កូនត្រី ដែលត្រូវបានសង្រ្គោះពីបទល្មើសនេសាទ និងព្រលែងចូលទៅក្នុងទីជម្រកធម្មជាតិវិញ ក្នុងរដូវបិទនេសាទ ក្នុងឆ្នាំ២០២៤នេះ។ រូបថតៈ ក្រសួងកសិកម្ម
ភ្នំពេញៈ កូនត្រីចម្រុះប្រមាណ ១០០លានក្បាល ត្រូវបានសង្រ្គោះពីបទល្មើសនេសាទ និងព្រលែងចូលទៅក្នុងទីជម្រកធម្មជាតិវិញ ក្នុងរយៈពេល ៥ខែនៃរដូវបិទនេសាទ ដែលធ្វើឱ្យបរិមាណត្រីចាប់ផ្តើមកើនឡើងវិញ។ នេះបើយោងតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី៧ ខែវិច្ឆិកានេះ។
ក្រសួងកសិកម្មបានឱ្យដឹងថា ក្នុងរដូវបិទនេសាទ ចាប់ពីថ្ងៃទី១ ខែមិថុនា ដល់ថ្ងៃទី៣១ ខែតុលា ឆ្នាំ២០២៤នេះ រដ្ឋបាលជលផល និងកម្លាំងអន្តរាគមន៍ថ្នាក់ជាតិ ដោយមាន ការចូលរួមពីគណៈបញ្ជាការឯកភាពខេត្ត ស្រុក និងសមត្ថកិច្ចពាក់ព័ន្ធបានទប់ស្កាត់និងបង្ក្រាបបទល្មើសជលផលទូទាំងប្រទេស។
ក្រសួងបញ្ជាក់ថា៖«ការទប់ស្កាត់ និងបង្ក្រាបបទល្មើសជលផល សម្រេចបានលទ្ធផលសរុប ១ ៥០៦ករណី។ ក្នុងនោះ រឹបអូស និងបំផ្លាញចោលវត្ថុតាងបាន ១ ៤១០ករណី បញ្ជូនទៅតុលាការ ៥៦ករណី ជនល្មើសជាប់ពន្ធនាគារ ១៥នាក់ និង ពិន័យអន្តរការណ៍ ៤០ករណី ស្មើទឹកប្រាក់ពិន័យ ១៦១ ៦៩១ ០០០ រៀលគត់»។
វត្ថុតាងបទល្មើសសំខាន់ៗដែលត្រូវបាន រឹបអូស និងបំផ្លាញចោលរួមមាន៖ របាំងស្បៃមុង និងសាច់អួនប្រវែងជាង៧៩ម៉ឺនម៉ែត្រ ឧបករណ៍ឆក់ត្រីចំនួន ៤៥៩គ្រឿង ក្នុងនោះ តាមរយៈការស្ម័គ្រចិត្តប្រគល់ចំនួន ១៦៥គ្រឿង និងអួនអូសទឹកសាប និងអួនហ៊ុម ១០៦វង់។
ក្រៅពីនោះ កម្លាំងចម្រុះក៏បានបង្ក្រាបទីតាំងផលិត ចែកចាយឧបករណ៍ឆក់បាន៣កន្លែង និងបានចាក់លែងកូនត្រីចម្រុះប្រមាណ ១០០លានក្បាល ស្មើនឹងជាង ៤០តោន ចូលទៅក្នុងដែនទឹកធម្មជាតិវិញផងដែរ។
សេចក្តីប្រកាសសរសេរថា៖«តាមរយៈសមិទ្ធផលនេះ បរិមាណត្រីក្នុងធម្មជាតិចាប់ផ្តើមកើនឡើងគួរកត់សម្គាល់។ ទន្ទឹមនេះ សត្វផ្សោត ទន្លេមេគង្គក៏មានការកើនឡើងផងដែរ គឺពី ៩០ក្បាល នៅឆ្នាំ២០២២ ដល់ ១០៤ក្បាល គិតត្រឹមខែតុលាឆ្នាំ២០២៤»។
ក្រសួងបានលើកឡើងថា ការកើនឡើងនូវធនធានជលផលនេះក៏ជាលទ្ធផលនៃការចូលរួមពីប្រជានេសាទនិងអ្នកពាក់ព័ន្ធនានា ដែលបានសហការ ផ្តល់ព័ត៌មាន ទប់ស្កាត់ និងបង្ក្រាបបទល្មើសនេសាទ ព្រមទាំងលែងប្រភេទវារីសត្វកម្រ ត្រីមេពូជចូលទៅក្នុងដែនទឹក ធម្មជាតិវិញ ដើម្បីថែរក្សាធនធានជលផលឱ្យបានគង់វង្ស។
