កម្លាំងចម្រុះកំពុងប្រើប្រាស់គ្រឿងចក្រ កាយលុបទីតាំង ធ្វើអាជីវកម្មរ៉ែមាសអាណាធិបតេយ្យ នៅតំបន់មេសំ ស្ថិតក្នុងខេត្តមណ្ឌលគិរី ដែលមានទាំងការប្រើសារធាតុគីមី និងគ្រឿងផ្ទុះ។ រូបថតៈ រដ្ឋបាលខេត្តមណ្ឌលគិរី
មណ្ឌលគិរីៈ ទីតាំងធ្វើអាជីវកម្មរ៉ែមាសខុសច្បាប់ ប្រមាណជា១០០កន្លែង ស្ថិតនៅតំបន់មេសំ ភូមិពូទុងឃុំចុងផ្លាស់ ស្រុកកែវសីមា ត្រូវបានកម្លាំងចម្រុះធ្វើការបង្រ្កាប ដើម្បីលុបបំបាត់សកម្មភាពអនាធិបតេយ្យ ដែលរួមទាំងមានការប្រើប្រាស់សារធាតុគីមី និងគ្រឿងផ្ទុះផងដែរ។
ការបង្រ្កាបនេះត្រូវបានធ្វើឡើងដោយកម្លាំងចម្រុះជាង៥០រូប ដែលរួមមាន ក្រុមការងាររដ្ឋបាលខេត្ត ដឹកនាំដោយលោកឈិត សុផល នាយករងរដ្ឋបាលសាលាខេត្ត ព្រះរាជអាជ្ញាអមសាលាដំបូងខេត្ត ក្រសួងរ៉ែ និងថាមពល អង្គភាពប្រឆាំងអំពើពុករលួយ កងកម្លាំងប្រដាប់អាវុធទាំងបីរបស់ខេត្ត អាជ្ញាធរមូលដ្ឋាន និងមន្ទីរពាក់ព័ន្ធផ្សេងៗទៀត។ កម្លាំងចម្រុះក៏មានប្រើប្រាស់គ្រឿងចក្រជាច្រើនគ្រឿង ដើម្បីវាយកំទេច កាយលុបរណ្តៅរ៉ែអាណាធិបតេយ្យ និងរុះរើរោងផងដែរ។
លោកឈិត សុផលបានបញ្ជាក់ប្រាប់ភ្នំពេញប៉ុស្តិ៍នារសៀលថ្ងៃព្រហស្បតិ៍នេះថា៖«កម្លាំងបានចុះប្រតិបត្តិការ បង្រ្កាបនេះធ្វើតាំងពីថ្ងៃទី៣ [ខែវិច្ឆិកា] មកម៉្លេះ ហើយបានសម្រេច៩៨ភាគរយហើយ។ នៅ២ម៉ោងទៀតចប់ហើយ។ ទីតាំងទាំងអស់មិនទាបជាង១០០ទេ គឺប្រហាក់ប្រហែល១០០ប៉ុណ្ណឹង»។
លោកបន្តថា ក្នុងជំហានដំបូងនេះ អាជ្ញាធរមិនមានការចាប់ឃាត់ខ្លួនអ្នកធ្វើសកម្មភាពអាណាធិបតេយ្យទាំងនោះទេ គឺគ្រាន់តែបោសសំអាត ដើម្បីរៀបចំសណ្តាប់ធ្លាប់ និងបរិស្ថានឡើងវិញ។
លោកមានប្រសាសន៍ដូច្នេះថា៖«គោលការណ៍របស់យើង មិនធ្វើអ្វីឈានដល់ការចាប់ចងនោះទេ។ យើងគ្រាន់តែចង់សំអាតសកម្មភាពអាណាធិបតេយ្យនេះ ព្រោះមានការប្រើប្រាស់សារធាតុអីហ្នឹង វាប៉ះពាល់បរិស្ថាន។ យើងចង់សំអាតទីតាំងហ្នឹង ហើយស្តារបរិស្ថានឡើងវិញ។ រឿងការដាក់ទោសទណ្ឌ យើងមិនទាន់មានគោលការណ៍ទេ»។
