ក្មេងៗនៅភូមិអូររូងជាង៣០នាក់ ទទួលបានឱកាសចូលរួមហ្វឹកហាត់បាល់ទាត់ជាមួយអង្គការ HFCA ដែលជាកម្មវិធីទទួលបានការគាំទ្រពីធនាគារ វីង។ រូបថត HFCA
ធនាគារ វីង បានបន្តសហការជាមួយអង្គការបាល់ទាត់រីករាយកម្ពុជា-អូស្ត្រាលី (HFCA) ដើម្បីគាំទ្រកម្មវិធីបាល់ទាត់យុវជននៅក្នុងខេត្តសៀមរាប ដោយកិច្ចសហការនេះបានឆ្លុះបញ្ចាំងពីការប្តេជ្ញាចិត្តរួមគ្នា ក្នុងការជួយទៅដល់យុវជនក្រីក្រឱ្យមានលទ្ធភាពចូលរួមក្នុងសកម្មភាពបាល់ទាត់ ដែលមានរចនាសម្ព័ន្ធសមរម្យមួយ ដើម្បីលើកកម្ពស់កាយសម្បទា ការងារជាក្រុម និងការអភិវឌ្ឍផ្ទាល់ខ្លួនរបស់ពួកគេបានកាន់តែប្រសើរ។
ស្ថាបនិកអង្គការ HFCA លោក Paraic Grogan បានឱ្យដឹងថា ការបន្តគាំទ្ររបស់ធនាគារ វីង លើកនេះ គឺផ្តោតទៅលើកម្មវិធីបាល់ទាត់យុវជននៅភូមិអូររូង ក្នុងខេត្តសៀមរាប បន្ទាប់ពី HFCA និង វីង ទទួលបានលទ្ធផលជាផ្លែផ្កា សម្រាប់ការចាប់ដៃសហការគ្នាជាលើកដំបូង កាលពីខែវិច្ឆិកា ឆ្នាំ២០២២ ដើម្បីជួយគាំទ្រដល់យុវជន នៅភូមិស្រះស្រង់ ដោយផ្តល់នូវបរិយាកាសដែលមានសុវត្ថិភាពសម្រាប់សកម្មភាពកីឡាបាល់ទាត់។
លោក Paraic បានបន្ថែមថា ការបន្តគាំទ្ររបស់ធនាគារ វីង លើកនេះ ជាកិច្ចការដ៏សំខាន់មួយទៀត ដែលសំដៅលើកកម្ពស់ការពង្រឹងសមត្ថភាពសហគមន៍តាមរយៈវិស័យកីឡា ដើម្បីធ្វើឱ្យប្រាកដថា កុមារនៅភូមិអូររូង អាចទទួលបានឱកាសចូលរួមក្នុងការហ្វឹកហាត់កីឡាបាល់ទាត់ អភិវឌ្ឍបំណិនជីវិត និងទទួលបានអត្ថប្រយោជន៍ពីការណែនាំតម្រង់ទិស ដែលនឹងជួយឱ្យពួកគេមានការរីកចម្រើនទាំងក្នុង និងក្រៅទីលានប្រកួត។
ស្ថាបនិកអង្គការ HFCA រូបនេះបានបញ្ជាក់ថា៖ «យើងខ្ញុំពិតជាមានកិត្តិយស ដែលបានចាប់ដៃសហការជាមួយធនាគារ វីង ក្នុងនាមជាស្ថាប័នមួយ ដែលមានការប្តេជ្ញាចិត្តយូរអង្វែង ដើម្បីជួយគាំទ្រដល់សហគមន៍កម្ពុជា។ ការឧបត្ថម្ភគាំទ្រនេះ នឹងនាំមកនូវការផ្លាស់ប្តូរក្នុងចំណោមយុវជននៅ ភូមិអូររូង ដោយផ្តល់ឱ្យពួកគេនូវឱកាសដ៏មានតម្លៃ ដើម្បីអភិវឌ្ឍសមត្ថភាពឱ្យកាន់តែរីកចម្រើន»។
ចំណែកលោក ហោ ប៊ុនថែ អគ្គនាយករងធនាគារ វីង បានលើកឡើងថា ការបន្តសហការជាមួយ HFCA នេះ បានឆ្លុះបញ្ចាំងពីការប្តេជ្ញាចិត្តឥតងាករេរបស់ធនាគារ វីង ចំពោះទំនួលខុសត្រូវសង្គម ហើយក៏ស្របតាមបេសកកម្មរបស់អង្គការ HFCA ដើម្បីបង្កើតឱ្យមានការផ្លាស់ប្តូរជាវិជ្ជមានតាមរយៈវិស័យកីឡាបាល់ទាត់។
