គណៈកម្មការថ្នាក់ជាតិបដិសេធការស្នើបន្ធូរបន្ថយទោសរបស់ទណ្ឌិត ២៨១នាក់ក្នុងកិច្ចប្រជុំដើម្បីពិនិត្យ និងវាយតម្លៃបញ្ជីឈ្មោះទណ្ឌិតដែលស្នើសុំបន្ធូរបន្ថយទោស និងលើកលែងទោស ក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូកកាលពីថ្ងៃទី៥ ខែវិច្ឆិកា។ រូបថត ភ្នំពេញប៉ុស្តិ៍
គណៈកម្មការថ្នាក់ជាតិ បានបដិសេធសំណើសុំលើកលែងទោសនិងបន្ធូរបន្ថយទោសរបស់ទណ្ឌិតចំនួន ២៨១នាក់ ក្នុងចំណោមអ្នកស្នើសុំ ៦៧១ នាក់ដោយសារពួកបានប្រព្រឹត្តបទល្មើសឧក្រិដ្ឋកម្មធ្ងន់ធ្ងរ និងសាហាវឃោរឃៅ។
ការសម្រេចនេះធ្វើឡើងក្នុងកិច្ចប្រជុំដើម្បីពិនិត្យ និងវាយតម្លៃបញ្ជីឈ្មោះទណ្ឌិតដែលស្នើសុំបន្ធូរបន្ថយទោស និងលើកលែងទោស ក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូក ដឹកនាំដោយលោក កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិ ពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោសនិងលើកលែងទោស កាលពីថ្ងៃទី៥ ខែវិច្ឆិកា។
បើតាមក្រសួងយុត្តិធម៌ ទណ្ឌិតទាំង ២៨១នាក់ ដែលត្រូវបានបដិសេធការបន្ធូរបន្ថយនិងលើកលែងទោស ជាប់ពាក់ព័ន្ធនឹងបទល្មើសគ្រឿងញៀន, ករណីក្មេងទំនើង, ករណីឃាតកម្ម, ករណីជួញដូរមនុស្ស, ករណីរំលោភសេពសន្ថវៈលើអនីតិជន និង ករណីឪពុក ឬជីតារំលោភសេពសន្ថវៈលើកូន ឬចៅរបស់ខ្លួន ជាដើម។
ការស្នើសុំបន្ធូរបន្ថយទោសរបស់ទណ្ឌិតទាំង ៦៧១ ទទួលមកពីពន្ធនាគាររាជធានី ខេត្ត ចំនួន ២២, មណ្ឌលអប់រំកែប្រែចំនួន ៤ និងមណ្ឌលយុវនីតិសម្បទា ដែលក្នុងនោះស្ត្រី ៥៩នាក់។
មានទណ្ឌិតតែម្នាក់ទេដែលនឹងអាចទទួលបានការលើកលែងទោសក្នុងចំណោមទណ្ឌិតទាំង ៣៩០នាក់ដែលអាចទទួលបានការលើកលែង ឬបន្ធូរបន្ថយទោស ក្នុងនោះ ៣០៤នាក់ អាចទទួលការបន្ថយទោសរយៈពេល ៣ខែ, ៨១ នាក់ អាចទទួលការបន្ថយទោសរយៈពេល ៦ខែ, និង ៤នាក់ អាចទទួលការបន្ថយទោសរយៈពេល ៩ខែ។
យោងតាមព្រះរាជក្រឹត្យឆ្នាំ២០២១ ស្ដីពីការបន្ធូរបន្ថយទោសនិងលើកលែងទោស ទណ្ឌិតដែលទទួលបានការបន្ធូរបន្ថយ ឬលើកលែងទោសត្រូវតែជាទណ្ឌិតដែលបានកែប្រែគំនិតមារយាទ និងគោរពតាមបទបញ្ជាផ្ទៃក្នុងពន្ធនាគារ និងជាគំរូដល់ទណ្ឌិតដទៃ និងលក្ខខណ្ឌមួយចំនួនទៀត។
