មន្រ្តីអង្គការកំពុងតែបំបៅកូនដំរី នៅពេលសង្រ្គោះយកចេញពីព្រៃក្នុងដែនជម្រកសត្វព្រៃកែវសីមា
ភ្នំពេញៈ កូនដំរីញី ដែលត្រូវបានសង្រ្គោះពីខេត្តមណ្ឌលគិរីកាលពីសប្តាហ៍មុនមានសុខភាពល្អឡើងវិញ ក្រោយពីត្រូវបានបញ្ជូន យកទៅថែទាំ នៅសួនសត្វភ្នំតាម៉ៅ ហើយនៅថ្ងៃអនាគត អាចនឹងត្រូវបង្កាត់ពូជជាមួយនឹងដំរី ដែលយកមកពីប្រទេសឡាវ
លោកទ្រី ស៊ីថេងមន្រ្តីអង្គការសម្ព័ន្ធមិត្តសត្វព្រៃ (Wildlife Alliance-WA)បានឱ្យដឹងថា កូនដំរីមួយក្បាលនេះកំពុងតែមានសុខភាពល្អឡើងវិញ ហើយថែមទំាងឆាប់ស្គាល់ និងមានការស្និតស្នាលជាមួយនឹងអ្នកមើលថែវាថែមទៀតផង។
លោកបញ្ជាក់ថា៖«សុខភាពល្អ។ ល្អមែនទែនហើយ។ វាមានអាម្មណ៍មួយដូចជា វាឆាប់ស្គាល់ជាមួយនឹងអ្នកថែរក្សា កាន់តែស្អិតស្នាល....»។
កូនដំរី ដែលមានអាយុប្រហែលជា ២ឆ្នាំ និងទម្ងន់ប្រមាណជា ៣០០ គីឡូក្រាមនេះ ត្រូវបានជួយសង្គ្រោះ ពីក្នុងដែនជម្រកសត្វព្រៃកែវសីមា បន្ទាប់ពីត្រូវបានប្រទះឃើញនៅព្រៃជិតចំការរបស់អ្នកភូមិ ស្ថិតនៅភូមិពូត្រុំ សង្កាត់រមនា ក្រុងសែនមនោរម្យ ខេត្តមណ្ឌលគិរីកាលពីសប្តាហ៍មុន។
កូនដំរីព្រៃនេះត្រូវបានប្រទះឃើញនៅដាច់ពីហ្វូងប្រហែលជិតពីសប្តាហ៍ គិតត្រឹមថ្ងៃ ដែលត្រូវបានជួយសង្គ្រោះ នាថ្ងៃទី២ ខែវិឆ្ឆិកានេះ។ ក្រោយទទួលបានដំណឹងនេះ ក្រុមការងារអង្គការសមាគមអភិរក្សសត្វព្រៃ (WCS Cambodia) បានចុះទៅពិនិត្យ និងតាមដានស្ថានភាពរបស់វា។
អង្គការ WCS បានបញ្ជាក់ថា៖«ដោយកូនដំរីមានស្ថានភាពស្គម និងបាក់ទឹកដោះ ក្រុមការងារអង្គការ WCS បានសហការជាមួយក្រុមការងារអង្គការ WWF, WA ក្នុងការផ្តល់ចំណី និងទឹកដោះគោ ដើម្បីអាចឱ្យកូនដំរីនេះមានកំលាំង និងអាហារគ្រប់គ្រាន់..ដំរីវ័យនេះ គឺត្រូវទទួលបានការបំបៅ និងបណ្តើរដោយមេដំរី»។
អង្គការបានលើកឡើងថា ករណី ដែលកូនដំរីនេះត្រូវបានទុកឱ្យនៅតែឯងបែបនេះ គឺជាករណីកម្រ។ ហេតុនេះ ក្រុមការងារបានបន្តរង់ចាំពិនិត្យមើលពីចំងាយ ក្រែងមានហ្វូងដំរីមករកកូនដំរីនេះទៅវិញ។ ប៉ុន្តែ ក្រោយពីរង់ចាំអស់រយៈពេល ៤ថ្ងៃនៅក្នុងព្រៃរួចមក ក្រុមការងារពាក់ព័ន្ធបានពិភាក្សា និងសម្រេចថាមិនអាចបន្តទុកកូនដំរីនេះឱ្យនៅតែឯង