សមត្ថកិច្ចបង្ក្រាបកន្លែងប្រព្រឹត្តល្បែងអនឡាញមួយកន្លែងនៅខេត្តកំពង់ស្ពឺ ឃាត់ខ្លួនជនសង្ស័យប្រមាណ ១០០០នាក់ កាលពីខែតុលា ឆ្នាំ២០២៤។ រូបថត កោះសន្តិភាព
លោក ស សុខា រដ្ឋមន្ត្រីក្រសួងមហាផ្ទៃប្រាប់ឲ្យអគ្គនាយកដ្ឋានអន្តោប្រវេសន៍រកវិធីរឹតបន្តឹងការគ្រប់គ្រងជនបរទេសឲ្យបានតឹងរ៉ឹងថែមទៀត បន្ថែមលើយន្តការដែលមានស្រាប់ ខណៈដែលកម្ពុជាបានបដិសេធមិនឲ្យជនបរទេសជាង ១០០០នាក់ចូលមកកម្ពុជា និងបណ្ដេញចេញជាច្រើននាក់។
ការណែនាំរបស់លោកធ្វើឡើងកាលពីសប្ដាហ៍មុន ក្នុងជំនួបជាមួយមន្ត្រីប៉ូលិសនៃអគ្គនាយកដ្ឋានអន្តោប្រវេសន៍ ដោយការរឹតបន្តឹងនេះផ្ដោតជាសំខាន់ទៅលើរាជធានីភ្នំពេញ ខេត្តព្រះសីហនុ សៀមរាប ស្វាយរៀង និងខេត្តបន្ទាយមានជ័យ។
ព័ត៌មានរបស់អគ្គនាយកដ្ឋានអន្តោប្រវេសន៍បានបញ្ជាក់ថា លោក ស សុខា ក៏បាន «ណែនាំឲ្យពង្រឹងការអនុវត្តកាតព្វកិច្ចរាយការណ៍វត្តមានជនបរទេសដែលចូលស្នាក់នៅតាមរោងចក្រ សហគ្រាស និងកន្លែងស្នាក់នៅនានា ដូចជាសណ្ឋាគារ និងផ្ទះសំណាក់ជាដើម»។
យោងតាមអគ្គនាយកដ្ឋានអន្តោប្រវេសន៍ កម្ពុជាបានបដិសេធមិនឲ្យជនបរទេស ១០២៤នាក់ចូលមកកម្ពុជា ក្នុងរយៈពេល ៩ខែ ឆ្នាំ២០២៤នេះ ខណៈដែលជនបរទេសជាង ៤,៨លាននាក់ (៤.៨៤៩.៩២២) មាន ២១៧ សញ្ជាតិ បានចូលកមកម្ពុជាក្នុងរយៈពេលនេះ ដែលកើនឡើង ៦,៧៦ភាគរយធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមជនបរទេសជាង ៤,៨លាននាក់នេះ មានភ្ញៀវទេសចរចំនួនជាង ៣,៧លាននាក់ (៣.៧៦៧.៥១៨) ស្មើនឹង ៧៧,៦៨ភាគរយ។
លោក ទូច សុខៈ អ្នកនាំពាក្យក្រសួងមហាផ្ទៃបានប្រាប់ភ្នំពេញប៉ុស្តិ៍ថា លោករដ្ឋមន្ត្រីមហាផ្ទៃ ស សុខា ណែនាំឲ្យអនុវត្តយ៉ាងតឹងរ៉ឹងទៅលើការអនុវត្តច្បាប់ និងគ្រប់គ្រងជនបរទេសនៅកម្ពុជាឲ្យបានដិតដល់ ហើយការធ្វើបែបនេះមិនមែនជាការបិទសិទ្ធិសេរីភាពរបស់ពួកគេនោះទេ។