ទណ្ឌិតចាស់ជរា ស្ត្រីមានផ្ទៃពោះ អ្នកមានជំងឺរ៉ាំរ៉ៃ ឬ មានវិបល្លាសស្មារតីឬពិការភាព មានសិទ្ធិស្នើសុំលើកលែង ឬបន្ធូរបន្ថយទោស។ ការស្នើសុំត្រូវដាក់តាមរយៈប្រធានពន្ធនាគារ ដែលនឹងបញ្ជូនទៅគណៈកម្មការថ្នាក់ជាតិដើម្បីពិនិត្យនិងសម្រេច មុននឹងនាយករដ្ឋមន្ត្រី ថ្វាយសំណើរទៅព្រះមហាក្សត្រ។
បើតាមព្រះរាជក្រឹត្យដដែល ការស្នើសុំលើកលែង ឬបន្ធូរបន្ថយទោស អាចស្នើសុំបានគ្រប់បទល្មើសទាំងធ្ងន់និងស្រាល ក្នុងករណីដែលទណ្ឌិតរូបនោះបានអនុវត្ត ១ភាគ៣នៃទោសកំណត់។ ចំណែកអ្នកជាប់ទោសមួយជីវិតត្រូវអនុវត្តទោសឲ្យបាន ១០ឆ្នាំជាមុនសិន មុនពេលស្នើសុំបន្ធូរបន្ថយ ដែលការស្នើសុំលើកទី១ អាចត្រូវបានបន្ថយមកនៅត្រឹម ៣០ឆ្នាំ។
យ៉ាងណាក៏ដោយ កាលពីកន្លងឆ្នាំកន្លងទៅ ប្រមុខដឹកនាំរាជរដ្ឋាភិបាលបានណែនាំទៅគណៈកម្មការកុំឲ្យមានការបន្ធូរបន្ថយទោសឬលើកលែងទោសសម្រាប់អ្នកប្រព្រឹត្តបទល្មើសធ្ងន់ធ្ងរ និងសាហាវឃោរឃៅ។
លោក អំ សំអាត នាយកកិច្ចការទូទៅនៃអង្គការលីកាដូ បានថ្លែងថា លោកសង្កេតឃើញថា ការលើកលែងទោស និងបន្ធូរបន្ថយទោសត្រូវបានរឹតបន្តឹងបន្ទាប់ពីរដ្ឋាភិបាលបានឆ្លើយតបទៅនឹងការរិះគន់អំពីការបន្ធូរបន្ថយសម្រាប់អ្នកប្រព្រឹត្តបទល្មើសធ្ងន់ធ្ងរ។
លោកថ្លែងថា៖ «ខ្ញុំមើលឃើញថា ចាប់តាំងពីប្រតិកម្មរបស់ប្រមុខរដ្ឋាភិបាលកាលពីប៉ុន្មានឆ្នាំមុនមក ការស្នើសុំបន្ធូរបន្ថយ និងលើកលែងទោស បានធ្លាក់ចុះមកនៅកម្រិតទាប នៅក្នុងការសម្រេចចុងក្រោយមុននឹងថ្វាយព្រះមហាក្សត្រដើម្បីសម្រេចលើលែងទោសឬបន្ធូរបន្ថយទោស»។
លោក សំអាត បានថ្លែងថា សម្រាប់ករណីពិសេសណាមួយ ប្រមុខរាជរដ្ឋាភិបាលមានសិទ្ធិស្នើសុំលើកលែងទោសឬបន្ធូរបន្ថយទោស ដើម្បីជាដំណោះស្រាយផ្នែកនយោបាយ ឬដើម្បីកិច្ចសហប្រតិបត្តិការណាមួយក្នុងករណីពាក់ព័ន្ធនឹងជនបរទេស។
យ៉ាងណាក៏ដោយលោកថា ក្រុមគ្រួសាររបស់សកម្មជនគណបក្សប្រឆាំង បានលើកឡើងថា សាច់ញាតិរបស់ពួកគេដែលជាប់ពន្ធនាគារនៅតែមិនមានឈ្មោះនៅក្នុងបញ្ជីបន្ធូរបន្ថយទោស ឬលើកលែងទោសដដែល៕
