តំណាងក្រុមហ៊ុនផ្តល់សំណងដល់ប្រជាពលរដ្ឋ ដែលទទួលរងផលប៉ះពាល់។ រូបភាព: ក្រុមហ៊ុន
ព្រះសីហនុ៖ ក្រសួងបរិស្ថានបានផាកពិន័យក្រុមហ៊ុនវិនិយោគទុនដំណាំដូងប្រេងកម្ពុជារបស់លោកម៉ុង ឫទ្ធី ប្រមាណជា ១ម៉ឺនដុល្លារ ដោយសារតែការបំពុលបរិស្ថានក្នុងខេត្តព្រះសីហនុ ហើយបានឱ្យក្រុមហ៊ុនកែលម្អប្រព័ន្ធគ្រប់គ្រងកាកសំណល់ឱ្យបានត្រឹមត្រូវ ត្រឹមដើមឆ្នាំ២០២៥ខាងមុខ។ នេះបើយោងតាមលិខិតរបស់រដ្ឋមន្រ្តីក្រសួងបរិស្ថាន លោក អ៊ាង សុផល្លែត ផ្ញើជូនលោកឧកញ៉ាម៉ុង ឫទ្ធី អគ្គនាយកក្រុមហ៊ុនវិនិយោគទុនដំណាំដូងប្រេងកម្ពុជា។
លិខិតស្តីពី ករណីអនុវត្តវិធានការច្បាប់ និងតម្រូវឱ្យកែលម្អការបំពុលបរិស្ថានចុះថ្ងៃទី២៦ ខែសីហា ឆ្នាំ២០២៤ ដែលត្រូវបានលោកឧកញ៉ាម៉ុង ឫទ្ធីបង្ហោះលើបណ្តាញសង្គមរបស់លោកនាថ្ងៃទី៥ ខែវិច្ឆិកានេះបានសរសេរថា រោងចក្រចម្រាញ់ដូងប្រេងទី២ របស់ក្រុមហ៊ុន ម៉ុង ឫទ្ធី វិនិយោគទុនដំណាំដូងប្រេង កម្ពុជា ស្ថិតនៅភូមិអន្លង់ក្រពើ ឃុំតានៃ ស្រុកព្រៃនប់ ខេត្តព្រះសីហនុ បានបញ្ចេញសំណល់រាវពីខ្សែច្រវាក់ផលិតកម្ម ចូលទៅក្នុងស្ទឹងព្រែកកំពង់សីលា ដែលបង្កការបំពុលទឹក និងត្រីងាប់។
លោករដ្ឋមន្រ្តីបញ្ជាក់ក្នុងលិខិតថា៖«ឆ្លើយតបនឹងបញ្ហានេះ និងធ្វើការទប់ស្កាត់ ការបំពុលបរិស្ថាន ជាបន្តទៀត ក្រសួងបរិស្ថានសម្រេចអនុវត្តវិធានការចំពោះក្រុមហ៊ុន ពិន័យអន្តរការណ៍ជាប្រាក់ចំនួន ៤០ ០០០ ០០០ (សែសិបលាន) រៀល»។
ការផាកពិន័យនេះគឺទៅលើបទល្មើសចំនួន៤ ដូចជា ការបញ្ចេញសំណល់រាវលើសស្តង់ដារកំណត់ ដោយ អនុលោមមាត្រា ៦ នៃអនុក្រឹត្យលេខ ២៧ ស្តីពីការត្រួតពិនិត្យការបំពុលទឹក ចំនួន ១០ ដប់លានរៀល និងប្រព័ន្ធអាងប្រព្រឹត្តិកម្ម ពុំមានលក្ខណៈបច្ចេកទេស និងសមត្ថភាពគ្រប់គ្រាន់ ដើម្បីធ្វើការសម្អាតសំណល់រាវ ឆ្លើយតបនឹងកម្រិតកំណត់ស្តង់ដារបញ្ចេញ ដោយអនុលោម មាត្រា ២៣ ចំណុច “ក” នៃអនុក្រឹត្យលេខ ២៧ ស្តីពីការត្រួតពិនិត្យការបំពុលទឹក ចំនួន ១០ ដប់លាន រៀល។
បទល្មើសក្រៅពីនោះរួមមាន ការធ្វេសប្រហែសបណ្តាលឱ្យសំណល់រាវហូរចូលប្រភពទឹកសាធារណៈ បង្កការបំពុលទឹក ស្ទឹងព្រែកកំពង់សីលា និងត្រីងាប់ ដោយអនុលោមមាត្រា២៣ ចំណុច “ខ” នៃអនុក្រឹត្យ លេខ ២៧ ដដែលនេះ ចំនួន ១០ដប់លាន រៀល និងបទល្មើសចុងក្រោយគឺ ក្រុមហ៊ុនពុំមានលិខិតអនុញ្ញាតបញ្ចេញសំណល់រាវ ដោយអនុលោមមាត្រា ១០ នៃអនុក្រឹត្យលេខ២៧ ចំនួន ១០ ដប់លានរៀល។