លោកថ្លែងថា៖ «ប៉ុន្តែ យើងត្រូវត្រួតពិនិត្យជាប្រចាំ ដើម្បីប្រាកដថា នៅកន្លែងណាមានជនបរទេសស្នាក់នៅ មានប៉ុន្មាននាក់ ធ្វើអ្វីខ្លះ ហើយស្របទៅតាមច្បាប់ដែរឬអត់។ ឧទាហរណ៍ថា ពួកគេមកក្នុងនាមអ្នកទេសចរណ៍ ប៉ុន្តែមកធ្វើការនៅកម្ពុជា អាហ្នឹងគឺខុស។ បើគាត់មកធ្វើការ ត្រូវមានទិដ្ឋាការការងារ និងសៀវភៅការងារ។ ចំពោះជនបរទេសខុសច្បាប់ យើងអនុវត្តតាមច្បាប់ស្ដីពីអន្តោប្រវេសន៍ គឺបណ្ដេញចេញពីកម្ពុជាទៅប្រទេសសាមីរបស់ពួកគេ ឬបណ្ដេញចេញពីកម្ពុជា»។
កាលពីសប្ដាហ៍មុន អគ្គនាយកដ្ឋានអន្តោប្រវេសន៍ក៏បានចេញសេចក្ដីបំភ្លឺពាក់ព័ន្ធនឹងការលើកឡើងថា សមត្ថកិច្ចអន្តោប្រវេសន៍កម្ពុជា បានបដិសេធមិនឱ្យជនបរទេសសញ្ជាតិឥណ្ឌា ប៉ាគីស្ថាន នេប៉ាល់ បង់ក្លាដេស និងឥណ្ឌូណេស៊ី ចូលមកកម្ពុជា និងមិនផ្ដល់ទិដ្ឋាការបន្តរយៈពេលស្នាក់នៅបណ្ដោះអាសន្នដល់ពួកគេ។
អគ្គនាយកដ្ឋានថ្លែងថា ផ្អែកតាមច្បាប់ស្តីពីអន្តោប្រវេសន៍ និងអនុក្រឹត្យពាក់ព័ន្ធ សមត្ថកិច្ចនគរបាលអន្តោប្រវេសន៍ អាចបដិសេធជនបរទេសណាម្នាក់ចូលកម្ពុជា ឬមិនផ្តល់ទិដ្ឋាការស្នាក់នៅបណ្ដោះអាសន្ន ក្នុងករណីដែលជននោះមិនបានបំពេញត្រឹមត្រូវតាមលក្ខខណ្ឌដែលបានចែងក្នុងច្បាប់ និងអនុក្រឹត្យ ដូចជា ប្រវត្តិនៃការធ្វើដំណើរមិនច្បាស់លាស់, គោលបំណងនៃការធ្វើដំណើរមិនច្បាស់លាស់ ឬខ្វះលទ្ធភាពចិញ្ចឹមខ្លួនក្នុងពេលស្នាក់នៅកម្ពុជា ក៏ដូចជាគ្មានអ្នកធានា។
លើសពីនេះទៀត អាជ្ញាធរសមត្ថកិច្ចមានហេតុអាចបដិសេធការចូលឬមិនផ្ដល់ទិដ្ឋាការក្នុងករណីមានហេតុផលគ្រប់គ្រាន់ជឿថា ជននោះនឹងប្រព្រឹត្ត ឬបានប្រព្រឹត្តសកម្មភាពធ្វើឱ្យខូចផលប្រយោជន៍ សណ្ដាប់ធ្នាប់សាធារណៈសីលធម៌សង្គម និងធ្វើសកម្មភាពប៉ះពាល់ដល់សន្តិសុខជាតិ អន្តរជាតិ។
លោក ទូច សុខៈ ថ្លែងថា កម្ពុជាមិនរើសអើងទៅលើជាតិសាសន៍ណាមួយដែលចូលមកកម្ពុជាទេ ប៉ុន្តែ កម្ពុជាត្រូវអនុវត្តច្បាប់អន្តោប្រវេសន៍ និងចាប់ពាក់ព័ន្ធ ដែលការអនុវត្តបែបនេះគឺដូចទៅនឹងប្រទេសឯទៀតៗដែរ។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងថា លោកមិនមានជំនាញរឿងអន្តោប្រវេសន៍ទេ ប៉ុន្តែ ជាការយល់ឃើញទូទៅ លោកយល់ថាមានជនបរទេសខិលខូចលួចស្នាក់នៅប្រទេសកម្ពុជា និងប្រព្រឹត្តបទល្មើសមួយចំនួន ដូចជាឆបោកតាមអនឡាញ ឬរកស៊ីមុខរបបខុសច្បាប់ផ្សេងៗ។