លោកបញ្ជាក់ថា៖ «កិច្ចខិតខំប្រឹងប្រែងរួមគ្នានេះ នឹងផ្តល់នូវបរិយាកាស ដែលមានសុវត្ថិភាព និងបរិយាបន្ន ដោយក្នុងនោះទាំងក្មេងប្រុស និងក្មេងស្រីអាចសម្រេចនូវសក្តានុពលរបស់ខ្លួន ហើយថែមទាំងជួយឱ្យពួកគេ រួមចំណែកកសាងសាមគ្គីភាព នៅក្នុងសហគមន៍បានកាន់តែរឹងមាំថែមទៀត»។
សកម្មភាពហ្វឹកហាត់បានបាល់ទាត់របស់ក្មេងៗនៅភូមិអូររូង ក្នុងខេត្តសៀមរាប ដែលរៀបចំឡើងដោយអង្គការ HFCA និងដៃគូសហការ។ រូបថត HFCA
ការលើកឡើងបែបនេះ ដោយសារតែលោក ហោ ប៊ុនថែ មើលឃើញថា ការលេងបាល់ទាត់ជាមធ្យោបាយដ៏មានឥទ្ធិពលមួយក្នុងការលើកកម្ពស់សុខុមាលភាព សាមគ្គីភាព និងស្មារតីសហគមន៍ ហើយតាមរយៈការលេងបាល់ទាត់នេះ កុមារមិនត្រឹមតែពង្រឹងសមត្ថភាពផ្នែករាងកាយប៉ុណ្ណោះទេ ប៉ុន្តែថែមទាំងរៀនសូត្រពីបំណិនជីវិតចាំបាច់ទាក់ទងនឹងភាពជាអ្នកដឹកនាំ ចេះធ្វើការងារជាក្រុម និងការកសាងភាពធន់ផងដែរ។
លោកបញ្ជាក់ថា៖ «យើងពិតជាមានសេចក្តីរំភើបរីករាយ ដែលបានចូលរួមជាផ្នែកមួយនៃគំនិតផ្តួចផ្តើមនេះជាមួយ HFCA ដើម្បីជួយបណ្តុះនូវគុណតម្លៃទាំងនេះទៅដល់យុវជន ហើយយើងជឿជាក់ថា ការគាំទ្រសកម្មភាពកីឡានៅភូមិអូររូង នឹងផ្តល់នូវផលវិជ្ជមានយូរអង្វែង ចំពោះកុមារទាំងនេះ ដោយជួយឱ្យពួកគេអាចក្លាយជាអ្នកដឹកនាំ ដែលជំរុញការអភិវឌ្ឍនៅក្នុងសហគមន៍របស់ពួកគេឱ្យបានកាន់តែប្រសើរ»។
ដោយបានធ្វើការលើកស្ទួយវិស័យបាល់ទាត់នៅកម្ពុជា តាំងពីឆ្នាំ២០០៥មក អង្គការ HFCA មានចក្ខុវិស័យផ្តល់ឱកាសដល់យុវជនក្រីក្រកម្ពុជា ឱ្យមានលទ្ធភាពទទួលបានការហ្វឹកហាត់បាល់ទាត់ប្រកបដោយគុណភាពខ្ពស់ ជាមួយគ្រូបង្វឹក និងក្រុមការងារបច្ចេកទេស ដើម្បីកសាងក្រុម និងមានឱកាសក្នុងការប្រមូលផ្តុំគ្នាពង្រឹងសមត្ថភាព ក៏ដូចជាលើកកម្ពស់សុខុមាលភាព ការគោរពខ្លួនឯង និងបំណិនជីវិត ដោយទាំងអស់នេះ ជាកត្តាដ៏ចាំបាច់ ដើម្បីជួយឱ្យយុវជនក្រីក្រ អាចសម្រេចបាននូវភាពជោគជ័យនាពេលអនាគត។
កុមារីវ័យ១៣ឆ្នាំ គង់ ហាណា ជាសមាជិកក្រុមបាល់ទាត់នារី ដែលកំពុងទទួលបានការបណ្តុះបណ្តាលបាល់ទាត់នៅភូមិអូររូង ជាមួយក្រុមគ្រូបង្វឹករបស់ HFCA បាននិយាយថា៖ «ខ្ញុំពិតជាចង់លេងបាល់ទាត់ឱ្យក្រុមនារីកម្ពុជាខ្លាំងណាស់ ហើយខ្ញុំសូមថ្លែងអំណរគុណដល់ធនាគារ វីង ដែលបានជួយគាំទ្រដល់ក្តីសុបិនរបស់ខ្ញុំ»៕
