សត្វឆ្កែ ២២៩ ៤៨៨ ក្បាល ត្រូវបានចាក់វ៉ាក់សាំងប្រឆាំងនឹងជំងឺឆ្កែឆ្កួតក្នុងអំឡុងពេលយុទ្ធនាការរយៈពេលពីរអាទិត្យ។ រូបថត សហការី
ភ្នំពេញ៖ សត្វសុនខ (ឆ្កែ) ២២៩ ៤៨៨ ក្បាល ត្រូវបានចាក់វ៉ាក់សាំងប្រឆាំងនឹងជំងឺឆ្កែឆ្កួតក្នុងអំឡុងពេលយុទ្ធនាការរយៈពេលពីរសប្តាហ៍កន្លងទៅ។
យុទ្ធនាការដ៏ធំមួយនេះត្រូវបានដឹកនាំដោយអង្គការសប្បុរសធម៌ផ្តល់សេវាបសុពេទ្យអន្តរជាតិចក្រភពអង់គ្លេស Worldwide Veterinary Service (WVS) ជាផ្នែកមួយនៃគម្រោង Mission Rabies ជាមួយនឹងអគ្គនាយកដ្ឋានសុខភាពសត្វ និងផលិតកម្មសត្វ (GDAHP) និងអង្គការសង្គ្រោះសត្វកម្ពុជា។
ក្រុមចាក់វ៉ាក់សាំង ២៨៧ក្រុម បានធ្វើការនៅក្នុងរាជធានីភ្នំពេញ ខេត្ដកណ្តាល និងខេត្ដបាត់ដំបង ក្នុងកិច្ចខិតខំប្រឹងប្រែងរួមគ្នាដើម្បីការពារអាយុ ជីវិតមនុស្ស និងសត្វ។
យុទ្ធនាការដែលបានធ្វើឡើងចាប់ពីថ្ងៃទី ២១ ខែតុលា ដល់ថ្ងៃទី ៤ ខែវិច្ឆិកា រួមបញ្ចូលជាមួយ «ផែនការយុទ្ធសាស្ត្រជាតិសម្រាប់ការគ្រប់គ្រង និងលុបបំបាត់ជំងឺឆ្កែឆ្កួត» របស់ប្រទេសកម្ពុជា ដែលស្ថិតក្នុងដំណើរការអនុម័តដោយភាគីពាក់ព័ន្ធរបស់រដ្ឋាភិបាល ដែលមាន WVS ជាទីប្រឹក្សានាំមុខគេ។
វេជ្ជបណ្ឌិត Amy Nicole Lewis អ្នកគ្រប់គ្រងគម្រោងអន្តរជាតិផ្តល់សេវាបសុពេទ្យទូទាំងពិភពលោក បានថ្លែងថា៖ «កង្វះការយល់ដឹងអំពីជំងឺដ៏កាចសាហាវនេះ មានន័យថា អ្នកត្រូវបានឆ្កែខាំជាច្រើនមិនបានទទួលការព្យាបាលក្រោយត្រូវបានឆ្កែខាំដែលយឺតពេល។ នោះធ្វើឱ្យពួកគេមិនមានឱកាសរស់រានមានជីវិតនៅពេលដែលមានរោគសញ្ញាលេចឡើង»។
វេជ្ជបណ្ឌិត Lewis បានបន្ដថា៖ «ជាអកុសល កុមារងាយរងគ្រោះនឹងជំងឺឆ្កែឆ្កួត ដោយសារពួកគេមិនសូវស្គាល់សញ្ញានៃជំងឺឆ្កែឆ្កួតនៅក្នុងសត្វសុនខ ហើយភាគច្រើនពួកគេទំនងជាមានទំនាក់ទំនងជាមួយ ឬថែទាំសត្វសុនខទាំងនេះ»។
អ្នកជំនាញវេជ្ជសាស្ដ្ររូបនេះ បានឱ្យដឹងថា ដើម្បីសម្រេចឱ្យបាននូវនៃការជោគជ័យនេះ ក្រុមការងារត្រូវធ្វើយុទ្ធនាការចាក់វ៉ាក់សាំងគ្របដណ្តប់យ៉ាងហោចណាស់ ៧០ ភាគរយនៃការចាក់ថ្នាំបង្ការនៅក្នុងចំណោមឆ្កែទាំងអស់នៅក្នុងតំបន់ដែលរងផលប៉ះពាល់ដោយជំងឺឆ្កែឆ្កួត បង្កើតភាពស៊ាំឱ្យពួកវា ដើម្បីបញ្ឈប់ចម្លងជំងឺនេះទៅមនុស្ស។
វេជ្ជបណ្ឌិតបានបន្ថែមថា៖ «តាមរយៈការចាក់វ៉ាក់សាំងទ្រង់ទ្រាយធំ ការអប់រំ និងការតាមដានជំងឺឆ្កែឆ្កួត យើងអាចការពារជីវិតមនុស្សជាច្រើន និងបញ្ឈប់ជំងឺដ៏កាចសាហាវនេះបានយ៉ាងល្អ»។