ដោយមិនមានមេនៅជិតបន្តទៀតបានទេ។ ហេតុដូចនេះ ក្រុមការងារស្រាវជ្រាវជីវចម្រុះ នៃអង្គការ WCS បានទាក់ទងទៅក្រុមការងារសង្គ្រោះសត្វព្រៃ នៃមជ្ឃមណ្ឌលសង្គ្រោះសត្វព្រៃភ្នំតាម៉ៅ ដើម្បីធ្វើការសង្គ្រោះកូនដំរីនេះ និងបញ្ជូនទៅសួនសត្វនេះ ដើម្បីធ្វើការបំប៉ន និងមើលថែរក្សា។
សកម្មភាពសង្គ្រោះកូនដំរីនេះត្រូវបានធ្វើឡើងរយៈពេល ២ថ្ងៃ គឺចាប់ពីថ្ងៃទី២ ដល់ថ្ងៃទី៣ ខែវិច្ឆិកា ដោយមានការចូលរួមសហការពី អង្គការ WCS អង្គការWWF អង្គការ WA រដ្ឋបាលព្រៃឈើ ក្រុមការងារសង្គ្រោះសត្វព្រៃនៃមជ្ឃមណ្ឌលសង្គ្រោះសត្វព្រៃភ្នំតាម៉ៅ មន្ទីរបរិស្ថានខេត្តមណ្ឌលគិរី មន្ត្រីឧទ្យានុរក្សនៃដែនជម្រកសត្វព្រៃកែវសីមា និងដែនជម្រកសត្វព្រៃភ្នំព្រិច សហគមន៍ល្បាត និងប្រជាសហគមន៍មូលដ្ឋានប្រមាណជិត ៣០នាក់។
ក្រោមកិច្ចសហការពីគ្រប់ភាគីពាក់ព័ន្ធ កូនដំរីព្រៃមួយក្បាលនេះត្រូវបានសង្គ្រោះដោយជោគជ័យ និងបញ្ជូនមកដល់ឧទ្យានសួនសត្វភ្នំតាម៉ៅ ដោយសុវត្ថិភាពនាល្ងាចថ្ងៃទី៣ ខែវិច្ឆិកានេះ។
លោកស៊ីថេងបានយល់ឃើញថា ក្រុមហ្វូងដំរីនេះអាចនឹងផ្អើល ដោយសារតែហេតុការណ៍អ្វីមួយ ដែលធ្វើឱ្យមេ រត់ចោលកូនបែបនេះ ក្រោយពីហ្វូងដំរីនោះចូលទៅតំបន់នោះ។
លោកបានឱ្យដឹងថា កិច្ចប្រជុំមួយត្រូវបានធ្វើឡើង ដើម្បីពិភាក្សាពីករណីកូនដំរីនេះ ហើយអ្នកខ្លះចង់យកកូនដំរីនេះទៅប្រលែងឱ្យនៅជាមួយមេ ឬក្រុមហ្វូងវាវិញ។ ប៉ុន្តែសត្វដំរី កាលណាវាបែកពីហ្វូងហើយ គេមិនអាចដាក់ឱ្យចូលរស់នៅជាមួយហ្វូងវិញបានទេ ដោយសារតែសត្វក្នុងហ្វូងនោះនឹងព័ទ្ធជាន់ ឬបុកសម្លាប់ចោលតែម្តង។
លោកបញ្ជាក់ថា៖«ចំពោះគំនិតរបស់យើងគឺអត់មានការដោះលែងវិញទេ។ និយាយឱ្យចាំទៅ គឺថែរក្សាវានៅភ្នំតាម៉ៅនេះ។ ថ្ងៃក្រោយ ខ្ញុំគិតថា យើងនឹងអាចរៀបចំឱ្យមានការបង្កាត់ពូជជាមួយនឹងដំរីយកមកពីប្រទេសឡាវ ដោយសារតែអាយុវាលើសគ្នាតិចតួច»។
លោកបានបន្ថែមថា នាពេលបច្ចុប្បន្ននេះ សួនសត្វភ្នំតាម៉ៅមានដំរីចំនួន៧ក្បាលហើយ។
ប្រទេសឡាវបានប្រគល់ដំរីញីមួយក្បាល និងឈ្មោលមួយក្បាលដល់ប្រទេសកម្ពុជា ដើម្បីជានិមិត្តរូបនៃចំណងសាមគ្គីភាពរវាងប្រទេសទាំងពីរកាលពីខែឧសភា ឆ្នាំ២០២៤៕