លោកបន្ថែមថា ពលរដ្ឋដែលប្រព្រឹត្តសកម្មភាពទាំងនោះមានចម្រុះ ទាំងអ្នកមូលដ្ឋាន និងអ្នកចំណាកស្រុក ហើយពេលដែលកម្លាំងចុះទៅនោះមិនបានឃើញពួកគាត់ទេ។ ពួកគេបានគេចខ្លួនអស់ ព្រោះមានការខ្លាចនឹងម្លាំងអាជ្ញាធរ។ ទោះយ៉ាងណា កម្លាំងចម្រុះមិនបានបង្កការប៉ះពាល់ដល់ផ្ទះសម្បែងរបស់ពួកគាត់នោះទេ គឺធ្វើការបោសសម្អាតតែទីតាំងអាណាធិបតេយ្យតែប៉ុណ្ណោះ។
នៅមុនពេលចុះប្រតិបត្តិការបង្រ្កាបនេះ កិច្ចប្រជុំមួយត្រូវបានធ្វើឡើង នាថ្ងៃទី១ ខែវិច្ឆិកានេះ។ ដោយយោងទៅតាមស្មារតីនៃកិច្ចប្រជុំនេះ រដ្ឋបាលខេត្តមណ្ឌលគិរីនៅថ្ងៃទី៤ វិច្ឆិកាបានជូនដំណឹងដល់ពលរដ្ឋថា ក្រុមការងារចម្រុះ ចុះអនុវត្ត វិធានការច្បាប់ជាធរមាន ដោយគ្មានការលើកលែង ចំពោះប្រជាពលរដ្ឋ ដែលបាន និងកំពុងពាក់ ព័ន្ធនឹងការប្រកបរបរធ្វើរ៉ែមាសតាមរូបភាពផ្សេងៗ។
ក្នុងនោះមានដូចជា កកាយ ចោះ កាត់បំផ្លាញបេតុងគំរបរណ្តៅរ៉ែ ជីក កិន រែង ប្រមូលកាកសំណល់ និងរ៉ែ គ្រប់ប្រភេទតាមគ្រប់រូបភាព។
រដ្ឋបាលខេត្តបានណែនាំឱ្យពលរដ្ឋទាំងនោះ បញ្ឈប់គ្រប់សកម្មភាពជាបន្ទាន់ និងធ្វើការ រុះរើ ប្រមូលសម្ភារៈទាំងឡាយណា ដែលមិនបំរើឱ្យបទល្មើរ៉ែមាស ដោយខ្លួនឯងផ្ទាល់ តាមដែលអាចធ្វើទៅបាន។
រដ្ឋបាលខេត្តបញ្ជាក់ថា៖«ក្នុងករណីមិនព្រមអនុវត្ត ក្រុមការងារនឹងយកឧបករណ៍ កំលាំងចុះរុះរើ សំអាត ដើម្បីលុបបំបាត់សកម្មភាពអនាធិបតេយ្យរ៉ែមាស ដែលបានប្រើប្រាស់សារធាតុគីមី គ្រឿងសារធាតុផ្ទុះ បង្កគ្រោះថ្នាក់ដល់សុខភាព មនុស្ស សត្វ និងបរិស្ថានយ៉ាងធ្ងន់ធ្ងរ នៅក្នុងទីតាំងទាំងនេះ»។
រដ្ឋបាលខេត្តបានលើកឡើងថា ក្រុមការងារមិនអនុគ្រោះ មិនលើកលែង ចំពោះបុគ្គលបានប្រព្រឹត្តប៉ះពាល់លើទីតាំងរណ្តៅ ដែលបានចាក់បេតុងបិទគំរប និងទីតាំងហាមឃាត់ផ្សេងៗទៀត ព្រោះវាបានរំលោភបំពានគោលការណ៍ វិធាន និងច្បាប់ ក៏ដូចជាការណែនាំរបស់រដ្ឋបាលខេត្តកន្លងមក ដើម្បីកែប្រែតំបន់នេះឱ្យមានបរិស្ថាន ប្រសើរឡើងវិញ៕