យុទ្ធនាការឆ្នាំ ២០២៤ ត្រូវបានធ្វើឡើងបន្តពីឆ្នាំ ២៩២៣ ដែលសត្វឆ្កែ ៧៤ ៩៨៣ ក្បាលត្រូវបានចាក់ថ្នាំបង្ការនៅក្នុងរាជធានីភ្នំពេញ និងខេត្តកណ្តាល ដែលវាជាគម្រោងចាក់វ៉ាក់សាំងការពារជំងឺឆ្កែឆ្កួតដំបូងគេបង្អស់នៅក្នុងប្រទេស។
ក្រុមចាក់វ៉ាក់សាំង ២៨៧ក្រុម បានធ្វើការនៅក្នុងរាជធានីភ្នំពេញ ខេត្ដកណ្តាល និងខេត្ដបាត់ដំបង ក្នុងកិច្ចខិតខំប្រឹងប្រែងរួមគ្នាដើម្បីការពារអាយុ ជីវិតមនុស្ស និងសត្វ។ រូបថត សហការី
យោងតាមអង្គការសុខភាពពិភពលោក ជាង ៩៩ ភាគរយនៃករណីជំងឺឆ្កែឆ្កួតរបស់មនុស្សទាំងអស់ត្រូវបានចម្លងតាមរយៈឆ្កែខាំ។ កុមារដែលមានអាយុក្រោម ១៥ ឆ្នាំគឺងាយរងគ្រោះជាងគេ ហើយនៅក្នុងចំណោមនោះមានចំនួន ៤០ ភាគរយបានបាត់បង់ជីវិតនៅទូទាំងពិភពលោក។
នៅកម្ពុជាគេប៉ាន់ស្មានថា មានមនុស្សប្រហែល ៦០ ម៉ឺននាក់ត្រូវឆ្កែខាំជារៀងរាល់ឆ្នាំ។ ប្រសិនបើជនរងគ្រោះមិនស្វែងរកវិធីបង្ការក្រោយការឆ្កែខាំ ហើយគ្លីនិករកមិនឃើញរោគសញ្ញា ជំងឺនេះអាចឱ្យមនុស្សស្លាប់។
Mission Rabies បានចាប់ផ្តើមធ្វើការនៅក្នុងប្រទេសកម្ពុជាក្នុងឆ្នាំ ២០១៩ ដោយដំណើរការយុទ្ធនាការចាក់វ៉ាក់សាំងសាកល្បង និងចាប់ផ្តើមកម្មវិធី អប់រំនៅក្នុងរាជធានី។
ចាប់តាំងពីពេលនោះមក ក្រុមឃ្លាំមើលពីជំងឺឆ្កែ ២៤ ម៉ោងបានឆ្លើយតបទៅនឹងរបាយការណ៍អំពីសត្វឆ្កែឆ្គួត ហើយត្រូវបានធានាថា បុគ្គលត្រូវបានឆ្កែខាំ ទទួលបានការព្យាបាលភ្លាមៗ។
លេខទូរស័ព្ទទាន់ហេតុការណ៍ពីជំងឺឆ្កែឆ្កួតរបស់ពួកគេអនុញ្ញាតឱ្យសាធារណៈរាយការណ៍ពីការមើលឃើញសត្វដែលមានឆ្កែឆ្គួត និងស្វែងរកការគាំទ្រសម្រាប់ការសង្គ្រោះបន្ទាន់នៃជំងឺឆ្កែឆ្កួត។
លោកវេជ្ជបណ្ឌិត Luke Gamble នាយកប្រតិបត្តិ និងជាស្ថាបនិកនៃសេវាកម្មផ្តល់សេវាបសុពេទ្យទូទាំងពិភពលោក បានថ្លែងថា៖ «នៅពេលពួកយើងចាប់ផ្តើមបេសកកម្មជំងឺឆ្កែឆ្កួតក្នុងឆ្នាំ២០១៣ គោលដៅរបស់យើងគឺត្រូវចាក់វ៉ាក់សាំងដល់សត្វសុនខឱ្យបាន ៦ម៉ឺនក្បាល ក្នុងរយៈពេល ៣០ ថ្ងៃ»។
លោកបានបញ្ជាក់ថា៖ «មនុស្សជាច្រើនគិតថា វាមិនអាចធ្វើទៅរួចនោះទេ ប៉ុន្តែយើងនៅតែអាចធ្វើបានរហូតទៅ ៦៤០០០ក្បាល។ ដប់ឆ្នាំក្រោយមក យើងបញ្ចប់ឆ្នាំទី ២ របស់យើងនៅក្នុងប្រទេសកម្ពុជា ដែលគួរឱ្យកត់សម្គាល់ យើងបានចាក់វ៉ាក់សាំងសុនខជាង ៨២០០០ក្បាលត្រឹម ៤ថ្ងៃដំពុងប៉ុណ្ណោះ»។