លោករដ្ឋមន្រ្តីបានបង្រ្គាប់ឱ្យក្រុមហ៊ុន ត្រូវទៅបង់ប្រាក់ពិន័យអន្តរការណ៍នេះ នៅទីស្តីការក្រសួងបរិស្ថាន ឱ្យបាន មុនថ្ងៃទី១៩ ខែកញ្ញា ឆ្នាំ២០២៤ ជាកំហិត។
ក្រសួងក៏បានណែនាំឱ្យក្រុមហ៊ុន «ត្រូវបញ្ឈប់ជាបន្ទាន់ នូវការបញ្ចេញសំណល់រាវ ដែលមិនបានធ្វើប្រព្រឹត្តិកម្មសម្អាត និងមិន ស្របតាមស្តង់ដារកំណត់ ចូលក្នុងចំការដូងប្រេង ឬ ទៅទីទំនាបផ្ទៃរងទឹកភ្លៀង» និង«ត្រូវរៀបចំសាងសង់ ឬ កែសម្រួលអាងប្រព្រឹត្តិកម្មសំណល់រាវ ឱ្យបានត្រឹមត្រូវតាមលក្ខណៈ បច្ចេកទេស និងមានសមត្ថភាពសម្អាតសំណល់រាវឆ្លើយតបនឹងស្តង់ដារ ឱ្យបានរួចរាល់ នៅមុនថ្ងៃទី១៩ ខែកុម្ភៈ ឆ្នាំ២០២៥ ជាកំហិត»។
លើសពីនោះ ក្រុមហ៊ុនក៏ ត្រូវរៀបចំឱ្យមានស្រះបម្រុងសម្រាប់ស្តុកសំណល់រាវ ក្នុងករណីអាងប្រព្រឹត្តិកម្មដំណើរការ មានភាពមិនប្រក្រតី ដើម្បីការពារសំណល់រាវហូរចូលប្រភពទឹកសាធារណៈដោយផ្ទាល់ ឱ្យបានរួចរាល់នៅមុនថ្ងៃទី១៩ ខែកុម្ភៈ ឆ្នាំ២០២៥ ផងដែរ។ ចុងក្រោយក្រុមហ៊ុនត្រូវរៀបចំបំពាក់ឧបករណ៍ស្វ័យត្រួតពិនិត្យលើការបញ្ចេញសំណល់រាវសម្អាតរួច ដោយត្រូវ ប្រើប្រាស់ក្រុមហ៊ុនផ្តល់សេវាបំពាក់ ដែលទទួលស្គាល់ពីក្រសួងបរិស្ថាន ឱ្យបានរួចរាល់ នៅមុនថ្ងៃទី១៩ ខែមីនា ឆ្នាំ២០២៥ ជាកំហិត។
ត្រីងាប់ក្រោយពីមានការហូរកាកសំណល់ចូលតំបន់អភិរក្សជលផលព្រែកកំពង់សីលា។ រូបថត មាតាធម្មជាតិ ផ្តល់ដោយប្រជាពលរដ្ឋ
ក្នុងករណីក្រុមហ៊ុនពុំអនុវត្តតាមចំណុចណែនាំទាំងនេះ «ក្រសួងបរិស្ថាននឹងចាត់វិធានការ តាមច្បាប់ជាធរមាន»។
លោក ម៉ុង ឫទ្ធី ក៏បានបង្ហោះផងដែរ ពីបង្កាន់ដៃបង់ប្រាក់របស់ក្រុមហ៊ុនចំនួន៤០លានរៀល ទៅតាមការផាកពិន័យរបស់ក្រសួង នៅថ្ងៃទី១៩ ខែកញ្ញាកន្លងមក។
ការបង្ហោះសារនេះ គឺជា«ភស្តុតាង» ដែលឆ្លើយតបទៅនឹងការចោទប្រកាន់ទៅលើលោកថា បានគេចវេសមិនទទួលខុសត្រូវ ចំពោះពលរដ្ឋមួយចំនួនតូច ដែលទទួលរងគ្រោះពីចំការដូងប្រេងរបស់លោកនាពេលថ្មីៗនេះ។ ប៉ុន្តែលោកអះអាងថា បញ្ហានោះត្រូវបានដោះស្រាយចប់សព្វគ្រប់អស់ទៅហើយ។
លោកបានសរសេរថា៖«នៅពេលនេះយើងបានទប់ទំនប់ ដែលបានបាក់រួចរាល់ជាស្ថាពរ ធ្វើឱ្យស្ថានភាពងាកមករកភាពប្រក្រតីឡើងវិញ ព្រមទាំងសងសំណងការខូចខាតដល់រដ្ឋ និងប្រជាជន ប្រកបដោយការទទួលខុសត្រូវខ្ពស់បំផុត»។