ក្នុងពេលដែល មន្រ្តីក្រសួងកសិកម្មកំពុងតែដឹកនាំបង្រ្កាបបទល្មើសនោះ អ្នកនាំពាក្យក្រសួងកសិកម្ម លោកឃឹម ហ្វីណង់បានប្រាប់ភ្នំពេញប៉ុស្តិ៍ថា ការបង្រ្កាបបទល្មើសនេសាទបាននឹងកំពុងតែធ្វើឡើងជាប្រចាំ ជាពិសេសគឺក្នុងរយៈពេល២ឆ្នាំចុងក្រោយនេះ។
មន្រ្តី និងប្រជានេសាទព្រលែងត្រីរាជមួយក្បាល ទម្ងន់ ២៦គីឡូក្រាមចូលទៅក្នុងជម្រកធម្មជាតិវិញក្នុងខេត្តពោធិ៍សាត់ ក្រោយពីនេសាទបាន។ រូបថតៈ មន្ទីរកសិកម្មខេត្តពោធិ៍សាត់។
លោកមានប្រសាសន៍ថា៖«យើងបានបង្រ្កាបច្រើនមែនទែន ដែលជាលទ្ធផលឃើញថា ទិន្នផលត្រីក្នុងបឹងទន្លេសាបមានការកើនឡើង។ ភាគច្រើនបានមកពីការបង្រ្កាបឧបករណ៍ឆក់ ឧបករណ៍ខុសច្បាប់ ក៏ដូចជាការនេសាទនៅក្នុងរដូវបិទនេសាទនេះឯង...ការងារនេះយើងបានធ្វើពីរឆ្នាំរួចមកហើយ មិនមែនទើបតែពេលនេះទេ។ ជារួមយើងបានលទ្ធផលល្អ ដោយសារតែការរឹតបន្តឹងការនេសាទខុសច្បាប់ហ្នឹង»។
ក្រសួងបានលើកទឹកចិត្ត ឱ្យប្រជាពលរដ្ឋបន្តចូលរួមថែរក្សា ការពារ និងអភិរក្សធនធានជលផលដែលជាសម្បត្តិធម្មជាតិដ៏មានតម្លៃ។ បន្ថែមពីនោះ ក៏បានអំពាវនាវដល់ប្រជាពលរដ្ឋ សហការផ្តល់ព័ត៌មានដល់មន្ត្រីជលផលឱ្យបានទាន់ពេលវេលា នៅពេលប្រទះឃើញបទល្មើសនេសាទ។
ក្រសួងបញ្ជាក់ថា៖«ការថែរក្សា ការពារ និងអភិរក្សធនធានជលផល ធ្វើឡើងដើម្បីធានានូវនិរន្តរភាពធនធានជលផលក្នុងធម្មជាតិ និងនិរន្តរភាពស្បៀងសម្រាប់ប្រជាជនកម្ពុជា។ មិនត្រឹមតែប៉ុណ្ណោះ វាក៏រួមចំណែកលើកកម្ពស់កិត្យានុភាពរបស់កម្ពុជា នៅលើឆាកអន្តរជាតិក្នុងការងារអភិរក្សធនធានជលផលដ៏កម្រ ដែលសឹងតែបាត់បង់ ឬបានបាត់បង់រួចទៅហើយនៅ ប្រទេសមួយចំនួនលើសកលលោក»។
រដ្ឋបាលជលផល នៃក្រសួងកសិកម្ម នាថ្ងៃទី១ ខែវិច្ឆិកា សប្តាហ៍មុន ក៏បានអំពាវនាវដល់អាជីវករ និងប្រជានេសាទ ដោយដាយត្រី ឱ្យដោះលែង ឬធ្វើចក្តីរាយការណ៍ផងដែរ នៅពេលប្រទះឃើញ ប្រភេទត្រី ដែលកំពុងរងគ្រោះថ្នាក់ ជិតផុតពូជ ឬប្រភេទត្រីកម្រៗ។
បន្ទាប់ពីមានការអំពាវនាវនេះ បុរសជាប្រជានេសាទម្នាក់ឈ្មោះ ស៊ិន ចាន់សាត រស់នៅឃុំកំពង់លួង ស្រុកក្រគរ ខេត្ដពោធិ៍សាត់ បានធ្វើការព្រលែង ត្រីរាជមួយក្បាល ទម្ងន់ ២៦គីឡូក្រាម ដែលជាប្រភេទត្រីកម្រជិតផុតពូជ ចូលទៅកន្លែងអភិរក្សជលផលកំពង់ប្រាក់វិញ នាថ្ងៃទី៣ ខែវិច្ឆិកានេះ។ នេះបើយោងតាមមន្ទីរកសិកម្មខេត្តពោធិ៍សាត់៕