លោកបានបន្ដថា សមិទ្ធិផលនេះគឺជាសក្ខីភាពមួយចំពោះការលះបង់ឥតងាករេរបស់ក្រុមការងារ និងជាការគោរពចំពោះវិជ្ជាជីវៈពេទ្យសត្វ ដោយមានពេទ្យសត្វ និងគិលានុបដ្ឋាយិកាមកពីជុំវិញពិភពលោកបានបញ្ចេញថាមពលរបស់ពួកគេក្នុងការធ្វើគម្រោងមួយនេះជោគជ័យបែបនេះ។
អំឡុងពេលនៃគម្រោងរយៈពេល ២សប្តាហ៍នេះ ក្រុមការងារបានធ្វើដំណើរឆ្លងកាត់តំបន់ចាក់ថ្នាំបង្ការពីផ្ទះមួយទៅផ្ទះមួយដើម្បីគ្រប់គ្រងការចាក់វ៉ាក់សាំងឆ្កែឆ្គូតនេះ។ រូបថត សហការី
លោកវេជ្ជបណ្ឌិត Gamble បានឱ្យដឹងថា វាមិនមែនជាការបំផ្លើសទេ ក្នុងការនិយាយថា យុទ្ធនាការនេះនឹងអាចការពារកុមារប្រហែល ៥០០នាក់ពីការស្លាប់ដោយសារជំងឺឆ្កែឆ្កួតក្នុងរយៈពេលប៉ុន្មានឆ្នាំខាងមុខនេះ។
រួមជាមួយនឹងការជំរុញការចាក់វ៉ាក់សាំង កម្មវិធីអប់រំមួយត្រូវបានធ្វើឡើងដើម្បីលើកកម្ពស់ការយល់ដឹងអំពីសារៈសំខាន់នៃការចាក់វ៉ាក់សាំងដល់សត្វឆ្កែ គ្រោះថ្នាក់នៃជំងឺឆ្កែឆ្កួត និងវិធីការពារជំងឺពីជំងឺឆ្កែឆ្គួត។ នេះរួមបញ្ចូលទាំងការអប់រំតាម សាលារៀន កន្លែងធ្វើការ និងទីតាំងសហគមន៍សំខាន់ៗ។
ផ្នែកមួយទៀតនៃយុទ្ធនាការនៅក្នុងឆ្នាំនេះ គឺការផ្តល់សេវាគ្រៀវសត្វសុសុនខដោយឥតគិតថ្លៃ ដែលសេវានេះបានធ្វើឡើងសាកលវិទ្យាល័យភូមិន្ទកសិកម្ម ដោយមានពេទ្យសត្វស្ម័គ្រចិត្តចូលរួមពីជុំវិញពិភពលោក។
សត្វឆ្កែចំនួន ២១២ ក្បាលត្រូវបានក្រៀវក្នុងរយៈពេលពីរសប្តាហ៍ ដោយក្រុមពេទ្យសត្វចល័តក៏បានផ្តល់ការព្យាបាលដល់សត្វឈឺ និងរបួសចំនួន ៥៣៨ ក្បាលផងដែរ ដែលនេះធ្វើឡើងយតាមឆ្លើយតបពីក្រុមចាក់វ៉ាក់សាំងដែលបានស្នើ។
អ្នកស្ម័គ្រចិត្តអន្តរជាតិមកពីប្រទេសជាង ៣០ផ្សេងគ្នា ត្រូវបានបង្កើត និងជាផ្នែកមួយដ៏សំខាន់ នៃក្រុមចាក់វ៉ាក់សាំងនៅតាមមូលដ្ឋាន ហើយនេះរួមបញ្ចូលទាំង ការគាំទ្ររបស់និស្សិតពេទ្យសត្វកម្ពុជាជាង ២១០នាក់។
អំឡុងពេលនៃគម្រោងរយៈពេល ២សប្តាហ៍នេះ ក្រុមការងារបានធ្វើដំណើរឆ្លងកាត់តំបន់ចាក់ថ្នាំបង្ការពីផ្ទះមួយទៅផ្ទះមួយដើម្បីគ្រប់គ្រងការចាក់វ៉ាក់សាំងឆ្កែឆ្គូតនេះ។
កម្មវិធីទួរស័ព្ទឈ្មោះថា “Rabies App” របស់អង្គការសប្បុរសធម៌ ត្រូវបានប្រើដើម្បីផ្តល់តំបន់ដល់ក្រុមចាក់វ៉ាក់សាំង និងដើម្បីបញ្ចូលព័ត៌មាន អំពីសត្វឆ្កែនីមួយៗ ដោយផ្តល់នូវការយល់ដឹងអំពីទិន្នន័យដ៏មានតម្លៃក្នុងការតាមដានដំណើរការរបស់គម្រោង។
ព័ត៌មានបន្ថែមអំពីយុទ្ធនាការ Mission Rabies សូមចូលទៅកាន់វេបសាយ https://cambodia.missionrabies.com/៕