លោកក៏បានឱ្យដឹងផងដែរថា នាពេលបច្ចុប្បន្ននេះ ក្រុមហ៊ុន ម៉ុង ឫទ្ធី វិនិយោគទុនដំណាំដូងកម្ពុជា បានផ្តល់ការងារដោយផ្ទាល់ដល់បុគ្គលិក កម្មករប្រមាណជាជាង២ ០០០នាក់ និងដោយប្រយោលប្រមាណជាជាង ៨ ០០០នាក់។ ចាប់តាំងពីឆ្នាំ១៩៩៦ ដល់ឆ្នាំ ២០២៤ ដែលមាន២៨ឆ្នាំមកហើយនោះ គុណដ៏មហាធំធេង ដែលលោកបានកសាង លើវិស័យកសិកម្ម និងកសិឧស្សាហកម្មចំពោះប្រទេសជាតិ និងប្រជាជនកម្ពុជាគឺមានច្រើនលើសលុប។
លោកបានចោទជាសំណួរដូច្នេះថា៖«តើអស់លោកចង់យកកំហុសដោយអចេតនាតូចតាចមួយនេះមកបំផ្លាញឬ? (គុណ១០០សំពៅ ទោសមួយចូលទៅ បំផ្លាញទាំងអស់)។ គ្រាន់តែមានករណីនេះកើតឡើងភ្លាម មានអ្នកស្នេហាជាតិច្រើនណាស់ ទាំងគ្នាឯងផង ទាំងគ្នាគេផងមកសាកសួរជីកឫស ជីកគល់ក្នុងគោលបំណងបំផ្លាញតែម្តង។ តែខ្ញុំមិនមានប្រតិកម្មត តបទៅវិញអ្វីទាំងអស់ ទុកពេលឱ្យសាមីក្រសួង ដែលមានការពាក់ព័ន្ធដោះស្រាយទៅតាមនីតិវិធីទៅចុះ»។
លោកក៏បានអះអាងដែរថា លោកនឹងជូនប័ណ្ណសរសើរ និងជូនសគុណជាទីគាប់ចិត្តថែមទៀតទៅអ្នករិះគន់ ប្រើសិនបើពួកគេរាប់ដើមឈើ ដែលលោកបានដាំឱ្យអស់រយៈពេល១ឆ្នាំ។
អ្នកនាំពាក្យក្រសួងបរិស្ថាន លោក ខ្វៃ អាទិត្យាបានឱ្យដឹងថា ការផាកពិន័យនេះគឺជាការចាត់វិធានការច្បាប់ដោយមិនលើកលែងចំពោះក្រុមហ៊ុន រោងចក្រ ឬសហគ្រាស ដែលបានបង្កផលប៉ះពាល់ដល់បរិស្ថាន។ ក្រសួងក៏កំពុងតែជំរុញការងារបំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យ នៃការបញ្ចេញឬបង្ហូរសំណល់ផងដែរ។
លោកបញ្ជាក់ថា៖«អញ្ជឹងយើងកំពុងតែជំរុញឱ្យរោងចក្រ សហគ្រាស ដែលមានសក្តានុពលបំពុលនោះ គឺគោរពទៅតាមច្បាប់ជាធរមាន និងក្រមបរិស្ថាន។ យើងឱ្យបំពាក់ឧបករណ៍ហ្នឹង ដើម្បីកាត់បន្ថយការបញ្ចេញជាតិពុលដល់សហគមន៍ តាមប្រភពទឹកស្អាត។ យើងអាចត្រួតពិនិត្យការបំពុលនេះបានពីក្រសួង និងងាយស្រួលដល់អន្តរាគមន៍។មិនបាច់ឱ្យមកធ្វើរបាយការណ៍រាយការណ៍មកទេ ហើយកាត់បន្ថយការធ្វើអធិការកិច្ច ពេលវេលាហើយនឹងថវិការបស់ពួកគាត់ថែមទៀត»។
លោកបានឱ្យដឹងថា ក្រសួងបានរកឃើញរោងចក្រ ឬសហគ្រាសជាង១២០ ដែលត្រូវបំពាក់ឧបករណ៍នេះ។ ក្នុងនោះ រោងចក្រ ឬសហគ្រាសជិត២០ហើយបានបំពាក់រួចរាល់ ហើយទីតាំងផ្សេងៗទៀតនឹងត្រូវបំពាក់ដូចគ្នានេះដែរជាបន្តបន្ទាប់៕