បញ្ហានេះអាចបណ្ដាលមកពីការគ្រប់គ្រងមិនទាន់បានតឹងរ៉ឹង ហើយជាលទ្ធផលសកម្មភាពរបស់ពួកគេធ្វើឲ្យប៉ះពាល់ដល់មុខមាត់កម្ពុជា។
លោកនិយាយថា៖ «ជាទស្សនៈ យើងអាចវាយតម្លៃបានថា ការគ្រប់គ្រងជនបរទេសនៅកម្ពុជា នៅមានលក្ខណៈធូររលុង មិនទាន់បានអនុវត្តច្បាប់អន្តោប្រវេសន៍បានហ្មត់ចត់នៅឡើយ។ ច្បាប់យើងមានហើយ តែការអនុវត្តអាចនៅមានកម្រិត។ នេះជាការមើលឃើញរបស់ខ្ញុំ»។
យ៉ាងណាក៏ដោយ លោក ទូច សុខៈ ថ្លែងថា កម្ពុជាមិនបានបានអនុវត្តធូររលុងក្នុងការអនុវត្តច្បាប់អន្តោប្រវេសន៍នោះទេ ដូចដែលតួលេខបង្ហាញពីការបដិសេធមិនឲ្យជនបរទេសជាង ១០០០នាក់ ចូលមកកម្ពុជាជាការបញ្ជាក់ស្រាប់។
លោក សុខ សុមនា អ្នកនាំពាក្យអគ្គនាយកដ្ឋានអន្តោប្រវេសន៍បានថ្លែងថា ក្នុងរយៈពេល៩ខែឆ្នាំ២០២៤នេះ កម្ពុជាក៏បានបណ្ដេញចេញជនបរទេសខុសច្បាប់ក្នុងចំនួនច្រើនផងដែរ ដែលភាគច្រើនពាក់ព័ន្ធនឹងបទល្មើសឆ្លងដែនដោយខុសច្បាប់ និងធ្វើការដោយគ្មានប័ណ្ណការងារ។
លោកថ្លែងថា៖ «យើងធ្វើទៅតាមច្បាប់របស់កម្ពុជាដែលមានស្រាប់ ហើយពេលនេះយើងពង្រឹងការគ្រប់គ្រងទៅលើជនបរទេស។ ឥឡូវនេះ យើងមានយុទ្ធនាការមួយគឺយុទ្ធនាការ ០០៣ ដែលយើងចុះស្រង់ចំនួនជនបរទេសដើម្បីដឹងចំនួនជាក់ស្ដែង ហើយសម្រេចថាយើងគួរធ្វើនីតិវិធីយ៉ាងម៉េចទៀតទៅតាមច្បាប់។ ហើយការបញ្ជូនចេញ ដឹងតែមានហើយ ដោយសារអីគឺដោយសារតែចូលមកខុសច្បាប់ យើងត្រូវបញ្ជូនគាត់ចេញ»។
កាលពីឆ្នាំ២០២៣ កម្ពុជាបានបណ្ដេញចេញជនបរទេសចំនួន ២១៥៩នាក់ដោយសារតែពួកគេបានប្រព្រឹត្តអំពើល្មើសច្បាប់។ ក្នុងនោះជនជាតិចិនមានច្រើនជាងគេ (១,០១១នាក់), បន្ទាប់មកឥណ្ឌូណេស៊ី (២៦៧នាក់) និងវៀតណាម (៥០៧នាក់)។ ក្រៅពីនេះមានជនជាតិដទៃផ្សេងទៀតសរុបជាច្រើនរយនាក់៕
