្រសួងធនធានទឹក។
ក្រសួងធនធានទឹកក៏បានឱ្យដឹងផងដែរថា ព្យុះទី ២២ ឈ្មោះយិនស៊ីង (Yinxing)ដែលកើតនៅមហាសមុទ្រប៉ាស៊ីហ្វិកខាងលិចបានមានឥទ្ធិពលខ្លាំងលើរបបខ្យល់មូសុងឦសាន ខណៈសម្ពាធទាបគ្របដណ្តប់លើសមុទ្រចិនខាងត្បូង ឈូងសមុទ្រថៃ និងគ្របដណ្តប់លើភាគខាងក្រោម នៃអាងទន្លេមេគង្គ និងលើប្រទេសកម្ពុជា ។
ស្ថានភាពបែបនេះនឹងធ្វើឱ្យ តំបន់វាលទំនាប ដូចជាខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើ ផ្ទៃដី ៥០ភាគរយ ចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ ២០២៤។
ក្នុងអំឡុងពេលនេះដែរ តំបន់ខ្ពង់រាបដូចជាខេត្តកំពង់ស្ពឺ ប៉ៃលិន ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្តប់លើផ្ទៃដី៣០ភាគរយ។
ដោយឡែក តំបន់មាត់សមុទ្រ ដូចជា ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើផ្ទៃដី ១៥ភាគរយ។ រីឯ រលកសមុទ្រមានកម្ពស់មធ្យមអប្បបរមា ០,៥០ម៉ែត្រនិងកម្ពស់មធ្យមអតិបរមា ១,២៥ម៉ែត្រ៕
